AIsarela Kunyima Azuñileña Njita, Indi Etu Twabulilañadi?

“NEYI hakachi kenu hadi wukukaana kuzuña njita naFrance hela England, wejima wenu mwatela kufwa!” Awa diwu mazu alejeliwu izanvu dawaYinsahu jaYehova kudi kapokola waNazi muNjita yaKaayi yamuChiyedi. Hela chakwila amashidika awaNazi emeni mukamwihi nakuhembelela, kwosi nimanakwetu wetejeli. Amwekesheli kuhamuka nankashi! Ichi chakutalilahu chinakumwekesha chitwekala etu aYinsahu jaYehova: Twakaanaña kuzuña njita jamukanu kaayi. Hela chakwila anatuleji nawu akutujaha twahakwilañaku kabadi kadi kejimaku.

1. ANTU JANZAMBI EJIMA DIÑA MUMUZA WUMU

Kunyima, Yehova wapompesheli antu jindi mumuza wumu, walsarela. Wayiteneni alsarela nindi, “iheta dami dadimena hakachi kawantu ejima.” (Kwid. 19:5) Nawa Nzambi wayinkeli cheñi iluña dawu. Dichi neyi Nzambi ayileja alsarela kuya kunjita nakuzuña nanyuza yikwawu, hiyazuñileña hela kujaha akwawu akakudifukulaku.a

Makonu, akakudifukula alala afuma “kunyuza yejima, kunyichidi yejima, kudi antu ejima nikumadimi ejima.” (Chim. 7:9) Neyi antu jaNzambi azuñaña njita dikwila nawu akuzuñaña hela kujaha akwawu akakudifukula.

2. YEHOVA WAYILEJELEÑA AISARELA KUYA KUNJITA

Kunyima, Yehova washimwineña mpinji nimuloña wateleleli kuyilawu aIsarela kunjita. Chakutalilahu, Nzambi wayilejeli aIsarela kujaha aKenani, adifukwileña kudi andemoni, kwila wuvumbi watama nikulambula anyana. Yehova wayilejeli aIsarela kujilumuna antu elileña yuma yatama Mwituña daChikaninu. (Lev. 18:24, 25) Hanyima yakwila aIsarela anashakami dehi Mwituña daChikaninu, Nzambi wayitejeli aIsarela kuzuña njita kulonda akiñi aIsarela kudi ayilumbu atama. (2 Sam. 5:17-25) Hela chochu, kwosi nihamu Yehova hayitejeliyi aIsarela kudifuukwila awenawu kuya kunjitaku. Neyi afuukulahu awenawu, ayishindileña—Kuch. 14:41-45; 2 Kushi. 35:20-24.

Makonu, Yehova wayiteja wanyi antu kuzuña njita. Nyuza yinakuzuña muloña kudi yuma yinakufwilawu bayi neyi nkeñelu yaNzambiku. Azuñaña njita muloña wakufwila maluña, kuheta, nsañu jamatuña hela kutiyakesha yitoñojoka yawu. Ndochu awa ahoshaña nawu anakuzuña mwijina daNzambi hela akiñi kudifukula kwawu, hela kujaha ayilumbu jaNzambi? Yehova wakakiña kudifukula kwalala nikujilumuna ayilumbu jindi hanjita yakumbidi, njita yaAmagedoni. (Chim. 16:14, 16) Haniyi njita, amashidika aNzambi amwiwulu diwu akazuña bayi akakudifukula indiku.—Chim. 19:11-15.

3. AISARELA ASHILEÑAHU ANTU ADIÑA NACHIKUHWELELU

Kunyima, amashidika awaIsarela atiyilileña luwi antu adiña nachikuhwelelu mudi Nzambi nawa ajahileña hohu antu amweneñayi Yehova nindi atela kuyijaha. Talenu yakutalilahu yiyedi. Hela chakwila Yehova washimwini nindi ajilumuni musumba waYeriku, aIsarela amupulwishili Rahaba nichisaka chindi muloña wachikuhwelelu chindi. (Yosh. 2:9-16; 6:16, 17) Kuhiñahu, musumba wejima waGibeyoni awupulwishili hanyima yakwila aGibeyoni ejima anamutiyi Nzambi woma.—Yosh. 9:3-9, 17-19.

