Tich Joote
22 “Owetena gi wuonega, winjauru mondo alernu ma kora e wi wachni.”+ 2 To ka ne giwinjo kowuoyo kodgi gi dho Hibrania, ne giling’ thi, kae to nowacho niya: 3 “An Ja-Yahudi+ monyuol e taon mar Tarso man Kilikia,+ to Jerusalem kae e ma ne asomee e tiend Gamaliel,+ kendo ne otiega mondo amakra chuth gi Chik kwerewa,+ kendo an gi kinda e tij Nyasaye mana kaka un uduto bende kawuononi.+ 4 Ne asando jo Yorni* nyaka e tho, ka atueyo mon gi chwo kendo ka achiwogi mondo otuegi e jela,+ 5 kendo jadolo maduong’ kod bura duto mar jodongo ong’eyo wachno maber. Gin bende e ma ne gimiya barupe ma ne adhigo ir owete ma Damaski. Ne an e yo ka adhi mondo atuegi kendo akelgi Jerusalem mondo okumgi.
6 “To sa ma ne achiegni chopo Damaski, e kar odiechieng’ tir, apoya nono ler maduong’ moa e polo ne orieny molwora,+ 7 mi ne apodho piny kendo ne awinjo dwol moro ka wachona niya: ‘Saulo, Saulo, isanda nang’o?’ 8 Ne apenje kama: ‘In ng’a, Ruoth?’ To ne odwoka niya: ‘An Yesu Ja-Nazareth, ma isando.’ 9 Jo ma ne ni koda noneno lerno to ne ok giwinjo dwond jal ma ne wuoyo koda. 10 Mi ne apenje kama: ‘Ruoth, en ang’o monego atim?’ Ruoth nodwoka niya: ‘A malo mondo idonj Damaski, kendo kuno ibiro nyisie weche duto mosechanni mondo itim.’+ 11 To nikech ler maduong’no ne omiyo ok anyal neno gimoro, jo ma ne ni koda ne omako lweta mi gitaya nyaka Damaski.
12 “Eka ng’at ma nyinge Anania, jal ma norito chike Nyasaye gi chunye duto kendo ma Jo-Yahudi duto modak Damaski ne wuoyo maber kuome, 13 nobiro ira. Ne ochung’ e batha mowachona kama: ‘Saulo owadwa, wengeni mondo ochak onen kendo!’ To gikanyono, ne arango malo mi ne anene.+ 14 Nowachona niya: ‘Nyasach kwerewa oseyieri mondo ing’e dwache, kendo ine jatichne makare,+ kendo iwinj dwonde, 15 nimar onego ibed janeno mare ne ji duto e wi gik miseneno kendo misewinjo.+ 16 To koro ang’o momiyo pod ideko? A malo mondo obatisi, kae to ilwok richoni+ kuom luongo nyinge.’+
17 “To ka nasedok Jerusalem+ kendo ne alemo ei hekalu, fweny moro nobirona 18 kendo ne anene kowachona niya: ‘Reti ia Jerusalem mapiyo, nikech ok gibi yie gi neno mibiro chiwo kuoma.’+ 19 Eka nawacho niya: ‘Ruoth, gin giwegi ging’eyo maber kaka ne ajawuotho ka adhi e sunagogi ka sunagogi mondo atue jo ma oyie kuomi e jela kendo goyogi.+ 20 Sa ma ne ichuero remb Stefano ma en janenoni, an bende ne achung’ kanyo ka ariwo lwedo jo ma ne nege, bende ne arito lewni ma oko mag jogo.’+ 21 To e ma nowachonae kama: ‘Wuog mondo idhi nimar abiro ori ir ogendni man kuonde maboyo.’”+
22 Ne giwinje nyaka nowacho wachno. Kae to ne giting’o dwondgi malo ka giwacho niya: “Negeuru, nimar ok owinjore bedo mangima!” 23 Nikech ne gikok ka giwito lepgi ma oko koni gi koni kendo ne gikiro buru e kor yamo,+ 24 jatend-jolweny maduong’* nochiko mondo orwak Paulo kama askeche ne odakie, kendo nowacho ni onone kichwade mondo eka ong’e chutho gimomiyo ji ne kok ne Paulo kamano. 25 To ka ne gisetueye mondo gichwade, Paulo nopenjo jatend-jolweny* ma ne ochung’ kanyo kama: “Be chik oyie ni ochwad Ja-Rumi ma pok oyal mi oyud ketho kuome?”+ 26 Ka jatend-jolwenyno* nowinjo mano, notero wach ne jatend-jolweny maduong’* niya: “Koro ibiro timo nang’o? Nikech jali en Ja-Rumi.” 27 Kuom mano, jatend-jolweny maduong’no* nodhi ir Paulo mi nopenje kama: “Nyisa ane, be en adier ni in Ja-Rumi?” Nodwoke ni: “Ee.” 28 Jatend-jolweny maduong’no* nowachone kama: “An ne achulo pesa mang’eny ahinya e ng’iewo ratiro mar bedo Ja-Rumi.” Paulo to nowachone kama: “An to an gi ratirogo nikech ne onyuola Ja-Rumi.”+
29 Eka gikanyono, jo ma ne dwaro none ka chwade ne oweye; kendo luoro nomako jatend-jolweny maduong’no* bang’ fwenyo ni Paulo ne en Ja-Rumi kendo ni nosemiyo otueye gi nyoroche.+
30 Koro kinyne, nikech jatend-jolweny maduong’no* ne dwaro ng’eyo chuth gimomiyo Jo-Yahudi ne odonjone, nogonyo nyoroche kuome, mi nochiko ni jotend-jodolo kod buch Sanhedrin duto orom. Eka ne oloro Paulo mwalo mi ne ochunge e diergi.+