Chakukolesha Wubwambu Wenu naYehova

CHAAKA nichaaka, anyikoku amavulu ayifuntishaña muchipompelu chawakwaKristu. Mwiwulu mwekalaña ‘muzañalu chikupu’ neyi wumu yafunta. (Luka 15:7, 10) Neyi anayifuntishi, ilukenu chikupu nenu Yesu, añelu niYehova anazañalali chikupu chimunafunti cheñi muchipompelu. Hela chochu, mukumonaña kukala chimukukoleshaña cheñi wubwambu wenu naYehova. Kukalanyi kweniku nawa yumanyi yinateli kuyikwasha?

KUKALANYI KUMUKUMONAÑA?

Amanakwetu niahela amavulu adinkaña nyiloña nihanyima yakuyifuntisha muchipompelu. Hadaha muneluki chatiyiliyi Mwanta Davidi. Nihanyima yakwila anamwanakeni dehi nshidi jindi wahosheli nindi: “Yuma yineli yakuluwa yinanshintakeshi.” (Mas. 40:12; 65:3) Neyi muntu nafunti kudi Yehova, nateli kutwalekahu kudinka nyiloña nikutiya nsonyi hadi yaaka yayivulu. Isabelle wadiña kunsa yakuloñesha hadi yaaka 20.a Wahosheli nindi: “Chankalilili kwiteja nami Yehova nañanakeni.” Neyi mudinkaña nyiloña, wubwambu wenu naYehova wukuzeya cheñi. (Yish. 24:10) Bayi mwiteja chumichi kuyimwekenaku.

Amakwawu akamenaña nawu hiyanateli kutwesha kwila yuma yejima yakeñekaña hakwila ekali nawubwambu wawuwahi naYehova cheñiku. Chamufuntishiliwu Antoine wahosheli nindi: “Navulameneni yuma yejima yinadizili niyinelileña hinadiña Chinsahu.” Muloña wakutiya muniyi njila, amakwawu hiyanateli kuzata hakumina ñovu jawu kulonda amuzatili Yehovaku.

Chakutalilahu, neyi muntu itala dindi dikisika nampepela yeneni, nateli kuneña neyi yatoñojoka hampinji niñovu yikukeñeka hakwila yatuñululi idi itala. Munjila yoyimu, neyi wubwambu wenu naYehova wuluwankana muloña wanshidi yimwakoñeli, mwatela kuzata nañovu kulonda mwikali cheñi nawubwambu wawuwahi naYehova. Ilaña kudi yuma yinateli kuyikwasha.

Yehova nakutuleja nindi: “Inzenu tutiyañanenu.” (Isa. 1:18) Munazati dehi nañovu hakwila ‘mutiyañani’ naYehova. Yehova watiyaña kuwaha chimunakuzata nañovu. Toñojokenu hachumichi: Chineli munafunti kudi Yehova, nateli kuyizatisha kulonda yamwekeshi chikupu nindi Satana hisakutwamba.—Yish. 27:11.

Chineli munafunti dehi kudi Yehova, munaswini dehi kwakwihi nayena nawa nayishiiki nindi niyena wukuswina kwakwihi nanenu. (Yak. 4:8) Hela chochu, twatela kuzata nañovu kubadika akwetu eluki hohu nawu tunafunti muchipompelu. Mwatela kutwalekahu kumukeña Tata yenu nawa Ibwambu denu Yehova. Munateli kwila ñahi mwenimu?

FUUKULENU YUMA YIMWATELA KWILA

Esekenu kufuukula yuma yimwatela kwila. Hadaha muchidi kwanuka chalala chimwadizili hadi Yehova nichikaninu chindi chaParadisa. Ilaña ichi mwatela kwila yuma yimwadiña nakwila cheñi, chidi neyi kuya nakushimwina mpinji yejima, kuya nakupompa nikudikunda nawamanakwenu niahela. Talenu yuma yimwatela kwila.

Hanjekenuña naYehova mpinji yejima. Tata yenu neluki nindi neyi mutwalekahu kudinka nyiloña, chinateli kuyikalila kulomba kudi yena. (Rom. 8:26) Hela chochu, “lombenuña chakadi kuzeya,” nakumulejamu Yehova chimunakukeña nenu yekali ibwambu denu. (Rom. 12:12) Andrej wanukaña nindi: “Nadinkeleña nyiloña nawa natiyileña nsonyi. Ilaña hanyima yakulomba natiyileña chiwahi. Nekalileña nakuwunda kwamuyitoñojoka.” Neyi muneluki wanyi yuma yimwatela kulomba. Talenu kulomba kwaMwanta Davidi wabalumukili kwasonekawu haMasamu 51 ni 65.

Dizenuña Bayibolu mpinji yejima. Ichi chikuyikwasha kwikala nachikuhwelelu chakola nawa mukusweja kumukeña Yehova. (Mas. 19:7-11) Felipe wahosheli nindi: “Muloña wakwila nalekeli kutaña nikudiza Bayibolu halwami, nazeyeli nawa nelili yuma yamuneñesheli Yehova. Hinakeñeleña kufuntishahu chiluwa chochimuku, dichi natachikili kudiza Bayibolu.” Ninenu mwatela kudizaña Bayibolu mpinji yejima. Neyi munakukeña kwiluka nyitu yinateli kuyikwasha hakudiza kwahalwenu, munateli kwihula ibwambu denu wapama kulonda yayikwashi.

