Luka

13 Gie kindeno, jomoko ma ne ni kanyo nokelone wach e wi Jo-Galili ma Pilato noruwo rembgi gi misengni ma ne gichiwo. 2 En nodwokogi kama: “Be uparo ni Jo-Galiligo ne gin joricho ma loyo Jo-Galili mamoko duto nikech ne giyudo sandruok ma kamago? 3 Awachonu ni ooyo; to ka ok uloko chunyu ua e richo, uduto ibiro kethu kamano. 4 Kata ji 18 ma ot moro ma rabora nopodho kuomgi Siloam kendo negogi—be uparo ni ne gin gi ketho moloyo jomamoko duto modak Jerusalem? 5 Awachonu ni ooyo; to ka ok uloko chunyu ua e richo, uduto ibiro kethu kaka gin.”

6 Eka nodhi nyime goyo ngero kama: “Ng’at moro nopidho yadh ng’owo e puothe mar mzabibu, kendo nobiro manyo olemo kuome to ok noyudo. 7 Mi nowacho ne jatij puoth mzabibu ni, ‘Sani koro en higa mar adek ma asebedo ka abiro manyo olemo e yadh ng’owoni, to ok ayud gimoro. Tong’e! Marang’o oketho lowo nono?’ 8 To en nodwoke ni, ‘Ruodha, yie iweye ane higa achiel kendo nyaka chop apur alworane mi aketne manyiwa. 9 Ka onyago olemo e kinde ma biro, mano nobed maber; to ka ok onyago eka initong’e.’”

10 Koro noyudo opuonjo e achiel kuom sunagoke chieng’ Sabato. 11 To ne! kanyo ne nitie dhako ma moro nosebedo ka tuore kuom higni 18 nikech jachien ne omake; kendo nodolore ma ok nonyal chung’ moriere tir kata matin. 12 Ka Yesu nonene, nowachone kama: “Dhako, osegonyi kuom tuoni.” 13 Kendo noketo lwete kuome, mi gikanyono noriere tir mochako miyo Nyasaye duong’. 14 To jatelo ma tayo e sunagogi nobedo gi mirima nikech Yesu nochango ng’ato chieng’ Sabato mi nowacho ne oganda niya: “Nitie odiechienge auchiel ma ji onego otimie tich; omiyo biuru e odiechiengego mondo ochangu, to ok e chieng’ Sabato.” 15 To Ruoth nodwoke niya: “Un joma wuondore, donge ng’ato ka ng’ato kuomu jagonyo ruadhe kata pundane kogole e kul kendo otere modho? 16 Koro dhako ma nyar Ibrahim-ni, ma Satan osetueyo kuom higni 18, donge ber ka ogonye kuom gima osetueyeni e chieng’ Sabato, koso?” 17 Eka ka nowacho wechego, jogo duto ma ne kwede nochako yudo wich-kuot, to ogandano duto nobedo mamor gi gik madongo duto ma notimo.

18 Omiyo, nodhi nyime wacho kama: “Pinyruodh Nyasaye chal gi ang’o, kendo anyalo pime gang’o? 19 Ochal gi koth karadali ma ng’ato nokawo kendo nopidho e puothe, mi kodhino nodongo mobedo yath kendo winy mag polo nodak e bedene.”

20 Nowacho kendo niya: “Anyalo pimo Pinyruodh Nyasaye gang’o? 21 Ochal gi thowi ma dhako moro nokawo moruwogo mogo ma pong’o gige pimo adek madongo mag pimo mogo, nyaka mogono duto noyienyo.”

22 Eka nowuotho e dala ka dala kod gweng’ ka gweng’ kopuonjo kendo kodhi nyime gi wuodhe mar dhi Jerusalem. 23 Koro ng’at moro nopenje kama: “Ruoth, be joma nok ema ireso?” Nodwokogi kama: 24 “Keduru matek mondo udonj e dhoot madiny, nikech awachonu ni, ji mang’eny nodwar donjoe to ok gininyal. 25 Ka wuon ot ochung’ mi oloro dhoot, ubiro chung’ oko kudwong’o dhoot kendo kusayo niya, ‘Ruoth, yawnwae.’ To nodwoku kama: ‘Ok ang’eyo kama uwuokie.’ 26 Eka unuchak wacho kama, ‘Ne wachiemo kendo ne wametho e nyimi, bende ne ipuonjo ji e wang’ yorewa madongo.’ 27 To obiro dwokou ni, ‘Ok ang’eyo kama uwuokie. Auru e nyima, un duto ma timbeu ok ni kare!’ 28 Kanyo e kama ywagruoku kod muodo lekeu nobedie, e kinde mubiro nenoe Ibrahim, gi Isaka, gi Jakobo, kod jonabi duto e Pinyruodh Nyasaye, ka un to osewitu oko. 29 E wi mano, ji nobi kowuok yo wuok-chieng’ gi yo podho-chieng’ kod nyandwat gi milambo, kendo ginibed piny e mesa e Pinyruodh Nyasaye. 30 To ne! nitie joma achien ma nobed mokwongo, to nitie joma okwongo, ma nobed ma achien.”

31 E sa nogono, Jo-Farisai moko nobiro mowachone niya: “Wuog ia kae nimar Herode dwaro negi.” 32 To Yesu nokonegi ni, “Dhiuru uwach ne bweno* ni, ‘Ne! agolo jochiende kendo achango ji kawuono gi kiny, to e odiechieng’ mar adek noyud ka asetieko.’ 33 Kata kamano, nyaka adhi nyime gi wuodha kawuono gi kiny kod orucha, nimar ok owinjore oneg janabi oko mar Jerusalem. 34  Jerusalem, Jerusalem, in janeg jonabi kendo jachiel joma oor iri gi kite—mano kaka nyading’eny ne adwaro choko nyithindi kanyachiel mana kaka gweno choko nyithinde kanyachiel e bwo buombene! To un ne ok udwar. 35 Neuru! Odu osejwang’nu. Awachonu ni, ok ununena kendo, nyaka chop uwach kama: ‘Ng’at moguedh en ng’atno ma biro e nying Jehova!’”