June

Yehova wakiswilili akaKristu akusambila muloña ahimpili chihandilu chawu kwesekeja nachadiña yuma. Kakavulu adiña nakuyikabisha, mpinji jikwawu ayikabishileña nihampinji yabulili kukuhwelelawu. Talenu chuma chayimwekeneni aBaranaba nakapostolu Pawulu hampinji yashimwinineñawu mwiluña damuLisitira. Hakusambila, ayitambwilili namuzañalu kudi ana adiña nakuyitiyilila. Ilaña chimwahitili mpinji, akakudikaña “ashinjilili mazaza awantu,” nawa amakwawu hakachi kanawa antu amwasili Pawulu malola nakukeña kumujaha. (Yilw. 14:19) Ilaña aBaranaba naPawulu atwalekelihu kushimwina kwiluña dacheñi. Yumanyi yafuminimu? Akwashili “antu antesha kwikala atumbanji,” nawa yuma yahosheleñawu niyelileñawu yakolesheli akwawu akakwitiya. (Yilw. 14:​21, 22) Amavulu ahetelelimu muloña aBaranaba naPawulu hiyalekeli kushimwina hela chakwila ayikabishileñaku. Yehova wakatukiswila, chakala hohu neyi tubula kuleka kuzata mudimu watwinkayi. w23.04 16-17 ¶13-14

Muchihandilu chindi chejima Mwanta Davidi wadiña nawayilumbu amavulu afwana akeñeleña kumujaha, nawa kakavulu walombeleña kudi Yehova nawu amukwashi. Davidi wakuhweleleli nindi Yehova watiyileña nikwakula kulomba kwindi. Ninenu dichimunateli kukuhwelela. Bayibolu yatukwashaña kukuhwelela netu Yehova nateli kutwinka maana niñovu yakutukwasha kuumika. Nateli kuzatisha amanakwetu niahela hela antu abulaña kudifukula kudi yena chayinu mpinji kulonda atukwashi muyuma yikwawu. Hela chakwila mpinji jikwawu Yehova hanateli kwakula kulomba kwetu munjila yitunakuhweleliku, tweluka netu wakaakula. Wakatwinka wukwashu wutunakukeña nawa hampinji yitunakuwukeña. Dichi twalekenuhu kulomba nakukuhwelela nenu Yehova wukuyakamenaña chayinu mpinji nawa nenu “[wakekutisha] yuma yejima yayumi nayuma yakeñañawu” mukaayi kakaha kanakwinza.—Mas. 145:16. w23.05 8 ¶4; 13 ¶17-18

Chachiwahi kutoñojoka hayuma yayiwahi yikufumamu neyi wushikija chikonkwanyi. Yumanyi yayiwahi yafumañamu yimwatela kutoñojokañahu? Neyi chikonkwanyi chenu chakufwila kutaña Bayibolu hela kulomba, toñojokenu hachichinateli kukolesha wubwambu wenu naYehova neyi muchishikija. (Mas. 145:​18, 19) Neyi chikonkwanyi chenu chakufwila kwikala nachilwilu chimu chawakaKristu, toñojokenu hachichinateli kukolesha wubwambu wenu nawakwenu. (Kol. 3:14) Komana kwila musoneka yuma yejima yinakuletesha mufwileña kushikija ochu chikonkwanyi chenu nehi? Mpinji yejima talenuña hanoyu yuma yimwasonekeli. Dikundenuña cheñi nawantu akuyikolesha kushikija chikonkwanyi chenu. (Yish. 13:20) Kuhosha hohu chalala, wejima wetu kudi mafuku amakwawu itwatiyaña wuudi. Komana chumichi chinatalishi mukwila nawu tukutwesha wanyi kuzatila hachikonkwanyi chetu? Inehi. Tukufwilaña kushikija chikonkwanyi chetu hela chakwila hitukweti muchima wakufwila kwilamuku. Hela chakwila chumichi chikwikala chaswayi wanyi, ilaña mukufuma yuma yayiwahi. w23.05 27-28 ¶5-8

Kwiluka netu kufuukula kwetu dikunaleteshi tumoni kukala, chumichi chikutuletesha kunyakala kushimuna nshidi jetu, kwiteja yiluwa yetu nikubula kuyikoña cheñi. Kwila mwenimu kukutukwasha kutwalekahu kutemuka lufuchi lwakuwumi. Neyi mwafuukula mwaluwa nawa mukutwesha wanyi kuhimpamu, itejenu chidi yuma hanoyu mpinji. Bayi mumanisha mpinji yenu niñovu nakudiyiñisha hela kudinka enu aweni nyiloña indi kwiji kwinka akwenu nyiloñaku. Ilaña, itejenu yiluwa yenu nawa zatenu hanakumini ñovu jenu kwesekeja nachidi yuma hanoyu mpinji. Neyi munakudinka nyiloña hachiluwa chimwakoñeli, dizozenu nakumulejamu Yehova mukulomba, itejenu chiluwa chenu nawa mulombenu ayanakeni. (Mas. 25:11; 51:​3, 4) Lombenu kwanakena kudi antu imwavulumwini, nawa neyi chinatwesheki, lombenu wukwashu kudi akulumpi. (Yak. 5:​14, 15) Dizilenu kuyiluwa yenu nawa tondolwelenu kuyikoña cheñi. Chimukwilaña mwenimu, ilukenu nenu Yehova wukuyitiyilaña luwi nawa wukuyikwashaña kwesekeja nakukala kumukweti.—Mas. 103:​8-13. w23.08 28-29 ¶8-9

