Joneno mag Jehova Oyie Gang’o?

“Wadwaro winjo kuomi gi miparo, nikech wang’eyo ni kuonde duto ji wacho marach kuom kanyaklani.” (Tich Joote 28:22) Jotelo mag gweng’go mane odak e Rumi e higa gana achiel mokwongo, noketo ranyisi maber ahinya.

Kamano bende, iwacho weche maricho kuom Joneno mag Jehova ndaloni to nyalo bedo gi marach ka iparo ni inyalo ng’eyo adiera kuomgi koa kuom jogo makwedogi to ok ong’eyo adiera. Kuom mano Wamor mar leronu tiend moko kuom gigo madongo ma wayiego.

Muma, Yesu Kristo, kod Nyasaye

Wayie ni “ndiko duto mowuok kuom much Nyasaye, konyo.” (2 Timotheo 3:16) To kata obedo ni jo moko wacho ni ok wan Jo Kristo adier, gino ma giwacho ok en adier kata matin. Wayie ahinya gi gima jaote Petro wacho kuom wach Yesu Kristo: “Kendo onge kwo kuom ng’ato moro; nikech onge nying’ moro machielo e bwo polo mochiw ni ji monego wakwoe.”—Tich Joote 4:12.

Kata kamano nikech Yesu ne owacho ni en “Wuod Nyasaye” kendo ni ‘Wuoro e ma noora,’ Joneno mag Jehova oyie ni Nyasaye duong’ moloyo Yesu. (Johana 10:36; 6:57) Yesu owuon noyie ni “Wuoro duong’ moloya.” (Johana 14:28; 8:28) Mano e momiyo ok wayie ni Yesu romre gi Wuoro kaka puonj mar nyiseche Adek ei achiel wacho. To, wan wayie ni Nyasaye nochueye kendo Wuon oloye gi teko.—Jo Kolosai 1:15; 1 Jo Korintho 11:3.

E Dho Luo nying Nyasaye en Jehova. Muma wacho: “Ni mondo ging’e ni in, ma nyingi Jehova, in kendi e ng’a Ma Malo Chutho e piny ngima.” (Zaburi 83:18) Koluwore gi lendono, Yesu notemo jiwo ahinya kuom nying Nyasaye, kopuonjo jolupne mondo olem kama: “Wuonwa manie polo, nyingi mondo obed maler.” To en owuon nolamo Nyasaye kama: “Nyingi nanyiso jogo ma nimiya e piny.”—Mathayo 6:9; Johana 17:6.

Joneno mag Jehova oyie ni nyaka gibedi kaka Yesu e lando nying Nyasaye gi cheno mage ni ji ma moko. Kuom mano e momiyo wasekawo nying’ mar Joneno mag Jehova nikech waluwo tim Yesu, ‘Janeno Maradier.’ (Fweny 1:5; 3:14) Kowinjore gi mano, Isaya 43:10 wacho ni jogo mochung’ ni Nyasaye: “Un jonenona, Jehova owacho, jatichna maseyiedho.”

Pinyruodh Nyasaye

Yesu nopuonjo jolupne mondo olem, “Pinyruodhi mondo obi,” moketo Pinyruodhno mondo obed gima duong’ motelo e puonjne. (Mathayo 6:10; Luka 4:43) Joneno mag Jehova oyie ni Pinyruoth en loch adier moa e polo, kendo obiro locho e wi piny, kendo Yesu Kristo e Ruodhe moyier ma ok wanyal neno gi wang’wa. “Loch nobedi e luete,” Muma wacho. “Lochne gi kuwe ok nowe medore ameda.”—Isaya 9:6, 7.

Kata kamano, Yesu Kristo ok e ma nobed ruoth kende mar loch Nyasaye. Obiro bedo gi ruodhi mang’eny makonye locho e polo. “Ka watimo kinda,” jaote Paulo nondiko, “wanaloch kode bende.” (2 Timotheo 2:12) Muma nyiso ni kwan jogo mabiro chier mondo olochi gi Kristo e polo tin, ma gin “ji gana piero apar achiel gi gana piero ang’wen gang’wen-go ma nowar oa e piny.”—Fweny 14:1, 3.

Adieri, loch moro amora nyaka bedie gi ji molocho e wigi, omiyo Joneno mag Jehova oyie ni ji moko tara gi tara ma ok jogi malocho e polo biro yudo ngima ma nyaka chieng’. Bang’e piny, koseloki obedo paradis maber, biro pong’ gi jogi mowinjore bedo e bwo Loch mar Nyasaye, ka giyie gi loch mar Kristo gi ji malocho kode. Omiyo Joneno mag Jehova oyie gi teko ahinya ni piny ok nokethi ngang’ kendo ni singoni mar Muma biro chopo: “Jo matir ginicham piny, mi ginidagie nyaka chieng’.”—Zaburi 37:29; 104:5.

