May

Nzala yakapwelendendi yenjili “heseki dejima hashakama antu,” yashikeneni niakaKristu akusambila. Chakadi nikujina, nyitu yayisaka yakameneni chiyatela kukeñela yisaka yawu yakuda. Indi atwansi akeñeleña nankashi kuzataku mudimu wakushimwina? Komana atoñojokeli nawu atela kuhembelelaku chantesha? Hela chakwila adiña nakukala kwamuchidiwu, akaKristu akusambila ahimpili chihandilu chawu. Atwalekelihu kushimwina kuzatisha njila yejima yatwesheleñawu nawa adiña namuzañalu wakwinkahu akwawu akakwitiya amuYudeya yuma yadiñawu nayu. (Yilw. 11:​29, 30) Ana atambwilili yuma yakudikwashamu nachu amweni Yehova chayikwashileñayi. (Mat. 6:​31-33) Atela adikundili chikupu nawakwawu akakwitiya ayikwashili. Nawa ana ahaniniku yawaana hela ana azatiliku mudimu wakuhana iyi yuma, atiyili muzañalu wafumaña mukuhana.—Yilw. 20:35. w23.04 16 ¶12-13

Mpinji jikwawu, Yehova waakulaña kulomba kwawantu jindi kuzatisha antu abulaña kudifukula kudi yena kulonda ayikwashi. Chakutalilahu, wazatishili Mwanta Atazakisheshi kumwiteja Nehemiya kufunta kuYerusalema kulonda ayi nakukwasha kutuñulula musumba. (Nehe. 2:​3-6) Nimakonu, Yehova nateli kuzatisha antu abulaña kudifukula kudi yena kulonda enzi nakutukwasha neyi tudi mukukala. Kulomba kwetu hiyavula kukwakula munjila yakuhayamishaku. Ilaña ñakwilu yitwatambwilaña yatukwashaña kutwalekahu kwikala ashinshika kudi Tata yetu wamwiwulu. Dichi ilukenuña chakulañayi Yehova kulomba kwenu. Mpinji yejima, ikalenuña nampinji yakutoñojoka chinakwakulayi Yehova kulomba kwenu. (Mas. 66:​19, 20) Twatela kumwekesha chikuhwelelu neyi tulombaña kudi Yehova nikwiteja njila yidi yejima yakwilañamu kulomba kwetu.—Heb. 11:6. w23.05 11 ¶13; 12 ¶15-16

Chitwadihanini kudi Yehova, twakanini netu tukudifukulaña kudi yena nikwila nkeñelu yindi. Twatela kuhemba ichi chikaninu. Kukakela kuchikaninu chetu hichiteli wanyi. Muloña Yehova watuleñeli nindi twileña nkeñelu yindi. (Chim. 4:11) Washa mudi etu muchima wakufwila kudiza hadi yena nawa watuleña muchifwanisha chindi. Chafumañamu, twaswinaña kwakwihi nayena nawa twatiyaña kuwaha kwila nkeñelu yindi. Chasweja kubadika, neyi twila nkeñelu yaNzambi nikumulondela Mwanindi, ‘twanookaña.’ (Mat. 11:​28-30) Dichi twalekenuhu kusweja kumukeña Yehova kuhitila mukutoñojoka chikupu hayuma yayiwahi yejima yinayililiyi niyakayililayi kumbidi. Chimwasweja kumukeña Nzambi, chikuyipelela kumwovwahila. (1 Yow 5:3) Yesu watwesheli kwila nkeñelu yaNzambi muloña walombeleña kudi Yehova nawa washili muchima hawufwetu windi. (Heb. 5:7; 12:2) Neyi chelileñayi Yesu, lombenuña kudi Yehova kulonda ayinki ñovu nawa twalekenuhu kuchiñeja chikupu wumi wahaya nyaaka. w23.08 27-28 ¶4-5

Wejima wetu twakeña antu adiwunjika. Muloñadi? Twalemesha antu ahembelelaña chuma chakadi kuhilashana. Twasakililaña akwetu chadiwunjikañawu nanetu neyi tunaluwañeshi. Nawa twasakililaña hakwiluka netu muntu watudizishileña Bayibolu wadiwunjikileña nanetu chitwakabakeneña hakwila tudizi, kwiteja, hela kuzatisha yuma yamuBayibolu yitwadizileña. Chabadika, twasakililaña kwiluka netu Yehova Nzambi wadiwunjika nanetu! Hela chakwila twalemesha antu adiwunjika, chinateli kutukalila kudiwunjika mpinji jikwawu. Chakutalilahu, chinateli kutukalila kudiwunjika neyi tunemani mumusululu hakukandama mumotoka, sweje-e neyi kudi kutunakutemukila. Tunateli kushikena kuhila neyi akwetu atuluwañesha. Nawa mpinji jikwawu, chinateli kutukalila kutwalekahu kuchiñilila chikaninu chaYehova chakaayi kakaha. Hela chochu, hichikweti muloña nayuma chiyidiku (mpinji yejima) twatela kusweja kwikala adiwunjika. w23.08 20 ¶1-2