Mwanta Yehowashi amukwashili kudi Yehoyada kwikala muntu wamuwahi. Chafuminimu, iwu mwanta wakansi wafwilileña kumutiyisha Yehova kuwaha. Ilaña chafwiliyi Yehoyada, Yehowashi watiyilili mwamulejeliwu kudi ayilolu akakusekesha. (2 Kushi. 24:​4, 17, 18) Hela chakwila chumichi chamuneñesheli nankashi Yehova “watwalekelihu kutemesha atuprofwetu mukachi kawu kulonda ayifuntishi . . . , ilaña wena akaanini kutiyilila.” Akaanini nikumutiyilila Zekariya mwana kaYehoyada nawa musonya Yehowashi owu wadiña kaprofwetu kaYehova nawa kapristu. Kafwampi, Mwanta Yehowashi wamujahili Zekariya. (2 Kushi. 22:11; 24:​19-22) Yehowashi hatwalekelihu kumutiya Yehova woma munjila yayiwahiku. Yehova wahosheli nindi: “Andiwulaña, akayisawula.” (1 Sam. 2:30) Nkumininaku, izanvu danyanya damashidika awaSiriya dashindili “njita yeneni chikupu” nawa ‘amukatishili nankashi.’ (2 Kushi. 24:​24, 25) Yehowashi amujahili kudi ambuñindi muloña wakwila wamujahili Zekariya. w23.06 18-19 ¶16-17

Kapostolu Pawulu washakamini muEfwesesa hadi mpinji yayilehi nakushimwina nikutañisha nsañu yayiwahi. (Yilw. 19:​1, 8-10; 20:​20, 21) Wayikeñeli amanakwindi chikupu nawa wakeñeleña kuyikwasha kulonda atwalekihu kwikala ashinshika kudi Yehova. AEfwesesa asonekeleliyi Pawulu mukanda adiña mpinji yimu muwuduñu wakudifukula kwakutwamba nikukuhwelela munsañu jakupanda. Mumusumba waEfwesesa mwenzeli yilwilu yawuzondu niyawukapwa nsonyi. Nhosheli yawuzondu avulileña kuyizatisha mumatala amaneni amumusumba mwakuhemena yisela nihayawija yakudifukula kwakutwamba. (Efwe. 5:3) Enimbu amavulu amuniwu musumba alekeli “kutiya nsonyi,” muchiGiriki iwu mukuku wamazu watalisha mukwila nawu “kuleka kutiya kukata.” (Efwe. 4:​17-19) Henohu kanda eluki nshimbi jaYehova jahosha hayuma yaloña niyatama, yinleji yawaEfwesesa hiyayisompesheleña neyi akoña chuma chatamaku. Hadaha dihafumini Pawulu ayiteneña nindi adi “mumwidima muyitoñojoka nawa anadaambuli kuwumi waNzambi.” AEfwesesa amakwawu hiyatwalekelihu kwikala mumwidimaku. w24.03 20 ¶2, 4; 21 ¶5-6

Gidiyoni wateleleli kuzata nañovu mumudimu windi wawunsompeshi. AMidiyani chatemukiliwu kunjita hakachi kawufuku, Gidiyoni wayikumpishili kufuma kuChinekineki chaYazeri nakushika kuKaloña Yodana. (Anso. 7:22) Komana Gidiyoni wakuminini kuYodani? Inehi! Hela chakwila azeyeli, yena niamayala 300 adiñayi nawu azambukili kaloña nakutwalekahu kuyikumpisha. Nkumininaku, ayiwanini aMidiyani nawa ayishindili. (Anso. 8:​4-12) Gidiyoni wakuhweleleli nindi Yehova wukumukolesha, nawa wamukolesheli. (Anso. 6:​14, 34) Mpinji yimu, Gidiyoni niamayala adiñayi nawu adiña nakuyikumpisha anyanta ayedi awaMidiyani hamaseki iku awa anyanta adi hajingameli. (Anso. 8:​12, 21) Hela chochu, nawukwashu waNzambi, aIsarela ashindili. Munjila yoyimu, akulumpi niwena atela kumushindamena Yehova, owu wabulaña ‘kuzeya hela kumana ñovu.’ Wakayinka ñovu yakuumika neyi adi mukukala.—Isa. 40:​28, 29. w23.06 6 ¶14, 16

