March

Kaayi kakaha kanda kenzi. Hela chochu, toñojokenu hayuma yimu yekalaku, chidi neyi tutumbwa, nyitondu, anyama niantu. Kwosi wunateli kujinoka nindi iyi yuma yejima yekalaku wanyi, hela chakwila kwadiña mpinji yimu yadiñaku wanyi. Yekalaku muloña Yehova diyi wayileñeli. (Kutach. 1:​1, 26, 27) Nzambi yetu cheñi wafuukula dehi kuleta kaayi kakaha. Wakela mwafuukulayi. Mukaayi kakaha, antu akashakamaña haya nyaaka nawa akola kumujimba. Hampinji yatoñolayi dehi Nzambi, kaayi kakaha kakekalaku neyi chiyekalaku yuma yamumawulu niyahamaseki yitwamonaña. (Isa. 65:17; Chim. 21:​3, 4) Chayinu mpinji, zatenuña kwesekeja nahakumina ñovu jenu kulonda mukolesheña chikuhwelelu chenu. Mwekeshenuña kusakilila hefutu danyiloña. Toñojokenuña chikupu hañovu jaYehova. Ilenuña yuma yakuspiritu. Neyi mwilaña yumiyi, mukwikala hakachi kawantu “akaswana yuma yakanawu muloña wachikuhwelelu nikudiwunjika kwawu.”—Heb. 6:​11, 12. w23.04 31 ¶18-19

Yesu nafumbuli mesu indi mwiwulu nakulomba hamesu awantu amavulu. Nakukeña mpuhu yejima yiyi kudi Yehova hachuma chinakukeña kumwekana. Kufumahu Yesu nabidiki nindi: “Lazaru, idikakumu!” (Yow. 11:43) Nawa Lazaru hakwidika mwijamu. Yesu neli chuma chatoñojokañawu antu amakwawu nawu chikutwesheka wanyi. Iyi nsañu yatukwashaña kukuhwelela chikupu mukuchiñeja kwakusañuka. Munjilanyi? Anukenu Yesu chamukaniniyi Mata nindi: “Manakweyi wukusañuka.” (Yow. 11:23) Kufwana Tata yindi, Yesu nakufwila kwilamu nawa wukweti ñovu yakushikija ichi chikaninu. Madilu awulumwiniyi amwekesheli nawu wakeñeshaña kufumishahu kufwa nichineñi chenzaña muloña wakufwa. Nawa mpinji yafuminiyi Lazaru mwijamu, Yesu wamwekesheli nindi wukweti ñovu yakusañula afu. Toñojokenu cheñi hamazu aYesu amwanukishiliyi Mata munsona yetu yalelu. Tukweti wunsahu wawuvulu wukuletesha tukuhweleli netu chikaninu chaNzambi chakusañula antu chakashikijewa. w23.04 11-12 ¶15-16

Tunateli kuhimpa yuma yitwalombaña neyi twiluka chiwahi nkeñelu yaYehova. Twatela kwanukaña netu Yehova wukweti nkeñelu, nawa wakayishikija hampinji yatoñolayi dehi. Iyi nkeñelu munabombeli kumanisha nikufumishahu chikupu kukala kwejima kwaleteshaña antu akabakaneña nankashi, kukala kudi neyi wubanji wadimwekenaña, yikatu nikufwa. Yehova wakashikija nkeñelu yindi kuzatisha Wanta windi. (Dan. 2:44; Chim. 21:​3, 4) Hela chochu, chayinu mpinji Yehova namwiteji Satana kuyuula kaayi. (Yow. 12:31; Chim. 12:9) Neyi Yehova afumishahu kukala kunakumonawu antu chayinu mpinji, chadi kumwekana neyi Satana nakuyuula chiwahi kaayi. Dichi hela chakwila twatela kumutalila Yehova hakwila akashikiji yikaninu yindi yimu, ichi hichinatalishi mukwila nawu watushiya chisayikilaku. Yehova wakatukwasha. w23.05 8 ¶4; 9-10 ¶7-8

Tunateli kukwasha ñahi amakwawu kulonda akahetelimu kuChanukishu? Chakadi nikujina, chuma chatachi, hikuyitambika kuChanukishu. Kubombela hakutambika antu itwawanaña mpinji yejima mumudimu wakushimwina, tunateli kusonekahu majina awantu itweluka kulonda tuyitambikiku niwena. Mudi awa antu munabombeli antaña jetu, antu itwazataña nawu, akwetu akashikola niantu amakwawu. Hela chakwila tudana makopi akupulinta amavulu ayipapilu yakutambika nachu antu, amakwawu tunateli kuyitemeshela malinki hamafoni. Mukukasumuka antu amavulu anenzi! (Mukwa. 11:6) Anukenu nenu, hadaha anateli kwikala namalwihu akukeña kutwihulawu kutalisha haChanukishu, sweje-e neyi kanda apompeñahu dehi nanetu. Tukwila chiwahi neyi tutoñojokela chadimu hamalwihu anateli kutwihulawu nikwiluka chitwatela kuyakula. Nihanyima yakwila anapompi dehi Chanukishu, antu akweti mpwila yakudiza chalala anateli kwikala namalwihu amakwawu. Twatela kuzata hakumina ñovu jetu henohu Chanukishu kanda, hampinji yaChanukishu nihanyima yaChanukishu kulonda tukwashi antu adi “nanyichima yashinshika” kuhetela munichi chidika.—Yilw. 13:48. w24.01 12 ¶13, 15; 13 ¶16