Makonu, nyuza yinakuzuña hiyashiyañahu antu akweti chikuhweleluku. Nawa mpinji yikwawu, neyi kudi njita hakachi kanyuza, antu akadi muloña diwu afwilañamu.

4. AISARELA ALONDELELEÑA NSHIMBI YANZAMBI YAKUZUÑILAMU

Kunyima, Yehova wakeñeleña amashidika awaIsarela kuzuña njita kwesekeja nachinayilejiwu. Chakutalilahu, mpinji yikwawu Nzambi wayilejeleña kuhosha “mazu akuwunda” namusumba wunakukeñawu kuzuña nawu. (Kuhit. 20:10) Yehova wakeñeleña cheñi mashidika awaIsarela kudihemba awenawu nawunyonji nichilombu chawu. (Kuhit. 23:9-14) Hela chakwila mashidika anyuza yayinyeñumukili ashimineña ambanda munyuza yashindileñawu, Yehova wayikaanishili aIsarela kwila chumichi. Kafwampi, kwila asumbula mumbanda anakwatiwu mwituña dinashindiwu neyi kanda muhiti kakweji kamu nehi.—Kuhit. 21:10-13.

Makonu, matuña amavulu afwachika chitiyañenu chatela kulondelawu hakuzuña njita. Hela chakwila iyi nshimbi ayishaku kulonda akiñi antu, chawushona, iji nshimbi ajilondelaña wanyi.

5. NZAMBI WAZUÑILILEÑA MUZA WINDI

Kunyima, Yehova wayizuñilileñaku aIsarela ,kakavulu wayikwashileña kushinda muchihayamisha. Chakutalilahu, Yehova wayikwashili ñahi aIsarela kushinda musumba waYeriku? Neyi chayilejeliyi Yehova, chelili aIsarela “[abidiki] nezu datiyakana danjita nawa mpwembu yamusumba [yibuvuki] chikupu,” chayipeleleli kutambula musumba. (Yosh. 6:20) Nawa ashindili ñahi njita nawaAmori? “Yehova wanokesheli nvula yamalola yeneni chikupu hadi wena mwiwulu . . . Kafwampi, owu afwili nanvula avulili kubadika ajahiliwu nampoku yakabali kudi aIsarela.”—Yosh. 10:6-11.

AKAKRISTU ALALA ALETAÑA KUWUNDA

Neyi chitunamoni, yuma makonu yinambukiku chikupu nawaIsarela akunyima. Hela chochu, ichi chaambu dichatuleteshaña kubula kuya kunjita wanyi. Kudi yuma yikwawu yaleteshaña. Chakutalilahu, Nzambi washimwineñahu dehi nindi mumafuku akukuminina, antu adizishayi “hiyakadiza cheñi njitaku,” kwosi kuzuña. (Isa. 2:2-4) Kubombelahu, Kristu wahosheli nindi atumbanji twindi akekala wanyi “[ku]kabadi kakaayi”; hiyakadiñija munsañu jamatuña nachiyuulu mukaayi mudi wufwindaku.—Yow. 15:19.

Kristu wayilejeli cheñi akakumulondela kwililahu yuma yikwawu. Wayilejeli kuleka yilwilu yasañumunaña, kuhila, kuzuwa ninjita. (Mat. 5:21, 22) Kubombelahu, wayilejeli akakumulondela nindi atela ‘kuleta kuwunda’ nikukeña ayilumbu jawu.—Mat. 5:9, 44.

Chumanyi chitwatela kwila hamuntu-hamuntu? Tunakukeña wanyi kuzuña njita, ilaña kudihu yuma yikwawu mumuchima wetu yikuleta yikonkojola hela chaambu muchipompelu? Tutwalekenuhu kufumisha yitoñojoka yamuchidiwu mudi etu.—Yak. 4:1, 11.

Chatela tudiñijeña munjita jamunyuza, tuleteña kuwunda nikudikeña mulwetu. (Yow. 13:34, 35) Tuzatenu nañovu kulonda tubuleña kudiñija mujamatuña nachiyuulu chitunakuhembelela ifuku dakamanishayi Yehova njita yejima chahaya nyaaka.—Mas. 46:9.