Yehova wamulejeli Gidiyoni kufuntisha mashidika kwakwihi naejima kwitala. Hadaha watoñojokeli nindi, ‘Komana chumichi mwamweni chinakukeñeka? Komana chumichi chikuzatika?’ Hela chochu, Gidiyoni wovwahilili. Akulumpi makonu amwimbujolaña Gidiyoni kuhitila mukwovwahila nshimbi yinahimpiki mukuloñesha. (Heb. 13:17) Gidiyoni wamwovwahilili Yehova hela chakwila wadiña nakutiya woma nawu wumi windi wadiña muwubanji. (Anso. 9:17) Hanyima yakumukolesha kudi Yehova, Gidiyoni wakuhweleleli chikupu nindi Nzambi wukumukwashaña hampinji yinakukiñayi antu jaNzambi. Akulumpi ashakamaña mwiluña mwakaanishawu mudimu wetu amwimbujolaña Gidiyoni. Ahamukaña nakulombola kupompa nimudimu wakushimwina hela chakwila anakuyichiinisha nawu akuyikasa, kuyihujola, kuyilekesha nyidimu, hela kuyichiinisha namadombu. Hampinji yalukadi lwasweja, akulumpi akakeñekaña kwikala ahamuka hakwila akwovwahileña nshimbi jakatambwilañawu hela chakwila jakaletesha wumi wawu kwikala muwubanji. w23.06 5-6 ¶12-13

Yehova welishili nyidimu yayiwahi yaKapristu Muneni Yehoyada ayisoneki kulonda tudizileñaku. (Rom. 15:4) Nawa chafwiliyi Yehoyada, amulemesheli chikupu kuhitila mukumujiika “muMusumba waDavidi hamu nawanyanta, muloña welili yuma yayiwahi muIsarela yakundamini kudi Nzambi walala niitala Dindi.” (2 Kushi. 24:​15, 16) Nsañu yahosha hadi Yehoyada yinateli kutukwasha wejima wetu kumutiyaña Nzambi woma. Akulumpi akaKristu anateli kumwimbujola Yehoyada kuhitila mukwikala asoñama nikutwalekahu kukiña mukanka wanyikoku yaNzambi. (Yilw. 20:28) Antu akula dehi anateli kudizila kudi Yehoyada nawu neyi amutiyaña Yehova woma nikutwalekahu kwikala ashinshika, nateli kuyizatisha kushikija nkeñelu yindi. Atwansi anateli kudizila kudi Yehova cheliliyi naYehoyada nikumwimbujola kuhitila mukulemesha akulumpi, sweje-e anamukalakeli Yehova hadi yaaka yayivulu. (Yish. 16:31) Dichi tutwalekenuhu kukwasha “anakulombola” kuhitila mukuyovwahila.—Heb. 13:17. w23.06 17 ¶14-15

Zatishenu kashinshi hakupompa kulonda mwiluki mapampa imukukeña kwakulahu. Neyi tuswejaña kwolola chikasa mwanti-mwanti, tukuletesha wunakulombola kutachika kutwinka yowenetu kukooleka kwakwakulahu henohu kudi niamakwawu anabuli kwakulahu. Chumichi chinateli kuletesha amakwawu kuleka kwolola makasa. (Mukwa. 3:7) Neyi akakushimwina amavulu anakwolola makasa hampinji yakudiza, tunateli kwakulahu wanyi kakavulu kwesekeja nachitunakukeña. Mpinji jikwawu, hadaha wunakulombola nateli kutwinka kukooleka kwakwakulahu wanyi. Chumichi chinateli kutuneñesha, ilaña bayi tumona netu kudi chuma chinaleteshi hakwila abuli kutwinka kukooleka kwakwakulahuku. (Mukwa. 7:9) Neyi munakulihu wanyi kakavulu kwesekeja nachimunakukeña, kwila mutiyilila nakanañachima hampinji yinakwakulawu akwenu nawa hanyima yakupompa muyihameka hañakwilu yawu nehi? Mazu enu anateli kuyikolesha amanakwenu niahela neyi chochadi kuyikolesha ñakwilu yimwadi kuhana. w23.04 23-24 ¶14-16

Dizenuña Izu daNzambi nikutoñojokahu chikupu. Neyi chochinateli kukola mutondu wudi nanyiji yajiyama, ninetu tunateli kutwalekahu kwikala akola mbe-e neyi tukuhwelela chikupu Izu daNzambi. Mutondu neyi wunakukula, nyiji yawu yajiyamaña nikutwalekahu kutaanda. Neyi tudizaña nikutoñojokahu chikupu, twakoleshaña chikuhwelelu chetu nikwiluka chikupu netu yuma yatulejañayi Nzambi nindi twileña yayiwahi. (Kol. 2:​6, 7) Toñojokenuña hanshimbi jaYehova nikufumba kwindi chijayikwashileña ambuñindi akunyima nikuyikiña. Chakutalilahu, Ezekeli washiliku chikupu muchima hampinji yapimineñayi kañelu chakekala tembeli yamweniyi muchimwenu. Ichi chimwenu chamukolesheli Ezekeli nawa chatukwashaña kwiluka chitwatela kwovwahila nshimbi jaYehova jahosha hakudifukula kwalala. (Ezek. 40:​1-4; 43:​10-12) Ninetu neyi tudizaña nikutoñojoka chikupu hayuma yakunama yaMwizu daNzambi, mwafumaña yuma yayiwahi. Tunateli kwikala namuchima wakola, nakukuhwelela chikupu mudi Yehova.—Mas. 112:7. w23.07 18 ¶15-16

