Ochier Wuod Chi Liel

E kinde oro ma ne wasewuoye, Jehova ne onyiso Elija kama: ‘Wuog idhi Zarefath. Ibiro yudo chi liel moro kuno, kendo obiro miyi chiemo.’ Ka Elija nochopo e ranga Zarefath, noneno chi liel moro modhier ka modo yien. Nokwaye pi modho. Ka ne chi lielno owuok mondo odhi okelne pi, ne onyise bende niya: ‘Donge ikelnae makate be.’ Chi lielno ne odwoke niya: ‘Makate to onge, nitie mana mogo matin gi mo moroma gi wuoda kende.’ Elija nonyise niya: ‘Jehova osingo ni ka ilosona makate, to moki gi moyi ok bi rumo nyaka oro rum.’

Chi lielno noyie tedo ne janabi mar Jehova makate. To mana kaka Jehova ne osesingo, chiemo ne ok orumonegi nyaka oro ne orumo. Agulni ma ne gikanoe mo kod mogo ne osiko kopong’.

Kae to chieng’ moro gimoro marach ne otimore. Tuo nogoyo wuod chi lielno, mi wuoyino otho. Chi lielno ne oywak ne Elija mondo okonye. Elija ne oting’o nyathino nyaka e rum ma malo. Ne opiele e otanda, kae to nolemo niya: ‘Jehova, kiyie, to chier wuoyini.’ Be ing’eyo gimomiyo mano ne dhi bedo hono makende? En nikech onge rekod moro amora ma nyisowa ni nitie ng’ama nosegachier motelo. Kae to bende, miyono gi wuode ne ok gin Jo-Israel.

Wuoyino ne ochier! Elija ne onyiso chi lielno kama: “Ne! Wuodi ngima.” Ne omor ahinya mi owacho ne Elija kama: ‘In ng’at Nyasaye adier. Ang’eyo mano nikech gik miwacho oa kuom Jehova, kendo gitimore mana kaka iwacho.’