Tunateli kwikala namuchima wakola chikupu hela chakwila tunakumona kukala kwamuchidinyi. Dichi mukuhwelelenuña Yehova. Talenu Baraki chashindiliyi muloña wakukuhwelela nshimbi jaYehova. Hela chakwila mwituña dejima himwadiñahu nkebu hela iyoñaku, Yehova wamulejeli kuya nakuzuña njita namukulumpi wamashidika awaKenani, Sisera hamu nimashidika indi, owu adiña nayitwa yanjita yayivulu. (Anso. 5:8) Kaprofwetu wamumbanda Debora wamulejeli Baraki kukunkumuka nakuya muchana chesekana kulonda adibulakani naSisera nimakalu indi 900. Hela chakwila makalu adi kuyikwasha ayilumbu jawu kuzuña chiwahi njita heseki desekana, Baraki wovwahilili. Amashidika chakunkumukileñawu haMpidi yaTabori, Yehova wanokesheli nvula yeneni. Makalu aSisera atapamini mumalowa nawa Yehova wamukwashili Baraki kushinda. (Anso. 4:​1-7, 10, 13-16) Munjila yoyimu, ninetu Yehova wukutukwasha kwimika mushindu neyi tumukuhwelela yena ninshimbi jatwinkañayi kuhitila mukuloñesha kwindi. w23.07 19 ¶17-18

Hakwila twakapuluki twatela kwikala adiwunjika. Neyi chelileñawu ambuña aNzambi ashinshika kunyima, twatela kuchiñilila nakudiwunjika kulonda Nzambi ashikiji yikaninu yindi. (Heb. 6:​11, 12) Bayibolu yatwesekejaña nandimi. (Yak. 5:​7, 8.) Ndimi wazataña nañovu kutumba nikutukumwina mbutu yindi, ilaña helukaña mpinji yiyakakulaku. Dichi ndimi wachiñililaña nakudiwunjika, nakukuhwelela nindi wakaañula. Munjila yoyimu, ninetu twatwalekañahu kuzata nañovu munyidimu yakuspiritu, hela chakwila ‘hituneluki ifuku dakenzayi Mwanta wetuku.’ (Mat. 24:42) Twachiñililaña nakudiwunjika, nakukuhwelela netu hampinji yindi yatoñolayi, Yehova wakashikija yuma yejima yakanayi. Neyi tuleka kudiwunjika, tunateli kuzeya nakuleka kuchiñilila nawa tukutachika kufuma kudi Yehova chovu-chovu. Tunateli cheñi kutachika kufwila yuma yakudizañalesha hohu etu aweni chayinu mpinji. Ilaña neyi tudiwunjika, tukuumikaña kushika nikunsa nawa akatwamwina.—Mika 7:7. w23.08 22 ¶7

Neyi twesekeja wuprofwetu wudi haDanyeli 2:​41-43 nawuprofwetu wukwawu wekala mumukanda waDanyeli niChimwekeshu, tukukunkulula netu nyendu yemenañaku Anglo-America, nfulumendi yañovu mukaayi makonu. Kutalisha haniyi nfulumendi yañovu mukaayi, Danyeli wahosheli nindi iwu “[wanta wakekala] aha wakola aha nehi.” Wawovu munjilanyi? Muloña antu abula kulema, emenañaku ndambu, adiwulaña wuswa waniwu wanta wakwikala wakola neyi chikuñu. Kuchalumbulwiliyi Danyeli chilota chankishi, twadizilañaku chalala chalema. Chatachi, Anglo-America Wanta waÑovu muKaayi wunamwekeshi ñovu yawu munjila jikwawu. Chakutalilahu, wazatili nañovu kushinda Njita yaKaayi Yatachi niYamuchiyedi. Hela chochu, iwu wanta wañovu mukaayi anawuzeyeshi nawa akutwalekahu kuwuzeyesha muloña wakudizuñañesha kwawantu ekalamu. Chamuchiyedi, iwu wanta wañovu diwakekala wakukumishaku kuyuula henohu Wanta waNzambi kanda wujiyishi mawanta ejima awantu. w23.08 10-11 ¶12-13

Mpinji jikwawu, Davidi wazeyeleña muloña wakukala nikweseka kwakuvulu kwamweneñayi. (Mas. 18:​4, 5) Ilaña, Yehova wamuwundishili muloña wakumumwekeshela kukeña chikupu nikumwakamena. Yehova wamulombweleña ibwambu dindi wazeyeli “kumunyenvu [nikumaluña] akunookela akutukumwina chiwahi.” Chafuminimu, Davidi wekalili cheñi nañovu nawa watwalekelihu kumukalakela namuzañalu. (Mas. 18:​28-32; 23:2) Nimakonu, “muloña wakukeña kwaYehova kwakashinshi, dichinaleteshi tubuli kunoña” hampinji yitunakumona kukala niyuma yitunakulwisha nayu muchihandilu. (Mukeña 3:22; Kol. 1:11) Wumi waDavidi kakavulu wadiña muwubanji, nawa wadiña nawayilumbu amavulu añovu. Hela chochu, muloña wakumukeña kudi Yehova, watiyileña nindi wakiñewa. Davidi watiyileña nindi Yehova wamukwashileña mukukala kwejima, nawa chumichi chamukolesheleña. Dihafumini embi nindi: “[Yehova] wampulwishili kuyuma yejima yantiyishileña woma.” (Mas. 34:4) Hela chakwila mpinji jikwawu Davidi watiyileña woma nankashi, ilaña watwesheleña kwimika mushindu woma muloña welukili nindi Yehova wamukeñeli. w24.01 30 ¶15-17