Bayibolu yashimuna antu 8 asañwiliwu nakwikala cheñi nawumi hanu hamaseki. Komana kwila mwikala nampinji yakudiza chikupu hansañu yahosha hadi awa antu asañwiliwu nehi? Chimukudizaña, talenu yuma yalema yimunateli kudizilaku. Toñojokenu hansañu yamuntu-himuntu asañwiliwu chiyinakumwekesha nawu Nzambi wafwilaña kwilamu nawa wukweti ñovu yakusañula afu. Chasweja kubadika, toñojokenu hakusañuka kwalema chikupu, kwaYesu. Anukenu nenu hampinji yamusañwiliwu Yesu antu amavulu amweni chumichi, nawa dichatukwashaña kukuhwelela chikupu netu kwakekala kusañuka. (1 Kor. 15:​3-6, 20-22) Twasakililaña nankashi hachikaninu chaYehova chakusañula antu! Twatela kukuhwelela netu ichi chikaninu chakashikijewa, muloña Yehova wafwilaña kwilamu nawa wukweti ñovu yakushikija ichi chikaninu. Dichi tufwileña kutwalekahu kukolesha chikuhwelelu chetu muniku kuchiñeja kwakuwahi. Neyi twila mwenimu, tukuswina chikupu kwakwihi naNzambi watukana hamuntu-hamuntu nindi, ‘Antu iwakeña akasañuka!’—Yow. 11:23. w23.04 8 ¶2; 12 ¶17; 13 ¶20

Kudikehesha nikudizoza hiyilwilu yadifwana chikupu. Twamwekeshaña netu twadikehesha kuhitila mukubula kutoñojoka nankashi hadi etu aweni nawa tweluka netu kudi yuma yitunateli kubula kutwesha. Twamwekeshaña netu twadizoza kuhitila mukumona akwetu netu atubadika. (Fwili. 2:3) Kakavulu, muntu wadizoza wekalaña cheñi wadikehesha. Gidiyoni wadiña iyala wadikehesha nawa wadizoza. Kañelu kaYehova chamulejeliyi Gidiyoni nindi anamutondi kulonda amwini aIsarela kudi aMidiyani añovu, iwu iyala wadizoza waakwili nindi: “Mutaña wami diwakuminamu mudi Manasi, nawa yami wabula kulema nankashi mwitala datata yami.” (Anso. 6:15) Wamweneña nindi washikilamu wanyi kuzata iwu mudimu, ilaña Yehova welukili nindi wukutwesha. Nawukwashu waYehova, Gidiyoni watwesheli kumanisha mudimu wamwinkeliwu. Akulumpi azataña nañovu kwikala adikehesha nikudizoza muyuma yejima. (Yilw. 20:​18, 19) Hiyaditiyaña hayuma yinateli kuzatawu niyazatawuku; nawa hiyatoñojokaña nawu amukunkulwayi muloña watuyiluwa twakoñañawuku. w23.06 3 ¶4-5

Kumuchika Satana kumutu kukamwekana hanyima yayaaka kubadika 1,000. (Chim. 20:​7-10) Henohu chumichi kanda chimwekani, Bayibolu yashimwineñahu dehi yuma yinakumwekana yinakukankisha iseki. Chatachi, nyuza yakabidika nawu “kuwunda nikukiñewa!” (1 Tes. 5:​2, 3) “Hohenohu,” lukadi lwasweja lwakatachika hampinji yakalukuka nyuza kudifukula kwejima kwakutwamba. (Chim. 17:16) Hanyima yachumichi, Yesu wakasompesha antu, wakaambula anyikoku nawampembi. (Mat. 25:​31-33, 46) Hela chochu, Satana wakaduñumika hohu wanyi. Chineli wahela nankashi antu jaNzambi, wakasañumuna nyuza yakadibomba hamu yatenaña Bayibolu nawu Gogi wakwituña daMagogi kulonda akalukuki akakudifukula aYehova alala. (Ezek. 38:​2, 10, 11) Hampinji yimu, awayishewa akashalahu akayipompesha mwiwulu nakudibomba hamu naKristu ninjita yindi yamwiwulu kulonda akazuñi njita yaAmagedoni, njita yakamanisha lukadi lwasweja. (Mat. 24:31; Chim. 16:​14, 16) Kufumahu dinu, dihakatachika kuyuula Chiyuulu chaKristu chaYaaka Ikombakaji hanu hamaseki.—Chim. 20:6. w23.10 20-21 ¶9-10

Makonu ambuña aYehova amavulu ashakamaña mumatuña mwalekeshawu mudimu wetu. Kufwana Obadiya, awa amanakwetu niahela itwakeña hiyalekaña kudifukula kudi Yehovaku, hela chakwila atwalekañahu kulemesha akawuswa. (Mat. 22:21) Amwekeshaña nawu amutiyaña Nzambi woma kuhitila mukumwovwahila chatela ovwahileña antu. (Yilw. 5:29) Elaña mwenimu kuhitila mukutwalekahu kushimwina nsañu yayiwahi nikupompa hamu mukuswamujoka. (Mat. 10:​16, 28) Azataña nañovu kulonda amanakwawu niahela atambwileña yakuda yakuspiritu yayivulu. Talenu chuma chelileñayi manakwetu Henri, washakamaña mwituña damuAfrica mwalekesheliwu mudimu wetu hakapinji kantesha. Hampinji yalekesheliwu mudimu wetu, manakwetu Henri wadihaninihu kutwalila akwawu aYinsahu nyikanda yashindamena haBayibolu. Wasonekeli nindi: “Nekala nansonyi. . . . Yehova . . . diwankashili kwikala wahamuka.” Komana ninenu munateli kwikala ahamuka neyi chahamukiliyi manakwetu Henri? Munateli, neyi mumutiyaña Nzambi woma munjila yayiwahi. w23.06 16 ¶9, 11

