Agost

Nikech kinde duto Ibrahim nong’iyo luwo chike Jehova kata mana e gik matindo, mano nomiyo osiep ma ne nie kinde gi Jehova odhi nyime dongo. Nojawuoyo gi Jehova ka chunye ni thuolo, kokwaye kony sama penjo moko ma korgi tek chande. Kuom ranyisi, ka nofwenyo ni Nyasaye ne dhi ketho Sodom gi Gomorra, chunye nochandore koparo ni joma kare be ne idhi keth kanyachiel gi joma richo. Samoro gima ne chando chuny Ibrahim ne en Lut wuod owadgi ma ne odak gi joode e dala mar Sodom. Ibrahim nobolore sama nopenjo “Ja-ng’ad bura mar piny duto” penjo ma ne chande kendo nogeno kuome. Jehova nohore kokonyo Ibrahim ong’e ni en Nyasaye ma kecho ji, ma nono chuny ji duto, kendo ma manyo joma kare mondo oresgi kata e kinde ma ochiwoe kum. (Cha. 18:22-33) Onge kiawa ni ng’eyo ma Ibrahim nong’eyogo Nyasaye kaachiel gi gik ma noneno, nokonye rito osiep ma ne nie kinde gi Jehova. w16.02 1:11, 12

Ji duto e piny mangima diher bedo gi osiepe ma ok wegi kata weche tek manade. Kata kamano, ka wamor mana gi kaka Jonathan nomakore gi Daudi to wiwa wil gi kaka nomakore gi Nyasaye, to kare nitie puonj moro maduong’ ma bayowa. Ang’o momiyo Jonathan nokawo Daudi kaka osiepne to ok jasike? Omiyo gima Jonathan nokawo kaka gima duong’ e ngimane, ne en makruok gi Nyasaye. To mano e ma nokonye makore gi Daudi. Giduto ne gitimo kaka ne gisingore. Wan kaka Jokristo, wageno joodwa, osiepewa, kod Jokristo wetewa kendo wamakorega kodgi, to ok wabedga mana mamor neno ka jomoko nono e ma timo kamano. (1 The. 2:10, 11) To en ng’awa monego wamakrego mokwongo? Donge en Jal ma nochiwonwa ngima? (Fwe. 4:11) Siko ka wamakore gi Nyasaye miyo wabedo mamor gadier. Kata kamano, mondo wanyis ni wamakore gi Nyasaye, nyaka wapadre kuome kata ka waromo gi tembe mager. w16.02 3:3, 4

Rawera ma pache otegno ni gadier e wi gik mosepuonje ma oyiego. Ok otimre ni en osiep Nyasaye ka en e Od Romo to ka en e skul to en osiep piny. Odong’ kogurore motegno kata mana e kinde ma itemo yie mare. (Efe. 4:14, 15) En adier ni waduto warem, omiyo kinde ka kinde wabothga bed ni wan joma tindo kata joma dongo. (Ekl. 7:20) Kata kamano, sama iparo wach batiso, nyalo bedo maber nono matut ni ing’ado mar makori gi chike Jehova e okang’ ma romo nade. Penjri kama, ‘Asebedo ka aluwo chike Nyasaye e okang’ ma romo nade kuom kinde matin mosekalo? ’ Par ane kaka isebedo kitimo sama iromo gi tembe. Be isenyiso ni in gi rieko ma dwarore e pogo ber gi rach? To nade ka ng’ato odhiali e yo makende e piny Satanni kaka ne otim ne Daniel? Be inyalo ‘dhi nyime yango dwach Jehova’ kata kapo ni dwache tuomore gi gima iyondhi mondo itim?—Efe. 5:17. w16.03 1:7-9

Wadak e kinde ma Muma luongo ni “ndalo mag giko,” kendo nyime kae wachomo masira moro maduong’ ma pok nobetie nyaka nene. (2 Tim. 3:1) E wi mano, Satan gi jochiendene osegol e polo kendo ne obolgi e piny kae kama gikeloe ne dhano chandruoge malich miwuoro. (Fwe. 12:9, 12) Omiwa tich moro makende mar lando wach maber ne ogendni ma wacho dhok mopogore opogore e piny mangima, kendo sani tijno itimo e okang’ ma pok ne otimego nyaka nene! Mondo wamed yudo gueth mag Nyasaye, dwarore ni wachik itwa ne weche duto michikowago e kanyakla mar Jokristo. Ka wan gi tim mar luwo kaka ichikowaga e kindegi, biro bedo mayot timo kamano kinde “masira maduong’,” ma biro golo oko piny ma Satan chikoni. (Mat. 24:21) Bang’e, chike manyien biro dwarore ma biro tayowa e piny manyien. w16.03 4:16, 18

