April

Ambuña aYehova akunyima amweneña kukala kwabulileñawu kukuhwelela. Talenu yuma yamumwekeneni Yakoba. Amulejeli kudi tata yindi nawu asumbuli mumbanda hakachi kanyana kaLabani awambanda, ntaña yindi wadiña wetiya nawa amukanini nawu Yehova wakamukiswila chikupu. (Kutach. 28:​1-4) Dichi Yakoba welili mwamulejeliwu. Wafumini mwituña dawu daKenani nakuya kwashakamineñayi Labani, owu wadiña nawanyanindi awambanda ayedi, aLiya naRacheli. Yakoba wakeñeli mwana kaLabani wakansi, Racheli, nawa wetejeli kumuzatila tata yindi yaaka 7 henohu kanda amusumbuli. (Kutach. 29:18) Ilaña yuma hiyazatikili neyi chakuhweleleliyi Yakobaku. Labani wamudimbili chakwila wasumbwili mwanindi wamukulumpi, Liya. Chimwahitili mulungu wumu, Labani wamwitejeli Yakoba kumusumbula Racheli, ilaña wateleleli kuzatilahu yaaka 7 yikwawu. (Kutach. 29:​26, 27) Labani wamwekesheleña cheñi wupwapoki hazatileñayi naYakoba. Wamwilili Yakoba chatama hadi yaaka 20!—Kutach. 31:​41, 42. w23.04 15 ¶5

Twatela kulomba kudinyi neyi tunakukeña kutukundeja nikutulombola? Ñakwilu yanilu lwihu tunayiluki. Tunateli kulomba kudi Yehova Nzambi. Yehova watukoleshaña nindi tulombeña. Wakeñaña nindi tulombeña kakavulu, dikwila nawu “[kulomba] mpinji yejima.” (1 Tes. 5:17) Tunateli kulomba kudi yena mukukasunuka netu atulomboleña muyuma yejima yitwelaña muchihandilu chetu. (Yish. 3:​5, 6) Chineli hiNzambi wachisambu, Yehova hashaku mapampa itwatela kulomba kudi yenaku. Yesu welukili nindi Yehova walemesha kulomba. Kunyima henohu Yesu kanda enzi hamaseki, wamweneña Tata yindi chakwileñayi kulomba kwawamayala niambanda ashinshika. Chakutalilahu, Yesu wadiña hamu naTata yindi hampinji yakwileñayi Nzambi kulomba kwakufuma hamuchima kwaHana, Davidi, Elija, kushilahu nikwawantu amakwawu ashinshika. (1 Sam. 1:​10, 11, 20; 1 Anya. 19:​4-6; Mas. 32:5) Dihafumini Yesu adizishi atumbanji twindi nindi alombeña kakavulu nakukuhwelela nawu akuyakula!—Mat. 7:​7-11. w23.05 2 ¶1, 3

Kapristu Muneni Yehoyada wamutiyileña Yehova woma. Chumichi chamwekeni hatooka hampinji yelili Ataliya mwana kaYezebeli wamumbanda, adiswanyiki yomweni hawanta muYuda. Wadiña naluwi wanyi nawa wadiña nalwisu lwakufwila kwikala mwanta chakwila wakeñeleña kujaha ejima akeñeleña kuswana hawanta, ejikulwindi awamayala! (2 Kushi. 22:​10, 11) Hakachi kanawa anyana hapulukili mwana wumu, Yehowashi, muloña amupulwishili kudi Yehoshabeyati, ñoda Yehoyada. Yena nanfumwindi amuswekeli iwu mwana nikumwakamena. Muloña wanichi chuma cheliliwu aYehoyada naYehoshabeyati, ahembeli ndonda yawanyanta akumutaña waDavidi. Yehoyada wadiña washinshika kudi Yehova nawa hamutiyili Ataliya womaku. Yehowashi hadiñayi yaaka 7, Yehoyada wamwekesheli cheñi nindi wadiña washinshika kudi Yehova. Wakasili kafuta. Neyi kazatika, Yehowashi wukwikala mwanta, Nswana yaDavidi washikilamu. Ilaña neyi kabula kuzatika, Yehoyada anateli kumujaha. Nawukwashu waYehova, aka kafuta kazatikili. w23.06 17 ¶12-13