Dizilenu kuyuma yatama yafuukwiliyi Yehowashi. Kapristu Muneni Yehoyada chafwiliyi, Yehowashi watondeli amabwambu atama. (2 Kushi. 24:​17, 18) Wafuukwilihu kutiyilila mwamulejeliwu ayilolu amuYuda abulili kumukeña Yehova. Chakadi nikujina, mukwiteja nenu Yehowashi wateleleli kuyitondolwela ana antu aleteleña kukala. Hela chochu, watiyilili mwamulejeliwu kudi awa amabwambu atama. Kafwampi, musonyindi Zekariya chesekeliyi kumukwasha, Yehowashi wamujahili. (2 Kushi. 24:​20, 21; Mat. 23:35) Welili chuma chatama nawa chawusupi! Yehowashi watachikili hohu chiwahi, ilaña chawushona wenjili nakwikala mukakusekesha nawa mukakujahañana. Nkumininaku, ambuñindi amujahili. (2 Kushi. 24:​22-25) Chihandilu chindi chadi kwikala chachiwahi neyi watwalekelihu kumutiyilila Yehova niantu amukeñeli! w23.09 9 ¶6

Yesu welukili nindi Petulu watiyileña woma, hadaha muloña wakwila wadimweneña nindi washikilamu wanyi. Welukili cheñi nindi Petulu nateli kutwalekahu kwikala washinshika. Dichi wamulejeli Petulu munjila yayiwahi nindi “[aleki] kutiya woma.” Yesu chamwekesheliyi nindi wamukuhweleleli Petulu, chumichi chamukwashili Petulu kuhimpa chihandilu chindi. Mukuhita kwampinji, aPetulu namanakwindi Anderi ashiyili mudimu wawu wakujaha inshi nakutachika kuzatila hamu naMesiya mpinji yejima, nawa chumichi chaletesheli atambwili nkisu jajivulu. (Maku 1:​16-18) Petulu wamweni yuma yayivulu yayiwahi hamu neyi mukakumulondela Kristu. Wamweni Yesu chokileñayi akata, kufumisha andemoni nikusañula afu. (Mat. 8:​14-17; Maku 5:​37, 41, 42) Petulu cheñi wamweni chimwenu chaYesu chakekalayi Mwanta waWanta waNzambi, nawa Petulu havulameneni chumichiku. (Maku 9:​1-8; 2 Pet. 1:​16-18) Mwamweni, Petulu wamweni yuma yabulili kukuhwelelayi. Watela wazañaleli chikupu hakwimika mushindu yina yitoñojoka yaheña hakwila atambwili nkisu jejimiji! w23.09 21 ¶4-5

Mumukanda windi watachi, kapostolu Petulu wazatishili mazu akwila nawu “dikeñenu chikupu.” Iku kukeña hikwabutaña hohu hanshidi janteshaku, ilaña ‘nihanshidi jajivulu.’ (1 Pet. 4:8) Hadaha Petulu wanukili chuma chamudizishiliwu kudi Yesu kutalisha hakwanakena hadi yaaka yayivulu yahitilihu. Hayina mpinji, Petulu watela wakuhweleleli nindi wadiña namuchima waluwi hahosheliyi nindi watela kumwanakena manakwindi “mapampa 7.” Ilaña Yesu wamudizishili yena ninetu nindi, twatela kwanakena “kushika kumapampa 77,” dikwila nawu twatela kwanakenaña hohu-u. (Mat. 18:21) Neyi chayikalilaña kuzatisha iku kufumba, bayi muneñaku! Ambuña aYehova ejima abula kuwanina, mpinji jikwawu chayikalilaña kwanakena. Chuma chalema chimwatela kwila chayinu mpinji hikuzata nañovu kumwanakena manakwenu nikuleta kuwunda nayena. w23.09 29 ¶12

Hadiñayi mwivumu danshi, Yona wakuhweleleli chikupu nindi Yehova wukutiya kulomba kwindi kwakudizoza nawa kwakubalumuka mumuchima nawa nindi Yehova wukumukwasha. Mukuhita kwampinji, Yona amusanzilili kumasaña, nawa haniyi mpinji wetejeli kuya nakuzata mudimu wukwawu wamwinkeliwu. (Yona 2:10–3:4) Hampinji yimudi mukukala, komana mwakamaña nankashi chakwila chayikalilaña nikulomba chiwahi? Indi kwiji mwatiyaña kuzeya nankashi chakwila mwakañanyaña nikudiza nkawenu? Anukenu nenu Yehova weluka chiwahi kukala kumunakuhitamu. Dichi hela mulomba hohu kulomba kwakwihi, ilukenu nenu wukuyinka yuma yejima yimunakukeña. (Efwe. 3:20) Neyi chayikalilaña kutaña nikudiza nkawenu muloña wayikatu, kuzeya hela kusweja kwakama, munateli kutiyilila kumazu amuBayibolu akukwata dehi hela amunyikanda yetu yashindamena haBayibolu. Munateli cheñi kutiyilila kukamina ketu kaWanta hela kutala vidiyo ha jw.org. Neyi mulombaña kudi Yehova nikukeñakeña ñakwilu muyuma yakuspiritu yatwinkañayi, dikwila nawu munakumwiteja Yehova nenu ayinki ñovu. w23.10 13 ¶6; 14 ¶9

