Jo-Hibrania

13 Hera ma un-go e kindu kaka hera manie kind owete mondo omed dhi nyime. 2 Wiu kik wil gi tim rwako welo, nimar kuom timo kamano jomoko norwako malaike kata ka ok ging’eyo. 3 Beduru ka uparo joma ni e jela, mana ka gima un bende un e tuech kanyachiel kodgi; bende, paruru joma itimonegi marach, nikech un uwegi un bende un e ringruok.* 4 Kend mondo obed gima ji duto miyo luor, kendo otanda mar kend kik dwany, nimar Nyasaye biro ng’ado bura ne joterruok gi jochode. 5 Kit ngimau mondo kik obed mar hero pesa, to ubed joma gik ma un-go sani romou. Nikech osewacho kama: “Ok anaweu ngang’, kendo ok anajwang’u ngang’.” 6 Eka mondo wabed gi chir maduong’ kendo wacho niya: “Jehova e jakonyna; ok analuor gimoro. En ang’o ma dhano ditimna?”

7 Beduru ka uparo joma tayou, ma gin joma osewachonu wach Nyasaye, kendo luwuru yiegi bang’ neno kaka timgi obet.

8 Yesu Kristo siko kaka en, nyoro kod kawuono, kendo nyaka chieng’.

9 Kik uwe mondo puonj mopogore opogore kod ma yoreyore omi uba yo, nimar ber moloyo mondo ng’wono mogundho mar Nyasaye oteg chuny ng’ato, to ok kokalo kuom chiemo ma gin gik ma ok kony joma odich kodgi.

10 Wan gi kendo mar misango ma en kama joma tiyo tij Nyasaye e hema ok nigi ratiro mar chiemoe. 11 Nimar le ma jadolo maduong’ tero rembgi ei kama ler kochiwogi kaka misango mar richo iwang’o ringregi oko mar kambi. 12 Kuom mano, Yesu bende ne osand oko e ranga dala, eka mondo opwodh ji odok maler kotiyo gi rembe owuon. 13 Omiyo, wadhiuru ire oko mar kambi, ka wating’o achaya ma noting’o, 14 nimar waonge gi dala moro ma siko, to wamanyo gi kinda dala ma biro. 15 Kokalo kuom Yesu, kinde duto wachiwuru ne Nyasaye misango mar pak, tiende ni olemo mar dhowa, ma en gima lando nyinge e lela. 16 E wi mano, wiu kik wil gi timo maber kendo pogo gik ma un-go ne jomamoko, nikech Nyasaye mor ahinya gi misengni ma kamago.

17 Beduru joma luwo kaka joma tayou chikou kendo yieuru bedo e bwo tekogi, nimar gisiko ka giritou kaka joma biro dwoko wach e bura, mondo giti tijno ka gin gi mor to ok gi chuny mapek, nikech mano nyalo kelonu hinyruok.

18 Sikuru ka ulamonwa, nimar wageno ni wan gi chuny matir ma ok ketnwa bura, nikech wadwaro bedo joratiro e gik moko duto ma watimo. 19 To moloyo, akwayo ni ulamna mondo aduog iru mapiyo kaka nyalore.

20 Nyasach kuwe nochiero Ruodhwa Yesu kane ogole e tho. Kendo remo mar singruok mochwere ni kod Yesu, jakwath maduong’ mar rombe. Mad Nyasach kuwe 21 omi ubed moikore gi gik mabeyo duto mondo utim dwache, kotimo kuomwa gima long’o e wang’e kokalo kuom Yesu Kristo. Duong’ obedne mochwere kendo nyaka chieng’. Amin.

22 Owetena, koro asayou mondo uhoru mos kuchiko itu ne weche moting’o jipgo, nimar asendikonu barua machuok. 23 Daher ni ung’e ni osegony Timotheo owadwa. Kapo ni obiro mapiyo, to wanabi kode mondo waneu.

24 Mosnauru ji duto matayou e kindu kendo umosna joma ler duto. Joma ni Italia ooronu mos.

25 Ng’wono mogundho mar Nyasaye mondo obed kodu uduto.