Chelili aAdama naEva anadikañi dehi, hadaha chamwekeni neyi Satana wakañesheli nkeñelu yaNzambi yakwinzesha iseki nawantu awanina nawa ovwahila. Hadaha Satana watoñojokeli nindi Yehova hadi kutwesha kuhemba chikaninu chindiku. Hekwawu watoñojokeli nindi Nzambi wukuyijaha aAdama naEva nakuleña adisumbula acheñi kulonda ashikijilimu nkeñelu Yindi kutalisha hadi antu. Ilaña neyi Nzambi welili chumichi, Diyabolu wadi kumutena nindi hisakutwamba. Muloñadi? Muloña, neyi chashimunawu haKutachika 1:​28, Yehova wayilejeli aAdama naEva nindi anyanawu akenzesha iseki. Indi kwiji Satana watoñojokeli nindi Yehova wukuyiteja aAdama naEva kuvwala anyana abula kuwanina akabula kushikilamu kwikala awanina. (Mukwa. 7:20; Rom. 3:23) Neyi yuma yamwekeni muniyi njila, chakadi nikujina, Diyabolu wadi kumwinkamu Yehova muloña nindi nakañanyi kushikija chikaninu chindi. Muloñadi? Muloña chumichi chadi kumukañesha Yehova kushikija nkeñelu yindi, yakwinzesha Paradisa yakekala hamaseki nawanyana kaAdama naEva awanina nawa ovwahila. w23.11 6 ¶15-16

Yehova watwinkaña nshimbi jatiyakana kuhitila Mwizu dindi nimukuloñesha kwindi. Kwosi chuma chikuletesha tubombeli nshimbi jetu kunshimbi jatwinkañayi. (Yish. 3:​5-7) Dichi, hitwabadikaña hayuma yasonekawu muBayibolu hela kutuñila akwetu akakwitiya nshimbi kwesekeja nachitunakutoñojokaku. Satana wazatishaña “ntañishilu yamukunkulwayi” “[niyuma] yawansi yamukaayi” kulonda aluwañeshi nikwambula antu. (Kol. 2:8) Mumafuku awapostolu, muniyi yuma mwabombeleli maana awantu ashindameneni hayitoñojoka yawantu, hantañishilu yawaYudeya yabulili kwikala yamunsona nihantañishilu yakwila nawu akaKristu atela kwovwahila Nshimbi jaMosi. Iyi yitoñojoka yadiña yakutwamba muloña yaletesheleña antu aleki kusha muchima kudi Nsulu yamaana alala, Yehova. Makonu, Satana wazatishaña maprogilamu ahayikunzulemba niintaneti kulonda ataandishileñamu mbonji ninsañu yakutwamba yahoshañawu kudi anlomboli jamapolitiki. w23.07 16 ¶11-12

Yehova wamanishili kukala kwakudikaña kwaSatana nikwawantu akusambila munjila yamuhayamishili nankashi Satana. Chatela adimwekeshi nindi hisakutwamba, Yehova wamwekesheli nindi wahoshaña mwalala kuhitila mukuyiteja aAdama naEva kuvwala anyana. Nawa chatela amwekeshi nindi nakañanyi, Yehova wamwekesheli hatooka nindi kwosi chuma chinateli kumukañesha kushikija nkeñelu yindi. Wahembeli chikaninu chindi kuhitila mukuhana ‘mwana’ wakamwina anyana kaAdama naEva ovwahila. (Kutach. 3:15; 22:18) Satana watela wahayamini nankashi nantanjikilu yaYehova yefutu danyiloña! Muloñadi? Muloña hintanjikilu yashindamena hakukeña kwakufuma hamuchima. (Mat. 20:28; Yow. 3:16) Satana hekala nanichi chilwiluku, muloña wadikeña yomweni. Dichi, chumanyi chakamwekana muloña wantanjikilu yefutu danyiloña? Hakumana kwaChiyuulu chaKristu chaYaaka 1,000, anyana kaAdama naEva awanina nawa ovwahila akashakama muParadisa hamaseki, neyi chochafuukwiliyi Yehova hakusambila. w23.11 6 ¶17

