Mondo Irit Osiep, Nyaka Ibed Osiep

Osiep tenore e hera. Kaka imedo puonjori weche Jehova, e kaka ibiro medo here. Kaka imedo hero Nyasaye, e kaka imedo gombo tiyone. Mano biro miyo ibed japuonjre Yesu Kristo. (Mathayo 28:19) Kiriwri gi oganda mamor mag Joneno mag Jehova, inyalo bedo osiep Nyasaye nyakachieng’. Onego itim ang’o?

Nyaka inyis ni ihero Nyasaye kimako chikene. “Nimar hero Nyasaye en mako chikne, to chikne ok tek.”​—1 Johana 5:3.

Tim gik mipuonjri. Yesu nogolo sigana moro manyiso ma. Ng’at mariek nogero ode e wi lwanda. Ng’at mofuwo nogero mare e wi kwoyo. Kane yamo maduong’ obiro, ot mane oger ewi lwanda ne ok olwar to ot mane oger ewi kwoyo nopodho matek. Yesu nowacho ni ji mawinjo wechene kendo timogi chal gi ng’at mariek mane ogedo ewi lwanda. To ji mawinjo wechene to ok lugi chal gi ng’at mofuwo mogedo ewi kwoyo. Idwaro chalo gi ng’a?​—Mathayo 7:24-27.

Chiwruok. Tiend chiwruok en dhi ne Jehova e lamo kinyise ni idwaro timo dwache nyakachieng’. Timo dwach Nyasaye nyiso ni in japuonjre Yesu Kristo.​—Mathayo 11:29.

Batiso. “Obatisi, olwok richoni, kiluongo nying Ruoth.”—Tich Joote 22:16.

Ti ne Nyasaye chutho. “Gimoro amora mutiyo, tiuru gi chunyu duto, kaka ni Ruoth, ok ni ji.”​—Jo Kolosai 3:23.