2 Jo-Thesalonika

2 Kata kamano, owetewa, kuom wach kinde ma biro yudo ka Ruodhwa Yesu Kristo nitie,* kendo mibiro chokwae kanyachiel kode, wakwayou ni 2 kik uyie mondo pachu ma ni kare ochoch e yo mayot, bende kik chand pachu, bed ni en kokalo kuom wach ma nenore ka gima oa kuom Nyasaye, kata kokalo kuom wach mohul gi dhok, kata kuom barua moro ma nenore ka gima oa kuomwa, ka giwuondou ni chieng’no mar Jehova osechopo.

3 Kik uwe mondo ng’ato omi ulal e yo moro amora, nimar mano ok bi betie nyaka ng’anjo ne lamo madier bi mondi, kendo bang’ ka osefweny jalo ma en jaketh-chik, tiende ni wuod kethruok. 4 En ja akwede kendo oting’ore malo e wi gimoro amora miluongo ni nyasaye kata e wi gimoro amora ma ji lamo, kendo mano miyo obet piny e hekalu mar Nyasaye koketore owuon ka nyasaye. 5 Koso ok unyal paro ni ne ajawachonu gigi e kinde ma ne pod an kodu?

6 To koro useng’eyo gima osebedo ka geng’e mondo obi ofwenye e kinde mowinjore kode. 7 Adier, wach mopondo mar ketho chikno sani osechako tiyo, to mana nyaka chop kinde ma ibiro golie oko jalo ma sani geng’e. 8 Eka kuom adier ibiro fweny jalo ma en jaketh-chik, ma Ruodhwa Yesu biro ketho kokalo kuom teko mar muya ma wuok e dhoge, kendo obiro tieke chuth e kinde ma biro yudo ka entie.* 9 To jalo ma jaketh-chik betie nikech tij Satan, kotimo tije kod ranyisi madongo mag miriambo gi gik miwuoro 10 kod wuond duto ma ok kare kuom joma ochomo kethruok, ma en kaka kum nikech ne ok gihero adiera ma diresgi. 11 Mano e momiyo Nyasaye oseweyo mondo gima ok kare owuondgi eka giyie gi gima en miriambo, 12 mondo giduto obi ong’adnegi bura nikech ne ok giyie kuom adiera, to ne gihero gik ma ok kare.

13 Kata kamano, kinde duto wan gi ting’ mar goyo ne Nyasaye erokamano nikech un, owetewa ma Jehova ohero, nimar Nyasaye noyierou a chakruok mondo ubi uyud warruok kokalo kuom pwodhou ubed maler gi rohone kendo kokalo kuom yieu e adiera. 14 Ne oluongou ne warruogno kokalo kuom wach maber ma walando, mondo uyud duong’ mar Ruodhwa Yesu Kristo. 15 Kuom mano, owetena, chung’uru motegno kendo sikuru kumako kit tim ma ne opuonju, bed ni ne en kokalo kuom weche mohul gi dhok, kata kuom barua moro ma oa kuomwa. 16 E wi mano, Ruodhwa Yesu Kristo owuon kod Nyasaye Wuonwa ma noherowa kendo nochiwonwa hoch ma nyaka chieng’ kod geno ma jaber kokalo kuom ng’wono mogundho, 17 mondo oho chunyu kendo otegu e tim kod wach moro amora maber.