Tabanaka nijitembeli jatuñiliwu muYerusalema mukuhita kwampinji, ajituñili chochimu mukachi. Mukachi mwadiña tupeka tuyedi, “Mwiluña Dajila” “[ni]Mwajila Chikupu,” nawa itu tupeka atwaambwili nehina dakujika nachu dakuchima chiwahi. (Heb. 9:​2-5; Kwid. 26:​31-33) Mwajila mwadiña chakutentekahu inoñu chawuru, kameña kakwochelahu insensi nimesa hakutenteka mankendi kumesu aNzambi. “Atupristu awayishiliwu” hohu diwu etejeliwu kwiñila Mwajila nakuzatilamu nyidimu yawu yajila. (Kuch. 3:​3, 7, 10) Mwajila Chikupu mwadiña chimbañu chawuru chachitiyañenu chemeneneñaku kwikalahu kwaYehova. (Kwid. 25:​21, 22) Kapristu muneni hohu diyi etejeliwu kupandakana ihina dakujika nachu nakwiñila Mwajila Chikupu kamu hachaaka Hefuku daKubuta haNshidi. (Lev. 16:​2, 17) Weñilileña mukachi namashi awayimuna nakubuta hanshidi jindi yomweni nijamuza wejima. Nkumininaku, Yehova wamwekesheli hatooka mwatalishili iyi yuma yadiña mutabanaka.—Heb. 9:​6, 7. w23.10 27 ¶12

Mwizu daNzambi kakavulu twawanañamu lushimbi lwakwila nawu “[mudikeñeña] wumu namukwawu.” (Yow. 15:12; Rom. 13:8; 1 Tes. 4:9; 1 Pet. 1:22; 1 Yow. 4:11) Hela chochu, kukeña hichilwilu chamumuchima, hela wuntu wamukachi, nawa kwosi muntu wunateli kumona mumuchima wetuku. Hanu dinu, tunateli kumwekesha ñahi hatooka netu twadikeña wumu namukwawu? Tunateli kwila mwenimu kuhitila mumazu etu niyuma yitwelaña. Kudi njila jajivulu mutunateli kuyimwekeshela amanakwetu niahela netu twayikeña. Njila jimu dijeniji: “Hoshenuña mwalala muntu namukwawu.” (Zek. 8:16) “Shakamenuña mukuwunda wumu namukwawu.” (Maku 9:50) Tachikilenuñahu “[Kumwekesha] kalemesha kudi wumu namukwawu.” (Rom. 12:10) “Ditambwilenuña wumu namukwawu.” (Rom. 15:7) “[Danakenenuña] wumu namukwawu.” (Kol. 3:13) “Disendelenuñaku yiteli wumu namukwawu.” (Ñal. 6:2) “Twalekenuhu kudikundeja wumu namukwawu.” (1 Tes. 4:18) “Dituñenuña wumu namukwawu.” (1 Tes. 5:11) “[Dilombelenuñaku] wumu namukwawu.”—Yak. 5:16. w23.11 9 ¶7-8

Ifuku niifuku, twafuukulaña yuma yakeñekaña etu kwikala nachikuhwelelu chakola. Chakutalilahu, twafuukulaña hadi antu itwatela kudikunda nawu, yisela yitwatela kutonda, shikola yitwatela kuya, muntu itwatela kudisumbula nindi, kwikala nawanyana hela nehi, nimudimu itwatela kwiñila. Tukwila chiwahi neyi tudihula netu, ‘Komana yuma yinafuukulaña kwila yamwekeshaña nawu neluki chikupu nami kanu kaayi kakapinji kantesha nawa keña akisinsi kudi kaayi kaNzambi kakaha? Tahindi nafuukulaña yuma yelañawu antu abula kukuhwelela nawu anateli kushakama haya nyaaka?’ (Mat. 6:​19, 20; Luka 12:​16-21) Tukufuukulaña mwamuwahi neyi tukuhwelela chikupu netu kaayi kakaha kadi mukamwihi. Twahitaña cheñi mukukala kwakeñekaña etu kwikala nachikuhwelelu chakola. Tunateli kumona ikabisha, kuyekela nayikatu, hela kukala kukwawu kunateli kutuzeyesha. Hakusambila, tunateli kumona neyi tukutwesha kuumika kukala kutukweti. Ilaña neyi kukala kutwalekahu, neyi chavula kumwekana nakukala kwakuvulu, tukukeñekaña kwikala nachikuhwelelu chakola hakwila tuumiki nikutwalekahu kumukalakela Yehova namuzañalu.—1 Pet. 1:​6, 7. w23.04 27 ¶4-5

Yehova wakeñaña nindi twileña yuma kwesekeja nachitunalombi. Chakutalilahu, manakwetu nateli kulomba kudi Yehova nindi amukwashi amwiteji kumudimu kwazatañayi kulonda akayi kukupompa kweluña. Yehova nateli kwakula ñahi iku kulomba? Yehova nateli kumukwasha iwu manakwetu kwikala wahamuka kulonda atweshi kuhanjeka namukulumpi windi wamudimu. Hela chochu, manakwetu watela kuya kudi mukulumpi wamudimu nakumulomba. Hadaha nateli kumulomba kapampa kakavulu. Indi kwiji nateli kudihimpa namukwawu mwazatilañawu mafuku akuzata hela kulombaku mafuku nakumuleja mukulumpi windi wamudimu nindi akamuketulimu mali. Yehova wakeñaña nindi tulombeña nakufuntisha-funtishahu hayuma yinakutwakamisha. Yesu watalishili mukwila nindi yuma yikwawu yitwalombaña hiyanateli kuyakula hohenohuku. (Luka 11:9) Dichi bayi muzeyaku! Lombenuña mpinji yejima nakufuntisha-funtishahu. (Luka 18:​1-7) Neyi twila mwenimu, twamwekeshaña kudi Yehova netu chuma chitunakukeña chalema. Twamwekeshaña cheñi netu twakuhwelela chikupu muñovu yikwetiyi yakutukwasha. w23.11 22 ¶10-11

