Mariko

6 Noa kanyo modhi e gweng’gi kendo jopuonjrene noluwe. 2 Ka Sabato nochopo, nochako puonjo e sunagogi kendo thoth joma ne winje nohum mi gipenjore kama: “Ng’atni nogolo wechegi kanye? Kendo ang’o momiyo nomiye riekogi, bende ang’o momiyo tije madongogi timore kokalo e lwete? 3 Donge jali en fundi bao ma wuod Maria-cha, kendo owetene gin Jakobo, gi Josef, gi Judas, kod Simon, koso? To donge kata nyiminene ni kodwa kae, koso?” Omiyo, ne gichako chwanyore nikech en. 4 To Yesu nowachonegi kama: “Ji miyo janabi duong’, mak mana e gweng’gi, e kind wedene, kod e ode owuon.” 5 Omiyo, ne ok onyal timo tije madongo kanyo, mak mana keto lwete kuom ji manok ma ne tuo mondo ochanggi. 6 Kuom adier, nowuoro kaka jogo ne onge yie. Eka nodhi kolworo gwengego kopuonjo.

7 Koro noluongo ji Apar Gariyoka mochako orogi ji ariyo ariyo kendo nomiyogi teko e wi jochiende. 8 Bende, nochikogi ni kik giting’ gimoro amora ne wuoth mak mana luth—ok makate, kata ofuk chiemo, kata pesa e msibegi— 9 kendo ni girwak wuoche to kik girwak nengni ariyo. 10 E wi mago, nokonegi niya: “Ka udonjo e ot moro amora, beduru kanyo nyaka ua. 11 To kama ok orwakue kata ok owinjue, sama uwuok kanyo, teng’uru buch tiendeu mondo mano ochiwnegi neno.” 12 Eka ne giwuok mi giyalo mondo ji olok chunygi a e richo 13 kendo ne gigolo jochiende mang’eny, mi ne giwiro ji mathoth ma ne tuo gi mo kendo ne gichangogi.

14 Koro Ruoth Herode nowinjo wachno, nimar nying Yesu nong’ere ahinya kendo ji ne wacho niya: “Osechier Johana Jabatiso oa kuom joma otho kendo mano e momiyo tije madongogo timore kokalo kuome.” 15 To jomoko ne wacho kama: “En Elija.” To pod moko ne wacho niya: “En janabi mana kaka achiel kuom jonabi machon.” 16 Kata kamano, ka Herode nowinjo mano, nowacho kama: “Johana ma ne ang’ado wiyecha osechier.” 17 Nimar noyudo Herode oseoro wach mondo omak Johana kendo ne otueye e jela nikech Herodia chi Filipo owadgi, nimar Herode nosekende. 18 Nikech Johana nosebedo ka nyiso Herode niya: “Ok en gima owinjore gi chik mondo ikaw chi owadu.” 19 Omiyo, Herodia nomako sadha kode kendo nodwaro nege, to ne ok onyal. 20 Nimar Herode noluoro Johana kendo nong’eye kaka ng’at makare kendo maler, omiyo norite maber. Nojawinje, to bang’e ok nong’eyo gima dotim, to pod nodhi nyime winje gi ilo.

21 Kata kamano, chieng’ mowinjore nochopo ka Herode noloso nyasi mar chiemo modhiambo e odiechieng nyuolne. Ne oloso nyasino ne jotije madongo gi jotend-jolweny* mage kod joma ne nigi huma ahinya e Galili. 22 Eka nyar Herodia nobiro mi omiel kendo nomoro Herode kod joma ne chiemo kode. Ruoth nowacho ne nyakono niya: “Kwaya gimoro amora midwaro to abiro miyigo.” 23 Ee, nokuong’orene kama: “Gimoro amora ma ikwaya anamiyigo, kata mana nus pinyruodha.” 24 Omiyo, nyakono ne odhi oko mopenjo min mare kama: “Ang’o monego akwa?” Nodwoke niya: “Wi Johana Jabatiso.” 25 Gikanyono, nyakono noringo mapiyo modhi ir ruoth kendo nochiwo kwayone niya: “Adwaro ni imiya wi Johana Jabatiso e san gie sani.” 26 Kata obedo ni ruoth nokuyo ahinya nikech mano, ne ok odwar tame nikech kuong’ruok ma nosetimo kendo nikech wende. 27 Omiyo, gikanyono ruoth nooro jarit moro kendo nochike mondo okel wi Johana. Eka jaritno ne odhi mong’ado wiye e jela 28 mokelo wiyeno e san. Nomiyo nyakono kae to nyakono nomiyo min mare. 29 Ka jopuonjre mag Johana nowinjo wachno, ne gibiro mi gikawo ringrene kendo ne giyike e liel.

