Be Wuon Jo-Yahudi En Ibrahim Koso Jachien?

Ka Yesu pod ni Jerusalem e Sawo mar Kiche, omedo puonjo adiera ma dwarore ni ji ong’e ahinya. Noyudo Jo-Yahudi man kanyo osewachone niya: “Wan koth Ibrahim kendo pok ne wabedoga wasumbni ng’ato ngang’.” Yesu dwokogi kama: “Ang’eyo ni un koth Ibrahim. To un udwaro nega, nikech wechena ok bed gi dongruok e kindu. Gik ma aseneno ka an gi Wuora e ma awacho, to un utimo gik musewinjo kuom wuonu.”​—Johana 8:33, 37, 38.

Gima Yesu wacho winjore maler: Owacho ni Wuon mare opogore mabor gi wuon Jo-Yahudigo. Nikech ok giwinj tiend gima Yesu wachonegi, Jo-Yahudigo nwoyo kendo niya: “Wuonwa en Ibrahim.” (Johana 8:39; Isaiah 41:8) En adier ni gin koth Ibrahim. Omiyo, gineno ni yie ma gin-go kuom Nyasaye chalre gi ma Ibrahim osiep Nyasaye ne nigo.

Kata kamano, nenore ni dwoko ma Yesu chiwonegi miyo giwuoro. Yesu wachonegi kama: “Ka da un nyithind Ibrahim, dikoro utimo gik ma Ibrahim notimo.” Kuom adier, kinde mang’eny wuowi luwo timbe wuon mare. Omiyo, Yesu medo wacho kama: “To sani udwaro nega, an ma asewachonu adiera ma ne awinjo kuom Nyasaye. Ibrahim ok notimo kamano.” Kae to Yesu wachonegi wach moro ma mako dhogi. Okonegi niya: “Un utimo tije mag wuonu.”​—Johana 8:39-41.

Pod Jo-Yahudi ok ong’eyo ni en wuoro mane ma Yesu wuoyoe. Gin pod giramo ni gin nyithind Nyasaye. Giwacho kama: “Wan ne ok onyuolwa kuom terruok; wan gi Wuonwa achiel, ma en Nyasaye.” Kata kamano, be Nyasaye e Wuon-gi adier? Yesu wachonegi niya: “Ka da bed ni Nyasaye e Wuonu, dikoro uhera, nimar nawuok ir Nyasaye, to koro an kae. Ne ok abiro kuom dwacha awuon, to Nyasaye e ma ne oora.” Nitie penjo ma Yesu penjo kae to owuon ochiwo dwoko. Owacho kama: “Obet nade ni ok ung’eyo tiend gima awacho? En nikech ok unyal winjo wachna.”​—Johana 8:41-43.

Yesu osetemo nyiso gik ma nyalo timore ne joma kwede. To koro owachonegi achiel kachiel niya: “Un ua kuom wuonu Jachien, kendo udwaro timo gombo mag wuonu.” Wuon jogo en ng’at ma chalo nade? Yesu konyogi ng’eyo ayanga kowachonegi kama: “Ng’atno ne en janek a chakruok, kendo ne ok ochung’ motegno e adiera.” Yesu medo bende niya: “Ng’at mowuok ir Nyasaye winjo weche mag Nyasaye. Mano e momiyo un ok uwinj, nikech ok uwuok ir Nyasaye.”​—Johana 8:44, 47.

Weche ma Yesu owacho ne Jo-Yahudigo miyo igi wang’. Gidwoke kama: “Donge wan kare e wacho ni, ‘In Ja-Samaria kendo ni in gi jachien’?” Sama giluongo Yesu ni “Ja-Samaria,” mano chalo ayany kata nyiso ni gichaye. Yesu to ok chwanyre kata ka gichaye kamano. Kar mano, odwokogi niya: “Aonge gi jachien, to amiyo Wuora duong’, un to uchaya.” Gima nyiso ni wachno en wach ma ok onego okaw mayot en singo ma Yesu chiwo. Osingo kama: “Ng’ato ang’ata ma mako wachna, ok bi tho ngang’.” Yesu ok wach ni joote kod jomamoko ma luwe ok bi tho ngang’. Kar mano, gima otemo wacho en ni ok bi kethgi e kethruok ma nyaka chieng’, ma en “tho mar ariyo” ma ng’ato dak chierie kendo.​—Johana 8:48-51; Fweny 21:8.

Jo-Yahudi to pod kawo weche ma Yesu owachogo mana kaka gin. Giwacho kama: “Koro to wang’eyo ni in gi jachien. Ibrahim ne otho, jonabi bende, to in iwacho ni, ‘Ka ng’ato ang’ata omako wachna, ok nobil tho ngang’.’ Ok iduong’ moloyo wuonwa Ibrahim ma ne otho, koso? . . . Itemo wacho ni in ng’a?”​—Johana 8:52, 53.

Nenore maler ni Yesu temo nyiso ni en e Mesia. Kata kamano, kar dwokogi achiel kachiel ni en ng’a, owachonegi kama: “Ka amiyora duong’ awuon, duong’ mara en ka nono. Wuora e ma miya duong’, en e Wuoro ma uwacho ni en Nyasachu. To e ma pod ok ung’eye, to an to ang’eye. Kendo ka anyalo wacho ni ok ang’eye to abiro chal kodu, abiro doko jamiriambo.”​—Johana 8:54, 55.

Koro Yesu dok e ranyisi ma a osewuoye motelo e wi Ibrahim kwargi. Owachonegi kama: “Ibrahim wuonu ne nigi ilo maduong’ kogeno neno ndalona, kendo nonenogo, mi noil.” Kuom adier, Ibrahim ne nigi yie kuom singo mar Nyasaye kendo norito ahinya neno biro mar Mesia. Jo-Yahudigo dwoko ka giwuoro niya: “Pok ichopo jahigni 50, to iwacho ni iseneno Ibrahim?” Yesu dwokogi kama: “Adier, adier, awachonu ni, ka Ibrahim pok nobetie, ne antie.” Yesu temo wuoyo e wi ngimane kane en e polo kaka malaika ma nigi teko.​—Johana 8:56-58.

Jo-Yahudigo igi owang’ nikech Yesu owacho ni ne entie ka Ibrahim pok nobetie. Omiyo, gidwaro chiele gi kite. Kata kamano, Yesu weyogi ka pok gihinye.