Yehova wamukanini ibwambu dindi Abarahama nindi nyuza yejima hamaseki akayikiswila kuhitila mudi mwanindi. (Kutach. 15:5; 22:18) Chineli Abarahama wamukuhweleleli Nzambi chikupu, welukili nindi chikaninu chaNzambi chakashikijewa. Hela chochu, Abarahama chashikijiliyi yaaka 100 nawa ñodindi yaaka 90, awa adisumbula ashinshika hiyadiña namwanaku. (Kutach. 21:​1-7) Ilaña, Bayibolu yahosha nawu: “[Muloña wakuchiñeja, Abarahama] wakuhweleleli nindi wakekala tata yanyuza yayivulu kwesekeja nachashimwiniwu.” (Rom. 4:18) Mweluka nenu chuma chachiñejeleñayi Abarahama chashikijeweli. Wavweli mwana weyala achiñejeliyi hadi mpinji yayilehi, Isaka. Chumanyi chamukwashili Abarahama kukuhwelela nindi chumichi chakashikijewa? Muloña wakwikala nawubwambu wakola naYehova, Abarahama “welukili chikupu nindi Nzambi wakashikija munakaniyi.” (Rom. 4:21) Yehova wamutiyileña Abarahama kuwaha nawa wamuteneni nindi waloña muloña wachikuhwelelu chindi.—Yak. 2:23. w23.12 8 ¶1-2

Kansi weyala washindamenewa wazataña chiwahi nyidimu yejima yinamwinkiwu. Talenu chimwatela kumwimbujola Yesu. Hadiwileña hela kukaana kuzata nyidimu yamwinkeleñawuku. Ilaña, wazatileña nyidimu yejima yamwinkeleñawu kudi Yehova, hela chakwila owu mudimu wunakali chamuchidinyi. Wakeñeli antu, sweje-e atumbanji twindi nawa wahanini wumi windi kulonda ayifwili. (Yow. 13:1) Kufwana Yesu, zatenuña chakufuma hamuchima mudimu wejima wunayinkiwu. Neyi muneluki wanyi chakuwuzata, dizozenu nakulomba wukwashu kudi amanakwetu apama. Bayi mukeñaña hohu kuzata tunyidimu twapelaku. (Rom. 12:11) Ilaña zatenu mudimu wunayinkiwu, muzatilenu “Yehova bayi antuku.” (Kol. 3:23) Hela chochu, mwawanina wanyi, dichi dizozenu nakwiteja yiluwa yejima yimunakoñi.—Yish. 11:2. w23.12 26 ¶8

Twazañalalaña neyi tupapatishewa nakwikala muchisaka chaYehova. Apapatishewa dehi akuditeja nañimbi yaMasamu, Davidi, wahosheli nindi: “Wudi namuzañalu yowu muntu iwunatondi [eyi Yehova] nikumuleta kulonda ashakami mumalubanza eyi.” (Mas. 65:4) Yehova haletaña muntu wudi wejima mumalubanza indiku. Watondaña antu amwekeshaña hatooka nawu anakukeña kwikala nawubwambu wakola nayena. (Yak. 4:8) Neyi mudihana enu aweni kudi Yehova nikupapatishewa, ilukenu nenu neyi munapapatishewi dehi “[wakayihuñunwina] nkisu yakwila himwakabulahu chuma hela chimuku.” (Mal. 3:10; Yere. 17:8) Chipapatishu hintachikilu hohu. Mukukeñekaña kuzata nañovu kuhemba chikaninu chenu chakudihana, nihampinji yimunakumona kweseka hela kukala kunakweseka chikuhwelelu chenu. (Mukwa. 5:​4, 5) Hakwikala kambanji kaYesu, mukulondelaña chikupu yuma yelileñayi Yesu ninshimbi jindi.—Mat. 28:​19, 20; 1 Pet. 2:21. w24.03 8 ¶1-3

Indi neyi enu nimwinikwenu mwatiyaña wuudi wakwilila hamu yuma? Chumanyi chimwatela kwila? Toñojokenu hakesi. Hikatachikaña kubidima hohenohuku. Kakeñekaña kutwalekahu kusonselaku chovu-chovu nansonsu jamaneni. Munjila yoyimu, kwila mutachika kwilila hamu yuma kuhitila mukwikala nakapinji kantesha ifuku niifuku nehi? Ililenuña hamu yuma yimwakeña wejima wenu. (Yak. 3:18) Neyi mutachika kwilila hamu itu tuyuma twanyanya, mukutachika cheñi kusweja kudikeña namwinikwenu. Kalemesha kalema muwulu. Kadi neyi mpepela yaleteshaña kesi kubidima nankashi. Chakadi iyi mpepela, kesi kajimaña swayi. Munjila yoyimu, neyi adisumbula kudilemeshaña nehi, kukeña kwawu kunateli kushikena dakukeha. Ilaña neyi eyala namumbanda azataña nañovu kulonda adilemesheña, dikwila nawu anakufwila kukeña kwawu kutwalekihu. Anukenuña nenu chuma chalema hikutoñojoka neyi chakwila mwinikwenu wamonaña nindi mwamulemesha, bayi chimwatoñojokaña enu aweni nenu mwamulemeshaku. w23.05 22 ¶9; 24 ¶14-15