E kinde Jokristo mokwongo, jaote Johana noneno e fweny malaike abiriyo ka moro ka moro kuomgi goyo turmbeta. Kane malaika mar abich ogoyo turmbetane, Johana noneno ka “sulwe moro” lwar piny koa e polo. ‘Sulweno’ ne nigi ofungu mar dho abiso. Notiyo gi ofunguno e yawo dho abiso mi iro nowuok kanyo. Det-bonyo mang’eny nowuok ei irono mi gibiro oko e piny. Kar chamo yiende gi alode, det-bonyogo nochako monjo “joma onge gi alama mar Nyasaye e lela wengegi.” (Fwe. 9:1-4) Onge kiawa ni Johana nong’eyo ni det-bonyo ne nyalo ketho kama duong’. Donge kinde moro det-bonyo nomonjo piny Misri machon e ndalo Musa? (Wuok 10:12-15) Det-bonyo ma ne Johana onenogi, ochung’ne Jokristo mowal sama gilando ote motegno mag kum mag Nyasaye. Bende iriwogi lwedo gi dhano milionde ma nigi geno mar dak e piny. Tijni osekonyo ji mang’eny weyo dinde mag miriambo mokwako piny mangima ma Satan osebedo ka chiko! w16.03 3:3

Mondo jaduong’-kanyakla ong’e okang’ ma adiera mag Pinyruoth osekonyogo owadwa ma pod onge lony ahinya, onyalo penje ni, ‘Chiwruok ne Jehova oseloko nade yo mitiyogo gi ngimani? ’ Penjono nyalo miyo uwuo e wi kaka wanyalo medo tiyo ne Nyasaye gi chunywa duto. (Mar. 12:29, 30) Bang’ goyo mbaka machalo kamano, onyalo lemo kanyachiel gi owadwano kokwayo Jehova mondo okonye gi roho maler nikech mano en gima dwarore oyud mondo tiegruok mare odhi maber. Mano kaka owadwano biro winjo kojiwe sama jaduong’ olemo kowuok e chunye e loye! Sama jaduong’ chako tiego ng’ato, onyalo nono kode ranyisi moko manie Muma ma biro konye neno gimomiyo dwarore obed ng’at moikore ne tiegruok, ng’at minyalo gen, kendo mobolore. (1 Ru. 19:19-21; Neh. 7:2; 13:13; Tich 18:24-26) Mago gin kido ma dwarore ahinya ni owadwa mitiego obedgo mana kaka lowo manie puodho dwaro manyiwa. Kidogo biro miyo otim dongruok mapiyo kendo konye ‘oyaw wang’e one weche miwuoro’ manie Wach Nyasaye. w15 4/15 2:3, 4

Wuoyo gi Jehova kinde ka kinde en gima dwarore mondo wasud machiegni kode. Ere kaka wanyalo wuoyo gi Nyasaye? Wajawuoyo kode seche ma walemo. (Zab. 142:2) Kae to, wan bende wamiyo Jehova thuolo mar wuoyo kodwa sama wasomo Wachne mondiki kendo waparo matut kuom gik ma wasomo. (Isa. 30:20, 21) Ka wakwayo Jehova gimoro achiel kachiel, wanyalo neno dwoko ma Jehova miyowa, kata obedo ni seche moko odwokowa e yo ma ok nere ayanga. Sama waneno ka Jehova dwoko kwayo magwa, mano miyo wamedo yie ni entie adier. E wi mano, kaka wamedo nyise weche ma iye ma chando chunywa, e kaka en bende omedo sudo machiegni kodwa. Loso osiep manie kindwa gi Jehova en gima watimo e ngimawa duto. Nyaka wakaw okenge ma dwarore mondo wasud machiegni gi Nyasaye ka wadwaro mondo osud machiegni kodwa. Watimuru duto mwanyalo mondo wabed gi tudruok gi Nyasachwa kuom puonjruok Muma kendo kuom wuoyo kode e lamo. Ka watimo kamano, winjruok manie kindwa gi Jehova biro medo bedo motegno, to mano biro konyowa wanyagre maber gi tembe ma wanyalo romogo. w15 4/15 3:3, 14, 16

