Fweny

22 Kendo nosiemona aora moro mar pi ngima, ma rieny maler ka kidi mar kristol, ma mol koa e kom-loch mar Nyasaye kod mar Nyarombo, 2 koridore e dier ndara maduong’ mar dalano. E bath aorano koni gi koni ne nitiere yien mag ngima ma golo nyak 12 mag olembe, ma nyago olembegi dwe ka dwe. Kendo oboke mag yien-go gin mag chango ogendni.

3 Bende, kuong’ moro amora ok nobedie kendo. To kom-loch mar Nyasaye kod mar Nyarombo nobed ei dalano, kendo wasumbnine biro tiyone; 4 mi ginine wang’e, kendo nyinge nobed e lela wang’gi. 5 Bende, otieno ok nobedie kendo, ok ginidwar ler mar taya kata mar wang’-chieng’, nikech Jehova Nyasaye biro menyonegi ler, kendo giniloch kaka ruodhi mochwere nyaka chieng’.

6 Ne owachona kama: “Wechegi gin migeno kendo madier; ee, Jehova, Nyasaye ma nowuoyo kokalo kuom jonabi, oseoro malaikane mondo onyis wasumbnine gik ma nyaka timre machiegni. 7 Neuru! Abiro mapiyo. Ng’at mamor en ng’atno ma luwo weche mokor mag bugni.”*

8 To an Johana, an e ma ne awinjo kendo neno gigo. Kane awinjogi kendo nenogi, ne apodho piny mondo alam e tiend malaika ma nosebedo ka nyisa gigo. 9 To nowachona kama: “Tang’! Kik itim kamano! An mana misumba wadu gi mar oweteni ma gin jonabi kod mar joma luwo weche manie bugni. Lam Nyasaye.”

10 Bende, nowachona niya: “Kik ilor weche mokor mag bugni kendo kik ituegi, nimar kinde ma noseket chiegni. 11 Ng’at ma ok kare osik e tim ma ok kare, kendo ng’at mochido osik e tim mochido; to ng’at makare osik e tim makare, kendo ng’at maler osik e tim maler.

12 “‘Neuru! Abiro mapiyo, kendo an-gi mich ma achiwo, mondo achul ng’ato ka ng’ato ka luwore gi timne. 13 An e Alfa kendo an e Omega,* Jal mokwongo kendo mogik, chakruok kendo giko. 14 Joma mor gin joma lwoko kandhogi mondo gibed gi ratiro mar dhi nyaka e yien mag ngima, kendo mondo gidonj e dalano ka gikalo e rangeyene. 15 Oko mar dalano nitiere guogi,* gi joma timo timbe-juok, gi joterruok, gi jonek, gi joma lamo sanamu, kod ji duto mohero miriambo e wechegi kod timbegi.’

16 “‘An Yesu, e ma ne aoro malaikana mondo ochiwnu neno e wi gigi nikech joma ni e kanyakla. An e koth Daudi kendo anyuola mare, kendo an e sulwe mokinyi ma rieny maler.’”

17 To roho maler kod miaha siko ka wacho niya, “Bi!” kendo ng’ato ka ng’ato ma winjo mondo owach ni, “Bi!” kendo ng’ato ka ng’ato ma riyo omako mondo obi; ng’ato ka ng’ato mohero mondo omodh pi ngima nono.

18 “Achiwo neno ne ng’ato ka ng’ato ma winjo weche mokor manie bugni: Kapo ni ng’ato ang’ata omedo gimoro e wechegi, Nyasaye biro medone masiche mondik e bugni; 19 to kapo ni ng’ato ogolo moko kuom weche mokor manie bugni, Nyasaye biro maye kare e yien mag ngimago kod dala malerno, ma gin weche mondik ei bugni.

20 “Jalno ma chiwo neno e wi gigo wacho kama, ‘Ee, abiro mapiyo ahinya.’”

“Amin! Bi, Ruoth Yesu.”

21 Ng’wono mogundho mar Ruodhwa Yesu mondo obed kuom joma lergo.