MuBayibolu, ambuña aNzambi ashinshika ashimuna mpinji yamweneñawu kukala nikuzaala muloña wawayilumbu jawu, indi kwiji ikañesha dikwawu. (Mas. 18:4; 55:​1, 5) Munjila yoyimu, hadaha anakutukabisha kushikola, kumudimu, muchisaka, hela kudi nfulumendi. Indi kwiji tunakutiya woma netu keña tufwi muloña wachikatu chitukweti. Neyi tunakumona kukala kwamuchidiwu, tunateli kutiya neyi mwana wanyanya wunakumona neyi kwosi akumukwasha. Yehova watukwashaña ñahi hampinji yitunakumona kukala kwamuchidiwu? Watukundejaña nikutuwundisha. Dichi dikundenuña naYehova mpinji yejima kuhitila mukulomba kudi yena nikutaña Izu dindi. (Mas. 77:​1, 12-14) Kuhiñahu neyi munakuhita mukukala, hadaha chuma chatachi chimukutoñojokaña kwila, hikumulejamu Tata yenu wamwiwulu kulonda ayikwashi. Mulejenu Yehova yuma yinakuyitiyisha woma nikuyakamisha. Mwitejenu ahoshi nanenu nikuyikundeja kuhitila muNsona.—Mas. 119:28. w24.01 24-25 ¶14-16

Hakwila mushikiji yikonkwanyi yakuspiritu mwatela kwikala namuchima wakufwila kwilamu. Neyi mudi namuchima wakufwila kushikija chikonkwanyi chenu mukuzataña nañovu kulonda muchishikiji. Nawa neyi tukweti chikupu muchima wakufwila kwilamu, chikutupelela kushikija yikonkwanyi yetu. Hanu dinu, yumanyi yimwatela kwila hakwila mwikaleña chikupu namuchima wakufwila kwilamu? Lombenu muchima wakufwila kwilamu chikupu. Yehova nateli kuzatisha spiritu yindi kulonda ayinki muchima wakufwila kushikija chikonkwanyi chenu. Mpinji jikwawu twemikaña chikonkwanyi muloña tweluka netu dichuma chitwatela kwila, nawa ichi hichuma chachiwahi. Ilaña hitunateli kwikala namuchima wakufwila kushikija ichi chikonkwanyiku. Toñojokenuña chikupu hayuma yayililayi Yehova. (Mas. 143:5) Kapostolu Pawulu watoñojokeli chikupu haluwi lwaYehova lwasweja lwamumwekesheleliyi, nawa chumichi chamusañumwini kumukalakela Yehova nañovu jindi jejima. (1 Kor. 15:​9, 10; 1 Tim. 1:​12-14) Ninenu neyi mutoñojokaña chikupu hayuma yayililayi Yehova, mukusweja kwikala namuchima wakufwila kushikija chikonkwanyi chenu.—Mas. 116:12. w23.05 27 ¶3-5

Twamutiyishaña Tata yetu wamwiwulu kuwaha neyi tushimekaña ijina dindi. (Mas. 119:108) Komana ichi chinatalishi mukwila nawu Nzambi wañovu jejima wudi neyi antu abula kuwanina akeñaña nawu antu ayihamekeña muloña akeñaña kuyikundeja nikuyikolesha? Inehi. Neyi tumushimekaña Tata yetu wamwiwulu, tukumwekesha netu nsañu yahosheliyi Satana hadi etu hamuntu-hamuntu niyena yakutwamba. Satana wahoshaña nindi kwosi muntu wunateli kutwalekahu kuhakwilaku ijina daNzambi. Watoñojokaña nindi hikudi muntu wunateli kutwalekahu kwikala washinshikaku. Wahoshaña nindi wejima wetu tukudikaña naNzambi neyi tutoñojokaña netu mukufuma yuma yayiwahi. (Yoba 1:​9-11; 2:4) Ilaña muntu washinshika Yoba wamwekesheli hatooka nindi Satana hisakutwamba. Indochi enu? Wejima wetu hamuntu-hamuntu tukweti kukooleka kwakuhakwilaku ijina daTata yetu nikumutiyisha kuwaha kuhitila mukumukalakela nakashinshi. (Yish. 27:11) Tukweti kukooleka chikupu kwakwila mwenimu. w24.02 8-9 ¶3-5

