Bug Muma Namba 64 3 Johana
Jandiko: Jaote Johana
Ne Ondike: Efeso, kata machiegni
Ne Otiek Ndike: Chiegni 98 E.N.
BARUANI ondiki ne Gayo, Jakristo mochung’ motegno kendo ma Johana nohero ahinya. Gayo ne en nying’ ma ji ne thoro tiyogo e ndalo mag kanyakla machon. Oyudore nyading’wen kuonde mamoko ei Ndiko mag Dho-Grik mag Jokristo, kiwuoyo kuom ji ma ok tin ne adek kata madirom ang’wen mopogore opogore. (Tich 19:29; 20:4; Rumi 16:23; 1 Kor. 1:14) Onge weche mantie ma yango ratiro ni en Gayo mane ma Johana ne ndikone kuom jogi. Duto mwang’eyo kuom Gayo en ni ne en achiel kuom jo kanyakla mar Jokristo, to ne en osiep Johana ma ti mata, kendo ni baruani ne ondikne en owuon, ma emomiyo wach mar “in” nwang’ore ndalo duto kanyiso ni iwuoyo gi ng’at achiel.
2 To nikech yo mochakogo kendo tiekogo mosne chalo gi manie Johana mar Ariyo, kendo jandiko luongore ni “an jaduong’,” onge kiawa ni jaote Johana ema nondiko baruani. (2 Joha. 1) Bedo ni weche ma giting’o kendo yo mondikgi godo chalre, bende nyiso ni ne ondike, e Efeso kata machiegni gi kanyo, chiegni 98 E Ndalowa, mana kaka barupe ariyo mamokogo. To nikech ochuok, jondiko mamoko machon ne ok thor nwoyo weche moting’o, to baruani kaachiel gi barua mar Ariyo mar Johana, yudore e oboke machon mag Ndiko mowuok kuom much Nyasaye.
3 E barupeni, Johana nyiso ni ogeno Gayo nikech timne mar rwako owete ma ne timo limbe, kendo owuoyo kuom gombo moro marach ma Diotrefe ne nigo. Iwuoyo kuom Demetrio ka jal ma ne otero baruani ne Gayo, omiyo nenore ni Johana ne oore kendo ne dwarore mondo Gayo orwake ka en e wuodhno, ma e gimomiyo nooro baruano. Mana kaka Gayo, onge gima wang’eyo kuom Diotrefe kod Demetrio maloyo weche mwasomo kae. Kata kamano, baruani konyowa neno e yo machuok kaka ne nitie winjruok machiegni e riwruok mar owete ma Jokristo e kinde machon. Kaachiel gi gik mamoko bende, winjruokni oriwo kata tim rwako welo ma ne ni e wuoth ‘nikech nying’’ Nyasaye, kata obedo ni welogo ne ok ong’ere gi joma ne rwakogi.—Kwan 7.
GIMOMIYO BUGNI KONYO
5 Jaote Johana nyiso kaka en owuon ne en jarit maber kuom timo kinda mar rito kanyakla kuom gigo ma ne nyalo kelo hinyruok. Chuny mar hera kod rwako welo ma ne ni e kanyakla ne en gima ipuoyo, kendo kuom adier ne gin gi ting’ mar rito chuny mamor kamano mondo omi owete manie alworano koda “welo” (jogo ma ne ok ong’ere gi Jakristo marwakogi) ma ne jobiro e kindgi, oti kanyachiel e “tich mar lando adiera.” (Kwan 5, 8) Kata kamano, Diotrefe ne nigi gombo maricho, tim ma Jehova osin godo, kendo ne ok ochiw luor ne chenro mag Nyasaye, ka owuoyo marach bende kuom jaote Johana. (Nge. 6:16, 17) Ne otamo jo kanyakla e nyiso kit Jokristo mar rwako welo. Kuom mano, onge kiawa ni Johana ne kwedo ahinya tim marachni, kojiwo hera manie kanyakla mar Jokristo madier. Onego wabed gi kinda kaka mano e kindewagi ka wamedo bolore, wuotho e adiera, nyiso hera mar Nyasaye, koda bedo jochiwo kaluwore gi puonj ma Johana nochiwo ni: “Ng’a ma timo maber en mar Nyasaye, to nga’ ma timo marach pok oneno Nyasaye.”—3 Joha. 11.