Mwanta Nebukaneza wadi kutoñojoka nindi Danyeli wadikañileña nayena nawa wadi kumujaha. Ilaña Danyeli wahamukili nakumulumbulwila ichi chilota. Yumanyi yatela yamukwashili Danyeli kwikala wahamuka muchihandilu chindi chejima? Mwamweni, Danyeli hadiñayi kansi wadizilili kudi mama yindi nitata yindi. (Kuhit. 6:​6-9) Danyeli welukili chahosheleña Nshimbi, chidi neyi Nshimbi 10, niyishina kutalisha hayuma yatela kudayi kaIsarela niyatela kubula kudayi. (Lev. 11:​4-8; Dan. 1:​8, 11-13) Danyeli welukili cheñi chihandilu chawantu jaNzambi akunyima niyuma yayimwekeneneña neyi akañanya kulondela nshimbi jaYehova. (Dan. 9:​10, 11) Yuma yamumwekeneni Danyeli muchihandilu chindi yamukwashili kukuhwelela chikupu nindi Yehova niañelu jindi añovu amukwashileña.—Dan. 2:​19-24; 10:​12, 18, 19. w23.08 3 ¶5-6

Rabeka wadiña mumbanda wamaana nawa washinshika wafuukwileña chiwahi muchihandilu chindi chejima. (Kutach. 24:58; 27:​5-17) Hela chochu, wadiña nakavumbi nawa wovwahilileña. (Kutach. 24:​17, 18, 65) Neyi mudizozaña nakwovwahila ntanjikilu yaYehova neyi cheliliyi Rabeka, akuyimbujolaña kudi antu amuchisaka chenu niamuchipompelu. Chilwilu chatela kwikala nawakaKristu ejima apama, hichilwilu chakudikehesha. Esita wadiña mumbanda wadikehesha wamutiyileña Nzambi woma. Muloña wakudikehesha, hadinkeleña wanta hekaliliyi ñoda mwantaku. Watiyilileña kukufumba kwamusonyindi Modekayi nawa wakwovwahilileña. (Esita 2:​10, 20, 22) Ninenu munateli kwikala nachilwilu chochimu chakudikehesha kuhitila mukuchikeñakeña nikuchizatisha. (Tit. 2:​3-5) Esita wamwekesheli cheñi nindi wadikehesha munjila yikwawu. “Amuleñeli chiwahi nawa wamwekeneña lubanji”; hela chochu, hakeñeleña nindi antu amumoneña nawu diyi wasweja lubanjiku.—Esita 2:​7, 15. w23.12 19-20 ¶6-8

Yehova hakeñaña nindi tuswejeña kudinka nyiloñaku. Neyi tushimuna nshidi yetu, tubalumuka mumuchima, nawa neyi tuzataña nañovu kubula kufuntilahu kukoña nshidi, twatela kukuhwelela netu Yehova natwanakeni. (Yilw. 3:19) Neyi twila yuma yejimiyi, Yehova hakeñaña nindi tutwalekihu kudinka nyiloñaku. Weluka kutama kwafumañamu neyi tutwalekahu kudinka nyiloña. (Mas. 31:10) Neyi tusweja kuneña, tunateli kuleka kutemuka lufuchi lwakuwumi. (2 Kor. 2:7) Neyi mutwalekahu kudinka nyiloña, toñojokenuña hadi Nzambi ‘chanakenañayi chikupu.’ (Mas. 130:4) Neyi nanakeni ana anabalumuki mumuchima chikupu, wayishiikaña nindi: “Hinakanukahu cheñi nshidi yawuku.” (Yere. 31:34) Chumichi chinatalishi mukwila nawu Yehova hakayanukilaña nshidi yimwakoñeli kunyimaku. Bayi mudihilila enu aweni neyi muleka kuzata nyidimu yimu muchipompelu muloña wayiluwa yimwakoñeli kunyimaku. Yehova hatwalekañahu kutoñojoka hanshidi jimwakoñeliku, ninenu himwatela kutoñojokañahuku. w23.08 30-31 ¶14-15

Mumpinji yachipupu chaCOVID-19, aYinsahu jaYehova atiyilileña wunlomboli watwinkeleña kuloñesha kwetu hiyakamineña nankashi neyi chakamineñawu antu atiyilileña kunsañu jakutwambaku. (Mat. 24:45) Twatela kusha muchima “[kuyuma] yalema nankashi.” (Fwili. 1:​9, 10) Yuma yaluwañeshaña yinateli kutudiila mpinji yeneni nawa yikutuletesha kubula kusha maana kuyuma yalema nankashi. Yuma yitwelaña muchihandilu—chidi neyi kuda, kunwa, kuhema ninyidimu yakumujimba—yinateli kutuluwañesha neyi tusweja kuyilemesha nankashi muchihandilu chetu. (Luka 21:​34, 35) Kubombelahu, ifuku niifuku tunakutiyaña nsañu jakubula kutiyañana ninsañu jamapolitiki. Bayi twiteja iyi yuma yituluwañeshiku. Neyi kubabala nehi, tunateli kutachika kukokwela kumu muyitoñojoka yetu nimumuchima. Satana wazatishaña njila jashiyashana kulonda atuzeyeshi tuleki kwila yuma yayiwahi. w23.07 16-17 ¶12-13

