Gik ma Ji Madwaro Ng’eyo Thoro Penjo

Ka Nyasaye en hera, ang’o ma omiyo oweyo richo mondo odhi nyime?

NYASAYE oweyo richo mondo odhi nyime, kendo ji mang’eny e piny ohero timo richo. Kuom ranyisi, gikedo e lwenje, giwito mbom ma nego nyithindo, giketho piny, kendo mani kelo kech maduong’. Ji tara gi tara madho ndawa kendo mano miyogi tuwo mar obo, moko chodo to yudo nyae, moko madho kong’o ahinya kendo mani miyogi tuwo mar chuny, kod timbe mamoko kaka mago. Kuom adier, ji kaka magi ok dwar mondo richo duto otieki. Gima gidwaro en mana ni mondo chandruok magiyudo kuom timo richogi, ema mondo ogol. Seche ma gikayo gima gisechuoyo, to koro giywak, “Gini timorena nikech ang’o?” Bang’e giwacho ni Nyasaye rach, mana kaka Ngeche 19:3 wacho: “Fup dhano oketho yore; mi chunye ochido kod Jehova.” To ka dipo ni Nyasaye nyalo chungogi e timbegi marichogi, kendo ginyalo chako ywago thuolo ma omagi no!

Gi maduong’ ma omiyo Jehova oweyo richo mondo odhi nyime, en ni mondo ochiw dwoko ni Satan, nikech Satan kwede. Jachien kendo Satan ne owacho ni Nyasaye ok ne nyal keto ji e piny kae manyalo here kuom adier ka gin e bwo tem. (Ayub 1:6-12; 2:1-10) Jehova oweyo Satan mondo odhi nyime betie, eka mondo omiye thuolo mar nyiso ka be wechenego ni kare. (Wuok 9:16) Satan dhi nyime gi kelo chandruok mondo olok ji osin gi Nyasaye, kendo mani e yo ma otemo nyisogo ni en kare. (Fweny 12:12) Kata kamano, Ayub to ne ochung’ motegno. Yesu bende ne otimo kamano. Jokristo madier bende timo kamano.—Ayub 27:5; 31:6; Mathayo 4:1-11; 1 Petro 1:6, 7.

Daher mondo abed gi geno kuom paradiso e pinyni kama ji dakie nyaka chieng’, to donge gi maber kamano ok nyal timore?

Kaluwore gi Muma ok en kamano. Ji neno ni mani ok nyal timore, nikech dhano osebedo kaneno mana chandruok kuom higini mang’eny. Jehova kane ochweyo piny, ne onyiso dhano ni mondo opong’e gi ji makare mane nyalo rito ngima mar le gi yien, kendo rito ber mar piny. (Ne ite mar 12 kod 17.) Kar neno ni Paradiso ma osingnwa ok nyal betie, piny masani ema rach ma ok onego odhi nyime. Paradiso biro kawo kare.

Ere kaka anyalo dwoko jo mawacho ni Muma en mana sigendini machon kendo ok owinjore gi sayans?

Bedo gi geno kuom gik ma osingnwa, ok en mana yie maonge gi mise. “Yie a kuom winjo wach.” Ka wapuonjore Wach Nyasaye, rieko mayudore e wach Nyasaye biro nenore ayanga e ngimawa, kendo yie marwa biro medore.—Jo Rumi 10:17; Jo Hibrania 11:1.

Jo makunyo gik machon ka ginono gik ma ne otimore, nyiso ni Muma wacho adier kuom gik ma ne otimore chon. Sayans mar adier winjore gi gik ma ondiki e Muma. Ka podi josomo ok ofwenyogi, Muma ne osewuoyo chon kuom okang’ ka okang’ ma piny ne okale mondo ochop kaka en sani, ni piny ong’inore maok ong’awe e gimoro, kendo ni winy dar ma dhi mabor ahinya.—Chakruok, sula 1; Isaiah 40:22; Ayub 26:7; Yeremia 8:7.

