Malwihu Kufuma Kudi Antañi
Neyi chashimunawu haIsamu 61:8, komana ñimbi yaMasamu Davidi wadiña nakulebumuna chasonekeliyi nindi wakashimekaña ijina daNzambi haya nyaaka?
Inehi. Yuma yasonekeliyi Davidi yadiña yalala.
Talenu chasonekeliyi haniyi vasi nimumavasi adifwana, nindi: “Nakemba tumina twakushimeka ijina deyi haya nyaaka chinakashikijaña kusanyika kwami hefuku-hefuku.” “Nakushimekaña, eyi Yehova Nzambi yami, namuchima wami wejima, nawa nakalemesha ijina deyi haya nyaaka.” “Nukushimekaña ijina deyi haya nyaaka nanyaaka.”—Mas. 61:8; 86:12; 145:1, 2.
Davidi hadiña nakulebumuna, nakutoñojoka nindi hamba kafwaku. Welukili nindi Yehova wahosheli nindi antu akafwaña muloña wanshidi nawa Davidi welukili nindi himukanshidi. (Kutach. 3:3, 17-19; Mas. 51:4, 5) Welukili nindi niantu atiyileñayi Nzambi kuwaha, adi neyi Abarahama, Isaka niYakoba afwili. Nawa Davidi welukili nindi niyena wakafwa. (Mas. 37:25; 39:4) Ilaña mazu indi awanikaña haIsamu 61:8 amwekeshaña chafwilileñayi kumushimeka Nzambi haya nyaaka, dikwila nawu mafuku akuhanda kwindi kwejima.—2 Sam. 7:12.
Mpinji jikwawu Davidi wasonekeleña nihayuma yamumwekeneneña muchihandilu chindi, neyi chitwamonaña munyitu yaMasamu 18, 51, ni 52. Mwisamu 23, Davidi wamushimuna Yehova nindi hikabiña walombolaña, wanookeshaña nawa wakiñaña. Davidi niyena wadiña kabiña wamuchidiwu. Nawa wakeñeleña kumukalakela Nzambi ‘mafuku akuhanda kwindi kwejima.’—Mas. 23:6.
Anukenu cheñi nenu Yehova diyi wamwoneneni Davidi kusoneka iyi yuma. Muyuma yasonekeliyi mwabombeleli wuprofwetu wayuma yakamwekana kumbidi. Chakutalilahu, Mwisamu 110, Davidi wahosheli hampinji yakashakamayi Mwanta windi ‘kuchikasa chaNzambi chachidiilu’ mwiwulu nakutambwila ñovu jasweja. Kulonda akelidi? Kulonda akayuuleña ayilumbu jaNzambi “[nikusompesha] hakachi kanyuza” heseki. Davidi wadiña nkakulula yaMesiya, owu wakayuulilaña mwiwulu nawa wakekala “kapristu haya nyaaka.” (Mas. 110:1-6) Yesu wahosheli nindi wuprofwetu wekala haIsamu 110 wahosheleña hadi yena nawa nindi wakashikijewa kumbidi.—Mat. 22:41-45.
Mwamweni, Davidi amwoneneni kusoneka hayuma yamwekeneña mumafuku indi niyakamwekana kumbidi hakamusañulawu nawa hakamushimekañayi Yehova namuzañalu haya nyaaka. Chumichi chatukwashaña kwiluka netu Isamu 37:10, 11, 29 yashimunaña chashakamineñawu antu muIsarela nichakekala yuma kumbidi mukaayi kejima hakashikijayi Nzambi yikaninu yindi.—Talenu paragilafu 8 muchibaaba chinakwila nawu “Wakekala Nanami muParadisa” mukanu Kaposhi Kakutalila.
Dichi Isamu 61:8 nimavasi amakwawu adifwanaku amwekeshaña nawu Davidi wakeñeleña kumulemesha Yehova muIsarela kushika nimpinji yafwiliyi. Nawa amwekeshaña yuma yakelayi Davidi kumbidi neyi Yehova namusañuli dehi