Kudi antu jaYehova, ifuku daChanukishu chakufwa kwaKristu hiifuku dalema nankashi muchaaka. Dichidika hohu chayilejeliyi Yesu akakumulondela nindi eleña. (Luka 22:​19, 20) Chatwanukishaña njila mutunateli kumwekeshela kusakilila hamulambu waYesu. (2 Kor. 5:​14, 15) Chatwinkaña cheñi kukooleka ‘kwakudikolesha’ nawamanakwetu niahela. (Rom. 1:12) Nawa antu amavulu adi namuchima wakufwila kudiza ekalaña nampwila yakukeña kutachika kwenda munjila yaya kuwumi muloña wayuma yamonañawu nikutiya. Toñojokenu cheñi Chanukishu chichatunuñañeshaña hamu nawamanakwetu niahela mukaayi kejima. Dichaleteshaña tulemesheña nankashi ifuku daChanukishu! w24.01 8 ¶1-3

Neyi tutoñojokaña chikupu hawuseya wahaniniyi Yehova niYesu, tukwiluka netu atukeña nankashi hamuntu-hamuntu. (Ñal. 2:20) Ifutu danyiloña hichawaana chahaniniyi muloña wakutukeña. Yehova wamwekesha nindi watukeña kuhitila mukulambula chuma chalemesheliyi chikupu, Yesu. Yehova wetejeli Mwanindi kukabakana nikufwa kukoola etu. Yehova hatoñojokaña hohu nindi watukeñaku, ilaña watulejaña cheñi nindi watukeña. (Yere. 31:3) Yehova watukokelaña kudiyi muloña watukeña. (Esekejenu Kuhituluka 7:​7, 8.) Kwosi chuma hela muntu niwumu wunateli kutwambula kuniku kukeñaku. (Rom. 8:​38, 39) Iku kukeña kwayileteshaña kutiya ñahi? w24.01 28 ¶10-11

AkaKristu awayishewa atiyaña kuwaha nakuchiñeja kwawu kwakuya mwiwulu. Manakwetu wumu hakachi kawu, Frederick Franz, wahosheli chakufuma hamuchima nindi: “Chuma chitwachiñejaña chakashikijewa, nawa wejima wetu a 144,000 twakatambwila chuma chatukanayi Nzambi. Wufwetu wutwakatambwila wakekala wawuwahi nankashi kubadika chitwatoñojokaña.” Mu 1991 Manakwetu Franz wakunkulwili nindi: “[Twaleka] wanyi kulemesha chuma chitwachiñejaña. . . . Kutwalekahu kuchitalila kunatukwashi kusweja kuchilemesha. Tukutwalekahu kuchitalila . . . Ichi nalemesha chikupu chuma chitwachiñejaña.” Hela chakwila twatalilaña kwikala nawumi wahaya nyaaka mwiwulu indi kwiji hamaseki, twachiñejaña yuma yayiwahi yatuletelaña muzañalu. Nawa kuchiñeja kutukweti kwayuma yakumbidi kukuswejelañaku. w23.12 9 ¶6; 10 ¶6-8

Hanji yawiñililu watabanaka yakushankulu ashilihu kameña kawuneñu hamulambwilileñawu Yehova nyilambu yayimuna. (Kwid. 27:​1, 2; 40:29) Hela chochu, ayina nyilambu hiyadi kuletesha antu kuyanakena nshidi jawu jejimaku. (Heb. 10:​1-3) Ayina nyilambu yayimuna yatwalekeliwu kuhana hatabanaka yadiña nakwimenaku mulambu wumu hohu wakakuula antu chikupu. Yesu welukili nindi Yehova wamutemesheli hanu hamaseki kulonda ahani wumi windi kwikala ifutu danyiloña dakukuula nachu antu. (Mat. 20:28) Dichi hampinji yamupapatishileñawu, Yesu wadihanini yomweni kwila chuma chakeñeleñayi Yehova. (Yow. 6:38; Ñal. 1:4) Yesu wahanini wumi windi “kamu hohu” kulonda ajimi hela kubuta haya nyaaka nshidi jawantu ejima amukuhwelelaña Kristu.—Heb. 10:​5-7, 10. w23.10 26-27 ¶10-11

