1 Jo-Korintho
14 Lawuru hera, to sikuru kutimo matek mondo uyud mich mag roho, to moloyo, mondo ukor wach. 2 Nimar ng’at ma nigi mich mar dhum gi dhok mopogore opogore wuoyo gi Nyasaye to ok gi dhano, nikech onge ng’at ma winjo, to owacho weche maler moum kotimo kamano kokalo kuom roho. 3 Kata kamano, ng’at ma koro wach gero ji, kendo ojiwo ji, kendo ohoyo ji gi wechene. 4 Ng’at ma nigi mich mar dhum gerore owuon, to ng’at ma koro wach gero kanyakla. 5 Koro daher ni uduto ubed gi mich mar dhum gi dhok mopogore opogore, kata kamano daher moloyo ni mondo ukor wach. Kuom adier, ng’at ma koro wach duong’ moloyo ng’at ma nigi mich mar dhum, mak mana ka adier oloko wechego mondo ogergo kanyakla. 6 To owetena, ka dipo ni abiro iru ka adhum gi dhok mopogore opogore, en ber mane ma datimnu ka ok awuoyo kodu gi fweny, kata gi ng’eyo, kata gi koro wach, kata gi puonj moro?
7 Mano bende e kaka gik ma golo dwol to gionge gi ngima chalo, obed asili kata nyatiti. Ka ok opog dwond moro ka moro kuomgi, ere kaka inyalo fweny dwol mar asili kata mar nyatiti? 8 Nimar ka turmbeta chiwo dwol ma tiende ok ong’ere malong’o, en ng’a ma biro ikore ne lweny? 9 Kamano bende, ka ok uwuo gi dhok ma ji winjo tiende mayot, ere kaka ng’ato biro ng’eyo gima uwacho? Mano biro chalo ka gima uwuoyo gi yamo. 10 Nyalo bedo ni nitie dhok mang’eny mopogore opogore miwacho e piny, kata kamano onge dhok moro amora ma onge gi tiende. 11 Nikech ka ok awinj tiend wach miwacho, abiro chalo wendo ne ng’at ma wuoyo, kendo ng’at ma wuoyono biro bedona ka wendo. 12 Kamano bende, nikech ugombo ahinya bedo gi mich mag roho, dwaruru matek mondo ubed gi mich mogundho ma biro gero kanyakla.
13 Kuom mano, ng’at ma dhum gi dhok mopogore opogore, olem mondo obed gi nyalo mar lokogi. 14 Nikech sama alemo ka adhum gi dhok mopogore opogore, mich mara mar roho e ma lemo, to pacha ok tim gimoro. 15 Kare ang’o monego otimre? Abiro lemo ka atiyo gi mich mar roho, to abiro lemo gi pacha bende. Abiro wero wende pak ka tiyo gi mich mar roho, to abiro wero wende pak gi pacha bende. 16 Ka ok kamano, ka ichiwo pak kitiyo gi mich moro mar roho, ere kaka ng’ato ang’ata mapile manie dieru biro wacho ni, “Amin” e wi erokamano migoyo sama ilemo to ok ong’eyo tiend gima iwacho? 17 Adier, isegoyo erokamano e yo maber, to ok iger ng’at machielo. 18 Agoyo ne Nyasaye erokamano ni adhum gi dhok mang’eny moloyo kaka uduto utimo. 19 Kata kamano, ka an e kanyakla, dibed maber moloyo ka awacho weche abich gi pacha mondo apuonjgo jomamoko ka ahulonegi gi dhoga, kar tiyo gi weche aluf apar ka adhum gi dhok mopogore opogore.
20 Owetena, kik ubed nyithindo e pachu, to beduru nyithindo matindo kuom wach richo; kendo ubed joma dongo e pachu. 21 Ondik e Chik niya: “Jehova owacho kama, ‘Anawuo gi jogi ka atiyo gi dho welo kod dho joma gikia, to e ma pod gibiro tamore winja.’” 22 Kuom mano, dhum gi dhok mopogore opogore ok en ranyisi ne joma ni e yie, to en ranyisi ne joma ok ni e yie, to koro wach ok en mar joma ok ni e yie, to en mar joma ni e yie. 23 Omiyo, ka kanyakla mangima ochokore kamoro achiel kendo uduto udhum gi dhok mopogore opogore, kae to ji ajia mapile kata joma ok ni e yie odonjo kanyo, donge gibiro wacho ni neko omakou? 24 To ka uduto ukoro wach kendo ng’at ma ok ni e yie kata ng’ato ang’ata mapile odonjo kanyo, obiro fwenyo ni irieye kendo inone adimba gi ji duto. 25 Eka weche mopondo e chunye biro fwenyore, kendo obiro podho piny auma kae to olamo Nyasaye kohulo ayanga niya: “Adier Nyasaye ni e kindu.”
26 Owetena, kare en ang’o monego otimre? Sama uchokoru kanyachiel, ng’at moro nigi zaburi, machielo nigi puonj moro, machielo nigi fweny moro, machielo nigi mich mar dhum gi dhok mopogore opogore, to machielo nigi mich mar loko tiend dhok. Gik moko duto mondo otimre e yo ma gero kanyakla. 27 To ka nitie ng’at ma dhum, ji ariyo kata adek e ma odhum ka ng’eny, kendo gitim kamano ka giwilore, to ng’ato nyaka lok dhokgo. 28 To ka onge ng’at ma loko, jalo nyaka ling’ thi e kanyakla kendo owuo gi chunye owuon kod Nyasaye. 29 Jonabi ariyo kata adek mondo okor wach, kae to jomamokogo ofweny tiend wechego. 30 To ka ng’at machielo oyudo fweny moro sama obet kanyo, ng’at ma fwenyno onwang’o ka wuoyo mondo oling’. 31 Nimar uduto unyalo koro wach ka utimo kamano ng’ato bang’ nyawadgi, mondo ji duto opuonjre kendo giduto giyud jip. 32 Kendo mich mag roho ma jonabi tiyogo, onego giti kodgi e yor ritruok. 33 Nimar Nyasaye ok tim gik moko e yo ma ok ochanore, to en Nyasach kuwe.
Mana kaka timore e kanyakla duto mag joma ler, 34 mon mondo oling’ ei kanyakla, nimar ok oyienegi wuoyo. Kar mano, gibolre e bwo chwo mana kaka Chik bende wacho. 35 Kapo ni gidwaro puonjore wach moro, onego gipenj chwogi ka gin pacho, nimar en gima kelo wich-kuot ka dhako wuoyo e kanyakla.
36 Be un e ma wach Nyasaye noa kuomu, koso wachno nochopo mana ne un kendu?
37 Ka nitie ng’at ma paro ni en janabi kata ni en gi mich mag roho, nyaka oyie gi weche ma andikonugi kaka weche ma Ruodhwa e ma chiko. 38 To ka nitie ng’at ma ochayo wechego, ibiro chaye. 39 Omiyo, owetena, timuru matek mondo ubed gi mich mar koro wach, to kik utam ng’at ma dhum gi dhok mopogore opogore. 40 To weuru mondo gik moko duto otimre e yo mobidhore kendo mochanore maber.