Tich Joote
13 Koro e kanyakla man Antiokia ne nitie jonabi kod jopuonj, ne gin: Barnaba, gi Simion ma ne iluongo ni Rateng’,* gi Lusio ma Ja-Kirene, gi Manaen ma noyudo tiegruok kanyachiel gi Herode ma jaloch mar alwora Galili, kod Saulo. 2 Ka noyudo gitiyo ne Jehova kendo gitueyo chiemo, roho maler nowacho kama: “Walnauru Barnaba gi Saulo ne tich ma aseluongonegi.” 3 Eka bang’ tueyo chiemo kendo lemo, ne giketo lwetgi kuomgi kae to ne giweyogi mondo gidhi.
4 Omiyo, roho maler nooro jogo mi ne gilor nyaka Seleukia, kendo ne giwuok kanyo mi giidho yie nyaka Saipras. 5 Kane gichopo Salamis, ne gichako lando wach Nyasaye e sunagoke mag Jo-Yahudi. Johana bende ne ni kodgi ka otiyonegi.
6 To kane gisewuotho e chulano duto nyaka e Pafo, ne giromo gi Ja-Yahudi moro miluongo ni Bar-Yesu ma ne en ajuoga kendo janabi mar miriambo. 7 Ne oyudo en gi Sajio Paulas ma ne en jatelo kendo ng’at mariek. Sajio Paulas noluongo Barnaba gi Saulo ire nikech nodwaro ahinya winjo wach Nyasaye. 8 To Elima, ajuogano (nying Elima iloko ni ajuoga), nochako kwedogi kotemo loko jatelono mondo kik orwak yie. 9 Eka Saulo, ma bende iluongo ni Paulo, ne opong’ gi roho maler mi nochomo wang’e tir kuome 10 mowachone kama: “Yaye, in jal mopong’ gi kit miganga duto kod richo duto, in wuod Jachien, in jasik gik makare duto, be iniwe gwenyo yore makare mag Jehova, koso? 11 Ne! lwet Jehova ni kuomi, ibiro bedo muofu kendo ok inine wang’-chieng’ kuom kinde.” Gikanyono, ong’ueng’o gi mudho mandiwa noumo wang’e, kendo nowuotho koni gi koni kotemo manyo ng’at ma ne nyalo mako lwete ka tayego. 12 Eka ka jatelono noseneno gima ne oa timoreno, ne orwako yie nimar ne ohum gi puonj mag Jehova.
13 Koro Paulo gi joma ne en-go noidho yie ka giwuok Pafo kendo ne gichopo Parga e Pamfilia. To Johana noweyogi, mi nodok Jerusalem. 14 Kata kamano, gin to ne giwuok Parga mi gidhi nyaka Antiokia e Pisidia. Eka kane gidonjo e sunagogi chieng’ Sabato, ne gibet piny. 15 Kane osesom Chik kod weche Jonabi, jotelo ma tayo e sunagogi nooronegi wach niya: “Owete, ka un gi wach moro amora ma unyalo jiwogo ji, wacheuru.” 16 Kuom mano, Paulo ne oa malo mi nofwayo bade kowacho niya:
“Un Jo-Israel kod un jomamoko moluoro Nyasaye, winjuru. 17 Nyasach Jo-Israelgi noyiero kwerewa, kendo noting’ogi malo kane gin jodak ma welo e piny Misri, mi nogologi kuno gi tekone maduong’. 18 Kendo ne onano kodgi e thim kuom higni ma dirom 40. 19 Ka noseketho ogendni abiriyo e piny Kanaan, nochiwo lopegi mondo obed kaka pok ne Jo-Israel. 20 Mago duto notimore kuom kinde ma dirom higni 450.
“Bang’ mano, nomiyogi jong’ad-bura nyaka e kinde janabi Samuel. 21 To bang’e, ne gikwayo ni omigi ruoth, eka Nyasaye nomiyogi Saulo wuod Kish, ma noa e dhood Benjamin, kuom higni 40. 22 Bang’ gole, ne ochungonegi Ruoth Daudi, jal ma Nyasaye notimo neno kuome niya: ‘Aseyudo Daudi wuod Jese, jal ma chunya oyiego; obiro timo gik moko duto ma adwaro.’ 23 Ka luwore gi singone, Nyasaye osekelo ne Israel jawar, ma en Yesu, moa e anyuola mar Daudi. 24 Ka pok jalo nochopo, Johana noseyalo ne Jo-Israel duto wach batiso ma en kaka ranyisi mar loko chuny a e richo. 25 To ka Johana ne chiegni tieko migape, nojapenjo kama: ‘Uparo ni an ng’a? Ok an en. Kata kamano, neuru! nitie Ng’ato ma biro bang’a ma ok awinjora gonyo tond wuoche manie tiende.’