Hitwadi kutwesha etu aweni kudikuula kunshidi nikukufwaku. (Mas. 49:​7, 8) Yehova hamu niMwanindi ahanini mulambu walema chikupu kuhitila mukwiteja Yesu kuhana wumi windi kukoola etu. Neyi tutoñojokaña chikupu hayuma yatwililawu kudi Yehova niYesu, tukusakililaña nankashi hefutu danyiloña. Adama chakoñeliyi nshidi, wajimbesheli kukooleka kwakwikala nawumi wahaya nyaaka, bayi kwindi hohuku, ilaña nikwawanyanindi. Hakwila atambuli chuma chajimbesheliyi Adama, Yesu wahanini wumi windi wawanina kwikala mulambu. Hadiñayi hanu hamaseki, Yesu “hakoñelihu nshidiku, nawa mukanwa kindi hiyawaninimu makudiku.” (1 Pet. 2:22) Hampinji yafwileñayi Yesu, wumi windi wawanina wesekeni chikupu nawumi wajimbesheliyi Adama.—1 Kor. 15:45; 1 Tim. 2:6. w24.01 10 ¶5-6

Hanyima yakwila Yesu anamusañuli dehi, weñilili Mwajila Chikupu mwamutembeli yakuspiritu. Ichi tunateli kumona wunsahu wunakumwekesha hatooka chabadika ntanjikilu yaYehova yakudifukula kwalala yashindamena hamulambu wefutu danyiloña nihawupristu waYesu Kristu. Kapristu muneni muIsarela weñilileña Mwajila Chikupu mwakutuña kudi antu nanyilambu yamashi awayimuna, ilaña Yesu weñilili “mwiwulu mwamweni,” mwabadika maluña ejima kujila, nakwimana kumesu aYehova. Mwiwulu wahanini wuswa wamwinkeliwu wakushakama hamaseki neyi muntu wawanina kukoola etu “kulonda yafumishihu nshidi kuhitila mukudilambula yomwenindi.” (Heb. 9:​24-26) Chili kuchiñeja kwetu kwakuya mwiwulu indi kwiji kwakushakama hamaseki, wejima wetu tunateli kudifukula kudi Yehova mutembeli yindi yakuspiritu. w23.10 28 ¶13-14

Toñojokenu hamudimu wukwetiyi Yesu mumawulu hamu neyi Mwanta wetu wunakuyuula nawa Kapristu Muneni wukweti wushona. Kuhitila mudi yena, tunateli kuswina kwakwihi “netanda daNzambi daluwi lwasweja” mukulomba nakumulomba netu atutiyili luwi nawa atukwashi “hampinji yatelela.” (Heb. 4:​14, 15) Dichi mpinji yejima tutoñojokeña hayuma yatwililawu kudi Yehova niYesu niyinakutwililawu chayinu mpinji. Kukeña kwatumwekeshelañawu kutushiki hamuchima chikupu nawa kutusañumuni hampinji yitunakumukalakela Yehova. (2 Kor. 5:​14, 15) Njila yimu yitwamwekeshelañamu kusakilila hikukwasha antu kwikala aYinsahu jaYehova nikwikala atumbanji twaYesu. (Mat. 28:​19, 20) Ichi dichuma cheliliyi kapostolu Pawulu. Welukili nindi Yehova wakeñaña nindi “antu ejima ayamwini nawa eluki chalala chikupu.”—1 Tim. 2:​3, 4. w23.10 22-23 ¶13-14

Hampinji yitunakushimwina antu, etu amavulu twazatishaña iyi nsañu yamuBayibolu yakukundeja yahosha hachakekala chihandilu muParadisa. Tunateli kuyikwasha ñahi akwetu, kushilahu ninetu aweni, kukuhwelela netu yuma yayiwahi yashimunawu haChimwekeshu 21:​3, 4 yakashikijewa? Yehova hakuminini hohu dakukana ichi chikaninu chakukundejaku, ilaña washimwini niyuma yaleteshaña tukuhweleli munichi chikaninu. Mumavasi analondelihu twawanañamu yuma yaleteshaña tukuhweleleña muchikaninu chaYehova chahosha haParadisa. Twatañañamu netu: “Owu washakamini hetanda wahosheli nindi: ‘Talaña! Inakubalumuna yuma yejima yiikali yayiha.’ Cheñi wahosheli nindi: ‘Sonekaku, muloña awa mazu atelela kuyikuhwelela nawa alala.’ Nawa wanlejeli nindi: ‘Anashikijewi dehi! Yami Alefwa nawa Omega, yami kutachika nawa yami insa.’”—Chim. 21:​5, 6a. w23.11 3 ¶3-5

