Mukanda wamuBayibolu Naambala 52—1 Atesalonika

Nsoneki: Pawulu

Awisonekeleli: muKorinda

Awimanishili Kuwisoneka: Kwakwihi na 50 C.E.

KUKAMWIHI nachaaka cha 50 C.E. kapostolu Pawulu, wadiña halwendu lwindi lwamuchiyedi lwakushimwina, wendeleli musumba waMasidoniya muTesalonika nawa kweniku watuñili chipompelu chawiniKristu. Muchaaka chochimu, henohu wuchidi muKorinda hamu naSilivanusa (watenawu mumukanda waYililu nawu Silasi) niTimotewu, Pawulu wafuukwilihu kuyisonekela Atesalonika mukanda windi watachi wakuyikundeja nikukolesha chikuhwelelu chawu. Hadaha kwadiñi kukumana kwa 50 C.E. Hadaha iwu mukanda wawahila muloña diwatachi hanyikanda yasonekeliyi Pawulu kwikala handanda yanyikanda yamuBayibolu nawa, hekwawu kufumishaku Nsañu Yayiwahi yaMatewu, kwikala mukanda watachi kusoneka haNyikanda yawiniKristu yachiGriki.

² Wunsahu wamwekeshaña walala nikuloña kwaniwu mukanda wawuvulu chikupu. Pawulu waditena yomweni hejina nindi diyi nsoneki, nawa nsañu yidi muniwu mukanda yanuñañana chikupu naMazu amakwawu onenewa. (1 Tesa. 1:1; 2:18) Ijina daniwu mukanda aditena mundandanda yayivulu yakusambila yaNyikanda yonenewa, kubombelahu niMuratorian Fragment. Ansoneki ansakililu amavulu akushankulu asombolola Atesalonika wamuchimu hela atalishaku nikuwitena hejina, kubombelahu Irenaeus (wamuyaaka nkulakaji yamuchiyedi C.E.). Chester Beatty Papyrus Na. 2 (P⁴⁶), wasonekeliwu kwakwihi na 200 C.E., mwekala Atesalonika Wamuchimu, nimukanda mukwawu wamuyaaka nkulakaji yamuchisatu (P³⁰), wudi muGhent, Belgium, mwekala yibalu yejima yaAtesalonika Wamuchimu niWamuchiyedi.a

³ Kushinshika chantesha hayuma yamwekeneña muchipompelu chaTesalonika, henohu iwu mukanda kanda awusoneki, kwamwekeshaña chaleñeleli Pawulu kwakamena nankashi ana kwindi adiña muniwu musumba. Kufuma tuhu hatachi, chipompelu chahitili muyihuñu yamaneni nikudimbulula. MuYililu kapetulu 17, Luka washimuna chashikiluwu aPawulu niSilasi muTesalonika, ‘kwadiñi sinagogi yawaYudeya.’ Pawulu wayishimwinini hadi maSabata asatu, nakuhanjeka nawu muNyikanda, nawa kudi yuma yamwekeshaña nawu washakaminiku mpinji yeneni kubadika maSabata asatu, muloña wadiña nampinji yakutachika mudimu windi wakulanda nakulandulula, sweje-e kutuña nikuloñesha chipompelu.—Yil. 17:1; 1 Tesa. 2:9; 1:6, 7.

⁴ Nsañu yekala haYililu 17:4-7 yashimuna hatooka to-o yuma yafumini mukushimwina kwakapostolu muTesalonika. Muloña wakutiya ichima hamudimu wawiniKristu wakoñeliyi Pawulu, aYudeya afumbili izaza dawantu nawa avwakwili ipumba muñanda yejima. Alotokeleli itala daYasoni nawa amukokeleli yena niana kwindi kumesu awanyuli jañanda nakubideka nañovu nawu: “Wenawa hiyatuvuba anavunduli mpata yamunu mwishina yejima, anenzi nikunu nawa; anayitambuli kudi Yasoni. Wejima wawu hiyovwahilaña nshimbi jaKesaruku, elaña nawu kudi mwanta walukanu wacheñi, yowu Yesu.” Ichi chaleñeleli Yasoni niamakwawu kuhana kapopu henohu kanda ayumbaku. Hamuloña wakukeña kudikiña aweni niamana kwawu muchipompelu, aPawulu naSilasi ayitemesheli nawufuku kuBereya. Hela chochu atuñili chipompelu muTesalonika.

