APENDIKISI

Mpinjinyi Yatelela Kuvwala Chitambala Nawa Muloñadi?

Mumbanda mukwaKristu watela kuvwala chitambala mukudifukula kwindi mpinjinyi nawa muloñadi? Tutalenu mazu onenewa asonekeliyi kapostolu Pawulu haniyi nsañu. Watwinka nshimbi yitwatela kulondela hakwila nawu tufuukuluhu chachiwahi, kufuukula kukumulemesha Nzambi. (1 Akorinda 11:3-16) Pawulu wamwekesha yikuma yisatu yitwatela kushinshikahu: (1) nyidimu yakeñekaña mumbanda kuvwala chitambala, (2) yuma yikumuleñela kuvwala chitambala, ni (3) muloña wukuzatishilayi iyi nshimbi.

Nyidimu. Pawulu wateneniyi nyidimu yiyedi: kulomba nikuprofweta. (Mavasi 4, 5) Hela chochu, kulomba hikuhosha naYehova mukudifukula. Makonu, kuprofweta kunatalishi kukudizisha kwashindamena haBayibolu kwadizishañayi nkoñi mukwaKristu. Komana Pawulu nakuhosha nindi mumbanda watela kubuta kumutu neyi nakulomba hela kudizisha nsañu yalala yamuBayibolu? Inehi. Kwesekeja nayuma chiyidi hampinji yinakulombayi mumbanda hela hakutañisha diyi yikuletesha kuvwala hela kubula kuvwala chitambala.

Yuma yaleñelaña. Mazu aPawulu atena yuma yiyedi, hela nyidimu, muchisaka nimuchipompelu. Nindi: “Mutu wamumbanda diyi iyala . . . Mumbanda wukulomba hela kuprofweta, kumutu kwakadi kubuta, nasawuli mutu windi.” (Mavasi 3, 5) Muchisaka, iyala diyi yenkawu kudi Yehova hamu neyi mutu wamumbanda. Chiña yalemesha ñovu yanfumwindi, neyi nehi wukusawula nfumwindi neyi yazata mudimu wamwinkawu iyala kudi Yehova. Chakutalilahu, neyi chinakukeñeka nawu yalomboli kudiza kwaBayibolu iku nfumwindi wudi hohu, wukulemesha wuswa wanfumwindi kuhitila mukuvwala chitambala. Watela kuvwala chili nfumwindi wapapatishewa chili nehi, muloña diyi mutu wachisaka.a Neyi nakulomba hela nakutañisha hamesu amwanindi weyala wanyanya wapapatishewa, wukuvwala chitambala bayi neyi muloña mwanindi weyala diyi mutu wachisakaku, ilaña hamuloña wakulemesha wuswa wenkawu amayala apapatishewa amuchipompelu chawakwaKristu.

Pawulu wateneni hachipompelu, nakuhosha nindi: “Neyi kudi muntu wukuleta ntadi, etu, hela yipompelu yaNzambi, hitwelaña chochochuku.” (Vasi 16) Muchipompelu chawakwaKristu, amayala apapatishewa diwu yenkawu kwikala mutu. (1 Timotewu 2:11-14; Aheberu 13:17) Amayala hohu diwu atondañawu kwikala aeluda niankoñi akuzatila kulonda kuhemba nyikoku yaNzambi, mudimu wayinkawu kudi Nzambi. (Yililu 20:28) Hela chochu, mpinji yikwawu kwekalaña yuma yaleteshaña mumbanda mukwaKristu kuzata mudimu watelela kuzatayi iyala washikahu wapapatishewa. Chakutalilahu, watela kulombola kupompa kwakuya mumudimu wakushimwina muloña kwosi iyala washikahu wapapatishewa. Hela watela kulombola kudiza kwaBayibolu kwahetala neyi waloñesha kuzata hamu neyala wapapatishewa. Muloña wakwila iyi hinyidimu yachipompelu chawakwaKristu, watela kuvwala chitambala kulonda kumwekesha nawu nakuzata mudimu watela kuzatawu kudi iyala.

Hela chochu, yuma yikwawu yamukudifukula hiyakeñekaña muhela kuvwala chitambalaku. Chakutalilahu, hatela kuvwala chitambala neyi nakwakulahu hampinji yakupompa, kushimwina kwitala nikwitala nanfumwindi hela namuntu weyala wapapatishewa, chili nakudiza nikulomba nawanyandi abula kupapatishewaku. Ilaña mpinji yikwawu kwatela kwikala malwihu amakwawu, nawa neyi muhela haneluki chikupu kutalisha hanoyu nsañuku, watela kusandujola nsañu yikwawu.b Neyi wuchidi kujinooka nawa neyi chinleji chindi chamuchima chinamuleji kuvwala chitambala, hichatamaku.

Muloña wakuvwalila chitambala. Muvasi 10, twawanañamu nyiloña yiyedi yatelela mumbanda mukwaKristu kuvwala chitambala: ‘Mumbanda wadi kwikala nachinjikijilu chawanta kumutu windi, hansañu yawañelu.’ Chatachi, talenu nhoshelu yakwila nawu, ‘chinjikijilu chawanta.’ Kuvwala chitambala hinjila yakumwekesha nawu mumbanda walemesha wanta wenkayi Yehova amayala apapatishewa muchipompelu. Dichi, nakumwekesha nawu wamukeña nawa washinshika kudi Yehova Nzambi. Muloña wamuchiyedi wekala munawa mazu, ‘muloña wawañelu.’ Indi iyi yileñaleña yañovu yakuspiritu chayikumaña ñahi neyi mumbanda yovwala chitambala?

Añelu akeñaña kumona neyi wanta waNzambi anakuwovwahila mukuloñesha kwaYehova kwejima, heseki nimwiwulu. Niwena ahetelañamu muchakutalilahu chawantu abula kumaninina muniyi nsañu. Kafwampi niwena atela kwovwahila kuloñesha kwaYehova, kweseka kwakañenyuwu añelu amavulu mumpinji yakunyima. (Yuda 6) Ichi añelu anateli kumona mumbanda mukwaKristu wakuluka yitembi chikupu, wukweti maana chikupu, weluka yuma nankashi kubadika muntu weyala wapapatishewa muchipompelu; ilaña nakumwekesha chikupu nawu nakwovwahila wumutu weyala. Mpinji yikwawu mumbanda nateli kwikala mukwaKristu wawayishewa wukekala nswana hamu naKristu. Mumbanda wamuchidiwu wukakalakala muchifulu chahewulu kubadika chikwetuwu añelu nawa wukayula hamu naKristu mwiwulu. Makonu añelu amonaña chakutalilahu chachiwahi. Chalala, hikukooleka kudi ahela ejima hakudikehesha nakwovwahila kuhitila mukashinshi kawu niyililu yakutiyilila kumesu ayihita yawañelu ashinshika.

[Tumazu twaheshina]