Kansi weyala wamwekeshaña nindi wukweti wuswa wakutoñojoka chiwahi kuhitila mukutonda chiwahi yuma yavwalañayi nichatela kumwekanayi. Kakavulu, nyitapu yayakuvwala ayituñaña nikuyitiyakesha kudi antu abulaña kudifukula kudi Yehova hela akweti yilwilu yatama. Yitoñojoka yawu yatama yamwekenaña munyitapu yayakuvwala yatuñañawu yakwataña hamujimba hela yamwekeshaña amayala neyi ambanda. Kansi weyala wunakukeña kwikala mukaKristu wapama neyi nakutonda yakuvwala, wukwiteja yishina yamuBayibolu kumulombola nawa wukwimbujolaña amanakwetu avwalaña nakalemesha muchipompelu. Nateli kudihula nindi: ‘Komana yakuvwala yinavwalaña yamwekeshaña nawu natoñojokaña chiwahi nawa natoñojokelañaku akwetu? Nvwalilu yami yaleteshaña antu kushikena kwiluka nawu nidi kambuña aNzambi?’ (1 Kor. 10:​31-33) Kansi weyala wukweti wuswa wakutoñojoka chiwahi, amulemeshaña kudi amanakwindi niahela kushilahu niTata yindi wamwiwulu. w23.12 26 ¶7

Kunyima, “mwanta wakukabeta kakuchidiilu” walukukileña antu jaYehova. (Dan. 11:40) Chakutalilahu, hampinji yaNjita yaKaayi Yatachi niYamuchiyedi, amanakwetu amavulu ayishili mutuleya muloña wakubula kudiñija munsañu jamatuña nachiyuulu nawa anyana kawaYinsahu amakwawu ayihañili kumashikola muloña wachuma chochimu. Hela chochu, muyaaka yinahitihu, kashinshi kawantu jaYehova ashakamaña muchiyuulu chaniwu mwanta kadiña mukweseka. Chakutalilahu, hampinji yakuvota, mukaKristu nateli kwikala mukweseka kwakuhakwilaku izanvu dimu damapolitiki hela muntu wumu. Hanateli kuya nakuvotaku; ilaña muyitoñojoka nimumuchima windi nakuhakwilaku kabadi kamu. Dichi chalema kubula kudiñija munsañu jamapolitiki muyuma yitwelaña, muyitoñojoka yetu nichitwatiyaña!—Yow. 15:​18, 19. w23.08 12 ¶17

Hampinji yitunakutemuka lufuchi lwakuwumi, twatela ‘kutemuka chakwila twakatambwili wufwetu.’ (1 Kor. 9:24) Yesu wahosheli nindi tunateli “kulema nakusweja kuda, kusweja kunwa nikwakama kwamuwumi.” (Luka 21:34) Iji nsona ninsona jikwawu jinateli kuyikwasha kwiluka yuma yimwatela kuhimpa hampinji yimunakutemuka lufuchi lwakuwumi. Twatela kukuhwelela netu tukutwesha kutemuka lufuchi lwakuwumi nakutambwila wufwetu muloña Yehova wukutwinkaña ñovu yitwakeñaña. (Isa. 40:​29-31) Dichi, bayi mufunta hanyimaku! Imbujolenu kapostolu Pawulu watemukili lufuchi kulonda atambwili wufwetu wamushiikiliwu. (Fwili. 3:​13, 14) Kwosi wunateli kuyitemukilaku ilu lufuchiku, ilaña nawukwashu waYehova mukutwesha. Yehova nateli kuyikwasha kusenda yiteli nakunata yuma yalema yamukunkulwayi. Neyi Yehova wudi kukabadi kenu, mukutwesha kutemuka lufuchi nakuumika nikutambwila wufwetu! w23.08 31 ¶16-17

Yesu hadiñayi nayaaka 12, anvwali jindi hafuntileñawu yena washalili kuYerusalema. (Luka 2:​46-52) AYosefu naMariya ateleleli kumona nawu anyanawu ejima adi hamu nawena hampinji yafuntileñawu kwitala kufuma kuchawija. Nkumininaku, chelili aYosefu naMariya amuwani Yesu, Mariya wamwinkelimu nyiloña hakuyikabisha! Yesu wadi kuyileja nindi wena diwu aluwañesheli. Ilaña wayakwili anvwali jindi munjila yayiwahi nawa yakavumbi. Hela chochu, aYosefu naMariya “hiyelukili mwatalishili mazu ayilejeliyiku.” Ilaña, Yesu “watwalekelihu kuyovwahila.” Enu atwansi, komana chayikalilahu dehi kwovwahila anvwali jenu neyi analuwañeshi hela neyi anatiyishishi wanyi mumunatalishi? Yumanyi yinateli kuyikwasha? Toñojokenu chatiyañayi Yehova. Bayibolu yahoshaña nawu neyi mwovwahilaña anvwali jenu, “chumichi dichamutiyishaña Mwanta kuwaha.” (Kol. 3:20) Yehova weluka nindi mpinji jikwawu anvwali jenu atiyishishaña wanyi mumunatalishi, nawa weluka nindi mpinji jikwawu atuñaña nshimbi jinateli kuyikalila enu kwovwahila. Hela chochu, neyi muyovwahila, mukumuzañalesha. w23.10 7 ¶5-6

