Kaka Bolruok ne Chenro ma Jehova Oketo Konyowa

BOLRUOK ne Nyasaye ma e Jaloch e wi gik moko duto, en gima dwarore ahinya mondo mi wabed jo ma timo dwach Nyasaye. Wang’eyo ni Wuode e Wi kanyakla mar Jokristo kendo wayie bolore ne chenro mar wich kata mana e yore mamoko mag ngimawa. Bolruok ne chenro ma Nyasaye oseketo kaka mago konyowa waduto.

² Chenro mar nyiso bolruok ne jogo moket e wiwa ne ochakore e puodho mar Eden. Wanyalo neno mano e weche ma Nyasaye nochiko e Chakruok 1:28 kod 2:16, 17. Chuech mamoko ne onego obolre ne dhano, to Adam gi Hawa ne onego obolre e bwo teko Nyasaye ka gitimo dwache. Luwo chenro ma Nyasaye noketono ne dhi miyo kue obedie kendo gik moko otimre e yo mochanore maber. Chenro mar bolruok e bwo jo ma nigi teko e wiwa ne onyis bang’e e 1 Jo-Korintho 11:3. Jaote Paulo nondiko kanyo kama: “Daher ni ung’e ni wi dichwo ka dichwo en Kristo; to wi dhako en dichwo; kendo wi Kristo en Nyasaye.” Mano nyiso ni Jehova kende e ma onge ng’at monyalo bolore e bwoye.

³ Kindewagi, ji mang’eny ok dwa bolore ne jogo manie wigi. Nikech ang’o? Chuny ma kamano nochakore e Eden ka jonyuolwa mokwongo noyiero ni ok gidwar mondo Nyasaye obed Jaloch e wigi. (Cha. 3:4, 5) Kata kamano, ne ok giyudo thuolo ma ne gigombo ni gibedgono. Kar mano, ne gibedo e bwo teko mar Satan Jachien. Ng’anjo mokwongono ne opogo dhano gi Nyasaye. (Kol. 1:21) Nikech mano, thoth dhano e kindegi osiko e bwo teko mar Ng’at Marach.​—1 Joh. 5:19.

⁴ Nikech wan wasepuonjore Wach Nyasaye kendo wayie luwogo, wasewuok e tuech mar Satan. Kaka Joneno mosechiwo ngimagi ne Jehova mi obatiswa, wayie mondo Jehova e mobed Jaloch ma chiko ngimawa. Wachalo gi Ruoth Daudi ma nonyiso ni Jehova en “e wi gik moko duto.” (1 We. 29:11) Ee, waikore hulo ayanga niya: ‘Ng’euru ni Jehova en Nyasaye. En e ma ne ochueyowa, kendo wan joge.Wan e joge morito kaka jakwath rito rombene.’ (Zab. 100:3) Wang’eyo ni Jehova duong’ kendo en e ma owinjore wabolrene chuth, nimar en e ma nochueyo gik moko duto. (Fwe. 4:11) Kaka jotich Nyasaye madier, waluwo ranyisi maber ma Yesu Kristo noketonwa mar bolruok ne Nyasaye.

⁵ Yesu nopuonjore ang’o kuom sand ma ne oyudo e piny? Jo-Hibrania 5:8 chiwo dwoko kama: “Kata obedo ni ne en wuod Jalo, ne opuonjore luwo kaka Nyasaye chiko kokalo kuom chandruoge ma noyudo.” Ee, Yesu nobolore ne Wuon mare me polo komakore kode motegno kata mana e bwo sand mager. E wi mano, onge kata gimoro achiel ma Yesu notimo gi dwache owuon. Ne ok owach wechene owuon, kata manyo duong’ne owuon. (Joh. 5:19, 30; 6:38; 7:16-18) Ka ne en e piny, nomor gi timo dwach Wuon mare kata obedo ni timo kamano nomiyo ji kwede kendo sande. (Joh. 15:20) To e mago duto, Yesu nonyiso ni obolore e bwo teko mar Nyasaye. Yesu “nobolore” kata mana nyaka e “tho e yadh-sand.” Bolruok ma ne obolorego ne Jehova nokelo gueth e yore mang’eny. Dhano koro ne nigi geno mar yudo warruok mosiko, ne idhi ting’ Yesu malo, kendo Wuon mare ne dhi yudo duong’.​—Fil. 2:5-11; Hib. 5:9.

