Ne Jo-Hibrania

6 Kuom mano, nikech koro wasedongo mi waweyo puonj ma gin mana mise+ mag ng’eyo Kristo, koro wakeduru matek mondo wabed jo motegno,+ ma ok wasik mana ka waketo mise kendo, tiende ni e puonj kaka loko chuny a e timbe ma kelo tho, yie kuom Nyasaye, 2 puonj mar batiso, yieyo lwedo kuom ji,+ chier mar jo motho,+ kod bura ma nyaka chieng’. 3 To wabiro timo mano, ka adier Nyasaye oyie.

4 Nimar kuom jo ma noseyudo ler chon+ kendo ma nosebilo mich mar polo michiwo nono, kendo moseyudo roho maler, 5 kendo ma osebilo wach malong’o mar Nyasaye kod teko motudore gi piny* ma biro, 6 to koro giseweyo yie,+ ok nyalre mondo okonygi mi gichak gilok chunygi gia e richo kendo, nimar giguro Wuod Nyasaye e yath kendo, ka gikete e lela mondo oyud wich-kuot.+ 7 Nikech lowo yudo gueth moa kuom Nyasaye sa ma omodho pi koth ma chue kuome pile, kae to omiyo cham gi yien nyakie mondo okony jo ma ne opure. 8 To ka onyago mana kuthe kod buya, ikwane ni oonge ohala, kendo machiegnini Nyasaye biro kuong’e, to gikone ibiro wang’e.

9 To kuomu un jo ma ahero, kata obedo ni sani wawuoyo e yo ma kamano, wan gadier ni umedo dhi maber moloyo, ka utimo gik ma terou e warruok. 10 Nimar Nyasaye ok en ng’at ma ok kare ma wiye diwil gi gik ma usetimo kod hera ma usenyiso ne nyinge+ ka ukonyo jo maler kendo dhi nyime tiyonegi. 11 To adwaro ni ng’ato ka ng’ato kuomu oti matek kamano mondo obed gadier chuth kuom genono+ nyaka giko,+ 12 mondo kik ubed josamuoyo,+ to ubed jo ma luwo tim jo ma yudo gik ma ne osing nikech ne ginyiso yie kod horuok.

13 Nimar ka Nyasaye notimo singo ne Ibrahim, Nyasaye ne okuong’ore gi nyinge owuon nikech onge ng’at moro maduong’ moloye ma nonyalo kuong’orego,+ 14 ka nowacho niya: “Abiro guedhi ahinya, kendo anami kothi obed mang’eny.”+ 15 Omiyo, ka Ibrahim nosenyiso horuok, noyudo gima ne osingno. 16 Nikech pile dhano kuong’ore gi nying ng’at maduong’ moloyogi, kendo mano e ma tieko ywaruok ma nyalo betie e kindgi, nimar kuong’ruogno golo kiawa moro amora ma nyalo betie.+ 17 E yo ma kamano bende, ka ne Nyasaye ong’ado mondo oyang weche e yo maler moloyo ne jo ma ne dhi yudo pok mar singono+ ka onyisogi kaka dwache ok lokre ngang’, ne ojiwo singono kuom kuong’ruok, 18 mondo kokalo kuom gik moko ariyo ma ok lokre ngang’ ma Nyasaye ok nyal riamboe chuth,+ wan ma waseringo mi wadhi e kar bwok, wabed gi jip maduong’ mar dhi nyime makruok motegno gi geno moseket e nyimwa. 19 Wan gi genoni+ ma chalnwa kaka nanga mar meli mosiro ngimawa; en geno madier, kendo motegno, kendo okalo pasia ka odonjo iye+ 20 ka ma Yesu, jal ma notelonwa, osedonjoe e lowa.+ Yesuno osebedo jadolo maduong’ mochwere e kit dolo mar Melkizedek.+