Twovwahilaña lushimbi lwaYehova lwahosha nawu wumi nimashi jajila. Muloñadi? Muloña Yehova wahosha nindi mashi emenañaku wumi, chawaana chalema chafuma kudi yena. (Lev. 17:14) Yehova hayitejeliyi antu kuda mbiji, wayilejeli kubula kuda mashi. (Kutach. 9:4) Wafuntishilihu cheñi ilu lushimbi hampinji yayinkeliyi aIsarela Nshimbi jaMosi. (Lev. 17:10) Nawa walejeli izanvu dalombolaña damumafuku awakaKristu akusambila kushaku lushimbi nawu akaKristu ejima atela ‘kuleka mashi.’ (Yilw. 15:​28, 29) Twovwahilaña chikupu ilu lushimbi neyi tunakufuukula njila yatela kutuukilamu. Cheñi twovwahilaña chikupu nshimbi jaYehova jahoshaña hakubula kwila wuvumbi. Kuhitila mukuzatisha nhoshelu yankinji, kapostolu Pawulu watulejeli ‘kujaha’ yiidi yetu yamujimba, dikwila nawu, kuzata nañovu kulonda tufumishi yilwilu yatama yafwilaña mujimba. Twatondolwelaña kutala hela kwila chuma chidi chejima chinateli kutuletesha kwila wuvumbi.—Kol. 3:5; Yoba 31:1. w23.07 15 ¶5-6

Hadaha chineli Samusoni wamukeñeli Delila nankashi, wakañenyi kwiluka yuma yakeñeleñayi kwila. Tuneluki wanyi chuma chaletesheli, ilaña Delila watwalekelihu kumukanjikija Samusoni kulonda ashimuni kwafumineña ñovu yindi nawa nkumininaku, Samusoni wamulejeli. Chawushona, Samusoni wadikojejeli yomwenindi kwiñila mukukala kwaletesheli ajimbeshi ñovu yindi niwubwambu windi naYehova hakapinji kantesha. (Anso. 16:​16-20) Samusoni wamweni kukala kwakuvulu muloña wakumukuhwelela Delila chatela amukuhweleli Yehova. AFilisitinu amukwatili Samusoni nakumulokola mesu. Amukasilili muGaza, nawa wekalili mukakuhala mbutu wakehelamu. Kuhiñahu amusawishili helili aFilisitinu apompi kuchawija. Amulambwili nzambi yawu wakutwamba Dagoni mulambu weneni, neyi kwiji diyi wamuhanini Samusoni mumakasa awu. Amwidishili Samusoni nakumuleta kuchawija hakwila ayilili “yuma yakusehesha,” kulonda amusehi.—Anso. 16:​21-25. w23.09 5-6 ¶13-14

Hadaha mukwetu mutwazatilaña indi kwiji mutwatañilaña kushikola nakutwihula chaleteshaña twovwahileña nshimbi jimu jamuBayibolu. Tukuzata hakumina ñovu jetu kuhakwilaku yuma yitwakuhwelela, hampinji yoyimu nikulemesha yitoñojoka yamuntu wunakututiyilila. (1 Pet. 3:15) Chachiwahi neyi tumonaña lwihu lunatwihuliyi netu hinjila yikutukwasha kwiluka yuma yalemeshayi, chatela tutoñojokeña netu nakukeña kutufwisha namuloña indi kwiji kututaadikisha. Hichikweti muloña nachuma chinaleteshi owu muntu ehuli olu lwihuku, ilaña tukwila chiwahi neyi tukwakula namuchima wawovu nawa munjila yayiwahi. Ñakwilu yetu yinateli kumuletesha kuhimpa yitoñojoka yindi. Chakutalilahu, neyi mukwetu mutwazatilaña atwihula chitwabulilaña kwanuka mafuku akuvwalika, toñojokenu hachumichi: Komana nakujinoka neyi chakwila atwitejaña wanyi kwikala natupinji twatuwahi twakuzañalela hamu? Chineli hitwanukaña mafuku akuvwalikaku, tunateli kusambila kumuhameka hakwikala namuchima wakwakamena akwawu. Chumichi chikuletesha tuhanjeki chiwahi hachahoshaña Bayibolu kutalisha hamafuku akuvwalika. w23.09 17 ¶10-11

Okukooleka kutukweti kwakuzatisha mpinji yinashaliku kulonda tushimwini antu akunyuza yejima. Kapostolu Petulu watukonkomwenaña ‘kwanuka chikupu’ ifuku daYehova. (2 Pet. 3:​11, 12) Tunateli kwila ñahi mwenimu? Tukwila chiwahi neyi tutoñojokaña hefuku-hefuku nkisu jitwakatambwila mukaayi kakaha. Difwikijenu munakwona mpepela yakadi majilu, munakuda yakuda yayiwahi, munakutambwila antaña niamabwambu anakusañulawu nawa munakudizisha antu adiñaku kunyima oko-o hakushikijewa kwawuprofwetu wamuBayibolu. Kutoñojoka muniyi njila kukuyikwasha kutwalekahu kuchiñilila nikukuhwelela chikupu nenu tunakushakama mumafuku akukuminina. Chineli ‘tunelukili chadimu’ yuma yikamwekana kumbidi, hiyamba ‘katuluwañesha’ kudi antu atañishaña nsañu yakutwambaku. w23.09 27 ¶5-6