MuBayibolu ashimunamu antu amavulu adiña nayilwilu yayiwahi anateli kwimbujolawu atwansi awamayala. Ana amayala akunyima amukeñeli Nzambi nawa azatileña nyidimu yashiyashana hakwakamena antu jindi. Munateli cheñi kuwana antu adi nayilwilu yayiwahi hakachi kawamayala akaKristu apama adi muchisaka chenu nimuchipompelu chenu. (Heb. 13:7) Nawa mukweti muntu wabadika imunateli kwimbujola, Yesu Kristu. (1 Pet. 2:21) Chimukudizaña nakanañachima hayuma yayiwahi yeliliwu awa antu, toñojokenu hayilwilu yawu yayiwahi. (Heb. 12:​1, 2) Kuhiñahu talenu chimunateli kuyimbujola awa amayala. Muntu wukweti wuswa wakutoñojoka chiwahi wasambilaña kutoñojoka chikupu hayuma yinakukeña kwilayi henohu kanda ayili. Dichi zatenu nañovu kulonda mwiikali naniwu wuswa nikutwalekahu kuwuhemba. Chatachi, ilukenu yishina yamuBayibolu nawa toñojokenu muloña waweni oyu yishina chiyalemena. Kuhiñahu, zatishenu oyu yishina kulonda yiyikwashi kufuukula yuma munjila yikumutiyisha Yehova kuwaha. (Mas. 119:9.) Ichi dichuma chasweja kulema chikuyikwasha kwikala iyala mukaKristu wapama.—Yish. 2:​11, 12; Heb. 5:14. w23.12 24-25 ¶4-5

Anvwali anateli kudizisha chiwahi anyanawu chatela kwakulawu namuchima wawovu neyi anakuyitaadikisha hayuma yakuhwelelawu. (Yak. 3:13) Anvwali amakwawu hakudifukula kwachisaka ashaku ntanjikilu yakuhitulukila chadimu muyuma yatela kwilawu. Atondaña nyitu yansañu yinateli kuyikalila anyanawu kwakula kushikola, ahanjekañahu nikumwekesha chatela kwakulawu nikuyidizisha chatela kuhoshawu namuchima wawovu nawa munjila yayiwahi. Kuhitulukila chadimu muyuma yakwila kunateli kukwasha atwansi akaKristu kukuhwelela awenawu nsañu yinakuhoshawu nikulumbulwila akwawu yuma yakuhwelelawu. Yibaaba yidi hamutu wakwila nawu “Malwihu Ehulañawu Atwansi” nichibaaba chinakwila nawu apo imisepela ingalemba, munateli kuyiwana ha jw.org. Iyi yibaaba ayiloñesha kulonda yikwasheña atwansi kukuhwelela chikupu yuma yakuhwelelawu nikuloñesha ñakwilu jinateli kwakulawu mumazu awu aweni. Neyi tuhanjekaña haniyi yibaaba hamu neyi yisaka, wejima wetu tunateli kwiluka chitwatela kuhakwilaku yuma yitwakuhwelela namuchima wawovu nawa munjila yayiwahi. w23.09 17 ¶10; 18 ¶15-16

Komana mwemikahu dehi chikonkwanyi chakuspiritu ilaña mukañanya kuchishikija? Neyi dichuma chayimwekeneni, himudi nkawenuku. Chakutalilahu, manakwetu Philip wakeñeleña kuwahishaku kulomba kwindi nikulombaña mpinji yejima, ilaña chamukalilileña kwikala nampinji yakulomba. Muhela Erika wemikili chikonkwanyi chakubula kulaba kukubulakana kwakuya mumudimu wakushimwina; ilaña kakavulu, watwalekelihu kulaba. Neyi kudi chikonkwanyi chimuchidi kanda mushikiji, mwani bayi muzeyaku. Muloña nikushikija tuhu chikonkwanyi chanyanya chakeñekaña kwikala nampinji nikuzata nañovu. Muchima wumukweti wakufwila kushikija chikonkwanyi chenu wamwekeshaña nawu mwalemesha wubwambu wenu naYehova nawa munakukeña kumukalakela kwesekeja nahanakumini ñovu jenu. Yehova walemesha chimwazataña nañovu. Kafwampi, hakeñaña nindi mumwilili yuma yimukubula kutweshaku. (Mas. 103:14; Mika 6:8) Dichi mwatela kwimika chikonkwanyi chimukutwesha, kwesekeja nachidi yuma muchihandilu chenu. w23.05 26 ¶1-2

