Johana

2 Koro e odiechieng’ mar adek, nyasi moro mar kend ne timore Kana man Galili, kendo min Yesu ne ni kanyo. 2 Yesu gi jopuonjrene bende ne ogwel e nyasino.

3 Kane divai chiegni rumo, min Yesu nowachone niya: “Gionge gi divai.” 4 To Yesu nodwoke niya: “Dhako, ang’o momiyo mano onego obadha kendo badhi? Sana pok ochopo.” 5 Min mare nowacho ne joma ne konyo tich kama: “Gimoro amora mowachonu, utim.” 6 Koro ka luwore gi kaka chik pwodhruok mar Jo-Yahudi ne dwaro, kanyo ne nitie agulni auchiel mag pi, ne olosgi gi kidi kendo moro ka moro ne nyalo ting’o lita ma dirom 44 kata 66. 7 Yesu nokonegi niya: “Pong’uru agulnigo gi pi.” Mi ne gipong’ogi thich. 8 Eka nowachonegi niya: “Koro tuomuru moko mondo uter ne jal ma tayo nyasi.” Mi ne gitero. 9 Ka jal ma ne tayo nyasino nobilo pi ma koro ne oselok mobedo divai, kata obedo ni ok nong’eyo kama divaino nowuokie (to jotich ma ne otwomo pigno to nong’eyo), jalo noluongo wuon kisera 10 kendo nowachone niya: “Pile ji kwongo golo divai maberie moloyo, to ka ji osemer eka gigolo ma ok ber ahinya. In to ikano divai maber moloyo nyaka sani.” 11 Yesu notimo mano Kana man Galili kaka ranyisi maduong’ mokwongo ma notimo, kendo nomiyo duong’ne onenore ayanga, mi jopuonjrene noketo yiegi kuome.

12 Bang’ mano, ne gilor mi gidhi Kapernaum, ka en gi min-gi, kod owetene, gi jopuonjrene, to ne ok gibet kuno kuom ndalo mang’eny.

13 Koro Pasaka mar Jo-Yahudi ne chiegni, kendo Yesu noidho kodhi Jerusalem. 14 Nodonjo ei hekalu monwang’o joma ne uso dhok, gi rombe, gi akuche, kod jowil pesa kobet e kombegi. 15 To bang’ mino tonde molosogo del, noriembo jogo duto ma ne nigi rombe kod dhok kogologi oko mar hekalu, kendo nopuko pesa ma mingli mag jowil pesago, mi noloko mesnigi ataro. 16 Eka nowacho ne joma ne uso akuche kama: “Goluru gigi oa kae! Weuru timo od Wuora obed od ohala!” 17 Jopuonjre noparo weche ma ne ondik niya: “Kinda mar odi biro tieka.”

18 Kuom mano, Jo-Yahudi nopenje kama: “Nikech itimo gigi, in gi ranyisi mane ma dinyiswae?” 19 Eka Yesu nodwokogi kama: “Mukuru hekaluni, to abiro gere gi ndalo adek.” 20 Mi Jo-Yahudi nopenje niya: “Hekaluni noger kuom higni 46, to in digere gi ndalo adek nade?” 21 Kata kamano, hekalu ma ne owuoyo kuome, ne en dende. 22 To ka nosechiere a kuom joma otho, jopuonjrene noparo kaka nojawacho mano, mi ne giketo yie e Ndiko kendo e wach ma Yesu nosewacho.

23 Kata kamano, kane en Jerusalem e sawo mar Pasaka, ji mang’eny noketo yiegi e nyinge kane gineno ranyisi madongo ma notimo. 24 To Yesu ok nogenogi ahinya nimar nong’eyogi giduto, 25 bende, ne ok odwar ni ng’ato e ma ochiw neno e wi dhano nimar nong’eyo gima ni ei dhano.