Luka

6 Koro nowuotho chieng’ sabato kokadho e puothe cham, to jopuonjrene ne jako kendo chamo wiye cham ka gidunyogi e lwetegi. 2 Nikech mano, moko kuom Jo-Farisai nopenjo kama: “Ang’o momiyo utimo gima ok owinjore gi chik chieng’ Sabato?” 3 To Yesu nodwokogi niya: “Pok usomo gima Daudi notimo kane gidenyo, en kaachiel gi joma ne en-go? 4 Kaka nodonjo e od Nyasaye mi nomiye makate michiwo e nyim Nyasaye mochamo, kae to nochiwo moko ne joma ne ni kode, ma en gima chik ok oyie ne ng’ato ang’ata chamo, to mana jodolo kende?” 5 Eka nowachonegi kama: “Wuod dhano e Ruodh Sabato.”

6 Chieng’ sabato machielo, nodonjo e sunagogi mochako puonjo. To ne nitie ng’ato kanyo ma lwete korachwich ne oner. 7 Jondiko gi Jo-Farisai koro ne ng’iyo Yesu ahinya mondo gine kabe nodhi chango ng’ato chieng’ Sabato eka mondo giyud yo ma ne ginyalo donjonego. 8 Kata kamano, en nong’eyo pachgi, omiyo nowacho ne ng’at ma lwete ne onerno niya: “A malo kendo ichung’ diere.” Mi jalo noa malo mochung’ kanyo. 9 Eka Yesu nokonegi kama: “Apenjou ni, e chieng’ Sabato, chik oyie ne ng’ato timo gima ber koso timo gima rach? Reso ngima koso neko?” 10 Bang’ ng’iyogi giduto koni gi koni, nowacho ne ng’atno niya: “Rie lweti.” Mi notimo kamano kendo lweteno nochango. 11 Kata kamano, ne gibedo gi mirima manono mi gichako wuoyo e kindgi kuom gima ne ginyalo timo ne Yesu.

12 Chieng’ moro e ndalogo, nowuok modhi e got mondo olem, kendo nosiko kuno otieno mangima kolamo Nyasaye. 13 To ka piny ne oru, noluongo jopuonjrene ire, kendo noyiero 12 kuomgi, ma bende nomiyo nying ni joote: 14 Ne gin Simon, ma bende nomiyo nying ni Petro, gi Andrea owadgi, gi Jakobo, gi Johana, gi Filipo, gi Bathlomeo, 15 gi Mathayo, gi Thoma, gi Jakobo wuod Alfayo, gi Simon miluongo ni “jakinda,” 16 gi Judas wuod Jakobo, kod Judas Iskariot ma bang’e nolokore ja andhoga.

17 Mi ne olor kodgi kendo ne ochung’ kama opie, to ne nitie oganda mang’ongo mar jopuonjrene kod oganda maduong’ mar ji mowuok e Judea duto gi Jerusalem kod gwenge mag Tiro gi Sidon ma ne chiegni gi nam. Jogo nobiro winje, kendo mondo ochanggi kuom tuochegi. 18 Kata mana joma jochiende ne chando, ne ochango. 19 To oganda duto ne manyo kaka ne ginyalo mule nimar teko ne wuok kuome kendo changogi giduto.

20 Mi nong’iyo jopuonjrene mochako wacho niya:

“Joma mor gin un joma odhier, nimar Pinyruodh Nyasaye en maru.

21 “Joma mor gin un ma un gi kech sani, nikech ibiro yieng’u.

“Joma mor gin un ma uywak sani, nikech ununyier.

22 “Un joma mor sama ji mon kodu, kendo sama ji pogou yoru kendo gikwedou, kendo sama giracho nyingu nikech Wuod dhano. 23 Beduru mamor e chieng’no kendo chikreuru gi ilo, nimar neuru! pok maru duong’ e polo, kendo gik ma kamago e ma kweregi ne jotimo ne jonabi.

24 “To yaye nobednu malit un joma nigi mwandu, nikech useyudo hoch maru chuth.

25 “Yaye nobednu malit un joma yieng’ sani, nikech unubed gi kech.

“Yaye nobednu malit, un joma nyiero sani, nikech ubiro kuyo kendo ywak.