Mukwetu mutwatañilaña nateli kuhosha nindi aYinsahu jaYehova atela kuhimpa yitoñojoka yawu kutalisha hachamonañawu wutumwa. Twatela kumukolesha netu twalemesha wuswa wukwetiyi muntu-himuntu wakudifuukwila yuma yinakukeñayi. (1 Pet. 2:17) Kuhiñahu, tunateli kumuleja chalemena kuzatisha nshimbi jamuBayibolu. Neyi muntu natutaadikishi chikupu, hitwatela kunyakala kutoñojoka netu tuneluki yuma yakuhwelelayiku. Chakutalilahu, indi neyi mukwenu mumwatañilaña ahosha nindi kumukuhwelela Nzambi hiwusupi? Komana mukutoñojoka nenu wakuhwelela chikupu nindi yuma yadileñeli yayeni nawa weluka yuma yayivulu haniyi nsañu? Kafwampi, hadaha nakutoñojoka hohu hayuma yatiyiliyi. Hadaha munateli kumulejaku nsañu yidi ha jw.org yahosha hayileñaleña. Hekwawu mukuhita kwampinji wukukeña nindi muhanjeki nindi hachibaaba hela vidiyo yawaniniyi haniyi webusayiti. Mwamweni, kwakula munjila yakalemesha kunateli kumuletesha kuhimpa yitoñojoka yindi. w23.09 17 ¶12-13

Twatela kukuhwelela chikupu netu Yehova wukutuzatisha nikutukiswila ninetu hela chakwila tunakoñi yiluwa, chakala hohu neyi tuzata nañovu nakuhimpa yilwilu yetu nikutwalekahu kumushindamena. (Yish. 28:13) Samusoni hadiña wawaninaku; ilaña walekeli wanyi kuzata nañovu kumukalakela Yehova, nihanyima yakukoña chiluwa muloña waDelila. Nawa Yehova watwalekelihu kumuzatisha. Nzambi wamuzatishili cheñi Samusoni munjila yakuhayamisha. Yehova watwalekelihu kumumona nindi hiiyala wadiña nachikuhwelelu chikupu nawa wamushili hakachi kamajina awantu ashinshika ekala muAHeberu kapetulu 11. Twakoleshewaña chikupu hakwiluka netu twakalakelaña Tata wamwiwulu wukweti kukeña wafwilaña kutukolesha, sweje-e neyi tunazeyi! Dichi neyi cheliliyi Samusoni, tumulembeleleña Yehova netu: “Mwani ñanukihu, [nawa] nkoleshi.”—Anso. 16:28. w23.09 7 ¶18-19

Chineli tweluka chikupu netu ifuku daYehova didi kwakwihi nakwinza, twazataña nañovu kushimwina antu nsañu yayiwahi. Hela chochu, mpinji yikwawu kudi yuma yinateli kuletesha tushintajali kuhosha. Muloñadi? Tunateli kutiya antu woma. Dichuma chamumwekeneni Petulu. Hawufuku wamwinkeleñawu Yesu nyiloña, Petulu wakaanini nindi wadiña kambanji kaYesu wanyi nawa watwalekelihu kukaana nindi wamwilukili wanyi. (Mat. 26:​69-75) Hela chochu, iwu kapostolu walekeli kutiya woma, nawa mukuhita kwampinji wasonekeli nindi: “Bayi mutiya woma yuma yatiyañawu wena womaku, hela bayi muluwankanaku.” (1 Pet. 3:14) Mazu aPetulu anakutukwasha kwiluka nawu tunateli kuleka kutiya antu woma. Chumanyi chinateli kutukwasha kuleka kutiya antu woma? Petulu watuleja nindi: “Mujilikenuña Kristu neyi Mwanta munyichima yenu.” (1 Pet. 3:15) Chumichi munabombeli kutoñojoka chikupu hachifulu niñovu jikwetiyi Mwanta wetu, Kristu Yesu. w23.09 27-28 ¶6-8

Twatela kutwalekahu kulwisha nayuma yinateli kutuletesha “kukoña nyidimu yamukunkulwayi yamumwidima.” (Efwe. 5:11) Chalala chidi chakwila nawu neyi muntu asweja kutala, kutiyilila hela kuhosha hayuma yamajilu, dikwila nawu yuma yawuzondu, chikwikala chaswayi muntu wamuchidiwu kukoña chuma chatama. (Kutach. 3:6; Yak. 1:​14, 15) Kaayi kaSatana kafwilaña kutudimba kulonda tukuhweleli netu yuma yatenañayi Yehova nindi yawuzondu nawa yamajilu, hiyatama hela hantiku. (2 Pet. 2:19) Kafuta kamu kanazatishiyi Diyabolu hadi yaaka yayivulu kakukeña kuluwañesha antu kulonda akañanyi kwiluka chaambu chidi hakachi kayuma yaloña nayuma yatama. (Isa. 5:20; 2 Kor. 4:4) Dichaleteshaña mumafwilimu amavulu, yuma yatalishañawu hamaTV, niyatudikañawu hamawebusayiti yitiyakesheña nsañu yaditaadikishaña nanshimbi jaYehova jaloña! Satana wafwilaña kutudimba kulonda tutoñojokeña netu yaaku niyilwilu yawuzondu hiyinateli kutuletela kukalaku.—Efwe. 5:6. w24.03 22 ¶8-10