Hanyima yamafuku aMosi naYoshuwa, Yehova watondeli ansompeshi kulonda alomboleña antu jindi. Kuhiñahu, mumpinji yawanyanta, Yehova watondeli atuprofwetu kulonda alomboleña antu jindi. Anyanta ashinshika ovwahilileña kufumba kwawatuprofwetu. Chakutalilahu, Mwanta Davidi wovwahili nakudizoza chamufumbiliwu kudi kaprofwetu Natani. (2 Sam. 12:​7, 13; 1 Kushi. 17:​3, 4) Mwanta Yehoshafwati washindameneni hawunlomboli wakaprofwetu Yahaziyeli nawa walejeli antu amuYuda nindi ‘akuhweleli atuprofwetu aNzambi.’ (2 Kushi. 20:​14, 15) Hampinji yamweniyi kukala, Mwanta Hezekiya walombeli wukwashu kudi kaprofwetu Isaya. (Isa. 37:​1-6) Mpinji yejima yovwahilileñawu anyanta wunlomboli waYehova, adiña nakuyikiswila nawa muza awukiñileña. (2 Kushi. 20:​29, 30; 32:22) Chakadi nikujina, Yehova wazatishileña atuprofwetu twindi hakulombola antu jindi. w24.02 21 ¶8

Satana wakeñaña nindi tudikundeña nawantu akutukañesha kwovwahila nshimbi jaYehova. Muloña makonu tunateli kudikunda nawantu mesu-namesu nikuhitila mukuzatisha njila yakuhanjekelamu haintaneti. Twatela kutondolwela yitoñojoka yamukaayi yakwila nawu yilwilu yawuzondu yidi hohu chiwahi. Iyi yitoñojoka yakutwamba. (Efwe. 4:​19, 20) Tukwila chiwahi neyi tudihula etu aweni netu: ‘Komana nazataña nañovu kutondolwela kudikunda kwejima kwabula kutelela nawakwetu mutwazatilaña, mutwatañilaña, hela nawantu amakwawu abulaña kulemesha nshimbi jaYehova jaloña? Nahamukaña nakuhakwilaku nshimbi jaYehova hela chakwila antu amakwawu anlejaña nawu hinalemesha yuma yakuhwelelawuku?’ Neyi chinamwekeshiwu ha 2 Timotewu 2:​20-22, twatela cheñi kwikala asoñama hampinji yitunakutonda antu akudikunda nawu mukachi kachipompelu chawakaKristu. Twanukeña netu antu amakwawu kwila atukwasha kutwalekahu kwikala ashinshika hampinji yitunakumukalakela Yehova nehi. w24.03 22-23 ¶11-12

Mwesekahu dehi kufwikija chekalayi Yehova? Hela chakwila Yehova twamumonaña wanyi, Bayibolu yamulumbulula munjila jashiyashana. Yehova amutenaña nawu “hiitena nawa hinkebu,”cheñi nawu “hikesi kajilumunaña.” (Mas. 84:11; Heb. 12:29) Amulumbulula nawu wamwekanaña neyi ilola dasafira, chikuñu chakekema, nawa neyi kansuluñunda katoñeka. (Ezek. 1:​26-28) Chineli twamumonaña Yehova wanyi, mpinji jikwawu chinateli kutukalila kukuhwelela netu watukeña. Antu amakwawu atoñojokaña nawu Yehova kwila ayikeña nehi muloña wayuma yatama yayimwekeneni kunyima. Yehova weluka chitwatiyaña nawa weluka chatukañeshaña yumiyi kuswina kwakwihi nayena. Hakwila atukwashi, washimuna yilwilu yindi yayiwahi Mwizu dindi. Izu dimu hohu dalumbulula chiwahi chekalayi Yehova hikukeña. (1 Yow. 4:8) Kukeña dikwamulumbulula chiwahi chekalayi. Yuma yejima yelañayi yashindamena hakukeña. Kukeña kukwetiyi Nzambi kwabadika nawa kukweti ñovu chikupu chakwila wakumwekeshaña nikudi antu abula kumukeña.—Mat. 5:​44, 45. w24.01 26 ¶1-3

Yehova watondeli Mosi kulonda alomboli aIsarela kufuma muEjipitu, nawa neyi chinamwekeshi wunsahu, Nzambi wayilombweleña nachishimi cheevu namwaana nawa nawufuku nachishimi chakesi. (Kwid. 13:21) Mosi wadiña nakulondela chishimi, nawa chamushikijili yena niaIsarela kuKaluñalwiji Kachinana. Antu atiyili woma nankashi chatachikiliwu kutoñojoka nawu kwosi kwatela kuyawu muloña kukabadi kamu kwadiña kaluñalwiji, kukabadi kakwawu amashidika awaEjipitu ayikumpishileña. Ilaña waluwañesheli wanyi. Kudi chuma chaletesheli Yehova amuzatishi Mosi kutwala antu Jindi kunidi iluña. (Kwid. 14:2) Kuhiñahu, Nzambi wayipulwishili munjila yakuhayamisha chikupu. (Kwid. 14:​26-28) Hadi yaaka 40 yalondelelihu, Mosi watwalekelihu kushindamena hachishimi cheevu hakulombola antu jaNzambi muchinkalampata. (Kwid. 33:​7, 9, 10) Yehova wahosheleña naMosi kuzatisha chishimi, kuhiñahu Mosi walejeleña antu nshimbi jinamulejiwu kudi Nzambi. AIsarela adiña nawunsahu wawuvulu wamwekesheleña nawu Yehova wazatishileña Mosi hakuyilombola. w24.02 21 ¶4-5