KUONDE MA DWARORE NI WANYISIE BOLRUOK

⁶ Sa ma wabolore ne Nyasaye kuom timo dwache, parruok kod chandruok mang’eny ma yudo jo ma ok dwar bolore ne loch Jehova, ok yudwa. Kinde duto, jasikwa ma en Jachien, manyo kaka dongamwa. Inyalo reswa e lwet ng’at marachno mana ka wachung’ motegno e kwede kendo ka wayie bolore ne Jehova mondo Jehova wuon e mochikwa.​— Mat. 6:10, 13; 1 Pet. 5:6-9.

⁷ Onego wang’e kendo wayie ni Kristo e Wi kanyakla mar Jokristo, kendo ni osemiyo “jatich mogen kendo mariek” teko mar tayo kanyakla. Ng’eyo mano onego ochik paro ma wan-go kod kaka watimo ne jomoko. Nyiso bolruok e kanyakla biro miyo waikre luwo kaka Wach Nyasaye chikowa e yorewa duto mag lamo. Wabiro timo kamano kuom dhi e tijwa mar yalo, dhi e chokruogewa kendo chiwo paro, winjo jodong-kanyakla, kendo riwo lwedo chenro ma riwruok mar oganda Jehova oseketo.​—Mat. 24:45-47; 28:19, 20; Hib. 10:24, 25; 13:7, 17.

⁸ Bolruok ne Nyasaye miyo weche timore e yo mochanore maber kendo wabedo gi kue kod winjruok e kanyakla mar Nyasaye. Kido mag Jehova nenore kuom jogo ma riwo lwedo chenroge. (1 Kor. 14:33, 40) Gik mwaseneno wawegi e riwruok mar oganda Jehova osemiyo wawacho weche ma chal gi ma Ruoth Daudi nowacho. Bang’ neno pogruok manie kind jotich Jehova kod jo maricho, Daudi nowacho koil kama: “Jo mamor gin jo ma Nyasachgi en Jehova!”​—Zab. 144:15.

⁹ Chenro ma Jehova oketo e ngima mar kend kata mar joot en ni “wi dhako en dichwo.” Kata kamano, wi dichwo en Kristo, to Wi Kristo en Nyasaye. (1 Kor. 11:3) Mon onego obolre ne chwogi, to nyithindo onego obolre ne jonyuolgi. (Efe. 5:22-24; 6:1) Kue betie sa ma ng’ato ka ng’ato bolore ne chenro moket ne joot.

¹⁰ Dichwo onego oti gi teko momiye kaka wi ot e yor hera koluwo ranyisi mar Kristo. (Efe. 5:25-29) Ok onego oti gi teko momiyeno e yor agoko, bende ok onego ojwang’ ting’no. Kotiyo gi teko momiye e yor hera, chiege kod nyithinde biro yie bolorene. Migawo ma dhako nigo en bedo jakony mar chwore. (Cha. 2:18) Koriwo chwore lwedo kendo nyise luor, chwore biro here kendo Nyasaye biro yudo pak. (1 Pet. 3:1-4) Sa ma chwo kod mondegi luwo puonj ma Muma chiwonegi, giketo ne nyithindgi ranyisi maber mar bolruok ne Nyasaye.

¹¹ Bedo gi chuny mar bolruok ne Nyasaye bende chiko kaka wabolore ne “joloch,” ma gin ‘loje ma Nyasaye e moketo e migepegigo.’ (Rumi 13:1-7) Nikech Jokristo gin jo ma luwo chik sirkal, gichulo osuru ka gimiyo “Kaisar gige Kaisar, to gige Nyasaye ne Nyasaye.” (Mat. 22:21) E wi mano, chenro mar tieko alwora mar lendo nyaka luwre gi chike moketi mag kano weche maling’ ling’ mag ng’ato. Sa ma wabolore kendo luwo chike duto ma sirkal oketo ma ok keth kata tuomre gi chike makare mag Jehova, mano weyonwa thuolo mar timo tijwa maduong’ mar yalo.​— Mar. 13:10; Tich 5:29.

¹² Onego wanyis bolruok ne chenro ma Nyasaye oketo e yore duto mag ngimawa. Nikech wan gi yie motegno, warito gi siso ahinya ndalo ma Jehova Nyasaye biro bedo e wi gik moko duto ka ji duto bolorene. (1 Kor. 15:27, 28) Mano kaka jogo moyie ni Jehova e Jalochgi kendo ma siko bolore ne chenro moketo biro bedo oganda moguedh kendo momorgo nyaka chieng’!