Antu ahamuka anateli kutiya woma, ilaña hiyetejaña woma wuyikañeshi kwila chuma chaloñaku. Danyeli wadiña mukwenzi wahamuka chikupu. Wadizileña munyikanda yawatuprofwetu twaNzambi, kushilahu niwuprofwetu waYeremiya. Muniyi nsañu yadizileñayi, Danyeli wenjili nakwiluka nindi ankoli aYudeya akwatiliwu muBabiloni hadi yaaka yayivulu adiña kwakwihi nakuyuumbaku. (Dan. 9:2) Chakadi nikujina, Danyeli watela wamukuhweleleli Yehova chikupu chamweneñayi wuprofwetu wamuBayibolu wunakushikijewa, nawa antu amukuhwelelaña chikupu Nzambi ekalaña ahamuka nankashi. (Esekejenu ARoma 8:​32, 37-39.) Chasweja kulema, Danyeli walombeleña kakavulu kudi Tata yindi wamwiwulu. (Dan. 6:10) Wasolweli nshidi jindi kudi Yehova nikumuleja chatiyileñayi. Nawa Danyeli walombeli wukwashu. (Dan. 9:​4, 5, 19) Wadiña muntu neyi etu, dichi havwalikili nachilwilu chakuhamukaku. Ilaña wekalili nanichi chilwilu kuhitila mukudiza nkawindi, kulomba nikumukuhwelela Yehova. w23.08 3 ¶4; 4 ¶7

Neyi twovwahila akweti wuswa wabadika, twahetelañamu kushilahu niakwetu. Munjilanyi? Chuma chachiwahi chafumañamu, atubabeshaña wanyi muloña wakubula kwovwahila nshimbi. (Rom. 13:​1, 4) Neyi twovwahilaña akawuswa akwiluka nawu aYinsahu jaYehova hiyantu ovwahila. Chakutalilahu, hadi yaaka yayivulu yinahitihu muNigeria, amashidika eñilili Mwitala daWanta hampinji yakupompa kwachipompelu, nakukeñakeña akakuleta mapumba akaanineña kufweta nyisonku. Ilaña mukulumpi wanawa amashidika wayilejeli amashidika kwidikamu, nindi: “AYinsahu jaYehova hiyakaanaña kufweta nyisonkuku.” Mpinji yejima yimukwovwahila nshimbi, mukuwahisha ijina dawantu jaYehova nawa ifuku dimu chumichi chinateli kukiña akwenu akakwitiya. w23.10 9 ¶13

Ambuña aYehova amakwawu anatalili hadi mpinji yayilehi kukuma kwayuma yanshakaminu yamakonu. Antu amakwawu atoñojokaña nawu, chikaninu chaNzambi chinakushikijewa swayi wanyi. Yehova weluka chatiyañawu ambuñindi, dihafumini amuleji kaprofwetu Habakuki nindi: “Chimwenu chakumpinji yatoñolawu dehi, chinakunyakala kushikijewa, nawa chikashikijewa. Hela chikulaba, chichiñilileña! Muloña chakadi nikujina, chakashikijewa. Hichakalabaku!” (Hab. 2:3) Komana mazu ahosheliyi Nzambi akukolesha akundamini hohu kudi Habakuki? Tahindi mazu indi anatukundami ninetu makonu? Chamwoneneniwu, kapostolu Pawulu wakundamishili awa mazu kudi akaKristu, anakutalila kaayi kakaha. (Heb. 10:37) Mwamweni, twatela kukuhwelela netu hela chakwila chikaninu chakutwamwina chinakumwekana neyi chinashimbuli, “chakadi nikujina, chakashikijewa. Hichakalabaku!” w23.04 30 ¶16

AIsarela amavulu akaanineña wunsahu wamwekesheleña hatooka nawu Yehova wadiña nakumuzatisha Mosi kumwimenaku. (Kuch. 14:​10, 11) Kakavulu, akaanineña kwiteja nawu Yehova wadiña nakumuzatisha Mosi hakuyilombola. Chafuminimu, adina ikiñu dawaIsarela hiyaditejeli kwiñila Mwituña daChikaninuku. (Kuch. 14:30) Hela chochu, aIsarela amakwawu ovwahilileña wunlomboli waYehova. Chakutalilahu, Yehova wahosheli nindi: “Kalebu. . . watwalekelihu kunlondela namuchima wejima.” (Kuch. 14:24) Nzambi wamukiswilili Kalebu, nawa wamwinkeli mpata yakeñesheliyi nankashi muKenani. (Yosh. 14:​12-14) Ikiñu dalondelelihu dawaIsarela nidena dovwahilileña wunlomboli waYehova. Yoshuwa chamutondeliwu nakumusinsa Mosi kulonda ekali nlomboli wawaIsarela, “amulemesheleña chikupu mumafuku akuhanda kwindi kwejima.” (Yosh. 4:14) Chafuminimu, Yehova wayikiswilili kuhitila mukuyileta mwituña dakaniniyi.—Yosh. 21:​43, 44. w24.02 21 ¶6-7

Neyi chochinateli kwilukayi ndotolu neyi chakwila muchima wetu wudi chiwahi hela nehi kuhitila mukuwupima, ninetu tunateli kwiluka chidi kukeña kutwamukeña Nzambi neyi twiluka ntahi chidi kukeña kutwayimwekeshelaña amanakwetu. Neyi tumona netu kukeña kutwayikeña amanakwetu kunatachiki kukeha, chinakumwekesha nawu nikukeña kutwamukeña Nzambi kunatachiki kukeha. Ilaña neyi tuyimwekeshelaña akwetu akakwitiya kukeña mpinji yejima, hichuma chinakumwekesha nawu twamukeña chikupu Nzambi. Twatela kwakama neyi tumona netu kukeña kutwayikeña amanakwetu niahela kunatachiki kukeha. Muloñadi? Muloña chumichi chikutuletesha tujimbeshi wubwambu wetu naYehova. Kapostolu Yowanu washimuna hatooka ichi chikuma hakutwanukisha nindi: “Muntu wabula kukeña manakwindi amonañayi namesu, hakutwesha kukeña Nzambi abula kumonayiku.” (1 Yow. 4:20) Chumanyi chitunakudizilaku? Yehova wukututiya kuwaha chiña hohu neyi “[Tudikeña] wumu namukwawu.”—1 Yow. 4:​7-9, 11. w23.11 8 ¶3; 9 ¶5-6

