Tunateli Kwikala Ñahi Atooka kuMesu aNzambi?

Fwikijenu mama yawantu nakuwahisha mwanindi kulonda ayi kushikola. Namuweleshi, namukoseli yakuvwala nawa namwekani wunyonji. Chumichi chikumukwasha kwikala wakola kumujimba nawa akwawu akumonaña nawu anvwali jindi amwakamenaña. Munjila yoyimu, Tata yetu wukweti kukeña, Yehova, wakeñaña nindi twiikali atooka kumujimba nimuyitoñojoka. Neyi twikala awunyonji, yuma yikutuwahila etu aweni nawa tukuleta kalemesha hejina daNzambi.

1. Tunateli kwikala ñahi awunyonji kumujimba?

Yehova watulejaña nindi: “Mwatela kwikala ajila.” (1 Petulu 1:16) Kwikala ajila hikwikala atooka kumujimba nimuyitoñojoka. Tunateli kwikala atooka kumujimba neyi tuwelaña mpinji yejima, kukosa yakuvwala, kuwahisha hamatala etu, nyotoka yetu nikutenteka yuma yetu chachiwahi. Tunateli cheñi nikuwahisha haMatala etu aWanta. Neyi twikala awunyonji kumujimba, tukuleta kalemesha kudi Yehova.—2 AKorinda 6:3, 4

2. Hakwila twiikali awunyonji, yaakwinyi yitwatela kutondolwela?

Bayibolu yatulejaña nawu “tuditookeshenu kuyuma yejima yatamishaña mujimba nispiritu.” (2 AKorinda 7:1) Dichi twatela kuzata nañovu kutondolwela yuma yikutamisha mujimba niyitoñojoka yetu. Yitoñojoka yetu yatela kumuzañalesha Yehova, dichi twatela kuzata nañovu kukaana yitoñojoka yatama. (Isamu 104:34) Twatela cheñi kuzata nañovu kwikala nanhoshelu yayiwahi.—Tañenu AKolosi 3:8.

Yumanyi yikwawu yinateli kutuletesha kwikala atooka kumujimba nimuyitoñojoka? Yuma yikwawu yinateli kutamisha nyijimba yetu. Dichi, hitwanwaña makanya hela kubokota nshetaku, nawa hitwazatishaña yitumbu yashetana yakaanishawu hela kuzatisha yitumbu chatamaku. Neyi tutondolwelaña iyi yuma, tukwikala akola kumujimba nawa tukumwekesha netu twalemesha chawaana chawumi. Twekalaña cheñi atooka muyitoñojoka neyi tubulaña kwila yuma yawuzondu, yidi neyi kudichuka hela kutala nyevulu yanzekesi. (Isamu 119:37; AEfwesesa 5:5) Chinateli kutukalila kuleka iyi yaaku, ilaña Yehova wukutukwasha kuyileka.—Tañenu Isaya 41:13.

SANDUJOLENU CHIKUPU

3. Kwikala atooka kumujimba kwamulemeshaña Yehova

Tunateli kwiluka chamonañayi Yehova wunyonji neyi tutaña nshimbi jayinkeliyi aIsarela. Tañenu Kwidika 19:10 ni 30:17-19, kuhiñahu hanjekenu hanawa malwihu:

• Awa mavasi anakumwekesha ñahi chamonañayi Yehova wunyonji wakumujimba?

• Yaakwinyi yayiwahi yinateli kutukwasha kutwalekahu kwikala awunyonji kumujimba?

Kwikala awunyonji kumujimba kwakeñekaña mpinji niñovu. Ilaña tunateli kwikala awunyonji kwejima kutwashakamaña hela chakwila tudi atuzweñi hela twaheta. Vumishenu VIDIYO, kuhiñahu hanjekenu halwihu lunalondelihu.

VIDIYO: Nzambi Wakeña Antu aWunyonji (4:10)

• Kuhemba yuma yetu chiwahi nikwikala awunyonji kwaleteshaña ñahi antu kulemesha mudimu wetu wakushimwina?

