APENDIKISI
Shindenu Chaaku chaKudichuka
Kudichuka hichaaku chamuhilishaña Nzambi, chaleteshaña muntu kutoñojoka hohu hakuditiyisha yomweni kuwaha nawa chaluwañeshaña yitoñojoka yamuntu.a Muntu wadichukaña watela cheñi kumona antu amakwawu hamu neyi mwakumanishila wuvumbi hohu. Muntu wadichukaña watachikaña kumona kuhumañana kweyala namumbanda, bayi neyi njila yakumwekeshelamu kukeña hakachi kawantu ayeduku, ilaña neyi chuma chakumutiyisha kuwaha hakapinji kantesha nakumanishilamu wuvumbi. Ilaña wuvumbi wamanaña hohu hakapinji kantesha. Chalala, chatela kujaha yidi yamujimba ‘wuvumbi, wuzondu wamumuchima, nilwisu lwawuvumbi lwabula kutelela,’ kudichuka kwaswejeshaña yumiyi.—Akolose 3:5.
Kapostolu Pawulu wasonekeli nindi: “Enu akwetu twakeña, ichi chanatukanuwu mwenimu, tuditookeshenu kutama kwamujimba nikwaspiritu; tukoleshenu kujila nawoma waNzambi.” (2 Akorinda 7:1) Neyi chakukalila nankashi kwovwahila awa mazu, bayi wuzeyaku. Mpinji yejima Yehova “waanakenaña” nawa wakwashaña. (Masamu 86:5; Luka 11:9-13) Mwalala, muchima weyi wunakudifwisha namuloña niñovu jeyi jakukeña kuleka ichi chaaku, hela chakwila wachifuntilaña cheñi, chinakumwekesha yililu yayiwahi. Ilukenu cheñi nenu, “Nzambi wabadika nyichima yetu, weluka yuma yejima.” (1 Yowanu 3:20) Nzambi hatalaña hohu hanshidi yetuku; wamonaña chekala muntu. Chineli weluka yuma yejima kutalisha hadi etu, watutiyililaña nawushona chitwalembaña netu yatutiyili luwi. Dichi bayi muzeya kumulomba Nzambi mukudizoza nawa chakadi kulekaku, neyi mwana wayaña kudi tata neyi wudi mukukala. Yehova wukuyinka chinleji chamuchima chitooka. (Masamu 51:1-12, 17; Isaya 1:18) Hela chochu mwatela kuzata kwesekeja nakulomba kwenu. Chakutalilahu, mwatela kufwila kutondolwela nyichidi yejima yanyevulu yanzekesi niamabwambu atama.b
Neyi kukala kwenu kwakudichuka kutwalekahu, mwani lejenumu nvwali mukwaKristu hela ibwambu wapama kuspiritu nawa wayakamenaña.c—Yishimu 1:8, 9; 1 Atesalonika 5:14; Titusa 2:3-5.
[Tumazu twaheshina]
a Kudichuka hikuhemesha yiidi yalusemu, kwasañumunaña wuvumbi nakuditekelela.
b Yisaka yayivulu yashaña kompyuta yamwitala hatooka kulonda kukañesha kuyizatisha chatama. Kubombelahu, yisaka yikwawu yalandaña jiprogiramu jahakompyuta jakañeshaña yuma yatama. Hela chochu, kwosi progiramu yahakompyuta yatela kukuhwelelawu chikupuku.
c Neyi mukukeña nsañu yikwawu yakuyikwasha chakushinda chaaku chakudichuka, talenu chibaba chinakwila nawu “Young People Ask . . . How Can I Conquer This Habit?” muAwake! yaNovember 2006 nimafu 205-11 mumukanda wunakwila nawu Questions Young People Ask—Answers That Work, Volume 1.