Hadiñayi kansi, Mwanta Yehowashi wafuukwilihu chuma chachiwahi. Hela chakwila wadiña wanyi natata yindi, walondeleleña mwamulejeleñawu kudi Kapristu Muneni washinshika, Yehoyada. Iwu kapristu wadiña nakumudizisha Yehowashi neyi kwiji himwanindi wakudivwela. Chafuminimu, Yehowashi wafuukwilihu kumukalakela Yehova nikufuntisha kudifukula kwalala. Yehowashi wafuukwilihu cheñi kuwahisha tembeli yaYehova. (2 Kushi. 24:​1, 2, 4, 13, 14) Neyi anakuyidizisha kumukeña Yehova nikulondela nshimbi jindi, dikwila nawu anakuyinka chawaana chalema nankashi. (Yish. 2:​1, 10-12) Anateli kuyidizisha kudi anvwali jenu munjila jashiyashana. Neyi muzatishaña kufumba kwamuNsona kunakuyilejawu, mukutiyishaña anvwali jenu kuwaha. Chasweja kulema, mukumutiyishaña Nzambi kuwaha nawa mukwikala nawubwambu wakola nayena. (Yish. 22:6; 23:​15, 24) Komana chumichi hichikuyiletesha kwimbujola yuma yelileñayi Yehowashi hadiñayi kansiku? w23.09 8-9 ¶3-5

Yehova watushiika nindi wukutiyaña kulomba kwetu. Nzambi yetu wakeña akakudifukula indi ashinshika, dichi hakadiwula kulomba kwawuku. (Mas. 10:17; 37:28) Hela chochu, ichi hichinayi mukwila nawu wukutwinkaña yuma yejima yitunalombiku. Hadaha yuma yikwawu yitwalombaña kwila atwakula yinu mpinji nehi, sampu kaayi kakaha kanashiki. Yehova wamonaña neyi chakwila yuma yitunakulomba yinesekani nankeñelu yindi. (Isa. 55:​8, 9) Yuma yakeñañayi kwila munabombeli kwinzesha iseki nawantu anuñañana akekala muchiyuulu chindi. Ilaña Satana wahoshaña nindi antu anateli kwikala chachiwahi neyi anakudiyuula aweni. (Kutach. 3:​1-5) Hakwila amwekeshi nindi yuma yahosheliyi Diyabolu yakutwamba, Yehova nayiteji antu kudiyuula aweni. Hela chochu, chiyuulu chawantu dichinakojeji kukala kwejima kutunakumona makonu. (Mukwa. 8:9) Tuneluki netu Yehova wukufumishahu wanyi iku kukala kwejima kutunakumona chayinu mpinji. w23.11 21 ¶4-5

Yehova wakanini nindi nyuza yayivulu akayikiswila kuhitila mudi Abarahama. Hela chochu, nihampinji yashikijiliyi Abarahama yaaka 100 nawa Sara yaaka 90, mwana akaniniwu wadiña kanda amwekani. Kwesekeja nammwenu yawuntu, chamwekeni neyi hichadi kutwesheka aAbarahama naSara kwikala namwanaku. Iku kwadiña hikweseka kweneni kudi Abarahama. “[Hela chochu, muloña wakuchiñeja], wakuhweleleli nindi wakekala tata yanyuza yayivulu.” (Rom. 4:​18, 19) Nawa chakadi nikujina, achina chuma chachiñejeleñawu chashikijeweli. Wavweli Isaka, mwana achiñejeliwu hadi yaaka yayivulu. (Rom. 4:​20-22) Nzambi nateli kututiya kuwaha nakututena nindi twaloña nawa tukwikala amabwambu jindi neyi chadiñayi Abarahama. Kafwampi, Pawulu wahosheli hachumichi munsañu yasonekeliyi nindi: “Izu dakwila nawu, ‘amuteneni’ hiyadisonekeli muloña [waAbarahama] hohuku, ilaña nihamuloña wanetu akatenawu nawu twaloña, muloña twakuhwelela mudi Owu wamusañwili Yesu.” (Rom. 4:​23, 24) Kufwana Abarahama, twatela kwikala nachikuhwelelu nikuzata nyidimu yayiwahi kushilahu nikwikala nakuchiñeja. w23.12 7 ¶16-17