Tabanaka yadiña neyi itenti dasendeleñawu kudi aIsarela hakusambila kwejima kwayileñawu. Ayizatishili kwakwihi nayaaka 500 kushika nimpinji yatuñiliwu tembeli muYerusalema. (Kwid. 25:​8, 9; Kuch. 9:22) Tabanaka didadiña iluña kwayileñawu aIsarela nakuhana nyilambu yawu nikudifukula. (Kwid. 29:​43-46) Hela chochu, tabanaka yemeneneñaku cheñi chuma chasweja kubadika. Yadiña “mwevulu wayuma yamwiwulu,” nawa yemeneneñaku tembeli yeneni yakuspiritu yaYehova. Kapostolu Pawulu wahosheli nindi “idi itenti [hela netu, tabanaka] hichinjikijilu chayuma yinakumwekana hayinu mpinji.” (Heb. 9:9) Dichi hampinji yayisonekeleliyi aHeberu, tembeli yakuspiritu adiña ayiluka dehi kudi akaKristu. Yekaliliku mu 29 C.E. Muchina chaaka, Yesu amupapatishili nawa watachikili kukalakela mutembeli yakuspiritu hamu neyi “kapristu muneni wabadika” waYehova.—Heb. 4:14; Yilw. 10:​37, 38. w23.10 25-26 ¶6-7

Hakwila tutwalekihu kumukalakela Yehova, ninetu twatela kwikala amwovu, adiloñesha kuhimpa. Tunateli kwila ñahi mwenimu? Twatela kwikala amwovu kuhitila mukuhimpa kwesekeja nachidi yuma muchihandilu chetu nikulemesha yitoñojoka yawakwetu nimunafuukuliwu. Etu ambuña aYehova twatela kwikala amwovu. Twatela cheñi kwikala adizoza nawa akweti wushona. Yehova amutenaña nawu “hiIlola” muloña wekala wakola mbe-e nawa haswijewañaku. (Kuhit. 32:4) Ilaña, wekala cheñi wamwovu. Yuma chiyinakuhimpika mukanu kaayi, Nzambi yetu natwalekihu kuhimpa kulonda ashikiji nkeñelu yindi. Yehova waleñeli antu muchifwanisha chindi nawuswa wakuhimpa kwesekeja nachidi yuma. Watwinkaña yishina yamuBayibolu yatiyakana yatukwashaña kufuukula chachiwahi hela chakwila tunamoni kukala kwamuchidinyi. Yuma yelayi Yehova niyishina yatwinkayi yamwekeshaña hatooka nawu hela chakwila “hiIlola,” Yehova wekala cheñi wamwovu. w23.07 20 ¶1-3

MuBayibolu, Yehova wadesekeja namama yawantu wakamenaña mwanindi chiwahi. (Isa. 66:​12, 13) Fwikijenu mama yawantu nakumwekeshela mwanindi wanyanya kukeña nawa nakumwakamena chachiwahi. Neyi tunakumona kukala, twakuhwelelaña netu Yehova wukutumwekeshela kukeña. Neyi tunakoñi chuma chatama, walekaña wanyi kutukeña. (Mas. 103:8) Muza waIsarela watwalekelihu kukoña yuma yatama yamuneñesheleña Yehova; hela chochu, yena watwalekelihu kumwekeshela antu jindi abalumukileña munyichima kukeña kwabulaña kumana nanawa mazu akwila nawu: “Wekalili walema kumesu ami, nakulemesheli nawa nakukeñi.” (Isa. 43:​4, 5) Kukeña kwaNzambi hikwahimpikaku. Hela chakwila tunakoñi nshidi yahamesu bwi-i, neyi tubalumuka mumuchima nakufunta kudi Yehova, wukutwalekahu kutumwekeshela kukeña. Watushiika nindi “yena [wukutwanakena] nankashi.” (Isa. 55:7) Bayibolu yashimuna nawu kutwanakena muniyi njila kukuletesha “Yehova yomweni [atunookeshi].”—Yilw. 3:19. w24.01 27 ¶4-5

