1 Johana

2 Nyithinda matindo, koro andikonu wechegi mondo kik utim richo. To ka ng’ato otimo richo, wan gi jakony* moa kuom Nyasaye Wuonwa, ma en Yesu Kristo, ng’at makare. 2 Kendo en misango ma loso winjruok nikech richowa, to ok mana richowa kende, to bende richo mag piny mangima. 3 Kendo ka wadhi nyime mako chikene, wanyiso ni waseng’eye kuom timo kamano. 4 Jal ma wacho ni, “Aseng’eye,” to pod ok omak chikene, en jamiriambo, kendo adiera onge ei ng’atno. 5 To ng’ato ang’ata ma luwo wachne, kuom adier, hera ma ng’atno oherogo Nyasaye osebedo moromo chuth e iye. Nikech mano, wang’eyo ni wan e winjruok achiel kode. 6 Ng’at ma wacho ni osiko e winjruok achiel kode, ng’atno onego odhi nyime wuotho mana kaka jalo nowuotho.

7 Andikonu un joma ahero, ok kuom chik moro manyien, to kuom chik machon ma usebedogo nyaka a chakruok. Chik machonno e wach ma usewinjo. 8 To sani andikonu kendo kuom chik manyien, ma nenore kuome kendo kuomu, nikech mudho kalo ka a, to ler madier koro rieny.

9 Ng’at ma wacho ni en e ler to koni otimo sigu gi owadgi, ng’atno pod ni e mudho. 10 Ng’at mohero owadgi ni e ler kendo onge gima nyalo miyo ochwanyre. 11 To ng’at ma timo sigu gi owadgi, ng’atno ni e mudho kendo owuotho e mudho, kendo ok ong’eyo kama odhiyoe nikech mudho osemiyo wengene odoko muofu.

12 Andikonu un nyithindo matindo, nimar osewenu richou nikech nyinge. 13 Andikonu un wuone, nikech useng’eyo jalno mosebetie nyaka a chakruok. Andikonu un chwo matindo, nikech useloyo Ng’at Marach. Andikonu un nyithindo matindo, nikech useng’eyo Nyasaye Wuonwa. 14 Andikonu un wuone, nikech useng’eyo jalno mosebetie nyaka a chakruok. Andikonu un chwo matindo, nikech un gi teko kendo wach Nyasaye siko e iu, kendo useloyo Ng’at Marach.

15 Kik uher piny kata gik manie piny. Ka ng’ato ohero piny, ok ohero Wuonwa e iye; 16 nikech gik moko duto manie piny—gombo mag ringruok, gi gombo mag wang’, kod nyisruok nikech gik ma ng’ato nigo e ngima—ok a kuom Wuonwa, to gia e piny. 17 E wi mano, piny kadho gi gombone, to ng’at ma timo dwach Nyasaye siko nyaka chieng’.

18 Un nyithindo matindo, ma e sa mogik, kendo mana kaka usewinjo ni jasik Kristo biro, to kata mana gie sani nitie jowasik Kristo mang’eny ma osesieko, mano e momiyo wang’eyo ni koro en sa mogik. 19 Ne gia kuomwa, to ne ok gichal kodwa; nimar ka dine bed ni gichal kodwa, dine gisiko kodwa. To ne giwuok mondo onenre malong’o ni ok ji duto ma gin joma chal kodwa. 20 Bende, ng’at malerno osewirou kendo uduto un gi ng’eyo. 21 Andikonu, ok nikech pok ung’eyo adiera, to en nikech ung’eyogo, bende, nikech onge miriambo ma wuok kuom adiera.

22 Jamiriambo en ng’a, ka ok mana jal ma kwer ni Yesu ok en Kristo? Jalo e ma en jasik Kristo, en e ng’at ma kwedo Nyasaye Wuonwa kod Wuode. 23 Ng’ato ang’ata ma kwedo Wuod Nyasaye, ng’atno onge gi Wuonwa bende. Ng’at ma hulo ni ong’eyo Wuod Nyasaye, ng’atno nigi Wuonwa bende. 24 To un, gik ma usewinjo nyaka a chakruok onego osik e iu. Ka gik ma usewinjo nyaka a chakruok osiko e iu, un bende unusik e winjruok achiel gi Wuod Nyasaye kendo e winjruok achiel gi Wuonwa. 25 E wi mano, gima en owuon nosingonwa en ngima ma nyaka chieng’.

26 Andikonu wechegi ka awuoyo e wi joma temo miyo ulal. 27 To un, wir ma ne owirougo siko kuomu, kendo ok onego obed ni ng’ato ang’ata puonjou; to wir moa kuome puonjou gik moko duto, kendo en adier to ok en miriambo. Mana kaka roho osepuonjou, sikuru e winjruok achiel kod jalo. 28 Omiyo, un nyithindo matindo, koro sikuru e winjruok achiel kode mondo e kinde fwenyruokne wabedie gi chir mar wuoyo ka wan thuolo, kendo mondo e kinde ma biro yudo ka entie* kik wawuog e nyime gi luoro nikech wich-kuot. 29 Ka ung’eyo ni en ng’at makare, ung’eyo bende ni ng’ato ang’ata ma timo gik makare en ng’at moseyudo nyuol moa kuom Nyasaye.