Atwansi kakavulu awanikaña nawakwawu “abulaña kwovwahila anvwali.” (2 Tim. 3:​1, 2) Muloñadi atwansi amavulu chabulilañawu kwovwahila? Amakwawu atoñojokaña nawu anvwali jawu hiyanfwikiji. Anyana amakwawu ayilejaña kudi anvwali jawu kwila yuma yabulañawu wena kwila. Atwansi amakwawu amonaña yuma yayilejañawu kudi anvwali jawu nawu yakushankulu, kwila yizatika nehi, hela nawu yayikañeshaña kwila yuma yakeñawu. Neyi wudi kansi, komana nineyi dichiwatiyaña? Atwansi amavulu chayikalilaña kwovwahila lushimbi lwaYehova lwawanikaña munsona yefuku dalelu. Yumanyi yinateli kuyikwasha kuyovwahila? Munateli kudizila kudi Yesu chakwikala ovwahila chikupu. (1 Pet. 2:​21-24) Wadiña wawanina, ilaña anvwali jindi adiña abula kuwanina. Hela chochu, Yesu walemesheleña anvwali jindi hela chakwila analuwañeshi nawa neyi mpinji jikwawu anakañanyi kutiyishisha munatalishiyi.—Kwid. 20:12. w23.10 7 ¶4-5

Kapostolu Pawulu walumbulwili nindi nyilambu yakeñekeleña kwesekeja naNshimbi hiyadi kutwesha kufumishahu nshidi jejimaku. Muloña wachumichi, Nshimbi ‘ajifumishiliku.’ Dichi Pawulu watwalekelihu kudizisha antu chalala chakunama. Wayanukishili akwawu akaKristu “kuchiñeja kwabadika kuwaha” kwashindameneni hamulambu waYesu kwadi kuyikwasha chikupu kuswina “kwakwihi naNzambi.” (Heb. 7:19) Pawulu wayilumbulwilili amanakwindi aHeberu chaletesheli kudifukula kwawu kwawakaKristu kwiikali kwalema nankashi kubadika kudifukula kwadifukwileñawu kunyima. Njila yadifukwilileñamu aYudeya kwesekeja naNshimbi yadiña hohu “himwevulu wayuma yakenza, ilaña yuma yalala yayumiyi yaKristu.” (Kol. 2:17) Mwevulu hichinjikijilu hohu chinakwimenaku chuma chacheni, ilaña bayi neyi mwevulu dichuma chacheniku. Munjila yoyimu, njila mwadifukwilileñawu aYudeya akushankulu yadiña hohu himwevulu wachuma chalala chadiña nakwinza. Twatela kutiyishisha mwatalisha ntanjikilu yatushilaku Yehova yakutwanakenenamu nshidi jetu kulonda tudifukuleña kudi yena munjila yetejayi. w23.10 25 ¶4-5

Danyeli kapetulu 11 kahosha hadi anyanta ayedi, hela nfulumendi jiyedi jadizuñishaña. Neyi twesekeja iwu wuprofwetu nawuprofwetu wukwawu wekala muBayibolu, tukwiluka netu “mwanta wakukabeta kakuchimunswa” hiRussia nimatuña amukwashañaku nawa “mwanta wakukabeta kakuchidiilu” hiAnglo-America Wanta waÑovu muKaayi. Antu jaNzambi ashakamaña muchiyuulu ‘chamwanta wakukabeta kakuchimunswa’ anakuyikabisha kudi iwu mwanta. AYinsahu amakwawu ayetaña nikuyisha mutuleya muloña wayuma yakuhwelelawu. Chatela amanakwetu achiineña, ilaña yuma yelañayi “mwanta wakukabeta kakuchimunswa” yakoleshaña chikuhwelelu chawu. Muloñadi? Muloña amanakwetu eluka nawu kukabishewa kwawantu jaNzambi kwashikijaña mazu awuprofwetu ashimwiniyi Danyeli. (Dan. 11:41) Kwiluka chumichi kunateli kutukwasha kwikala nachikuhwelelu chakola nikutwalekahu kwikala ashinshika kudi Yehova. w23.08 11 ¶15-16

Chineli watukeña, Yehova wanyakalaña kwiluka chitunakutiya nawa wafwilaña chikupu kutukiña. Chamukataña kumuchima neyi amona tunakuhita mukukala. Dichikuletesha tulombi kudi yena netu: “Nkiñi neyi kantu kadisu deyi.” (Mas. 17:8) Disu hichiidi chamujimba chitwakiñaña nankashi nawa chalema. Dichi neyi Yehova atwesekeja nakantu kahadisu dindi, chidi hohu neyi nakuhosha nindi, ‘Wejima wukukatisha enu antu jami, nakukatisha chuma chalema kudi ami.’ Yehova wakeñaña nindi tukuhweleli netu watukeña hamuntu-hamuntu. Ilaña weluka nindi muloña wayuma yatumwekeneni kunyima, tunateli kujinoka neyi chakwila watukeña hela nehi. Indi kwiji tunakuhita mukukala chayinu mpinji kunakuletesha tujinokeña neyi chakwila Yehova watukeña hela nehi. Yumanyi yikutukwasha kubula kujinoka? Neyi twiluka Yehova chamumwekeshelañayi Yesu kukeña, awayishewa niejima wetu. w24.01 27 ¶6-7

Ezera wamweni Yehova chakwashileñayi antu jindi mumpinji yakweseka. Henohu kunashali yaaka yantesha, mu 484 B.C.E., Ezera hadaha wadiña nakushakama muBabiloni hampinji Mwanta Ahasuwerusi yahaniniyi lushimbi lwakujilumuna aYudeya ejima mwahita Wanta wawaPeresi wejima. (Esita 3:​7, 13-15) Wumi waEzera wadiña muwubanji! Muloña waniku kuyichiinisha, aYudeya “mukabeta kejima” ashakamineña chakadi kuda nawa adilileña nakumulomba Yehova nawu ayikwashi. (Esita 4:3) Fwikijenu chatiyili Ezera niaYudeya helili yuma yiyibalumukili ana akasili kafuta kakujilumuna aYudeya! (Esita 9:​1, 2) Yuma yahitilimu Ezera muyina mpinji yakala yatela yamukwashili kwikala wadiloñesha nakweseka kwadi kumwekana kumbidi. Nawa chinamwekani hatooka nawu yumiyi yamukwashili kukuhwelela muñovu jaYehova jakukiña antu Jindi. w23.11 17 ¶12-13