To Pinyruodh Nyasaye biro biro e yo machal nade? Enobi e yo ma ogendini duto chiworego giwegi mondo gibedi e bwo Loch mar Nyasaye? Mopogore gi mano, Muma nyiso e yo makare ni biro mar Pinyruodhno biro dwaro mondo Nyasaye odonji e weche mag piny: “Nyasaye manie polo nochung piny ruoth moro ma ok norum nyaka chieng’. . . . to enong’iny pinje ruodhigi duto, mi notiekgi, kendo nobedie nyaka chieng’.”—Daniel 2:44.

To Pinyruodh Nyasaye biro biro karang’o? Kaluwore kod weche ma nokor e Muma matimore koroni, Joneno mag Jehova oyie ni obiro biro machiegni ahinya. Wagweli mondo ipare weche moko ma nokor ma nowuoyo kuom gigo manyiso “ndalo mag giko” mag piny marachni. Gigo matimore nondiki e Mathayo 24:3-14; Luka 21:7-13, 25-31; kod 2 Timotheo 3:1-5.

Nikech ‘Wahero Jehova Nyasachwa gi iwa duto, chunywa duto, riekowa duto, gi tekowa duto, gi owetewa kaka waherore wawegi,’ waonge gi pogruok mag oganda, dhoot kata gweng’. (Mariko 12:30, 31) Wang’ere ahinya kuonde duto nikech hera manenore ratiro e kind owetewa ma Jokristo mayudore e pinje duto. (Johana 13:35; 1 Johana 3:10-12) Omiyo wadhi nyime gi chung’ marwa mondo kik wariwre weche kedo ni piny mag ogendinigo. Watemo mondo wabed kaka jolup Yesu machon mane owacho kuomgi: “Ok gin mag piny, kaka an ok an mar piny.” (Johana 17:16) Wayie ni ka wasiko ka wapogore gi piny nyiso ni ok wadonji e tim dwanyruok mayudore kamoro amora kawuono, moting’o wacho miriambo, kuo, tim chode, terruok, nindruok e kind joma chwo kendgi, tiyo gi remo e yo ma ok owinjore, lamo nyiseche manono, gi timbe moko machalo kamago ma Muma okwedo.—1 Jo Korintho 6:9-11; Jo Efeso 5:3-5; Tich Joote 15:28, 29.

Geno Mar Ndalo Mabiro

Joneno mag Jehova oyie ni ngima mar kawuono e pinyni ok e ngima kende mantie. Wayie ni Jehova nooro Kristo e piny mondo ochwer remb ngimane kata rawar mondo omi ji obed jo makare e wang’ Nyasaye mondo giyud ngima ma nyaka chieng’ e ndalo cheno manyien mar gik moko. Mana kaka japuonjre Yesu nowacho: “Koro oseketwa kare kuom rembe.” (Jo Rumi 5:9; Mathayo 20:28) Joneno mag Jehova goyo erokamano mang’eny ahinya ni Nyasaye kod Wuode kuom loso chenono mar warruok mamiyo ngima mar kinde mabiro obed ma nyalo yudore.

Joneno mag Jehova ni kod geno mar adier chuth kuom ngima mar ndalo mabiro, kaluwore gi chier a kuom tho e bwo Pinyruodh Nyasaye. Wayie, mana Kaka Muma puonjo, ni kinde ma ng’ato otho ngimane orumo chuth, kendo “chieng’onogo gi moparo olal alala.” (Zaburi 146:3, 4; Ezekiel 18:4; Eklesiastes 9:5) Ee, ngima mar ndalo mabiro ni jo motho obedo kaluwore gi kaka Nyasaye parogi e chieng’ chier.—Johana 5:28, 29.

Kata kamano, Joneno mag Jehova oyie ni ji mang’eny ma ngima e kindeni biro kwo ka gisiko ka gingima e kinde ma Pinyruoth Nyasaye biro kelo giko mar loch duto mantie kendo, kaka Noa gi joode nokwo e Ataro mar pi, ginisik ka gingima ka gimor e ngima ma nyaka chieng’, e piny maler. (Mathayo 24:36-39; 2 Petro 3:5-7, 13) To wan wayie ni kwono obedo kuom timo gima Jehova dwaro, kaka Muma wacho: “Piny kadho, . . . , to ng’a ma timo gi ma Nyasaye dwaro osiko nyaka chieng’.”—1 Johana 2:17; Zaburi 37:11; Fweny 7:9, 13-15; 21:1-5.

Kuom adier, ok wanyal tieko lero kani gigo duto ma Joneno mag Jehova oyiego, kata kamano wagweli mondo iyudi weche ma moko moloyo kendo.

Ka ok onyisi e yo machielo, ndiko duto mokonyruokgo kani oa e The Bible in Luo, mar higa mar 1968.