4. Shindenu yaaku yatama

Neyi mwanwaña makanya hela kuzatisha yitumbu yashetana, mukwiteja nenu chekala chakala kuleka. Yumanyi yinateli kuyikwasha? Talenu yuma yikufumamu neyi mwikala naniyi yaaku. Tañenu Matewu 22:37-39, kuhiñahu, hanjekenu hakunwa makanya hela kuzatisha chatama yitumbu yashetana chikunateli kuluwañesha . . .

• wubwambu wamuntu naYehova.

• chisaka chamuntu niantu amakwawu.

Wanenu njila yakushindilamu chaaku chatama.a Vumishenu VIDIYO.

VIDIYO: Diyulenuña (2:47)

Tañenu AFwilipi 4:13, kuhiñahu hanjekenu hanilu lwihu:

• Kwikala nampinji yakulomba, kudiza Bayibolu nikupompa kukumukwasha ñahi muntu kwikala nañovu yakushinda chaaku chatama?

5. Shindenu yitoñojoka niyilwilu yatama

Tañenu AKolosi 3:5, kuhiñahu hanjekenu hanawa malwihu:

• Tuneluki ñahi netu Yehova wamonaña nindi kutala nyevulu yanzekesi, kuditemeshela nsañu yawuvumbi nikudichuka kwatama?

• Munakutoñojoka nenu chachiwahi Yehova chakeñañayi nindi twiikali nayilwilu yayiwahi? Muloñadi?

Ilukenu chimwatela kushinda yitoñojoka yatama. Vumishenu VIDIYO.

VIDIYO: Zatenu naÑovu Mwikali Atooka (1:51)

Yesu wazatishili chakutalilahu chamwekeshaña nawu twatela kuzata nañovu hakwila twiikali nayilwilu yitooka. Tañenu Matewu 5:29, 30, kuhiñahu hanjekenu hanilu lwihu:

• Yesu watalishili wanyi mukwila nindi twatela kudikatisha etu aweni, ilaña nindi twatela kwilahu chuma chimu. Yumanyi yatela kwilayi muntu hakwila yatondolweli yitoñojoka yatama?b

Yehova watiyaña kuwaha neyi munakuzata nañovu kuleka yitoñojoka yatama. Tañenu Isamu 103:13, 14, kuhiñahu hanjekenu hanilu lwihu:

• Neyi munakulwisha kulonda muleki chaaku chatama, iyi nsona yinateli kuyikwasha ñahi kutwalekahu kulwisha?

Bayi muzeyaku!

Chaswayi kutoñojoka netu, ‘Nakañanyi, nukutwesha kuleka wanyi.’ Ilaña toñojokenu hachumichi: Neyi mukakutemuka lufuchi ahukana nakudimbuka, hichinayi mukwila nawu nakañanyi hela nawu wukufunta nakutachika cheñiku. Munjila yoyimu, neyi mufuntishahu chaaku chochimu hichinayi mukwila nawu munakañanyi kuchishindaku. Nawa ñovu jenu hijinayi mumenjiku. Antu amakwawu niwena dikukala kwamweneñawu nawa akushindili. Bayi muzeyaku! Nawukwashu waYehova, ninenu munateli kushinda chaaku chatama.

YUMA YIMUNADIZI

Twamuzañaleshaña Yehova neyi tutwalekahu kwikala awunyonji kumujimba, muyitoñojoka nimuyilwilu yetu.

Kuhitulukamu

• Kwikala awunyonji kwawahiladi?

• Munateli kwikala ñahi awunyonji kumujimba?

• Munateli kwikala ñahi awunyonji muyitoñojoka nimuyilwilu?

ILUKILENUHU NSAÑU YIKWAWU

Yumanyi yimwatela kwila hakwila mwiikali awunyonji hela chakwila himukweti mali amavuluku?

Kukola Kumujimba niWunyonji​—Kwisuka Kumakasa (3:01)

Talenu njila jimwatela kuzatisha hakwila muleki kunwa makanya.

“Ifya Kuleka Ukupeepa” (Loleni!, May 2010)

Talenu chichatamina kutala nyevulu yanzekesi.

“Nyevulu Yanzekesi Yayiwahi Tahindi Yatama?” (Kaposhi Kakutalila, September 1, 2013)

Talenu chamukwashili iyala wumu kuleka kutala nyevulu yanzekesi.

“Nakañenyi Kakavulu Hakwila Nitweshi” (Kaposhi Kakutalila Na. 4 2016)