Neyi munakuhita mukukala kunakuyitiyisha woma, anukenu nenu Yehova nakumoni oku kukala nawa neluki chimunakutiya. Chakutalilahu, Yehova hamweni hohu chayikabishileñawu aIsarela muEjipituku, ilaña wamweni ‘nimakabi iyahitileñamu.’ (Kwid. 3:7) Hela chochu, munateli kujinoka neyi chakwila Yehova nakuyikwasha hampinji yimunakumona kukala kunakuyitiyisha woma. Dichi mulombenu ayikwashi kulonda mumoni chinakuyikwashayi. (2 Anya. 6:​15-17) Kuhiñahu toñojokenu hachumichi: Kudihu mpanji hela ñakwilu yahaniniwu hakupompa yinayikoleshi? Kudihu mukanda, vidiyo indi kwiji kamina kadimena kanayikoleshi? Kudihu mukwenu mukakudifukula wayilejahu dehi mazu akukolesha hela nsona? Tunateli kutachika kudiwula kulema kwakukeña kwatumwekeshelañawu amanakwetu mukaayi kejima niyakuda yakuspiritu yitwatambwilaña. Ilaña iyi hiyawaana yalema nankashi yatwinkañayi Yehova. (Isa. 65:13; Maku 10:​29, 30) Yamwekeshaña hatooka nawu watwakamenaña. (Isa. 49:​14-16) Yamwekeshaña cheñi hatooka nawu yena watelela enu kumukuhwelela. w24.01 4-5 ¶9-10

Chikwashalili kapinji kantesha henohu kanda afunti mwiwulu, Yesu wayanukishili atumbanji twindi mudimu wayinkeliyi wakushimuna wunsahu hadi yena “muYerusalema, muYudeya nimuSamariya mwejima nikwakumina iseki dejima.” (Yilw. 1:8; Luka 24:​46-48) Chimwahitili kapinji kantesha, anlomboli jawaYudeya ayikwatili aPetulu naYowanu nakuyitwala kudi akaSanihedirini, nakuyikonkomwena nawu awa amayala ashinshika aleki kushimwina, nawa ayichiinishili. (Yilw. 4:​18, 21) Petulu naYowanu ahosheli nawu: “Sompenu enu aweni neyi chachiwahi kumesu aNzambi kutiyilila enu chatela tutiyilili Nzambi. Ilaña etu kwetu, hitukutwesha kuleka kuhosha yuma yitunamoni nikutiyaku.” (Yilw. 4:​19, 20) Chelili aPetulu naYowanu ayuumbiku, atumbanji alombeli kudi Yehova nawu ayikwashi kwila nkeñelu yindi. Yehova waakwili iku kulomba kwakufuma hamuchima.—Yilw. 4:31. w23.05 5 ¶11-12

Hadi yaaka yayivulu nankashi, Yehova naMwanindi akeñayi adikunda nawa adimwekeshelaña kukeña chikupu. Wubwambu wawu diwubwambu wunashimbuli nankashi kubadika wubwambu wejima. Yehova wamwekesheli hatooka chamukeñayi Yesu, neyi chitwataña munsona yalelu. Yehova wadi kuhosha hohu nindi, ‘Iwu diyi inatiyaña kuwaha.’ Ilaña wakeñeleña twiluki chamukeñayi nankashi Yesu, dichi wamuteneni nindi “Mwanami, inakeña.” Yehova wamutiyileña Yesu kuwaha, kushilahu nichuma chadiñayi kwakwihi nakwila. (Efwe. 1:7) Nawa Yesu wajinokeleña wanyi nindi Tata yindi wamukeña. Yesu welukili chikupu nindi Tata yindi wamukeña. Wahosheleña kakavulu chakufuma hamuchima nindi Tata yindi wamukeña.—Yow. 3:35; 10:17; 17:24. w24.01 28 ¶8

Toñojokenu hachumichi: Muntu imwakeña avuba nsañu yatama nankashi hadi enu. Muneluki nenu oyu nsañu yakutwamba, ilaña amakwawu anayikuhweleli. Chinasweji kutama, anatwalekihu kutaandisha oyu nsañu yakutwamba, nawa antu amavulu niwena anayikuhweleli. Chakadi nikujina, iyi nsañu yakutwamba yinateli kuyineñesha. Ichi chakutalilahu chinateli kutukwasha kwiluka chatiyiliyi Yehova chelili ijina dindi aditamishi. Wumu hakachi kawañelu jindi wamutwambilili kudi mumbanda watachi, Eva. Wakuhweleleli ana makudi. Ana makudi aletesheli anvwali jetu atachi kudikaña naYehova. Chafuminimu, antu ejima aswanini nshidi nikufwa. (Kutach. 3:​1-6; Rom. 5:12) Kukala kwejima kutunakumona mukaayi—jiñufwa, majita, yihuñu—jekaliliku muloña wamakudi anataandishiyi Satana. Komana chamukataña Yehova chamutwambililiwu niyuma yafuminimu? Eña. Hela chochu, Yehova hahila hela kuhemba nkunyiku. Kafwampi, watwalekahu kwikala “[Nzambi] wamuzañalu.”—1 Tim. 1:11. w24.02 8 ¶1-2

