Ranyisi Mag Del

OGENDINI moko tiyo gi ranyisi mag del sama giwuoyo moloyo ogendini mamoko. Kata kamano, chiegni ji duto nyiso e wang’gi kendo tiyo gi ranyisi mag del e yo moro sama giwuoyo. Mano timore sama ng’ato goyo mbaka mapile koda sama owuoyo e nyim ji.

Tiyo gi ranyisi mag del ne en gima pile ne Yesu gi jolupne mokwongo. Kinde moro, ng’ato ne ochopo ne Yesu kowachone ni min Yesu koda ominene ne dwaro wuoyo kode. Yesu nodwoko niya: “Mama en ng’ano, kendo ominena gin ng’a gini?” Kae to Muma medo wacho ni: ‘Norieyo lwete kuom jopuonjrene, kowacho niya, “Neuru, mama gi ominena!”’ (Math. 12:48, 49) Kuonde moko e Muma kaka Tich Joote 12:17 koda 13:16 nyiso ni tiyo gi ranyisi mag del sama giwuoyo ne en gima biro abira kende ne joote Petro koda Paulo.

Ok wanyis paro koda kaka wawinjo e chunywa mana gi dwondwa kende, to bende watiyo gi ranyisi mag del koda wang’. Ka ok watim kamano, ji nyalo paro ni ok wadew. To ka watiyo gi ranyisi mag del koda mag wang’ e yo maber, gimiyo wechewa donjo ne ji moloyo. Kata kapo ni iwuoyo e simo, ka iwuoyo kitiyo gi ranyisi mag del koda mag wang’ e yo mowinjore, dwondi biro nyiso mayot pek mar gimiwacho koda kaka iwinjo e chunyi kuom gimiwachono. Omiyo, bed ni isomo kamoro kata iwuoyo maok ing’i ahinya weche mondiki, bed ni jowinjo ng’iyi kata ging’iyo Muma, ranyisi mag del koda mag wang’ dwarore.

Ranyisi mag del koda mag wang’ ok onego onere ka gima gin mosom e buk. Ne ok opuonji kaka onego inyier kata kaka onego inyis ni iyi owang’. Ranyisi mag del bende onego onyis kaka iwinjo e chunyi. Ber moloyo ka giwuok awuoka kendgi.

Ranyisi mag del inyalo ket e grube ariyo: malero wach gi majiwo wach. Ranyisi mag del malero wach, gin manyiso kaka gimoro ne otimore, pim mar gimoro kata kama gimoro nitie. Sama itiegori e skul kuom wach tiyo gi ranyisi mag del, kik ine ni tiyo mana gi ranyisi mar del achiel kata ariyo kende oromo. Tem tiyo gi ranyisi mag del e yo mapile e twagi duto. Ka iyudo pek e timo kamano, inyalo temo tiyo gi weche manyiso kama gimoro wuokie, borne, duong’ne, kata kama entie. Kata kamano, thothne gima dwarore en mana keto chunyi duto e twak maok iparori ahinya ni ji neni nade, to iwuo kendo itim kaka pile. Ka ng’ato ogonyore sama owuoyo, ranyisi mag del biro kendgi.

Ranyisi mag del majiwo wach nyiso kaka ng’ato winjo e chunye kendo nyiso ni en gadier. Gipogo kind weche kendo gijiwo puonj. Ranyisi mag del majiwo wach dwarore. Kata kamano, tang’! Yot mondo gibed gik mitimo samoro amora miwuoyo. Kisiko itiyo mana gi ranyisi mar del achiel e jiwo wach, jowinjo nyalo chako keto pachgi kuom mano kar keto pachgi e twak. Ka jarit-skul onyisi ni in gi nyawoni, tem tiyo gi ranyisi mag del malero wach kende kuom kinde. Bang’e matin, chak tiyo kendo gi ranyisi mag del majiwo wach.

Mondo ing’e okang’ monego itiye gi ranyisi mag del majiwo wach kendo ing’e yore mowinjore mag timo kamano, tem ng’eyo kaka joma iwuoyogo kawogi. Siemo jowinjo gi lweti nyalo chwanyogi. E ogendini moko, ka dichwo oumo dhoge gi lwete konyiso ni ohum gi gimoro, inyalo kawe ni otimore ka dhako. Kuonde moko e piny, ka dhako wuoyo ka fwayo lwetene, ikawo ni mano ok en nyiso luor. Omiyo dwarore ni nyimine modak kuonde ma kamago oti moloyo gi ranyisi mag wang’. Chiegni e piny mangima, ka ng’ato wuoyo e nyim grup matin, tiyo gi ranyisi mag del ajimba nyalo nenore kaka tim mar oyuma.

Kaka imedo lony kendo bedo maonge luoro, ranyisi moro amora mar del mitiyogo e jiwo wach biro nyiso kaka iwinjo e chunyi kendo ni in gadier gi gima iwacho. Gibiro miyo wecheni oyangre maber.

Gima Wang’i Nyiso. Moloyo kamoro amora e dendi, wang’i ema janyiso gadier kaka iwinjo e chunyi. Wengeni, dhogi, kendo kaka iketo wiyi, nyiso kaka iwinjo. Kata kaonge gima isewacho, wang’i nyalo nyiso ni ok idew, isin, ibwok, ihum, kata imor. Nyiso gik ma kamago e wang’i sama iwuoyo miyo ji neno maler picha mar gimiwachono e pachgi kendo wechego mulo chunygi. Jachwech noketo leche mang’eny e wang’i—mokalo 30. Sama ibwonjo, itiyo gi chiegni nus mar lechego.

Bed ni iwuoyo e ndiri kata in e tij lendo, wach mitemo nyiso ji en wach maber manyalo miyo chunygi obed mamor. Bwonjo nyiso ni mano en adier. To komachielo, ka wang’i ok nyis gimoro amora, mano nyalo miyo ji oket kiawa kabe weche miwacho wuok e chunyi adier.

To moloyo mano, bwonjo nyiso jomoko ni chunyi mor kodgi. Mano en gima dwarore ahinya e kindegi ma ji mang’eny oluoro joma gikiya. Bwonjoni gi ji nyalo miyo gibed thuolo kodi kendo girwak gima iwacho.