KUDIZA 34
Tunateli Kumwekesha Ñahi Netu Twamukeña Yehova?
Komana munakutiya nenu munaswini kwakwihi naNzambi kufuma himwatachikili kudiza Bayibolu? Mukukeña kutwalekahu kukolesha wubwambu wenu nayena? Neyi munakukeña, anukenu nenu neyi Yehova amona chimunakuswejelaku kumukeña niyena wukuyikeña nawa wukuyakamenaña. Mukumwekesha ñahi nenu mwamukeña?
1. Tukumwekesha ñahi netu twamukeña Yehova?
Twamwekeshaña netu twamukeña Yehova neyi tumwovwahilaña. (Tañenu 1 Yowanu 5:3.) Hakanjikijaña muntu wudi wejima kumwovwahilaku. Ilaña, watwinka wuswa wakufuukulahu etu aweni kumwovwahila hela nehi. Muloñadi? Yehova nakukeña nindi ‘tumwovwahileña namuchima wetu wejima.’ (ARoma 6:17) Munjila yikwawu, nakukeña nindi mumwovwahileña, bayi neyi dichuma chimwatela hohu kwilaku, ilaña muloña wakumukeña. Chibalu 3 ni 4 chawunu mukanda anachisoneki kulonda chiyikwashi kumukeña Yehova kuhitila mukwila yuma yamutiyishaña kuwaha nikutondolwela yuma yamuneñeshaña.
2. Muloñadi chichinateli kutukalila kumukeña Yehova?
“Muntu waloña wamonaña kukala kwakuvulu.” (Isamu 34:19) Wejima wetu twaluwañeshaña muloña wakubula kuwanina. Nawa twamonaña kukala kwamali, kutwila chatama nikukala kukwawu kwashiyashana. Neyi tunakuhita mukukala, chinateli kutukalila kwila yuma yakeñañayi Yehova nindi twileña, muloña chinateli kwikala chaswayi kwila yuma yatama. Ilaña neyi mukwilaña yuma yakeñañayi Yehova nindi mwileña, mukumwekesha nenu mwamukeña kubadika yuma yejima nawa mwamwovwahilaña. Chikufumamu, niyena wukuyikeña. Hamba kayishiyaku.—Tañenu Isamu 4:3.
SANDUJOLENU CHIKUPU
Ilukenu kumwovwahila Yehova chikwalemena nichimunateli kutwalekahu kwikala ashinshika kudi yena.
3. Nsañu yinayikundami ninenu
Kwesekeja namukanda wamuBayibolu waYoba, Satana watwambili, bayi neyi wamutwambilili hohu Yobaku, ilaña niantu ejima akeñaña kumukalakela Yehova. Tañenu Yoba 1:1, 6–2:10, kuhiñahu hanjekenu hanawa malwihu:
Kwesekeja nayitoñojoka yaSatana, muloñadi Yoba chamwovwahililiyi Yehova?—Talenu Yoba 1:9-11.
Yumanyi yahoshañayi Satana hadi antu ejima kushilahu ninenu?—Talenu Yoba 2:4.
Tañenu Yoba 27:5b, kuhiñahu hanjekenu hanilu lwihu:
Yoba wamwekesheli ñahi nindi wamukeñeli Yehova chikupu?
Yoba wamwekesheli nindi wamukeña Yehova hakutwalekahu kwikala washinshika kudi yena
Twamwekeshaña netu twamukeña Yehova neyi tutwalekahu kwikala ashinshika kudi yena
4. Mutiyishenuña Yehova kuwaha
Tañenu Yishimu 27:11, kuhiñahu hanjekenu hanawa malwihu:
Yehova watiyaña ñahi neyi mwikala namaana nikumwovwahila? Muloñadi?
5. Munateli kumwovwahila Yehova
Kukeña kutwamukeña Yehova kwatusañumunaña kulejaku akwetu chekalayi. Hela chakwila yuma yinakali chamuchidinyi, twatwalekañahu kumwovwahila. Vumishenu VIDIYO, kuhiñahu hanjekenu hamalwihu analondelihu.
Komana chayikalilaña kulejaku akwenu chekalayi Yehova?
Muniyi vidiyo, chumanyi chamukwashili Grayson kuleka kutiya woma?
Neyi tukeña yuma yakeñayi Yehova nawa tuhela yuma yahelayi, chikwikala chaswayi kwikala ashinshika kudi yena. Tañenu Isamu 97:10, kuhiñahu hanjekenu hanawa malwihu:
Kwesekeja nayuma yimunadizi, yumanyi yakeñayi Yehova? Yumanyi yahelayi?
Munateli kukeña ñahi yuma yayiwahi nakuhela yuma yatama?
6. Mukumwovwahila Yehova mwafumaña yuma yayiwahi
Kumwovwahila Yehova kwakuwahi nankashi. Tañenu Isaya 48:17, 18, kuhiñahu hanjekenu hanawa malwihu:
Munakutoñojoka nenu Yehova weluka yuma yejima yayiwahi yitwakeñaña? Muloñadi?
Kudiza Bayibolu nikumwiluka Nzambi walala, Yehova, kunayikwashi ñahi?
AMAKWAWU AHOSHAÑA NAWU: “Nzambi washaña muchima kuyuma yinelaña wanyi.”
Nsonanyi yimunateli kuzatisha yinakumwekesha nawu yuma yitwelaña yamuneñeshaña Yehova hela nehi?
YUMA YIMUNADIZI
Mukumwekesha nenu mwamukeña Yehova neyi mutwalekahu kumwovwahila nikwikala ashinshika hela munakumona kukala.
Kuhitulukamu
Yumanyi yimunadizili kudi Yoba?
Mukumwekesha ñahi nenu mwamukeña Yehova?
Chumanyi chikuyikwasha kutwalekahu kumwovwahila Yehova?
ILUKILENUHU NSAÑU YIKWAWU
Ilukenu chimunateli kwikala ashinshika kudi Yehova nikuchipompelu.
Ilukilenuhu yuma yikwawu yayitwambilañayi Satana antu.
“Yoba Nahembi Kashinshi Kindi” (Bayibolu—Nsañwinyi Yekalamu? chibalu 6)
Talenu atwansi niwena chinateli kumwekeshawu nawu amukeña Yehova.
Atwansi akanjikijañawu kwila yuma yatama kudi akwawu anateli kutwalekahu ñahi kwikala ashinshika kudi Nzambi?