Samuel Mokwongo

11 Nahash Ja-Amon+ nobiro mogoyo kambi mondo omonj Jo-Jabesh man Gilead, mi Jo-Jabesh+ duto nonyise niya: “Tim winjruok kodwa mondo watini.” 2 To Nahash Ja-Amon ne owachonegi kama: “Abiro timo kodu winjruok mana ka uyiena ni agol wengeu ma korachwich mondo akuod wi Jo-Israel duto.” 3 Jodong Jabesh nodwoke niya: “Miwa ndalo abiriyo mondo waor joote e piny Israel duto. To ka ok wayudo ng’at ma direswa, to wabiro timo kaka idwarono.” 4 Bang’ ndalo, joote ne ochopo Gibea+ dalagi Saulo mi giwacho ne oganda wachno. To ka ne giwinjo awinja wachno ni i, giduto ne gimuoch gi nduru.

5 Gie sechego, Saulo ne odonjo gi dhok, mi nopenjo ni: “Ang’o marach? Ang’o momiyo ji ywak kama?” Ne gipimone wach ma Jo-Jabesh nonyisogi. 6 Kanyo gi kanyo, roho mar Nyasaye ne obiro kuom Saulo,+ kendo nobedo gi mirima mager. 7 Nokawo ruedhi ariyo mi ong’adogi, kae to nomiyo joote mondo otergi e piny Israel duto. Jootego ne lando niya: “Ng’ato ang’ata ma ok oluwo Saulo gi Samuel, ibiro ng’ad dhoge kama.” Eka luoro moa kuom Jehova nomako ji duto, mi giduto ne giwuok. 8 Saulo ne okwano ji duto ka gin Bezek kendo kwan mar Jo-Israel ne en 300,000, to Jo-Juda ne gin ji 30,000. 9 Ne giwacho ne joote ma ne oorka niya: “Dhi uwach ne Jo-Jabesh man Gilead kama: ‘Kiny ibiro resu kar sa auchiel kama.’”* Gikanyono, joote ne oteronegi wach, kendo Jo-Jabesh ne mor sidang’. 10 Omiyo, Jo-Jabesh nowacho ne Nahash niya: “Kiny wanabi mondo utimnwa kaka udwaro.”+

11 Kinyne, Saulo ne opogo jolweny e grube adek kendo ne gidhi e dier kambi kogwen mi ginego Jo-Amon+ nyaka kar sa auchiel kama. Jo ma ne otony ne oringo mokere, kendo onge ji ariyo ma ne inyalo yud kanyachiel. 12 Kendo ji ne owacho ne Samuel niya: “Gin jomage ma ne ok dwar ni Saulo obed ruodhwa?’+ Kelgiuru mondo waneggi.” 13 To Saulo notamore kowacho niya: “Onge ng’at ma ibiro neg kawuono,+ nimar Jehova osereso Israel kawuono.”

14 Bang’e, Samuel ne onyiso oganda kama: “Biuru wadhi Gilgal+ mondo wapwodh Saulo kaka ruoth kendo.”+ 15 Omiyo, oganda duto ne odhi Gilgal mi gipwodho Saulo e nyim Jehova mondo obed ruoth. Kendo ne gigolo misengni mag kuwe e nyim Jehova,+ mi Saulo kod Jo-Israel duto ne otimo nyasi ka gimor ahinya.+