Kapostolu Pawulu wateneneña “nyidimu yamunshimbi,” nshimbi jaMosi jamwinkeliwu haMpidi yaSinayi. (Rom. 3:​21, 28) Chinamwekani neyi akaKristu aYudeya amakwawu amumafuku aPawulu, chayikalilileña kwiteja nawu Nshimbi jaMosi ninyidimu yashimwiniwu muyina Nshimbi yaleka dehi kuzatika. Dichi, Pawulu wahosheli hayuma yeliliyi Abarahama hakumwekesha hatooka nindi kwikala waloña kumesu aNzambi hikwashindamena “hanyidimu yamunshimbiku,” ilaña kwashindamena hachikuhwelelu. Chatukoleshaña muloña kwiluka chumichi kwatukwashaña kukuhwelela netu tunateli kutwesha kwila yuma yamutiyishaña Nzambi kuwaha. Chumichi chinatalishi mukwila nawu tunateli kumukuhwelela Nzambi niKristu, kulonda Nzambi atutiyeña kuwaha. Kwambukaku, nyidimu yashimunawu muYakoba kapetulu 2, bayi neyi “hinyidimu yamunshimbi” yashimwiniyi Pawuluku. Yakoba nakutena nyidimu hela yuma yelañawu akaKristu ifuku niifuku. (Yak. 2:24) Iyi nyidimu diyamwekeshaña neyi chakwila mukaKristu wamukuhwelela chikupu Nzambi hela nehi. w23.12 3 ¶8; 4-5 ¶10-11

Ahela anakutoñojoka kusumbuka, atela kutonda chachiwahi muntu wakwiñila nindi muwulu. Anukenu nenu iyala wakayisumbula diyi wakekala mutu wenu. (Rom. 7:2; Efwe. 5:33) Dichi dihulenu nenu: ‘HimukaKristu wapama? Komana watwamijañaku yuma yakuspiritu muchihandilu chindi? Wafuukulaña chiwahi? Wetejaña neyi naluwañeshi? Walemeshaña ambanda? Komana wakankwashaña kutwalekahu kukolesha wubwambu wami naYehova, kunkeñela yuma yakumujimba nikwikala ibwambu dami wamuwahi?’ Hela chochu, neyi munakukeña kuwana iyala wukweti yilwilu yayiwahi, enu aweni mwatela kusambila kwikala mumbanda wukweti yilwilu yayiwahi. Mumbanda wamuwahi wekala “nkwashi” kudi nfumwindi nawa “wamutelela.” (Kutach. 2:18) Chineli iwu mumbanda wamukeña Yehova, wazataña nañovu kulonda antu amoneña yilwilu yanfumwindi yayiwahi. (Yish. 31:​11, 12; 1 Tim. 3:11) Munateli kudiloñesha kwikala mumbanda watelela kuhitila mukumukeña Yehova chikupu nikukwasha antu amuchisaka chenu nimuchipompelu. w23.12 22-23 ¶18-19

Yehova watushiika nindi wukutwinkaña maana neyi tunakukeña kufuukula mwamuwahi. Twakeñekaña maana aNzambi, sweje-e hampinji yitunakufuukula yuma yakahimpa chihandilu chetu chejima. Cheñi watwinkaña ñovu yakuumika. Neyi cheliliyi nakapostolu Pawulu, Yehova wukutwinka ñovu yakuumika kukala kutunakumona. (Fwili. 4:13) Njila yimu yazatishañayi hiyamanakwetu niahela. Hawufuku wakutwala kwifuku dakulambula wumi windi, Yesu walombeli chikupu. Wamulembeleli Yehova nindi abuli kwiteja antu kutoñojoka nawu himukakasawuntu. Ilaña chatela eli chumichi, Yehova wamukwashili Yesu kuhitila mukumutemeshela manakwindi wumu hakachi kawañelu nakumukolesha. (Luka 22:​42, 43) Yehova nateli kutukwasha ninetu kuhitila mukuzatisha manakwetu hela muhela kututemeshela foni yakutukolesha hela kutuhempula. Wejima wetu twatela kwikalañaku nampinji yakuhosha “izu dadiwahi” kudi akwetu akakwitiya.—Yish. 12:25. w23.05 10-11 ¶9-11

Azeya anenzi kuChanukishu hadaha achiinaña nawu akuyitambwila chiwahi wanyi. Dichi tondolwelenu kuyihula malwihu akuyitiyisha nsonyi hela kuhosha mazu akuyikata kumuchima. Awa amanakwetu niahela hiyakwetu akakwitiya. Twatiyaña kuwaha kudifukwila cheñi hamu nawu! (Mas. 119:176; Yilw. 20:35) Twasakililaña chikupu chatulejawu kudi Yesu nindi twanukeña kufwa kwindi hachaaka-hachaaka, nawa tweluka chumichi chichalemena. Neyi twila mwenimu, tukuhetelamu nawa tukukwasha akwetu munjila jajivulu. (Isa. 48:​17, 18) Twaswejelañaku kumukeña Yehova niYesu. Twamwekeshaña chitwasakililaña hayuma yatwililawu. Twadikundaña chikupu nawamanakwetu niahela. Nawa tunateli kukwasha amakwawu niwena eluki yuma yayiwahi yitwatambwilaña muloña wefutu danyiloña. Dichi wejima wetu tuzati hakumina ñovu jetu kudiloñesha kwanuka Chanukishu chachinu chaaka, ifuku dalema nankashi muchaaka! w24.01 14 ¶18-19

