Singo mag Pinyruoth​—Loso Gik Moko Duto Obed Manyien

PAR ane ni ipono olemo moro kaka apple ka in gi minu e piny manyien. Ing’ueye mondo iwinj kaka ogolo suya mamit kae to ikete e okapu ma iseketoe olembe mamoko. Seche koro osekalo mang’eny nyaka ne ichak pono olembe, to pod iwinjo kitek ateka, kendo pod idwaro ni idhi mana nyime gi pono. Igoyo wang’i bathe komachielo kendo ineno ka minu be pono olembe. Joodu moko kaachiel gi osiepeu bende konyore kode kanyo, kendo gimor matek. Ineno ka minu tinde tin mana kaka ne otin ka ne pod in nyathi. Ihum ahinya kiparo kaka ne oseti mojwajni e piny machon. E kinde machonno, nineno kaka tuo ne otere marach ma gikone onege ka in bute, kendo ne iywak malit ahinya e liende. To sani koro ongima kendo. Ji mathoth bende osechier!

Kinde ma kamago biro chopo, kendo wan gadier chuth. Wan gadier nikech gik ma Nyasaye osingo nyaka timre. E sula ma luwogi, wabiro nono moko kuom gik mosingi ma Pinyruoth biro timo machiegnini ka wachomo lweny mar Har–Magedon. Bende, wabiro neno gik ma Pinyruoth biro timo bang’ Har–Magedon. To mano kaka wabiro winjo maber ka koro Pinyruodh Nyasaye locho e wi piny ngima kendo oloso gik moko obed manyien!