Jakobo

5 Koro biuru un jomwandu, ywaguru kendo ugo nduru nikech masiche ma biro kuomu. 2 Mwandu magu osetow kendo kute osechamo lepu. 3 Nyal osechamo dhahabu gi fedhau chuth, kendo nyal man kuomgi biro chiwo neno ni un gi ketho, kendo obiro chamo ringreu. Gik ma usekano biro chalo gi mach e ndalo mag giko. 4 Neuru! Chudo ma usetuono jotich ma ne okeyo e puotheu siko ka kok gi dwol maduong’, kendo ywak mar jokeyogo ni mondo okonygi osechopo nyaka e it Jehova mar ogendni mag lweny. 5 Usebedo ka udak e ngima ma malo mopong’ gi dhialruok kendo uchopo gombou mag ringruok e piny. Usemiyo chunyu odoko machwe e chieng’ yeng’o. 6 Useng’ado bura; usenego ng’at makare. Donge okwedou?

7 Kuom mano, beduru joma hore mos nyaka chop ndalo ma biro yudo ka Ruodhwa nitie.* Neuru! Japur siko ka rito ahinya kogeno ni lowo biro nyakne, kohore mos nyaka chop koth mokwongo gi koth ma achien bi. 8 Un bende beduru joma hore mos; miuru chunyu obed motegno, nikech kinde ma biro yudo ka Ruodhwa nitie* osekayo machiegni.

9 Owetena, kik ung’ur e kindu uwegi, mondo kik ng’adnu bura. Neuru! Jang’ad-bura ochung’ e dhoot. 10 Owetena, neuru jonabi ma nowuoyo e nying Jehova kaka ranyisi monego uluw nikech masiche ma ne oyudogi kod horuok ma ne gikadhoe. 11 Neuru! Wakwano joma osenano ni gin joma mor. Usewinjo wach Ayub kaka ne onano kendo useneno gima Jehova notimone bang’ mano, ni Jehova ogundho gi hera matut kendo okecho ji.

12 To moloyo duto owetena, weuru kuong’oru gi polo, kata gi piny, kata gi kuong’ruok moro amora. Kar mano, “Ee” maru mondo obed mana ee, to “Ooyo” maru obed mana ooyo, mondo kik ng’adnu bura.

13 Be nitie ng’ato e kindu ma yudo masiche? Odhi nyime kwayo Nyasaye e lamo. Be nitie ng’ato ma chunye mor? Ower wende zaburi. 14 Be nitie ng’ato ma tuo e kindu? Oluong jodong-kanyakla obi ire mondo gilamne ka giwire gi mo e nying Jehova. 15 Eka lamo mar yie biro miyo ng’at ma tuono* owinj maber, kendo Jehova biro chunge malo. Bende, kapo ni nitie richo moko mosetimo, ibiro wene.

16 Kuom mano, huluru richou ayanga e kindu, kendo ulam ne joweteu mondo ochangu. Kwayo mar ng’at makare nigi teko kendo otiyo ahinya. 17 Elija ne en mana dhano ma chal kaka wan, to e ma ne olamo gi kinda mondo koth kik chue, mi koth ne ok ochue e pinyno kuom higni adek gi dweche auchiel. 18 Nochako olemo kendo, mi polo nochiwo koth kendo pinyno nobedo gi nyak.

19 Owetena, ka nitie ng’ato kuomu ma obayo yo koa e adiera, kae to ng’at machielo oduoke e yo, 20 ng’euru ni ng’at ma loko jaricho mondo oa e yore marach biro reso jarichono oa e tho kendo obiro umo richo mogundho.