Yehova watulombolaña ñahi? Kakavulu, watulombolaña kuhitila Mwizu dindi dasonekewa, Bayibolu. Hela chochu, wazatishaña cheñi antu hakutulombola. Chakutalilahu, wazatishaña “nduñu wamaana nikashinshi” kutuloñeshela yakuda yakuspiritu yatukwashaña kufuukula chiwahi. (Mat. 24:45) Yehova wazatishaña cheñi amayala amakwawu ashikahu hakutulombola. Chakutalilahu, ankoñi añinza niakulumpi muyipompelu atukoleshaña nikutuleja yuma yinateli kutukwasha kuumika kukala kutunakumona. Twasakililaña nankashi hawunlomboli wawuwahi wutwatambwilaña munanu mafuku akukuminina akala! Chumichi chaleteshaña atutiyeña kuwaha kudi Yehova nikutukwasha kutwalekahu kwenda munjila yaya kuwumi. Hela chochu, mpinji jikwawu chinateli kutukalila kwovwahila wunlomboli waYehova, sweje-e neyi wunakufumina kudi antu abula kuwanina. Hampinji jamuchidiwu, twatela kukuhwelela chikupu netu Yehova diyi wunakulombola antu jindi, nawa netu kwovwahila wunlomboli windi mwafumaña yuma yayiwahi. w24.02 20 ¶2-3

Tunateli kusweja kumukeña Nzambi kuhitila mukudiza Izu dindi. Chimukutañaña Bayibolu, toñojokenu hanoyu nsañu chiyinakumwekesha chekalayi Yehova. Dihulenu nenu: ‘Iyi nsañu yinakumwekesha ñahi nawu Yehova wankeña? Yumanyi yinashimuniwu yikuletesha nimukeñi Yehova?’ Chuma chikwawu chinateli kutukwasha kusweja kumukeña Yehova hikulomba mpinji yejima nakumuleja yuma yidi kumuchima wetu. (Mas. 25:​4, 5) Chikufumamu, Yehova niyena wukwakula kulomba kwetu. (1 Yow. 3:​21, 22) Twatela cheñi kusweja kuyikeña akwetu antu. Chimwahitili yaaka kufuma habalumukiliyi nakwikala mukaKristu, kapostolu Pawulu wadilukili nakansi weyala wejina daTimotewu. Timotewu wamukeñeli Yehova niantu. Pawulu wayilejeli aFwilipi nindi: “Muloña hinukwetihu muntu mukwawu wudi namuchima neyi [Timotewu] wukwakamena chikupu yuma yinakuyakamishaku.” (Fwili. 2:20) Pawulu wamutiyili Timotewu kuwaha hakukeña kwayimwekesheleleñayi amanakwindi niahela. Chakadi nikujina, yipompelu yakalakeleleñayi Timotewu yafwilileña kumumona chakenzayi.—1 Kor. 4:17. w23.07 9 ¶7-10

Henohu aIsarela kanda eñili Mwituña daChikaninu, Mosi wafwili. Chakadi ona iyala washinshika, komana antu jaNzambi ashalili nakululuta? Inehi. Chakala hohu atwalekahu kwikala ashinshika, Yehova wayakameneneña. Henohu Mosi kanda afwi, Yehova wamulejeli nindi amutondi Yoshuwa kulonda alomboleña antu. Haniyi mpinji, Mosi wadiña wamudizisha dehi Yoshuwa hadi yaaka yayivulu. (Kwid. 33:11; Kuhit. 34:9) Kubombelahu, kwadiña antu amakwawu ashikahu adiña nakulombola, antwamina amakombakaji, antwamina ajinkulakaji, antwamina amakumi atanu kushilahu niantwamina amakumi. (Kuhit. 1:15) Antu jaNzambi adiña nakuyakamena chiwahi. Dichamwekeni nimumpinji yadiñaku Elija. Diwadiña nakutwaminina kudifukula kwalala hakachi kawaIsarela hadi yaaka yayivulu. Mukuhita kwampinji, Yehova wamutemesheli kuya nakuzata mudimu wacheñi, kukabeta kakuchidiilu muYuda. (2 Anya. 2:1; 2 Kushi. 21:12) Komana antu ashinshika adiña muwanta wanyitaña 10 waIsarela ayishili chisayikila? Inehi. Haniyi mpinji Elija wadiña wamudizisha dehi Elisha hadi yaaka yayivulu. Yehova watwalekelihu kushikija nkeñelu yindi, nawa wakameneneña akakudifukula indi ashinshika. w24.02 5 ¶12

