Ne Jo-Hibrania

13 Hera ma un-go e kindu kaka owete mondo omed dhi nyime.+ 2 Wiu kik wil gi rwako welo,+ nimar kuom timo kamano jomoko norwako malaike ka ok ging’eyo.+ 3 Paruru jo ma ni e jela,+ mana ka gima un bende un e tuech kanyachiel kodgi;+ bende, paruru jo ma itimonegi marach, nikech un uwegi un bende un e ringruok.* 4 Ji duto mondo omi kend luor, kendo otanda mar kend kik dwany,+ nimar Nyasaye biro ng’ado bura ne joterruok* gi jochode.+ 5 Kik ubed jo mohero pesa,+ to ubed jo ma gik ma un-go sani romou.+ Nikech osewacho kama: “Ok anaweu, kendo ok anajwang’u.”+ 6 Eka mondo wabed gi chir maduong’ kendo wacho niya: “Jehova* e jakonyna; ok abi luor. Dhano adhana ditimna ang’o?”+

7 Paruru jo ma tayou,+ ma gin jo mosewachonu wach Nyasaye, kendo sa murango kaka timgi obet, luwuru yiegi.+

8 Yesu Kristo siko kaka en, nyoro kod kawuono, kendo nyaka chieng’.

9 Kik uwe mondo puonj mopogore opogore kod ma yoreyore omi uba yo, nimar ber moloyo mondo ng’wono mogundho mar Nyasaye oteg chuny ng’ato, to ok kokalo kuom chiemo,* ma ok kony jo modich kodgi.+

10 Wan gi kendo mar misango ma en kama jo ma tiyo tij Nyasaye e hema ok nigi ratiro mar chiemoe.+ 11 Nimar le ma jadolo maduong’ tero rembgi ei kama ler kochiwogi kaka misango mar richo iwang’o ringregi oko mar kambi.+ 12 Kuom mano, Yesu bende ne osand oko e ranga dala,+ eka mondo opwodh ji kotiyo gi rembe owuon.+ 13 Omiyo, wadhiuru ire oko mar kambi, ka wating’o achaya ma noting’o,+ 14 nimar waonge gi dala moro ma siko, to wamanyo gi kinda dala ma biro.+ 15 Kokalo kuom Yesu, kinde duto wachiwuru ne Nyasaye misango mar pak,+ tiende ni olemo mar dhowa,+ ma lando nyinge e lela.+ 16 E wi mano, wiu kik wil gi timo maber kendo pogo gik ma un-go ne jomamoko,+ nikech Nyasaye mor ahinya gi misengni ma kamago.+

17 Luwuru kaka jo ma tayou chikou+ kendo ubolrunegi,+ nimar gisiko ka giritou kaka jo ma biro dwoko wach e bura,+ mondo giti tijno ka gin gi mor to ok gi chuny mapek, nikech mano nyalo kelonu hinyruok.

18 Sikuru ka ulamonwa, nimar wageno ni wan gi chuny ma ok ketnwa bura, nikech wadwaro bedo joratiro e gik moko duto ma watimo.+ 19 To moloyo, akwayo ni ulamna mondo aduog iru mapiyo kaka nyalore.

20 Mad Nyasach kuwe ma nochiero Ruodhwa Yesu, jakwath maduong’+ mar rombe kuom remo mar singruok mosiko, 21 omi ubed moikore gi gik mabeyo duto mondo utim dwache, kotimo kuomwa gima long’o e wang’e kokalo kuom Yesu Kristo. Mad obed gi duong’ nyaka chieng’. Amin.

22 Owetena, koro asayou mondo uhoru mos kuchiko itu ne weche moting’o jipgo, nimar asendikonu barua machuok. 23 Daher ni ung’e ni osegony Timotheo owadwa. Ka obiro mapiyo, to wanabi kode mondo waneu.

24 Mosnauru ji duto ma tayou, kendo umosna jo maler duto. Jo ma ni Italia+ ooronu mos.

25 Ng’wono mogundho mar Nyasaye mondo obed kodu uduto.