Jo-Hibrania

6 Kuom mano, nikech koro wasedongo mi waweyo puonj ma gin mana mise mag ng’eyo Kristo, koro wakeduru matek mondo wabed joma otegno, ma ok wasik mana ka waketo mise kendo, tiende ni e puonj kaka loko chuny a e timbe ma kelo tho, yie kuom Nyasaye, 2 puonj mar batiso, yieyo lwedo kuom ji, chier mar joma otho, kod bura ma nyaka chieng’. 3 To wabiro timo mano, ka adier Nyasaye oyie.

4 Nimar kuom joma noseyudo ler chon kendo ma gin joma nosebilo mich mar polo michiwo nono, kendo moseyudo roho maler, 5 kendo ma osebilo wach malong’o mar Nyasaye kod gik ma nigi teko motudore gi ndalo ma biro, 6 to koro giselwar gia e yie, ok nyalre mondo okonygi mi gichak gilok chunygi gia e richo kendo, nimar giwegi giguro Wuod Nyasaye e yath kendo, ka gikete e lela mondo oyud wich-kuot. 7 Nikech lowo yudo gueth moa kuom Nyasaye sama omodho pi koth ma chue kuome pile, kae to omiyo cham gi yien nyakie mondo okony joma ne opure. 8 To ka onyago mana kuthe kod buya, japur jwang’e kendo mapiyo obiro bedo gima ikuong’o, kendo gikone ibiro wang’e awang’a.

9 To kuomu un joma ahero, kata obedo ni sani wawuoyo e yo ma kamano, wan gadier ni umedo dhi maber moloyo, ka utimo gik ma terou e warruok. 10 Nimar Nyasaye ok en ng’at ma ok kare ma wiye diwil gi gik ma usetimo kod hera ma usenyiso ne nyinge kuom tiyo ka ukonyo joma ler kendo udhi nyime tiyonegi. 11 To adwaro ni ng’ato ka ng’ato kuomu oti matek kamano mondo obed gadier chuth kuom genono nyaka giko, 12 mondo kik ubed josamuoyo, to ubed joma luwo tim joma yudo gik ma ne osing nikech ne ginyiso yie kod horuok mos.

13 Nimar ka Nyasaye notimo singo ne Ibrahim, Nyasaye ne okuong’ore gi nyinge owuon nikech onge ng’at moro maduong’ moloye ma nonyalo kuong’orego, 14 ka nowacho niya: “Kuom adier, anaguedhi, kendo adier anami inya mi ibed mang’eny.” 15 Omiyo, ka Ibrahim nosenyiso horuok mos, noyudo gima ne osingno. 16 Nikech pile dhano kuong’ore gi nying ng’at maduong’ moloyogi, kendo mano e ma tieko ywaruok ma nyalo betie e kindgi, nimar kuong’ruogno golo kiawa moro amora ma nyalo betie. 17 E yo ma kamano bende, kane Nyasaye ong’ado mondo oyang weche e yo maler moloyo ne joma ne dhi yudo pok mar singono ka onyisogi kaka dwache en dwaro ma ok lokre ngang’, ne ojiwo singono kuom kuong’ruok, 18 mondo kokalo kuom gik moko ariyo ma ok lokre ngang’ ma Nyasaye ok nyal riamboe chuth, wan ma waseringo mi wadhi e kar bwok, wabed gi jip maduong’ mar dhi nyime makruok motegno gi geno moseket e nyimwa. 19 Wan gi genoni ma chalnwa kaka nanga mar meli mosiro ngimawa; en geno madier, kendo motegno, kendo okalo pasia ka odonjo iye 20 kama Yesu ma en jal mosedhi motelonwa mondo olos yo, osedonjoe e lowa. Yesuno osebedo jadolo maduong’ mochwere e kit dolo mar Melkizedek.