Weche ma ne okor ma osetimore, nyiso ni Muma ne ondiki ka otelne gi roho mar Nyasaye. Daniel ne okoro chon kaka pinjeruodhi moko ne dhi chung’ kendo lwar, kata kinde ma Mesia ne dhi biro kendo kinde ma ne idhi nege. (Daniel, sula 2, 8; 9:24-27) Moko kuom weche ma ne okor timore e ndalogi, kanyiso ni magi “e ndalo mag giko.” (2 Timotheo 3:1-5; Mathayo, sula 24) Dhano onge gi teko machalo gi mano mar ng’eyo gik moko kapodi ok gitimore. (Isaiah 41:23) Mondo ing’e wachni e yo ma omedore, ne buge kaka The Bible—God’s Word or Man’s? kod Is There a Creator Who Cares About You?, ma ogo gi Joneno mag Jehova.

Ere kaka anyalo puonjra dwoko penjo mag Muma?

Nyaka ipuonjri Muma kendo ipar matut e chunyi gigo ma isesomo, ka ikwayo Nyasaye roho mare mondo otelni. (Ngeche 15:28; Luka 11:9-13) Muma wacho ni “ka ng’ato kuomu ochando rieko, mondo okwa Nyasaye ma chiwo gi ng’wono ni ji duto, ma ok ochayo ng’ato; to nomiye.” (Jakobo 1:5) Bende nitie buge mawuoyo kuom Muma ma inyalo somo. E kinde mang’eny, kony nyaka a kuom jomoko, mana kaka Filipo ne opuonjo Ja-Ethiopia. (Tich Joote 8:26-35) Joneno mag Jehova puonjo Muma maonge chudo, ne jogo duto madwaro. Kik iluor kwayogi mondo ipuonjri Muma kodgi.

Ang’o ma omiyo ji mang’eny kwedo Joneno mag Jehova ka ginyisa ni kik apuonjra kodgi?

Ka Yesu ne lendo, ne nitie akwede, kendo ne owacho ni nokwedi jolupne bende. To jomoko ka ne mor gi puonj mag Yesu, jo din ma ne kwedo ne onyisogi kama: “Kara un bende ulal? Be nitie ng’ato kuom jo madongo moseyie kuome, kata ng’ato kuom jo Farisai koso?” (Johana 7:46-48; 15:20) Ng’eny jogo ma semi ni kik ipuonjri gi Joneno, nyalo bedo ni ok ging’eyo, kata gin kod ich wang’ moro. Puonjri gi Joneno mondo ine iwuon ka be ibiro ng’eyo Muma e yo momedore koso.—Mathayo 7:17-20.

Ere gi momiyo Joneno limo jogo mantie kod dindegi?

Seche ma gi timo kamano, giluwo ranyisi ma ne oketi gi Yesu. Ne odhi ne Jo-Yahudi. Ne gin kod din margi, to kata kamano ne giseweyo Wach Nyasaye e yore mang’eny. (Mathayo 15:1-9) Oganda ka oganda ni kod din margi, bed ni giluongore ni Jokristo kata maok Jokristo. En gima duong’ ahinya ni puonj duto ma ji nigo mondo owinjre gi Wach Nyasaye, kendo kinda ma Joneno timo e konyogi e yorni nyiso ni gihero ji.

Bende Joneno oyie ni din margi kende e din mar adier?

Nga’to ang’ata ma luwo din mare maonge tugo, nyaka kaw dinno kaka mar adier. Ka ok kamano, ang’o momiyo oluwe? Isiemo Jokristo kama: “Temuru gik moko duto; padreuru gi gik mabeyo.” (1 Jo Thessalonika 5:21) Ng’ato nyaka ne ni yie mare osir gi Muma, nikech yie mar adier en mana achiel. Jo Efeso 4:5 oyie gi wachno, ka owacho kama “Ruoth achiel, yie achiel, batiso achiel.” Yesu ne ok oyie gi puonj mar ni dinde duto gin yore matero ji e warruok. Mopogore gi mano, ne owacho niya: “To rangano tin, kendo yorno diny ma dhi e ngima, kendo ginok ma nwang’e.” Joneno mag Jehova nigi yie ni giseyudo yorno. Ka bed ni podi, di koro gimanyo din machielo.—Mathayo 7:14.

Bende gipuonjo ni gin kendgi ema gibiro yudo warruok?

Ooyo. Ji mang’eny ma osedak kuom tienge ma osekalo ma ne ok gin Joneno mag Jehova, ibiro chier mondo giyud thuolo mar yudo ngima. Ji mang’eny masani ngima, podi nyalo puonjore adiera ka “masira maduong’” podi ok ochopo, kendo giniyud ngima. Bende Yesu ne owacho ni kik wang’ad bura ne jomoko. Dhano neno mana kido maoko; Nyasaye to neno chuny ng’ato. Oneno e yo makare kendo ong’ado bura gi ng’wono. Osemiyo Yesu tij ng’ado bura, to ok wan.—Mathayo 7:1-5; 24:21; 25:31.