Munateli kwila ñahi neyi cheliliyi Yosefu? Ayinu diyi mpinji yimwatela kwiluka chuma chimwakela neyi mwikala mukweseka. Shikenenuña kukaana yuma yahelayi Yehova nikutondolwela kuyitoñojokahu. (Mas. 97:10; 119:165) Chimwela mwenimu, himwakavulumuna neyi anayesekiku. Hadaha muneluki nenu munawani dehi chalala nawa munakukeña kumukalakela Yehova namuchima wenu wejima, ilaña kudi chuma chinakuyikañesha kudihana nikupapatishewa. Munateli kwila chuma cheliliyi Mwanta Davidi. Munateli kulemba kudi Yehova nenu: “Nshinshiki chikupu mukachi, eyi Nzambi, kulonda wiluki muchima wami. Ntalatali chiwahi, kulonda wiluki yitoñojoka yami yakwakama. Talaku neyi mumuchima wami mudihu njila yatama, nawa nlomboli munjila yahaya nyaaka nanyaaka.” (Mas. 139:​23, 24) Yehova wakiswilaña “antu amukeñakeñaña chikupu.” Chimunakuzata nañovu kushikija chikonkwanyi chenu chakudihana nikupapatishewa, munakumwekesha kudi yena nenu munakumukeñakeña chikupu.—Heb. 11:6. w24.03 6 ¶13-15

Kapristu muneni diyi etejeliwu kwimenaku antu kudi Nzambi. Kapristu muneni watachi waIsarela, Aroni, amutondeli kudi Yehova hampinji yajilikiliwu tabanaka. Hela chochu, neyi chalumbulwiliyi kapostolu Pawulu, “antu amavulu ekalileña atupristu mukudisinsa-sinsa muloña wakwila kufwa kwayikañesheleña kutwalekahu kuzata iwu mudimu.” (Heb. 7:​23-26) Nawa chineli ana atupristu amaneni adiña abula kuwanina, adiña nakulambula nyilambu niyahanshidi jawu aweni. Ichi dichaambu cheneni chekala hakachi kakapristu muneni wawaIsarela naKapristu Muneni wabadika, Yesu Kristu. Hakwikala kapristu wetu muneni, Yesu Kristu ‘himukakukalakela . . . mwitenti dalala dalemeniyi Yehova, bayi muntuku.’ (Heb. 8:​1, 2) Pawulu walumbulwili nindi “chineli [Yesu] wahandaña haya nyaaka nanyaaka, wupristu windi hiwukweti answanaku.” Pawulu wabombelelihu nindi Yesu wekala “wakadi kutamishewa, waambuka kudi akanshidi” nawa nindi kwaambukaku nawatupristu amaneni awaIsarela, “Yena hakeñekaña kulambula nyilambu [hefuku-hefuku]” yahanshidi jindiku. w23.10 26 ¶8-9

“Iwulu dadikulu” demenañaku nfulumendi jayuulañawu kudi Satana niandemoni jindi. (Mat. 4:​8, 9; 1 Yow. 5:19) Neyi chadizatishawu muBayibolu, izu dakwila nawu “iseki” demenañaku antu ashakamaña hamaseki. (Kutach. 11:1; Mas. 96:1) Dichi, “Iseki dadikulu” demenañaku antu atama adiku makonu. Yehova hakakumina hohu dakutuñulula hela kuwahisha “iwulu” ‘niiseki’ jidiku makonuku; ilaña wakajijilumuna jejima nakusinsishahu jacheñi. Iwulu niiseki jidiku makonu wakajisinsisha “[newulu] dadiha niiseki dadiha”—dikwila nawu, nfulumendi yayiha niantu aloña. Yehova wakabalumuna iseki niantu kwikala neyi yuma yayiha kuhitila mukuyilisha kwikala awanina. Neyi chashimwineñahu dehi Isaya, iseki dejima akadibalumuna nakwikala dalubanji neyi chadiña itempa daEdeni. Ninetu akatubalumuna nakwikala amaha, hela kutuwahisha hamuntu-hamuntu. Akakubalakata, amputamesu nianjika matu akayuuka, nawa antu afwa dehi akayisañula.—Isa. 25:8; 35:​1-7. w23.11 4 ¶9-10

“Lukadi lwasweja” lwakenza mukukasumwisha. (Mat. 24:21) Hela chochu, kwambukaku nawubanji wawuvulu wamwekanaña, lukadi lwasweja hilwakashintakesha antu ejimaku. Kwakwihi nayaaka 2,000 yinahitihu, Yesu wayisoñamishili akakumulondela kudiloñeshela chadimu nanidi ifuku. Neyi tudiloñeshela chadimu, chakatupelela kuumika muyina mpinji yakala nawa twakakwasha akwetu kwila chochimu. (Luka 21:36) Twakakeñekaña kwikala omika hakwila twakamwovwahili Yehova nakukuhwelela netu wukutukiñaña. Twakela ñahi neyi amanakwetu ajimbesha yuma yawu yantesha, indi kwiji yejima? (Hab. 3:​17, 18) Twakakeñekaña kwikala nawushona kulonda wakatukwashi kuyinkaku yuma yakakeñekaña. Twakela ñahi neyi kulukuka kwanyuza kwakaletesha twakakeñekeña kushakama hamu nawamanakwetu niahela hakapinji kantesha? (Ezek. 38:​10-12) Twakakeñekaña kwikala nakukeña chikupu hakwila akatukwashi kuumika hayina mpinji yakala. w23.07 2 ¶2-3

