Kuwundisha Muchima Kwamwekeshaña Maana
Toñi, wakuluka yitembi mukuhemba ayeji, wavumishili belu yachiisu, mumbanda wumu wedikili. Iwu mumbanda wamutukili Toñi nikumusupisha hakubula kushika swayi nakuyihemba amama yaniwu mumbanda ashinakaja dehi. Ilaña Toñi walabili wanyi. Hela chochu, wahosheli mumesu awunda nakulomba kwanakena hachuma chamwekeni.
IFUKU dikwawu, iwu mumbanda wamuzuwilili cheñi Toñi. Indi Toni welili ñahi? Wahosheli nindi, “Chuma chamuneñesheli nankashi.” Nindi, “amuhosholileña hachuma chabulili kwilayi.” Hela chochu, Toñi walombeli cheñi kwanakena nawa wamulejeli iwu mumbanda nindi neluki kukala kunakumonayi.
Neyi yenu mwadiña Toñi, mwadi kwila ñahi? Mwadi kuwundisha muchima? Tahindi chadi kuyikalila kufuntisha muchima mwivumu? Kuhosha hohu chalala, chakalaña kuwundisha muchima neyi kukala kunateni kunatumwekeni. Neyi tunazeyi hela anatuvuloki, muchima watachikaña kutatashana.
Hela chochu, Bayibolu yalejaña akwaKristu kuwundisha muchima. Izu daNzambi desekejaña ichi chilwilu namaana. Yakoba wehwili nindi: ‘Wudi namaana nikashinshi mukachi kenu hinyi? Amwekeshi nyidimu yindi nanochu chashakamañayi chachiwahi, nakudizoza mwaya maana.’ (Yak. 3:13) Indi kuwundisha muchima kwamwekeshaña ñahi maana afumaña mwiwulu? Tunateli kwiladi kulonda twikali nanichi chilwilu chachiwahi?
KUWAHA KWAFUMAÑA MUKWIKALA AWUNDA
Kwikala awunda kwafwomonaña ndulu. “Kwakula mukwenu mwamwovu chawundishaña ndombu, ilaña izu dankalu dasañumunaña kuzuwa.”—Yish. 15:1.
Neyi muntu yaakula nakuzuwa kukala kukuswejelaku neyi kwiji nakusha matahu oma hakesi. (Yish. 26:21) Kwambukaku, ñakwilu yawunda yajimaña kesi. Yafwomwonaña nindulu yamuntu wazuwa nankashi.
Ichi dichamumwekeneni Toñi. Chamweniyi ñakwilu yaToñi yayiwahi, iwu mumbanda watachikili kudila. Washimwini nindi kukala kwadiñayi naku nikwamuchisaka dikwaletesheli hakufwindashana. Toñi waheni chakutalilahu chachiwahi, watachikili kumudizisha ona mumbanda Bayibolu muloña wayilwilu yindi yiwahi yakudiwunjika nikuwundisha muchima.
Kuwundisha muchima kunateli kuyizañalesha. “Ovwaha anakooleki, muloña akaswana mpata.”—Mat. 5:5.
Muloñadi akwakuwundisha muchima chekalilañawu namuzañalu? Hamuloña wakwikala amwovu, antu amavulu aswejeli kuzuwa chayinu mpinji adi namuzañalu. Chihandilu chawu chinawahi nawa eluka nawu akatambwila wuloku kumbidi. (Kol. 3:12) Adolfo, nkoñi wañinza muSpain, wahosheli chadiñayi henohu kanda yekali muchalala.
Adolfo nindi, “Chihandilu chami chatamini nankashi.” Nindi, “Nashimbwileña nakuhila wanyi, chakwila niamabwambu jami amakwawu anchinineña muloña wakuzuwa nimadombu. Ifuku dimu, yuma yabalumukili. Mundombu yatama yinazuñili, nafuminimu nayilonda 6 yantapiliwu nawa kwaachi nakufwa muloña mashi afumini amavulu.”
Ichi, Adolfo walejaña akwawu nanhoshelu yindi nimuyilwilu chakwikala awunda. Akwawu amukeña nankashi muloña wayilwilu yindi yayiwahi. Adolfo nindi iwu wudi namuzañalu hakuhimpa yilwilu yindi. Nawa wamusakililaña Yehova chinamukwashiyi kwikala namuchima wamuchidiwu.
Kuwundisha muchima kwamuzañaleshaña Yehova. “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.”—Yish. 27:11.
Yehova amusawulaña kudi chilumbu muneni, Diyabolu. Bayibolu yamutenaña Yehova nawu ‘hazuwaña swayuku’ chatela niyena yatachiki kumuhoshola mumushikila. (Kwid. 34:6) Twikala namuchima wakwimbujola kubula kunyakala kuzuwa kwaNzambi nikudiwunjika kwindi, dikwila nawu tunakwila yuma yamuzañaleshaña Yehova chikupu.—Efwes. 5:1.
Akanu kaayi hiiluña datama. Twashakamaña nawantu “akwakudisamba, akwakudinka wanta, akwakutukana; . . . akakutuñula akwawu, abulaña kudihemba, asweja kuzuwa.” (2 Tim. 3:2, 3) Hela chochu, mukwaKristu watela kwikala nachilwilu chakwikala wamwovu. Izu daNzambi datulejaña nawu “maana afumaña mwiwulu . . . awunda, ovwaha.” (Yak. 3:17) Neyi tukumwekesha yilwilu yakuwunda nikwovwaha, dikwila nawu tunekali dehi namaana afumaña kudi Nzambi. Maana amuchidiwu atukwashaña kwakula chachiwahi neyi anatuvuloki nawa tukukundama kwakwihi naNsulu yayeni yamaana, Yehova.