Pinyruodh Nyasaye En Ang’o?

1. En lamo mane ma wadwaro nono?

JI MANG’ENY ong’eyo lamo miluongo ni Lamo mar Ruoth. Yesu notiyo gi lamono mondo opuonjgo jopuonjrene kaka onego gilem. Gin gik mage ma Yesu nokwayo e lamono? To ere kaka lamono konyowa e kindegi?

2. Gin gik mage adek ma Yesu nopuonjowa ni mondo wakwa e lamo?

² Yesu nowacho niya: “Un to onego ulem kama: ‘Wuonwa manie polo, nyingi mondo obed maler. Pinyruodhi mondo obi. Dwaroni mondo otimre e piny kaka timore e polo.’” (Som Mathayo 6:9-13.) Ang’o momiyo Yesu nopuonjowa mondo walem ka wakwayo gik moko adekgo?​—Som Weche Momedore namba 19.

3. Ang’o monego wang’e e wi Pinyruodh Nyasaye?

³ Wasepuonjore ni nying Nyasaye en Jehova. Bende, wasepuonjore e wi kit ngima ma Nyasaye dwaro ni dhano odagie kod kaka odwaro ni piny obedi. Kata kamano, Yesu ne puonjowa wach ma ne ka ne owacho niya: “Pinyruodhi mondo obi”? Wabiro puonjore gima Pinyruodh Nyasaye en, gima obiro timo, kod kaka obiro miyo nying Nyasaye obed maler.

PINYRUODH NYASAYE EN ANG’O?

4. Pinyruodh Nyasaye en ang’o, to Ruodh Pinyruodhno en ng’a?

⁴ Jehova nigi sirkal mare e polo, kendo oseyiero Yesu mondo obed Ruoth mar sirkandno. Muma luongo sirkandno ni Pinyruodh Nyasaye. Yesu e “Ruodh ruodhi kendo Jaloch mar joloch.” (1 Timotheo 6:15) Yesu nigi nyalo mar timo gik mabeyo moloyo jaloch moro amora kendo en gi teko moloyo joloch duto manie piny.

5. Sirkand Nyasaye biro locho ka en kanye? Kendo obiro locho e wi ang’o?

⁵ Ka ne osechier Yesu, notieko ndalo piero ang’wen e piny, kae to ne odok e polo. Bang’e, Jehova noyiere mondo obed Ruoth mar Pinyruodhe. (Tich Joote 2:33) Sirkand Nyasaye biro locho e wi piny ka en e polo. (Fweny 11:15) Mano e momiyo Muma luongo Pinyruodh Nyasaye ni, ‘Pinyruodh polo.’​—2 Timotheo 4:18.

6, 7. Ang’o momiyo Yesu e jaloch maberie moloyo?

⁶ Muma konyowa ng’eyo gimomiyo Yesu ok nyal pim gi dhano moro amora. En nikech “en kende e ma ok onyal tho.” (1 Timotheo 6:16) Joloch duto mag piny thoga, Yesu to ok bi tho. Gik mabeyo ma Yesu biro timonwa nosik nyaka chieng’.

⁷ Weche mokor manie Muma nyiso ni Yesu biro bedo Ruoth ma ok buon ji kendo mang’won gi ji. Olero kama: “Roho mar Jehova nobed kuome, roho mar rieko kod mar winjo tiend weche, roho ma ng’ado ne ji rieko kod mar teko, roho mar ng’eyo kod mar luoro Jehova. Enobed mamor nikech oluoro Jehova. Ok obi ng’ado bura kaluwore mana gi gima wang’e oneno, kata kwero ji kaluwore gi gima ite owinjo. Obiro ng’ado bura makare ne jochan.” (Isaya 11:2-4) Be igombo bedo gi jaloch ma chalo kamano?

8. Wang’eyo nade ni Yesu ok bi locho kende?

⁸ Nyasaye oseyiero jomoko e piny ka mondo odhi oloch gi Yesu e pinyruodh polo. Kuom ranyisi, jaote Paulo nonyiso Timotheo niya: “Ka wadhi nyime nano, wanaloch bende kanyachiel kode kaka ruodhi.” (2 Timotheo 2:12) Gin ji adi ma biro locho gi Yesu kaka ruodhi?

9. Gin ji adi ma biro locho gi Yesu? Nyasaye nochako yierogi karang’o?

⁹ Mana kaka ne wasepuonjore e Sula mar 7, jaote Johana ne omi fweny moneno Ruoth Yesu e polo ka en gi ji ma moko 144,000. Ji 144,000 gin jomage? Johana lero ni “nyinge [tiende ni, Yesu] gi nying Wuon mare ondik e lela wang’gi.” Nomedo lero ni: “Gin e jo ma luwo Nyarombo [tiende ni, Yesu] kamoro amora ma odhiyoe. Ne ong’iew jogi ka gia kuom oganda dhano.” (Som Fweny 14:1, 4.) Ji 144,000 gin Jokristo mochung motegno ma Nyasaye oseyiero mondo oloch gi Yesu “kaka ruodhi e wi piny.” Ka gi tho ichierogi mondo gidhi gidag e polo. (Fweny 5:10) Chakre kinde mag joote, Jehova osebedo ka yiero Jokristo mosiko ka luwo chikene mondo obed e kind ji 144,000 ma biro locho kaka ruodhi.