Adisumbula anateli kudizila kudi aAkwila naPrisila, eyala namumbanda alemesheliwu kudi akaKristu akusambila amavulu. (Rom 16:​3, 4) Azatilileña hamu, kushimwina nikukwasha akwawu. (Yilw. 18:​2, 3, 24-26) Kafwampi, Bayibolu neyi yinakutena aAkwila naPrisila, mpinji yejima yayitenenaña hamu. Adisumbula anateli kuyimbujola ñahi? Toñojokenu yuma yimunateli kwilila hamu namwinikwenu. Chatela muzateña iyi nyidimu iwu nkawindi-iwu nkawindi, kwila muyizatila hamu neyi adisumbula nehi? Chakutalilahu, aAkwila naPrisila adiña nakushimwina hamu. Komana ninenu mwatanjikaña kuzatila hamu mpinji yejima? Akwila naPrisila azatilileña cheñi hamu. Hadaha enu nimwinikwenu himwazataña mudimu wowumuku, ilaña kwila muzatila hamu nyidimu yahetala nehi? (Mukwa. 4:9) Neyi mudikwashaña munyidimu, mukudikundaña nankashi nawa mukwikalaña nampinji yakuhanjeka. w23.05 22-23 ¶10-12

Wejima wetu twatiyaña woma mpinji jikwawu. Chakutalilahu, hampinji yamukumpishileñawu Davidi nikukeña kumujaha kudi Mwanta Sawulu, Davidi watemukilili kumusumba waGati wawaFilisitinu. Hashimbwili wanyi, Mwanta Akishi wakuGati, watiyili nawu Davidi wadiña chilobu wañovu embileñawu mukamina nawu natapi “makumi amakombakaji” awaFilisitinu. Davidi watiyili “woma nankashi.” (1 Sam. 21:​10-12) Wakameneni chuma chikumwilawu kudi Akishi. Davidi wemikili ñahi mushindu woma watiyileñayi? Mwisamu 56, Davidi washimuna chatiyileñayi hampinji yadiñayi muGati. Idi isamu dashimuna woma watiyiliyi Davidi, ilaña damwekesha cheñi hatooka chemikiliyi mushindu iwu woma. Chatiyayi woma, Davidi wamukuhweleleleña Yehova. (Mas. 56:​1-3, 11) Mukumukuhwelela Nzambi mwafumini yuma yayiwahi. Nawukwashu waYehova, Davidi wakasili kafuta kakwila chuma chamukwashili nankashi: Wadibalumwini kwikala neyi chizaluki! Chatela Akishi amujahi Davidi wamuhañili, dichi Davidi watemukili.—1 Sam. 21:13–22:1. w24.01 2 ¶1-3

Anyi anakutenawu adi munsona yefuku yalelu? Awayishewa akasañulawu! Dichi neyi awayishewa akukumishaku hanu hamaseki anayitwali dehi mwiwulu kwakwihi nakukuma kwalukadi lwasweja, mudimu watachi wakayinkawu hikuzuña. Neyi anayi dehi mwiwulu akakalakela hamu naKristu niañelu jindi ajila, kuzuña njita yakukumishaku nawayilumbu jaNzambi. Toñojokenu hachumichi! AkaKristu awayishewa amakwawu adi hanu hamaseki anashinakaji dehi nawa anazeyi. Ilaña chakayisañwilawu kuwumi wamwiwulu, akekala nañovu nawa yileñaleña yakuspiritu yakafwaña, akayinka mudimu wakuzuña hamu naMwanta Wanjita, Yesu Kristu. Hanyima yakuzuña njita yaAmagedoni, akazata mudimu wakukwasha antu kwikala awanina. Chakadi nikujina, hakekalawu mwiwulu akayilila amanakwawu niahela akeñawu akekala hanu hamaseki yuma yayivulu yayiwahi kubadika yinakuyililawu chayinu mpinji hadiwu mumujimba wawuntu wabula kuwanina! w24.02 6-7 ¶15-16

Antu amakwawu anashikihu kupapatishewa ashintajalaña kudihana nikupapatishewa. Anateli kudihula nawu, ‘Indi neyi hanyima yakupapatishewa nikoña nshidi yahamesu bwi-i nawa ahaña muchipompelu?’ Neyi dichimwatoñojokaña, kuhwelelenu nenu Yehova wakayinka yuma yejima yakayikwasha “[kwenda] kwesekeja nanochu chakeñañayi . . . nakumutiyisha kuwaha chikupu.” (Kol. 1:10) Wakayinka cheñi ñovu yikayikwashaña kwila mwaloña. Wakwashahu dehi antu amavulu kwila mwaloña. (1 Kor. 10:13) Ichi dichuma chimu hayuma yaleteshaña antu antesha hohu ayihañeña muchipompelu chawakaKristu. Yehova wakwashaña antu jindi kutwalekahu kwikala ashinshika. Muntu wejima wabula kuwanina amwesekaña kulonda eli yuma yatama. (Yak. 1:14) Hela chochu, mwatela kutondahu chuma chimwatela kwila neyi anayeseki. Chalala chidi chakwila nawu iyenu mukweti wuswa wejima wakufuukula yuma yimwatela kwila muchihandilu chenu. Hela chakwila antu amakwawu anateli kutoñojoka nawu kwila mutwesha kuyuula chimwatiyaña niyuma yimwelaña nehi, ilaña munateli kwiluka chakuyuula yitoñojoka yenu yakufwila kwila yuma yatama. w24.03 5 ¶11-12