Dichwo gi Dhako Mokwongo

ANG’O ma opogore e pichani? Ee, en joma ni e iye. Gin dichwo gi dhako mokwongo. Ng’ano ma ne ochweyogi? Ne en Nyasaye. Be ing’eyo nyinge? En Jehova. To dichwo gi dhako ne iluongo ni Adam gi Hawa.

Kama e kaka Jehova Nyasaye ne ochweyo Adam. Ne okawo buru ma ochweyogo del makare mar dhano. Bang’e ne okudho muya e ume, ma Adam ne obedo mangima.

Nitie tich ma Jehova Nyasaye ne dwaro mondo Adam otim. Ne onyiso Adam mondo omi le duto mopogore nyingegi. Nyaka bed ni Adam ne ong’iyo le go aming’a, kendo koro, ne onyalo miyogi giduto nyinge mabeyo. Ka Adam podi ne miyo le nyingegi, ne ochako neno gimoro. Bende ing’eyo ni ne en ang’o?

Le duto ne gin ariyo ariyo, madhako gi madichwo. Ne nitie liech madichwo koda madhako, sibuor madichwo koda madhako. Kata kamano, Adam to ne onge dhako. Omiyo Jehova ne okelo ne Adam nindo matut, ma okawo ng’etne achiel. Ka otiyo kod ng’edno, Jehova ne ochweyo ne Adam dhako, ma nobedo chiege.

Adam koro ne mor! Par ane mor ma Hawa nyaka bed ni ne nigo, kuom bedo e puodho majaber mondo odagie! Koro, ne ginyalo nyuolo nyithindo kendo dak kodgi gimor.

Jehova ne dwaro mondo Adam kod Hawa odag nyaka chieng’. Ne odwaro mondo gilos piny duto obedi puodho majaber kaka puodho mar Eden. Mano ne nyalo bedo mor maduong’ ne Adam gi Hawa ka ne gi paro timo kamano! Bende ne dihero bedo achiel kuom jogo ma ne dhi konyo loso pinywani obed puodho majaber? Kata kamano, mor mar Adam kod Hawa ne ok osiko. We wane gimomiyo.