2 Jo-Korintho

5 Nikech wang’eyo ni ka oketh odwa mar pinyni, tiende ni hemani, wabiro yudo ot moa kuom Nyasaye, ot manie polo, ma ok oger gi lwedo, ma en ot ma siko. 2 Nimar kuom adier wachur e odwani ka wagombo ahinya rwako ot ma marwa, ma en ot ma wuok e polo, 3 mondo ka waserwake, kik yudwa duk. 4 Kuom adier, wan ma wanie hemani, wachur nikech ting’ mapek, nimar ok wadwar lonyo hema ma wan-go sani, to wadwaro rwako machielono, eka ngima omwony mano ma tho. 5 Koro Nyasaye e ma noikowa ne ngimano, kendo nomiyowa roho maler kaka singo mar gima biro.

6 Omiyo, kinde duto wan gi chir ahinya kendo wang’eyo ni ka pod wan gi kar dak e del mar ringruok, wabedo mabor gi Ruoth, 7 nimar wawuotho kuom yie, to ok kuom gik mineno. 8 To wan gi chir ahinya kendo dwaher moloyo ni wabed mabor gi del mar ringruok, to mondo walos kar dakwa gi Ruoth. 9 Omiyo, kata bed ni wadak kode kata wan mabor kode, watemo matek mondo wabed joma oyiego. 10 Nimar waduto nyaka wachung’ e nyim kom-bura mar Kristo, mondo ochul ng’ato ka ng’ato ka luwore gi gik mosetimo ka en e ringruogni, obed gima ber kata gima rach.

11 Kuom mano, nikech waseng’eyo tiend luoro Ruoth, wasiko ka watemo loko pach ji mondo giyie, kendo Nyasaye ong’eyowa maber. Kata kamano, an gi geno ni un bende chunyu ok chich kodwa nikech useng’eyowa maber. 12 Ok wapakre wawegi kendo e nyimu kaka joma long’o, to wamiyou gima nyalo miyo usungru nikech wan, mondo ubed gi nyalo mar dwoko joma sungore nikech gik ma nenore gi oko, to ok gik man ei chuny. 13 Nimar kapo ni pachwa ne ok ni kare, ne en kamano nikech Nyasaye; ka pachwa ni kare, en nikech un. 14 Nimar hera mar Kristo chunowa, nikech ma e gima waseng’ado, ni ng’ato achiel ne otho ne ji duto; kuom adier, ji duto nosetho. 15 Kendo ne otho ne ji duto mondo joma ngima kik dhi nyime bedo mangima ne dwachgi giwegi, to ne dwach jalo ma ne othonegi, kendo ma nochier.

16 Omiyo, chakre sani ka dhi nyime, ok wang’eyo ng’ato ang’ata e yor ringruok. Kata kapo ni chon ne wang’eyo Kristo e ringruok, kuom adier sani to koro ok wang’eye kamano. 17 Kuom mano, ka ng’ato ni e winjruok achiel gi Kristo, ng’atno en chuech manyien; gik machon osekalo; neuru! gik manyien koro nitie. 18 Kata kamano, gik moko duto a kuom Nyasaye ma ne oloso winjruok maber e kindwa kode kokalo kuom Kristo, kendo nomiyowa tich mar konyo ji olos winjruok kode, 19 tiende ni kokalo kuom Kristo, Nyasaye ne loso winjruok gi piny duto, ma ok okwan kethogi e wigi kendo, to wan nomiyowa tij lando wach winjruogno.

20 Kuom mano, wan joma oor ma tiyo e lo Kristo mana ka gima Nyasaye hombo ji kokalo kuomwa. Kaka joma tiyo e lo Kristo, wasayo kama: “Losuru winjruok maber gi Nyasaye.” 21 Ng’at ma ne onge gi richo chuth, ne omi odoko richo* nikech wan, mondo kokalo kuom ng’atno, wabed joma kare e wang’ Nyasaye.