En chiwo mane mar pesa ma ikwayo jogo mabiro e chokruoge mag Joneno mag Jehova?

Jaote Paulo ne owacho kama korka chiwo mar pesa: “Ng’ato ka ng’ato mondo ochiw kaka oseparo e chunye; ok mar ng’ura kata mar achuna: nikech Nyasaye ohero jachiwo mamor.” (2 Jo Korintho 9:7) Joneno mag Jehova ok sol pesa kuom joma obiro e Ute Romo maggi koda kuonde ma gitimoe chokruogegi madongo. Nitie kuonde ma oketie sanduge, kendo jogo madwaro nyalo lute chiwo ma gin go. Onge ng’ama ng’eyo gima ng’ato ochiwo kata jachiwo. Jomoko nyalo chiwo maloyo jowetegi; to jomoko nyalo bedo ma onge gi nyalo mar chiwo gimoro. Yesu ne onyiso paro makare ma ji onego obedgo kane owuoyo kuom kar keno ma ne ni e hekalu man Jerusalem, kendo kuom jogo ma ne golo chiwo: Gima duong’ en nyalo kod chuny mar chiwo ma ng’ato ni godo, to ok ni ng’ato ogolo pesa maromo nade.—Luka 21:1-4.

Bende ka abedo achiel kuom Joneno mag Jehova, ibiro dwaro mondo ati tij lendo kaka gitimo?

Ka ng’ato oseng’eyo puonj mar Paradiso ma biro bedo e piny kae e bwo Pinyruodh Kristo e yo maber, obedo gi gombo mar nyiso jomoko. In bende ibiro bedo gi gombono. Ma en wach maber!—Tich Joote 5:41, 42.

Timo mani e yo ma ibiro nyisogo maler ni in japuonjre Yesu Kristo. Yesu iluongo e Muma ni “janeno migeno kendo madier.” Kane en e piny ne oyalo ka owacho niya: “Pinyruodh polo osesudo machiegni,” kendo ne ooro jopuonjrene bende mondo otim kamano. (Fweny 3:14; Mathayo 4:17; 10:7) Bang’e, Yesu ne ochiko jolupne niya: “E momiyo dhiuru utim ogendini duto jopuonjrena, . . . kupuonjogi.” Bende ne okoro ni ka giko podi ok ochopo, “wach maberni mar pinyruoth nolandre e piny duto, mondo obed ranyis ni ogendini duto.”—Mathayo 24:14; 28:19, 20.

Nitie yore mang’eny mag lando wach maberni. Wuoyo kod osiepeni kod jogo ma ing’eyo nyalo miyi thuolo mar timo kamano. Jomoko timo kamano ka okalo kuom ndiko barupe kata goyo sim. Moko oro ne jo ma ging’eyo buge mawuoyo kuom gik ma jogo nyalo hero. Joneno limo ji ot ka ot ka giting’o wach maberni, nikech gidwaro yudo ji duto.

Muma kwayi e yo mamor kama: “To Roho gi Miaha wacho ni, ‘Bi!’ Kendo ng’a mowinjo, mondo owach ni, ‘Bi!’ Kendo ng’a ma riyo omako, obi, mondo oyud pi mar ngima nono.” (Fweny 22:17) Nyiso jomoko wach mar Paradiso e piny kod gweth mabiro betie, en gima ng’ato timo ma onge achuna, nikech chunye opong’ gi gombo mar miyo ji wach maberni.

Wan gi adier ni in kod penjo mamoko e wi Joneno mag Jehova koda gigo ma gipuonjo. Nyalo bedo ni puonj moko tek winjo. Wanyalo hero dwoko penjo ma in go. Thuolo manie bugni ok nyal romo, kuom mano wakwayi ni mondo ipenj Joneno ma odak machiegni kodi. Inyalo timo mano ka idhi e chokruogegi e Od Romo margi kata ka gilimi kama idakie. Kata inyalo oro penjo ne Watch Tower ka itiyo gi nonro mantie piny kae, ma owinjore kodi.