Somo mar 6

Pinyruoth Nyasaye En Ang’o?

Pinyruoth Nyasaye nitie kanye? (1)

Ruodhe en ng’a? (2)

Bende jomoko locho kaachiel gi Ruodhni? Ka kamano, gin ji adi? (3)

Ang’o manyiso ni wadak e ndalo mag giko? (4)

Ang’o ma Pinyruodh Nyasaye biro timo ne dhano e ndalo mabiro? (5-7)

1. Ka ne en e piny, Yesu nopuonjo jolupne mondo gilem ni Pinyruodh Nyasaye. Pinyruoth en loch ma jatelo mare en ruoth. Pinyruodh Nyasaye en loch moyiedhi. Ochunge e polo kendo obiro locho e pinyni. Obiro puodho nying Nyasaye. Obiro miyo dwaro mar Nyasaye otimre e piny kaka timore e polo.—Mathayo 6:9, 10.

2. Nyasaye nosingo ni Yesu nobed Ruoth e Pinyruodhe. (Luka 1:30-33) Ka Yesu ne ni e piny, nonyisore ni obiro bedo Ruoth mang’won, majadiera kendo makare. Ka nodok e polo, ne ok okete e kom kaka Ruoth mar Pinyruodh Nyasaye gi kanyono. (Jo Hibrania 10:12, 13) E higa mar 1914 Jehova nomiyo Yesu telo mane osingore ni nomiye. Chakre kanyono, Yesu oselocho e polo kaen Ruoth moyier gi Jehova.—Daniel 7:13, 14.

3. Jehova bende oseyiero chuo kod mon man gi yie koa e piny mondo odhi e polo. Gibiro locho gi Yesu kaka ruodhi, jobura, kod jodolo ewi dhano. (Luka 22:28-30; Fweny 5:9, 10) Yesu noluongo joma locho kode e Pinyruoth mare ni “kueth matin.” Gin ji 144,000.—Luka 12:32; Fweny 14:1-3.

4. Mapiyo ka Yesu ne osebet Ruoth, nowito Satan kod malaika maricho koa e polo nyaka e piny. Mano emomiyo gik moko osebedo maricho ahinya e pinyka chakre 1914. (Fweny 12:9, 12) Lwenje, kech, twoche, timbe maricho mamedore—magi duto gin gik moko kuom “ranyis” manyiso ni Yesu locho kendo ni pinyni ni e ndalo mag giko.—Mathayo 24:3, 7, 8, 12; Luka 21:10, 11; 2 Timotheo 3:1-5.

5. Machiegini Yesu biro ng’ado ne ji bura, kopogogi kaka jakwath pogo rombe kod diek. “Rombe” gin jomabiro nyisore ni giyie kode. Gibiro yudo ngima mochwere. “Diek” gin joma biro dagi Pinyruodh Nyasaye. (Mathayo 25:31-34, 46) E kinde mabiro machiegini, Yesu biro ketho ji duto manyiso kido mag diek. (2 Jo Thessalonika 1:6-9) Kidwaro mondo ibed achiel kuom “rombe” mag Yesu, nyaka ichik iti ne wach mar Pinyruoth kendo itim kaluwore gi gik mipuonjori.—Mathayo 24:14.

6. Kindegi piny opogore matindo-tindo. Moro ka moro nigi lochne. Pinje kedoga giwegi. Kata kamano Pinyruodh Nyasaye biro golo loch duto mag dhano. Obiro bedo gi loch achiel kende e piny mangima. (Daniel 2:44) Eka lweny, ketho chik gi gero ok nobedie kendo. Ji duto nodagi kaachiel gi kwe gi riwruok.—Mika 4:3, 4.

7. Kinde mag Loch Yesu mar Higini Gana Achiel, ji duto moyie biro bedo makare, kendo piny mangima biro bedo paradis. Giko mar higini gana achiel biro yudo ka Yesu osetimo gik moko duto ma Nyasaye nedwaro mondo otim. Bang’e obiro dwoko ne Wuon mare Pinyruoth. (1 Jo Korintho 15:24) Ang’o mamoni nyiso osiepeni kod wedeni gik ma Pinyruodh Nyasaye biro timo?

[Picha manie ite mar 13]

E bwo loch mar Yesu, sigu kata achaya ok nobedie kendo