Koleshenu cheñi wubwambu wenu nawamanakwenu niahela. Amakwawu afuntaña muchipompelu atoñojokaña nawu akwawu akuyihilila. Larissa wahosheli nindi: “Natiyileña nsonyi nawa natoñojokeleña nami naneñeshi chipompelu. Hashimbwili hakwila nileki kutoñojoka chamuchidiwu.” Ilukenu chikupu nenu akulumpi niamanakwenu anakukeña kuyikwasha kulonda mukoleshi cheñi wubwambu wenu naYehova. (Talenu chikasha chinakwila nawu, “Yumanyi Yatela Kwilawu Akulumpi?”) Anatiyi kuwaha chimunafunti nawa anakukeña mwikaleña namuzañalu.—Yish. 17:17.

Chumanyi chinateli kuyiswija cheñi kwakwihi nawamanakwenu niahela? Pompenuña kupompa kwejima hamu nawamanakwenu niahela nawa yenuña nawu nakushimwina. Iyi yuma yinateli kuyikwasha ñahi? Felix wahosheli nindi: “Chipompelu chakeñeleña nawu nifunti. Nelukili nami ankeña. Wejima wawu ankwashili kwiluka nami chipompelu chankeña, Yehova nañanakeni nawa natela kutwalekahu kumukalakela.”—Talenu chikasha chinakwila nawu “Yumanyi Yimwatela Kwila?”

BAYI MUZEYAKU!

Satana wukutwalekahu kuyiletela kukala kwakuvulu kulonda yayizeyeshi hampinji yimunakukolesha cheñi wubwambu wenu naYehova. (Luka 4:13) Diloñeshenu chayinu mpinji kuhitila mukutwalekahu kukolesha wubwambu wenu naYehova.

Yehova wayikana anyikoku indi nindi: “Ajimbala nakayikeñakeña ahañewa nakayileta cheñi akotoka nakayikasa akata nakayikolesha.” (Ezek. 34:16) Yehova nakwashi antu amavulu kukolesha cheñi wubwambu wawu nayena. Ilukenu chikupu nenu nakukeña kuyikwasha kulonda mutwalekihu kukolesha wubwambu wenu nayena.

Yumanyi Yatela Kwilawu Akulumpi

Akulumpi atela kuzata mudimu weneni wakukwasha akwakushimwina anafuntishiwu kulonda akoleshi cheñi wubwambu wawu naYehova. Talenu chinateli kukwashawu antu anafuntishiwu muchipompelu.

Yikoleshenu. Kapostolu Pawulu welukili nindi muntu wunabalumuki nateli “kusweja kwikala nachineñi.” (2 Kor. 2:7) Nateli kudinka nyiloña nikwikala nachineñi. Pawulu walejeli chipompelu nindi: “Mwatela kumwanakena nikumukundeja muntu wamuchidiwu.” Atela kuyileja antu anafuntishiwu nawu Yehova niamanakwetu niahela ayikeña nankashi. Neyi akulumpi ayihamekaña mpinji yejima, chumichi chinateli kuyikwasha kubula kwikala nachineñi.

Lombenuña hamu nawu. “Kulomba kwakulembelela kwamuntu waloña kwekala nañovu chikupu.” (Yak. 5:16) Larissa itwashimuna wahosheli nindi: “Nayilejeli akulumpi chinajinookeleña niwoma wunatiyileña. Anlombeleliku kudi Nzambi nawa twadiña hamu. Nkumininaku nelukili nami komana akulumpi anhililili wanyi. Akeñeleña kunkwasha nikoleshi cheñi wubwambu wami naYehova.” Theo wahosheli nindi: “Kulomba kwawakulumpi kwankwashili kwiluka chikupu nami Yehova wankeña nawa wamonaña yuma yayiwahi mudi ami bayi yatamaku.”

Ikalenu amabwambu jawu. Antu anafuntishiwu akeñaña kwikala nawamabwambu muchipompelu. Mukulumpi wejina daJustin wahosheli nindi: “Wanenuñaku mpinji yakuya nakushimwina nawu hamu nikuyitambikaku kumatala enu. Chalema nankashi kwikala amabwambu jawu.” Mukulumpi mukwawu wejina daHenry wahosheli nindi, “Neyi antu muchipompelu amona nawu akulumpi anakudikunda nawantu anafuntishiwu muchipompelu, niwena akutachika kudikunda nawu.”

Yikwashenu kulonda adizeña. Ibwambu wapama nateli kukwasha muntu anafuntishiwu kwikala nandandanda yayiwahi yakudiza. Mukulumpi wejina daDarko wahosheli nindi: “Natiyaña kuwaha kulejaku antu yuma yalema yakuspiritu yinadiza mukudiza Bayibolu kwahalwami nawa nayilejaña chinatiyaña kuwaha kudiza Bayibolu. Naloñeshaña cheñi nsañu yitwatela kudizila hamu.” Mukulumpi mukwawu wejina daClayton wahosheli nindi: “Nayikoleshaña kutaña nsañu yamuBayibolu yinadifwani nakukala kwamweniwu.”

Ikalenu kabiña wamuwahi. Antu anafuntishiwu amonaña akulumpi nawu ansompeshi. Dichi atela kuyimonaña nawu mudi atubiña. (Yere. 23:4) Tiyililenuña nawa yihamekenuña. Hanjekenuña nawu kakavulu. Talenu chuma chelañayi mukulumpi wejina daMarcus neyi nayi nakubiña: “Twatañilaña hamu jiNsona, twayihamekaña nawa twayilejaña netu tunatiyi kuwaha chimunazati nañovu kulonda mufunti niYehova niyena nazañalali. Neyi tunamanishi twayilejaña ifuku dikwawu ditukayendela cheñi.”

a Majina muchinu chibaaba anayihimpi.