AEfwesesa akaKristu atachikili kuhanda kwesekeja nachahosha Izu daYehova dadiña neyi chejeji chayilombweleña. (Mas. 119:105) Awa aEfwesesa ashiyili yaaku niyilwilu yawuzondu yadiñawu nayu mukudifukula kwakutwamba. Ekalili “[akakumwimbujola] Nzambi” nawa azatileña hakumina ñovu jawu kudifukula kudi Yehova nikumuzañalesha. (Efwe. 5:1) Munjila yoyimu, henohu kanda tudizi chalala, twadiña mumwidima muloña wakudifukula kwakutwamba nimuloña wayilwilu yatama. Etu amu twadiña nakwanuka mafuku akunooka anukañawu mukudifukula kwakutwamba nawa etu amakwawu twelileña yuma yawuzondu muchihandilu chetu. Ilaña chitwelukili nshimbi jaYehova jahosha hayuma yaloña niyabula kuloña, twahimpili. Twatachikili kuhanda kwesekeja nanshimbi jindi jaloña. Nawa chafumamu, tunakudiluñisha yuma yayivulu yayiwahi. (Isa. 48:17) Hela chochu, chayinu mpinji tunatwalekihu kumona kukala. Twatela kutondolwela mwidima wutwashiya kunyima nakutwalekahu kwenda “neyi anyana kachejeji.” w24.03 21 ¶6-7

Munateli kutoñojoka nenu kanda mudiloñeshi kudihana nikupapatishewa. Hadaha kudi yuma yimunakukeña kuhimpa muchihandilu chenu kulonda mwovwahileña nshimbi jaYehova, indi kwiji munakukeñeka mpinji yeneni kulonda mukoleshelimu chikuhwelelu chenu. (Kol. 2:​6, 7) Bayi neyi atudizi ejima apamaña kuspiritu munjila yoyimuku, nawa bayi neyi atwansi ejima adihanaña nikupapatishewa nayaaka yoyimuku. Shinshikenuña chimunakupama kuspiritu kwesekeja nayuma yimukutwesha kwila, nawa bayi mudesekeja nawakwenuku. (Ñal. 6:​4, 5) Neyi munamoni nenu kanda mudiloñeshi kudihana enu aweni kudi Yehova, twalekenuhu kufwila kushikija ichi chikonkwanyi. Mulombenu Yehova ayikwashi kuhimpa yuma yejima yimwatela kuhimpa muchihandilu chenu. (Fwili. 2:13) Kuhwelelenu chikupu nenu wukutiya kulomba kwenu nawa wukuyakula.—1 Yow. 5:14. w24.03 5 ¶9-10

Mpinji yimu, Sara watiyili kutama, wamulejeli Abarahama chatiyileñayi nawa wamwinkelimu ninyiloña. Abarahama welukili nindi Sara wadiña mumbanda wovwahila nawa wamukwashileña. Wamutiyilili nawa wafwilileña kumanisha iku kukala. (Kutach. 16:​5, 6) Chumanyi chitukudizilaku? Enu amayala, mukweti wuswa wakufuukwilaku chisaka chenu. (1 Kor. 11:3) Hela chochu, chuma chachiwahi chimwatela kwila hikutiya chinakutoñojokayi mwinikwenu henohu kanda mufuukuli, sweje-e neyi ochu chuma chimunakufuukula chinamukundami niyena. (1 Kor. 13:​4, 5) Mpinji yikwawu, Abarahama wafuukwilihu kumwekeshela enyi chisambu abulili kukuhwelelawu nawu akwinza. Wamulejeli Sara kuleka mudimu wazatileñayi kulonda ochi mankendi amavulu. (Kutach. 18:6) Sara wanyakeli kwila mwamulejeliwu kudi Abarahama. Enu ambanda, munateli kumwimbujola Sara kuhitila mukwovwahila munafuukuliwu anfumu jenu. Neyi mwilaña mwenimu, mukukoleshaña wulu wenu.—1 Pet. 3:​5, 6. w23.05 24-25 ¶16-17

Hampinji yamutondeliwu Gidiyoni kwikala nsompeshi, wakeñekeleña kwikala wovwahila nawa wahamuka. Amwinkeli mudimu wakala chikupu wakukisañana kameña kaBayali katuñiliwu kudi tata yindi. (Anso. 6:​25, 26) Chimwahitili mpinji, hanyima yakwila napompeshi dehi amashidika, Gidiyoni amulejeli kapampa kayedi kufumishahu amashidika amakwawu. (Anso. 7:​2-7) Nkumininaku, amulejeli kuya nakulukuka chilombu chawayilumbu hakachi kawufuku. (Anso. 7:​9-11) Akulumpi atela kwikala “anyakalaña kwovwahila.” (Yak. 3:17) Mukulumpi wovwahila wanyakalaña kwovwahila chahosha Nsona ninshimbi jamukuloñesha kwaNzambi. Dichi wekalaña chakutalilahu chachiwahi kudi antu. Hela chochu, mpinji yikwawu chinateli kumukalila kwovwahila. Chakutalilahu, hadaha chinateli kumukalila kwovwahila nshimbi jinatambwiliyi. Mpinji jikwawu, nateli kujinoka neyi chakwila iji nshimbi jinateli kuzatika hela nehi. Hadaha anateli kumwinka mudimu wukuletesha amukasi. Akulumpi anateli kumwimbujola ñahi Gidiyoni kwikala ovwahila neyi adi muniku kukala? Tiyililenuña nakanañachima kunshimbi nawa yizatishenuña. w23.06 4-5 ¶9-11