26 “Owetena, ma un koth Ibrahim kod jomamoko manie kindu moluoro Nyasaye, wach mar warruokni oseornwa waduto. 27 Nimar joma nodak Jerusalem kod jolochgi ne ok ofwenyo jalni, to kane ging’adone bura, ne gichopo gik ma ne okor e weche Jonabi, ma gin weche misomo ne ji gi dwol maduong’ e sabato ka sabato. 28 Kata obedo ni ok ne giyudo wach moro amora kuome ma dimi otho, pod ne giramo ni Pilato ogol chik mondo onege. 29 To kane gisechopo weche duto ma ne ondik kuome, ne gilore oa e yath kendo ne gipiele e liel. 30 Kata kamano, Nyasaye ne ochiere oa kuom joma otho, 31 to kuom ndalo mang’eny, joma noidho kode a Galili nyaka Jerusalem ne onene. Jogo e ma sani chiwo neno ne ji e wi wachne.
32 “Omiyo, sani walandonu wach maber e wi wach ma ne osing ne kwerewa. 33 Kuom chiero Yesu, Nyasaye osechopo singono chuth ne wan nyithindgi; mana kaka ondik e zaburi mar ariyo niya: ‘In e wuoda; kawuononi, asebedo wuoru.’ 34 To nikech Nyasaye ne ochiere oa kuom joma otho mondo kik obed gi ringruok ma tow kendo, nowacho kama: ‘Ananyisu hera ma siko chuth ma ne osing ne Daudi, ma en hera minyalo gen.’ 35 Omiyo, owacho bende e zaburi machielo kama: ‘Ok ibi weyo ng’ati momakore kodi mondo ringrene otow.’ 36 Kata kamano, Daudi notiyo ne Nyasaye e tieng’ne mi ne otho moyike gi kwerene, kendo ringrene ne otow. 37 Mopogore gi mano, jal ma Nyasaye nochiero, ringrene ne ok otow.
38 “Kuom mano, owetena, wachni mondo ong’erenu, ni kokalo kuom jalno, wach weyo ne ji richo sani ilandonu, 39 kendo ni kuom gik moko duto ma Chik Musa ne ok nyal ketoue joma kare, ng’ato ang’ata moyie, ikete ng’at makare kokalo kuom jalni. 40 Omiyo, beduru motang’ mondo gik ma ne okor e weche Jonabi kik bi kuomu, niya: 41 ‘Neuru, un jojero, kendo wuoruru wachno mi ulal nono, nimar sani achopo tich moro e ndalou, ma en tich ma ok ubi yie ngang’ kata ka ng’ato oleronugo adimba.’”
42 Koro sama ne giwuok e sunagogino, ji nosayogi mondo giduog ginyisgi wechego e Sabato ma luwo. 43 To ka chokruok mar sunagogi noserumo, thoth Jo-Yahudi gi joma ne lamo Nyasaye ma ne ok gin Jo-Yahudi to nodonjo e din mar Jo-Yahudi, noluwo Paulo gi Barnaba ma ne sayogi mondo gisik e ng’wono mogundho mar Nyasaye.
44 E Sabato ma noluwo, chiegni taondno mangima ne ochokore kanyachiel mondo giwinj wach Jehova. 45 Ka Jo-Yahudi noneno oganda mang’ongono, nyiego nomakogi ahinya mi ne gichako kwedo gik ma Paulo ne wacho ka gichayo gigo. 46 Eka Paulo gi Barnaba nowachonegi gi chir niya: “Ne en gima dwarore ni un e ma okwong yalnu wach Nyasaye. To nikech ero utamoru wachno kendo useng’ado ni ok uwinjoru gi ngima mochwere, neuru! koro wadhi ir ogendni mamoko. 47 Nimar Jehova osechikowa niya, ‘Aseketou kaka ler ne ogendni, mondo uter warruok nyaka e tung’ piny.’”
48 Ka joma ne oa ogendni mamoko nowinjo mano, ne gichako bedo mamor kendo pako wach Jehova, eka ji duto ma chunygi ne ni kare ne ngima mochwere norwako yie. 49 E wi mano, wach Jehova ne ilando e pinyno mangima. 50 To Jo-Yahudi nothuwo wach kuom mon moko ma ne nigi huma kendo ma ne oluoro Nyasaye, kod jodongo mag taondno, kendo ne gimiyo osand Paulo gi Barnaba, mi ne owitgi oko mar taondno. 51 Kuom mano, ne giteng’onegi buch tiendegi mi gidhi nyaka Ikonio. 52 Kendo jopuonjre nomedo pong’ gi mor maduong’ kod roho maler.