Yawuowi Ariyo ma ne Ochier

KA DIPO ni itho ma ochieri, minu nyalo winjo nade? Dobed mamor ahinya! To be ng’at motho nyalo bedo mangima kendo? Be gima kamano osetimore e kinde moko?

Ne ane dichwo man kae, kod dhako gi wuowi matinno. Dichwono en janabi Elija. Dhakono en chi liel ma nya dala mar Zarefath, wuowino to wuode. Koro, chieng’ moro wuowino bedo matuwo. Tuwone medore ma nyaka gikone otho. Elija koro nyiso dhakono ni: ‘Gamna ane wuowino.’

Elija tero nyathi mothono nyaka e ot man malo e gorofa, kendo opiele e otanda. Bang’ mano, olemo ni: ‘A Jehova, mi wuowini obed mangima kendo.’ Kendo wuowino chako yueyo! Kuom mano, Elija lor kode piny, kendo owacho ne dhakono kama: ‘Ne, wuodi ngima!’ Ma e momiyo min mare mor ahinya.

Janabi machielo mar Jehova kendo mogen ahinya, iluongo ni Elisha. Otiyo kaka jakony mar Elija. Bang’e, Jehova tiyo gi Elisha e timo honni. Chieng’ moro, Elisha dhi e dala mar Shunem, kama dhako moro timone ng’wono ahinya. Bang’e, dhakono bedo gi nyathi ma wuowi.

Okinyi moro, kane nyathino osedongo matin, odhi ir wuon mare ma ne tiyo e puodho. Apoya nono, wuowino chako yuak matek ni: ‘Wiya bara!’ Bang’ ka osetere dala, wuowino tho. Min mare kuyo ahinya! Gikanyono, odhi luongo Elisha.

Ka Elisha chopo, odhi e ot kama nyathi mothono nitie. Okwayo Jehova, kendo oriere e wi ringre wuowino. Bang’ kinde matin, ringre nyathi bedo maliet, kendo ogir nyadibiriyo. Min mare mor ahinya kodonjo ei ot, kendo oyudo ni wuodeno ngima!

Ji mang’eny ahinya osetho. Mani osemiyo anyuolagi kod osiepegi kuyo mang’eny. Waonge gi nyalo mar chiero jo motho. Jehova to nikod nyalono. Bang’e, wabiro neno kaka Jehova nochier tara gi tara mag ji obed mangima.