10. Hera mar Nyasaye nenore nade kuom yiero Yesu gi ji 144,000 mondo oloch e wiwa?

¹⁰ Jehova dewowa ahinya to mano emomiyo oseyiero dhano mondo obi oloch gi Yesu. Yesu biro bedo jaloch maber nikech ong’eyowa maber. Nosegabedo dhano ma ochandore, omiyo ong’eyo kaka wawinjo sama wachandore. Paulo nowacho ni Yesu “kechowa e nyawowa,” kendo ni ‘oseteme e yore duto mana kaka wan.’ (Jo-Hibrania 4:15; 5:8) Ji 144,000 bende ong’eyo malong’o kaka ngima dhano chalo. Gin bende gisenyagore gi nyawo kod tuoche mana kaka wan. Omiyo, wanyalo bedo gadier ni Yesu kaachiel gi ji 144,000 biro ng’eyo chandruoge ma wanyagorego.

PINYRUODH NYASAYE BIRO TIMO ANG’O?

11. Be malaike duto ma ne odak e polo ne timo dwach Nyasaye?

¹¹ Ang’o momiyo Yesu nopuonjo jopuonjrene mondo gilem ni dwaro mar Nyasaye otimre e piny kaka timore e polo? Ne wapuonjore e Sula mar 3 ni Satan Jachien ne ong’anjo ne Jehova. Bang’ ka Satan noseng’anjo, Jehova noweye en kaachiel gi malaike ma bang’e nolokore mobedo jochiende mondo gidag e polo kuom kinde. Omiyo, nitie jomoko e polo ma ne ok tim dwach Nyasaye. E Sula mar 10, wabiro puonjore weche momedore e wi Satan kod jochiende.

12. Gin weche mage ariyo madongo milero e Fweny 12:10?

¹² Muma lero ni bang’ ka Yesu osebedo Ruoth e Pinyruodh Nyasaye ne odhi kedo gi Satan. (Som Fweny 12:7-10.) Kwan matindo 10 lero weche moko ariyo madongo ma ne dhi timore. Pinyruodh Nyasaye ne dhi chako locho kae to Satan iwito e piny. Mana kaka wabiro nono, weche ariyogo osetimore.

13. Ang’o mane otimore e polo ka ne owit Satan e piny?

¹³ Muma lero kaka malaike makare nowinjo ka ne owit Satan gi jochiendene e piny. Muma wacho kama: “Beduru mamor un polo kod jo modak e iye!” (Fweny 12:12) Nitie kuwe gi winjruok e polo nikech ji duto man kuno timo dwach Nyasaye.

14. Ang’o mosebedo ka timore e piny nyaka ne riemb Satan e polo?

¹⁴ Ngima e piny opogore ahinya. Gik maricho ahinya timorenwa “nimar Jachien oselor mwalo” kendo “en gi mirima mager, kong’eyo ni odong’ mana gi kinde manok.” (Fweny 12:12) Satan nigi mirima mager. Oseriembe e polo kendo ong’eyo ni machiegnini ibiro kethe. Otimo duto monyalo mondo okel chandruoge, lit, kod kuyo e piny mangima.

15. Dwaro mar Nyasaye ne piny en ang’o?

¹⁵ Dwaro mar Nyasaye ne piny pok olokore. Pod odwaro ni dhano makare odag e paradiso nyaka chieng’. (Zaburi 37:29) Ere kaka Pinyruodh Nyasaye biro miyo dwarono otimre?

16, 17. Daniel 2:44 nyisowa ang’o e wi Pinyruodh Nyasaye?

¹⁶ Ne okor e Daniel 2:44 niya: “E kinde loch ruodhigo, Nyasaye manie polo nochung pinyruoth ma ok noketh ngang’. Pinyruodhno ok nomi oganda machielo, to obiro ng’injo pinjeruodhi mamokogi duto motiekgi chuth kendo noloch nyaka chieng’.” Weche ma nokorgo puonjowa ang’o e wi Pinyruodh Nyasaye?

¹⁷ Mokwongo, onyisowa ni Pinyruodh Nyasaye biro chako locho “e kinde loch ruodhigo.” Mano nyiso ni Pinyruodh Nyasaye biro chako locho ka sirkande mag dhano pod locho e piny. Mar ariyo, onyisowa ni Pinyruodh Nyasaye biro siko nyaka chieng’ kendo onge sirkal ma biro kawo kare. Mar adek, lweny biro betie e kind Pinyruodh Nyasaye gi sirkande mag pinyni. Pinyruodh Nyasaye biro loyo lwenyno kae to ochako locho e piny. Gikone, dhano biro bedo gi sirkal maberie moloyo ma pok ne gibedogo nyaka nene.