Yehova nateli kutukwasha neyi tunakuhita mukukala. Chakutalilahu, neyi tulomba kudi mukulumpi wetu wamudimu kulonda atwiteji kuya kukupompa kweluña hela tulomba netu atuhimpiku mudimu wukutushilañaku mpinji yakuyaña kukupompa kwetu kwejima, tunateli kumona Yehova chinakutukwashayi muchihandilu chetu. Munateli kufuma yuma yayiwahi yitwabula nikukuhwelela. Chikufumamu, tukusweja kumukuhwelela Yehova. Ezera walombeli kudi Yehova kulonda amukwashi. Mpinji yejima yaswejeleñayi kwakama muloña wanyidimu yazatileñayi, Ezera walombeleña kudi Yehova. (Ezera 8:​21-23; 9:​3-5) Chilwilu chamwekesheliyi Ezera chaletesheli antu adiñayi nawu kumukwasha nikwimbujola chikuhwelelu chindi. (Ezera 10:​1-4) Neyi tutachika kusweja kwakama hayuma yakumujimba hela hachakukiña chisaka chetu, twatela kumulejamu Yehova mukulomba. w23.11 18 ¶15-17

Yehova wahosha wanyi nindi hakwila atuteni nawu twaloña twatela kwila yuma yejima yeliliyi Abarahama. Kafwampi, kudi njila jajivulu mutunateli kumwekeshela netu tukweti chikuhwelelu kuhitila munyidimu yetu. Tunateli kutambwila amaha muchipompelu, kukwasha amanakwetu niahela anakaankili chikupu nikwilila amuchisaka chetu yuma yayiwahi, yuma yejimiyi yikumutiyisha Nzambi kuwaha nawa wukuyikiswila. (Rom. 15:7; 1 Tim. 5:​4, 8; 1 Yow. 3:18) Sweje-e dinu, mudimu walema nankashi mutwamwekeshelaña chikuhwelelu chetu hikudikita chikupu mumudimu wakulejaku antu nsañu yayiwahi. (1 Tim. 4:16) Wejima wetu tunateli kumwekesha muyuma yitwelaña netu twakuhwelela netu yikaninu yaYehova yakashikijewa nawa njila jindi jajiwahi nankashi. Neyi twila mwenimu, tukukuhwelela chikupu netu Nzambi wukutumona nindi twaloña nawa wukututena nindi tudi amabwambu jindi. w23.12 2 ¶3; 6 ¶15

Hadiñayi kwakwihi nakufwa, Mwanta Davidi wamulejeli Solomoni mazu adi munsona yalelu. (1 Anya. 2:​1, 3) Makonu amayala akaKristu ejima elaña chiwahi neyi azatisha iku kufumba. Hakwila eli mwenimu, atela kwovwahila nshimbi jaNzambi nikuzatisha yishina yamuBayibolu muyuma yejima yelañawu muchihandilu chawu. (Luka 2:52) Muloñadi chichalemena amanakwetu atwansi kwikala amayala akaKristu apama? Iyala mukaKristu wazataña nyidimu yalema muchisaka nimuchipompelu. Chakadi nikujina, enu amanakwetu atwansi mwatela mwatoñojokahu dehi hanyidimu yimwakazataña kumbidi. Hadaha munateli kwimika chikonkwanyi chakuzata mudimu wampinji yejima, kwikala nkoñi wakuzatila nawa mukuhita kwampinji mukulumpi muchipompelu. Munateli cheñi kufuukulahu kusumbula nikwikala nawanyana. (Efwe. 6:4; 1 Tim. 3:1) Hakwila mushikiji iyi yikonkwanyi nikwila mumunafuukuli, mwatela kwikala mukaKristu wapama. w23.12 24 ¶1-2

Akulumpi akaKristu ayinka mudimu wakwakamena nyikoku yaYehova. Awa amayala adihana alemesha mudimu wawu wakukalakela amanakwawu niahela, nawa azataña nañovu kwikala ‘atubiña . . . abiñaña chachiwahi.’ (Yere. 23:4; 1 Pet. 5:2) Twasakililaña chikupu hakwikala nanawa amayala muyipompelu yetu! Akulumpi anateli kudizila kudi Nsompeshi Gidiyoni. (Heb. 6:12) Wadiña nakukiña nikuyibiña antu jaYehova. (Anso. 2:16; 1 Kushi. 17:6) Kufwana Gidiyoni, akulumpi ayitonda kulonda akameneña antu jaNzambi mumpinji jakala. (Yilw. 20:28; 2 Tim. 3:1) Tunateli kudizila kudi Gidiyoni chadiñayi wadikehesha, wadizoza nawa wovwahila. Kuumika kwindi kwadiña mukweseka hampinji yazatileñayi nyidimu yamwinkeliwu. Chili tudi akulumpi hela nehi, twatela kudiza chakumwekesha kusakilila kudi akulumpi. Tunateli kukwasha awa amayala adikita.—Heb. 13:17. w23.06 2 ¶1; 3 ¶3