Munakwanuka?

Komana mwatañili nakanañachima yibaaba yachinu chaaka yaKaposhi Kakutalila? Esekenu kwakula awa malwihu:

‘Kuhimpa yitoñojoka yenu’ kwatalisha mudihi? (Rom. 12:⁠2)

Hikwatalisha mukwila hohu yuma yayiwahi muchihandilu ­chenuku. Ilaña twatela cheñi kushinshika chekala wuntu wetu wamukachi nakuhimpa hanakukeñeka kulonda twovwahileña chikupu nshimbi jaNzambi muchihandilu chetu.​—w23.01, mafu 8-9.

Tunateli kuhemba ñahi yitoñojoka yetu hitunaku­mona yuma yinakumwekana mukaayi?

Tunakukeña kwiluka yuma yinakumwekana chiyinakushikija ­wuprofwetu. Chatela tubokeña hohu nakuhosha yuma yinateli kuluwañesha kunuñañana kwetu, tukwila chiwahi neyi kuhanjeka kwetu kushindamenaña hayuma yedishaña kuloñesha ­kwaYehova. (1 Kor. 1:​10)​—w23.02, ifu 16.

Chipapatishu chaYesu chaambukaku ñahi ­nachawakakumulondela?

Chineli wavwalikilili mumuza wadihanini kudi Nzambi, hakeñekeleña kudihana yomweni kudi Yehova neyi chitwelaña etuku. Yesu wadiña muntu wawanina, wakadi nshidi. Hakeñekeleña kubalumuka nakuleka nshidiku.​—w23.03, ifu 5.

Yumanyi yitwatela kwila hakwila antu amakwawu ­niwena akulihu hakupompa?

Twatela kwihihishaku ñakwilu jetu, kulonda antu amakwawu ekali nakukooleka kwakwakulahu. Twatela cheñi kutondolwela kuhosha hayikuma yayivulu nankashi. Dichi akwenu niwena akwikala nayikuma yakwakulahu.​—w23.04, ifu 23.

“Njila yaKujila” yashimunawu haIsaya 35:8 yatalisha mudihi?

Iyi njila yeneni yachifwikija, kunyima yatalishili kunjila mwendeliwu aYudeya kufuma kuBabiloni nakuya kumukala wawu. Indi makonu yatalisha mudihi? Hadi yaaka yayivulu yakutwala kuchaaka cha 1919, azatili mudimu wakuloñesha, dikwila nawu mudimu wakubalumuna nikupulinta maBayibolu, kushilahu ninyikanda yikwawu. Antu jaNzambi anakwenda ‘muNjila yaKujila’ yinakuyilombola kuparadisa yakuspiritu, mwakadiluñishawu yuma yayiwahi yakaleta Wanta.​—w23.05, mafu 15-​19.

Yishimu kapetulu 9 kashimuna kufumba kutalisha hadi ambandanyi ayedi achifwikija?

Yishimu yahosha hadi “mumbanda wasupa” wukweti mutambi watwalaña “Mwijamu” nawa yahosha cheñi ‘hamaana alala,’ emenañaku mumbanda mukwawu, wukweti mutambi watwalaña “munjila yakashinshi” nikuwumi. (Yish. 9:​1, 6, 13, 18)​—w23.06, mafu 22-24.

Chuma cheliliyi Nzambi naLoti chamwekesheli ñahi nawu wadizoza nawa wamwovu?

Yehova wamulejeli Loti nindi atemukili kwiluña damapidi. Loti chalembeliyi nindi ayi nakushakama kuZowari, Nzambi wetejeli mwalombeliyi.​—w23.07, ifu 21.

Yumanyi yatela kwilayi mumbanda neyi mwinikwindi watalaña nyevulu yanzekesi?

Watela kwanukaña nindi hidiyi wunakukojeja chumichiku. Ilaña watela kusha maana hakukolesha wubwambu windi naNzambi nikutoñojoka chikupu hansañu yamuBayibolu yahosha hadi ambanda adiña nachineñi akundejeliwu kudi Yehova. Nateli kumukwasha mwinikwindi kulonda atondolweli kwila yuma yikuletesha eli wuvumbi.​—w23.08, mafu 14-​17.

Neyi anakutwihula kutalisha hayuma yitwakuhwelela, kashinshi kanateli kutukwasha ñahi kwakula namuchima wawovu?

Tunateli kumona olu lwihu netu hinjila yikutukwasha kwiluka chinakutoñojokayi owu muntu hela yuma yalemeshayi. Neyi twila mwenimu, chikutukwasha kwakula namuchima wawovu.​—w23.09, ifu 17.

Chumanyi chitunakudizila kudi Mariya neyi ­tunakukeña netu atukoleshi?

Mariya chelukiliyi nindi wakavwala Mesiya, amukolesheli kudi akwawu. Gabireli naElizabeta amukolesheli Mariya naNsona. Ninetu anateli kutukolesha kudi akwetu mutwadifukwilaña.​—w23.10, ifu 15.

Yehova nateli kwakula ñahi kulomba kwetu?

Yehova watushiika nindi wukutiyaña kulomba kwetu nawa ­wukumonaña neyi chakwila yuma yitunakulomba yinesekani nankeñelu yindi. (Yere. 29:12) Nateli kwakula kulomba kwokumu munjila yaambukaku, ilaña wukutukwashaña mpinji yejima.​—w23.11, mafu 21-22.

ARoma 5:2 yatena “kuchiñeja,” hanu dinu muloñadi chakutenenawu cheñi muvasi 4?

Muntu chatiyayi nsañu yayiwahi, nateli kwikala nakuchi­ñeja kwakudiluñisha wumi muparadisa hamaseki. Nawa hanyima yakumona lukadi, omika olu lukadi nikumona nindi Nzambi nakumutiya kuwaha, kuchiñeja kwindi kunateli kuswejelaku nawa wukwiluka chikupu nindi yuma yachiñejañayi yakashikijewa.​—w23.12, mafu 12-​13.