18. Lweny mogik ma biro timore e kind Pinyruodh Nyasaye gi sirkande mag pinyni iluongo nang’o?

¹⁸ Pinyruodh Nyasaye biro kawo kar loje mag pinyni e yo mane? Ka pok lweny mogik miluongo ni Har–Magedon otugore, jochiende biro wuondo “ruodhi mag piny mangima mondo gichokgi ne lweny mar odiechieng’ maduong’ mar Nyasaye Manyalo Duto.” Sirkande mag dhano biro kedo gi Pinyruodh Nyasaye.​—Fweny 16:14, 16; som Weche Momedore namba 10.

19, 20. Ang’o momiyo Pinyruodh Nyasaye onego obi mondo oloch e wi piny?

¹⁹ Ang’o momiyo Pinyruodh Nyasaye onego obi? Nitie weche adek momiyo onego obi. Mokwongo, onyuolwa e richo, omiyo wabedo matuo kendo watho. Kata kamano, Muma wacho ni e bwo loch mar Pinyruodh Nyasaye wabiro dak nyaka chieng’. Johana 3:16 wacho kama: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.”

²⁰ Wach mar ariyo momiyo Pinyruodh Nyasaye onego obi, en nikech wadak e kind joma richo. Ji ohero wacho miriambo kendo gihero timbe mochido mag terruok. Waonge gi teko mar golo joma kamago, kata kamano, Nyasaye to biro gologi. Joma dhi nyime timo gik maricho ibiro kethi e lweny mar Har–Magedon. (Som Zaburi 37:10.) Wach mar adek momiyo Pinyruodh Nyasaye onego obi en nikech sirkande mag dhano ok nyal tieko gik maricho e piny, giger, kendo gipong’ gi mibadhi. Ok gidwar konyo ji mondo oluw chike Nyasaye. Muma wacho ni “loch dhano, . . . en loch ma kelo mana hinyruok.”​—Eklesiastes 8:9.

21. Pinyruodh Nyasaye biro miyo dwach Nyasaye otimre e piny e yo mane?

²¹ Bang’ lweny mar Har–Magedon, Pinyruodh Nyasaye biro miyo dwach Nyasaye otimre e piny. Kuom ranyisi, obiro tueyo Satan gi jochiendene. (Fweny 20:1-3) Gikone, onge ng’ato ang’ata ma biro bedo matuo kata ma biro tho. Misango mar Yesu biro miyo ji duto momakore motegno gi Nyasaye odag e Paradiso nyaka chieng’. (Fweny 22:1-3) Pinyruodh Nyasaye biro miyo nyinge obed maler. Mano biro timore nade? Kinde ma Pinyruodh Nyasaye biro locho e piny, dhano duto biro miyo nying Jehova luor.​—Som Weche Momedore namba 20.

YESU NOBEDO RUOTH KARANG’O?

22. Ang’o momiyo wanyalo wacho ni Yesu ne ok obedo Ruoth ka ne en e piny ka, kata mapiyo bang’ ka ne osechiere?

²² Yesu nopuonjo jopuonjrene mondo olem niya: “Pinyruodhi mondo obi.” Omiyo, ne en gima nenore ayanga ni Pinyruodh Nyasaye ne dhi locho e kinde mabiro. Jehova ne dhi kwongo chungo Pinyruodhe kae to oketo Yesu obed Ruoth. Be ne okete Ruoth mapiyo bang’ dok e polo? Ooyo, ne nyaka orit mondi. Kinde moko bang’e ka ne osechier Yesu, Petro gi Paulo ne olero wachno ka gitiyo gi weche ma nokor e wi Yesu ma yudore e Zaburi 110:1. E ndikono, Jehova nowacho ne Yesu niya: “Bed e bada korachwich nyaka chop aket wasiki obed raten tiendi.” (Tich Joote 2:32-35; Jo-Hibrania 10:12, 13) Yesu ne dhi rito kuom kinde maromo nade ka pok Jehova okete obed Ruoth?

23. (a) Yesu nochako locho kaka Ruoth e Pinyruodh Nyasaye karang’o? (b) Wabiro puonjore ang’o e sula ma luwo mae?

²³ Higni mang’eny ka pok higa mar 1914 ochopo, grup moro matin mar Jokristo madier nong’eyo kaka higano ne dhi bedo higa makende kaluwore gi weche ma nokor e Muma. Gik mosebedo ka timore e piny chakre higa mar 1914 osenyiso ni ne gin kare. Yesu nochako locho kaka Ruoth e higano. (Zaburi 110:2) Mapiyo bang’ kosechako locho, ne owit Satan e piny kendo sani “odong’ mana gi kinde manok.” (Fweny 12:12) E sula ma luwo mae, wabiro nono gik ma nyiso ayanga ni wadak e kindego. Bende, wabiro puonjore ni machiegnini, Pinyruodh Nyasaye biro miyo dwaro mar Nyasaye otimre e piny.​—Som Weche Momedore namba 21.