⁵ Pawulu chayiliyi kuBereya ikañesha dasweja dawaYudeya datwalekeluhu nawa akeñeleña kulekesha mudimu windi wakushimwina. Dichi wafuminiku nakuya kuAtenisi, muGreece. Hela chochu wafwilileña kwiluka chiyahandileña ana kwindi muTesalonika muyihuñu. Mapampa kayedi wakeñeli kuya nakuyitala, ilaña ‘Satana wamukañesheli.’ (1 Tesa. 2:17, 18) Pawulu wamutemesheli Timotewu kuTesalonika nakukundeja ana kwetu nikuyikolesha muchikuhwelelu, muloña wakusweja kwakamena chipompelu chanyanya nawa welukili lukadi lwasweja luyamweneñawu. Chafuntiliyi Timotewu nachileji chakuluñisha, Pawulu wazañaleli chikupu nansañu jakukuhwelela kwawu kwasweja hampinji yamweneñawu lukadi lwasweja. Haniyi mpinji chipompelu chekalili chakutalilahu kudi akakwitiya mwahita Masidoniya mwejima nimuAkaya. (1:6-8; 3:1-7) Pawulu wamusakilili Yehova Nzambi muloña wakumika kwawu kwachikuhwelelu, ilaña welukili cheñi nindi chiyakukulilañaku lwakuspiritu, akukeñaña wunlomboli wukwawu nikufumba. Dichi, henohu wuchidi muKorinda hamu naTimotewu niSilivanusa, Pawulu wasonekeli mukanda windi wamuchimu kudi eniTesalonika.

CHIWAWAHILA

¹³ Muniwu mukanda Pawulu wamwekesheli spiritu yakwakamena ana kwindi. Yena niakwawu ankoñi emikili chakutalilahu chachiwahi chakukeña, hiyatiyili kuwaha kuyishimwina nsañu yayiwahi yaNzambi hohuku, ilaña ayinkeli wumi wawu muloña wakusweja kukeña amana kwawu muTesalonika. Dichi ankoñi ejima afwileña kwikala nakukeña kwamuchidiwu muyipompelu yawu! Kukeña kwamuchidiwu kukusañumuna ejima kudikeña wumu namukwawu, neyi chahosheli Pawulu nindi: “Mwanta ayivulishili kukeñañana kwasweja, nikukeña antu ejima, neyi chitwelaña etu nawa nanenu.” Iku kukeña neyi akwimwekesha hakachi kawantu jaNzambi mukudikeñela kwakoleshaña chikupu. ‘Kwakoleshaña nyichima, yibuli hakuyinkela muloña mukujila kumesu aNzambi yetu, yowu Tata, hakenzayi Mwanta wetu Yesu nawantu indi ajila ejima.’ Kwambulaña eniKristu kwituña datama nawa dikweti yililu yaheña kulonda atweshi kwenda mukuloña nimukujila nakumuzañalesha Nzambi.—3:12, 13; 2:8; 4:1-8.

¹⁴ Awunu mukanda wahanaña chakutalilahu chachiwahi chakufumba kwakuwahi, kwakukeña muchipompelu chawiniKristu. Hela chakwila amana kwetu amuTesalonika adiña adikita nawa ashinshika, kwadiña yuma yakeñekeleña kwolola. Munjila yidi yejima, Pawulu wahamekeli amana kwindi hayililu yawu yayiwahi. Chakutalilahu, hakuyisoñamisha hansañu yakubula kwikala nayililu yatama, wasambilili kuyihameka hakwenda nakumutiyisha Nzambi kuwaha kuhiñahu wayikonkomweneni ‘kuswejeshamu,’ wejima wawu kuhemba nyijimba yawu nakujila nikalemesha. Hanyima yakuyihameka muloña wakukeña amana kwawu, hakuyilembelela kutwalekahu muniyi njila nindi “muswejeshumu,” nakudowa nikushakama nakumwena kumesu awantu adi hanzi. Mukubabala Pawulu walejeli amana kwindi nindi ‘londelenu kwilila akwenu chachiwahi, niantu ejima.’—4:1-7, 9-12; 5:15.

¹⁵ Mapampa kawana Pawulu wateneni ‘kwinza’ kwaYesu Kristu. Hadaha eniKristu amaha muTesalonika akeñeli chikupu iyi ntañishilu. Iku wuchidi mumusumba wawu, Pawulu hajinokeli kushimwina Wanta waNzambi wunakulombolewa naKristu chakadi womaku, neyi chinamwekeshi nyiloña yakumutwambila yiyamuleteleli yena niamabwambu jindi: “Wejima wawu hiyovwahilaña nshimbi jaKesaruku, elaña nawu kudi mwanta walukanu wacheñi, yowu Yesu.” (Yil. 17:7; 1 Tesa. 2:19; 3:13; 4:15; 5:23) Amana kwetu muTesalonika achiñejeleña Wanta, nikukuhwelela mudi Nzambi, adiña nakutalila “Mwanindi asañwiliyi mudi afu, wakafuma mwiwulu, diyi Yesu,” kulonda kuyipulwisha kukuzuwa kwamba kenza. Chochimu, antu ejima achiñejaña Wanta waNzambi makonu atela kutiyilila kufumba kwakuwahi kwamukanda waAtesalonika Wamuchimu kulonda asweji kukeñañana, nanyichima yakola nawa yakadi muloña, kulonda atweshi ‘atwalekuhu kwenda nakumutelela Nzambi, wayitambikili kwiñila muwanta windi yomweni nimukulema kwindi.’—1 Tesa. 1:8, 10; 3:12, 13; 2:12.

[Tumazu twaheshina]