26 “Yaye nobednu malit sama ji duto wuoyo maber kuomu, nimar mano e kaka kweregi notimo ne jonabi mag miriambo.

27 “To un joma chiko itgi awachonu niya: Dhiuru nyime hero wasiku, ka utimo maber ne joma sin kodu, 28 ka uguedho joma kuong’ou, ka ulamo ne joma yanyou. 29 Ka ng’ato othalo lembi konchiel, lokne machielono bende; kendo ka ng’ato okawo nangani ma oko, kik itame nangani ma iye bende. 30 Mi ji duto ma kwayi gigi, to ng’at ma kawo gigi, kik ikwa mondo oduokni.

31 “Bende, mana kaka udwaro ni ji otimnu, un bende timnegiuru kamano.

32 “Ka uhero joma oherou kende, ere ber muyudo? Nimar kata mana joricho ohero joma oherogi. 33 Kendo ka utimo maber ne joma timonu maber, ere ber muyudo? Kata mana joricho timo kamano. 34 Bende, ka uholo mana joma ugeno ni biro chulou, ere ohala muyudo? Donge kata mana joricho bende holo joricho ka gigeno ni ibiro duoknegi duto ma ne gichiwo, koso? 35 Kar mano, dhiuru nyime hero jowasiku, kendo utim maber, kendo uhol ji ma ok ugen yudoe gimoro; to pok maru biro bedo maduong’, mi unubed nyithind Ng’at Mamalo Chutho, nikech ong’won gi joma ok go erokamano kod joma richo. 36 Dhiuru nyime bedo joma kecho ji, mana kaka Wuonu bende kecho ji.

37 “Bende, weuru ng’ado ne ji bura, eka ok nong’adnu bura ngang’; kendo weuru keto ne ji bura, eka ok noketnu bura ngang’. Dhiuru nyime weyo ne ji kethogi, to un bende nowenu. 38 Beduru jochiwo, to ji biro chiwonu. Giniol e ofuke mag lepu gik mopim maber, modin, motiel, kendo mopong’ thich ma o oko. Nikech rapim ma upimogo, mano bende e ma ibiro pimnugo.”

39 Eka nogoyonegi ngero niya: “Be muofu nyalo tayo muofu wadgi? Donge giduto gibiro lwar e bur? 40 Japuonjre ok duong’ moloyo japuonjne, to ng’ato ka ng’ato mosepuonj malong’o chuth biro bedo kaka japuonjne. 41 Kare ang’o momiyo ing’iyo pilni yath e wang’ owadu to ok ine yath maduong’ e wang’i iwuon? 42 Ere kaka inyalo wacho ne owadu ni, ‘Owadwa, we agolni pilni yath manie wang’i,’ ka koni to in iwuon ok ine yath maduong’ manie wang’ino? In ng’at ma wuondore! Kwong igol yath maduong’ e wang’i iwuon eka ibiro neno maler kaka inyalo golo pilni yath manie wang’ owadu.

43 “Nimar onge yath maber ma nyago olemo motop, kendo onge yath motop ma nyago olemo maber. 44 Nikech yath ka yath ing’eyo kuom olembe owuon. Kuom ranyisi, ji ok pon olemb ng’owo kuom kuthe, kata ng’ado mzabibu kuom yadh kudho. 45 Ng’at maber golo gik mabeyo koa e mwandu mabeyo manie chunye, to ng’at marach golo gik maricho koa e mwandune maricho; nimar gik mogundho e chunye e ma dhoge wacho.

46 “Kare ang’o momiyo uluonga ni ‘Ruoth! Ruoth!’ to ok utim gik ma awacho? 47 Ng’ato ang’ata ma biro ira kendo ma winjo wechena kendo ma timogi, we anyisu ng’at mochalgo: 48 Ochal gi ng’at ma kane dwaro gero ot, nokunyo lowo modhi piny nyaka e wi lwanda eka noketo mise. Omiyo, ka ohula nobiro, pi nogoyo odno to pigno ne onge gi teko mar yienge nikech ne ogere maber. 49 Mopogore gi mano, ng’at ma winjo to ok otim gimoro, ochal gi ng’at ma nogero ot e wi lowo ma onge mise. Pi nogoyo odno mi gikanyono nolwar, kendo ne okethore marach.”