30 Joote nochokore ka gilworo Yesu koni gi koni, mi ne giwachone gik moko duto ma ne gisetimo kendo puonjo. 31 Eka nokonegi niya: “Biuru kar kendu kama onge ji mondo uyue matin.” Nikech ji mang’eny ne biro kendo a ma kata thuolo mar yueyo kata chiemo ne giongego. 32 Omiyo, ne giwuok ka giidho yie nyaka kar kendgi kama ji ongee. 33 Kata kamano, ji nonenogi ka gidhi, mi ng’eny ji nong’eyo mano. Kendo ji nowuok e taondego duto mi giringo gi tiendgi, kendo ne gikwongonegi kuno. 34 Ka nowuok e yie, noneno oganda mang’ongo mi nokechogi, nikech ne gichal kaka rombe ma onge jakwath. Omiyo, nochako puonjogi gik mang’eny.

35 Gie sechego koro sa nolewo, kendo jopuonjrene nobiro ire mi giwachone niya: “Kae bor gi kama ji odakie kendo sa koro olewo. 36 Nyisgi gia mondo gidhi e gwenge gi mier man machiegni eka ging’iew gimoro ma ginyalo chamo.” 37 Nodwokogi kama: “Un migiuru gima ginyalo chamo.” Eka ne gipenje niya: “Be dwadhi mi wang’iew makate mag dinari* 200 mondo wami ji mi romgi chamo?” 38 En nopenjogi kama: “Un gi makate adi? Dhiuru ung’i!” To bang’ ng’iyo ne gidwoke niya: “Makate abich gi rech ariyo.” 39 Eka nochiko oganda duto mondo obed piny e lum mang’ich e kidienje kidienje. 40 Mi ne gibet piny e kidienje mag 100 kod mag 50. 41 Eka nokawo makate abichgo kod rech ariyogo, mi nong’iyo malo e polo kendo noguedho gigo. Bang’e, nong’ingo makatego mochako miyogi jopuonjrene mondo giketgi e nyim ji, kendo nopogo rech ariyogo ne jogo duto. 42 Omiyo, ji duto nochiemo mi giyieng’ 43 kendo ne gichoko ng’injo mag makate mopong’o okepni 12, ka ok okwan mag rech. 44 Joma nochamo makatego ne gin chwo 5,000.

45 Eka ma ok odeko, nojiwo jopuonjrene mondo giidh yie gitelne loka nam ka gichomo Bethsaida, ka en to pod nogonyo oganda. 46 To bang’ goyonegi oriti, nodhi e got moro mondo olem. 47 Ka nochopo odhiambo, yie ne ni e dier nam to en ne en kende e lowo motwo. 48 Omiyo, ka noneno ka kwang’o yie ne bedonegi matek nikech yamo ne chomogi tir, chiegni e arita mar ang’wen gotieno,* nobiro kochomogi ka owuotho e wi nam; to en nodwaro kadhogi. 49 Kane ginene kowuotho e wi nam, ne giparore kama: “En ni waleko, koso?” Kendo ne gikok matek. 50 Nimar giduto ne ginene mi chunygi nochandore. To gikanyono nowuoyo kowachonegi niya: “Beduru gi chir! En an; kik uluor.” 51 Eka noidho irgi e yie, kendo yamono nogik. Mano nomiyo gihum nono 52 nimar pod ne ok giwinjo tiend wach makatego, kata kamano chunygi pod ne odinore.

53 Kane ging’ado loka machielo, ne gichopo Genesaret mi gigowo yie kanyo. 54 To mapiyo kane gisewuok e yie, ji ne ofwenye. 55 Ne giringo kuonde duto e alworano mi ne gichako kelo otendni moting’o joma ne tuore nyaka kama ne giwinjo ni entieree. 56 To e gwenge kata taonde kata mier ma nodonjoe, ji ne keto joma tuo e chirni, kendo ne gisaye mondo gimulie mana riak nangane ma oko kende. Kendo jogo duto ma nomulo nangane, nochango.