Mano kaka wechego dimbo kaka Satan chalo! Kata obedo ni piny duto nie bwo teko Satan, pod ogombo ni omedie yudo ji. Gombo maduong’ ma Satan nigo en tieko jotich Jehova. Yo mosesandogo jolup Yesu chakre kinde Jokristo mokwongo nyaka sani nyiso kaka en jasigu mager nyowuoyo. Sibuor ma kech kayo malich ok nyal ng’wono ne le modwaro mako. Ok one lit moro amora sama odwaro nego leno, kendo bang’ nege wachno ok lichne. E yo ma chalo kamano, Satan ok winj lit moro amora ne joma odwaro ngamo. Kuom ranyisi, par ane kaka Satan Jachien nyalo bedo ni ne mor kane Jo-Israel donjo e richo mag terruok kod ich lach kinde ka kinde. Sama isomo weche ma nyiso masiche ma noyudo Zimri nikech terruok, kod ma noyudo Gehazi nikech ich lach, be inyalo neno kaka sibuor ma rutono ne mor kaka olocho?—Kwan 25:6-8, 14, 15; 2 Ruo. 5:20-27. w15 5/15 1:8, 9

Ere kaka wanyalo kedo gi Satan mi waloye? Yesu nonyiso jopuonjrene kama: “Kuom nano maru, unures ngimau.” (Luka 21:19) Onge gimoro amora ma dhano nyalo timonwa ma nyalo hinyowa nyaka chieng’. Kendo onge ng’ato ang’ata ma nyalo ketho winjruokwa ma jaber gi Nyasaye, mak mana ka wan e ma wachiwo thuolono. (Rumi 8:38, 39) Kata mana ka jotich Jehova otho, mano pod ok nyis ni Satan olocho nimar Jehova pod biro chierogi. (Joh. 5:28, 29) To komachielo, Satan onge gi geno moro amora mar kinde mabiro. Koseketh piny marachni, ibiro bole e abiso kuom higni 1,000. (Fwe. 20:1-3) E giko Higni Aluf Achiel mar Loch Yesu, “ibiro gony Satan oa e tuech” kuom kinde matin kimiye thuolo mogik mondo owuond dhano mosebedo makare. Bang’ mano, ibiro keth Jachien chuth. (Fwe. 20:7-10) Satan onge gi geno moro amora, in to in-go! Kwed Satan matek ka ichung’ motegno e yie. (1 Pet. 5:9) Inyalo kedo gi Satan ma iloye! w15 5/15 2:1, 18

Ng’at mariek ong’eyo ni gik ma waketo e pachwa ahinya inyalo pim gi mach. Ka oti gi mach e yo maber, onyalo konyo mana kaka okonyoga e tedo chiemo. To mach nyalo kelo masira ka ok oti kode maber ma owang’ ot gi joma nie iye te. E yo ma chalo kamano, paro weche e yo matut en gima ber ka okonyowa luwo ranyisi mar Jehova. Kata kamano, paro gimoro marach aming’a nyalo hinyowa kapo ni gik mwaparogo miyo wabedo gi gombo maricho e chunywa. Kuom ranyisi, ka wahero paro gik maricho, mano nyalo miyo wachak timo gik maricho ma waparogo. Kuom adier, ka wapong’o pachwa gi paro mochido mag nindruok mano nyalo miyo waketh winjruok me kindwa gi Nyasaye! (Jak. 1:14, 15) Yesu nokwero wach keto paro mochido mag nindruok e chunywa koda e pachwa. Nochiwo siem niya: “Ng’ato ang’ata ma siko ka ng’iyo dhako mondo ogombe, osechodo kode ei chunye.”—Mat. 5:28. w15 5/15 4:11, 12, 14

Gik moko duto ma Yesu notimo kolendo, ne nyiso kaka odewo dhano gadier. Chieng’ moro noromo gi wach moro ma kore tek ahinya. (Mar. 1:39, 40) Ng’at moro ma nigi tuwo mar dhoho ma en tuwo ma ji oluoro ahinya, ochung’ e nyime. Luka ma ne en laktar, wuoyo e wi kaka tuono nosechamo ringre ng’atno kowacho ni “dhoho nosaso dende.” (Luka 5:12) “Ka [jadhohono] noneno Yesu, nopodho auma kosaye niya: ‘Ruoth, kidwaro, to mi abed maler.’ ” Ng’atno ne onge kiawa ni Yesu ne nigi teko mar change. Kata kamano, gima nodwaro ng’eyo ne en ka be Yesu ne dwaro timo kamano. Yesu ne dhi timo nade kaluwore gi gima ng’atno nokwaye kowuok e chunye? Norieyo lwete momulo jadhohono. Kendo kowuoyo kode gi dwol ma nyiso ng’wono nonyise kama: “Ee, adwaro! Bed maler.” Kae to “gi kanyono, dhohono noa kuome.” (Luka 5:13) Yesu nonyiso okang’ matut ma noherogo dhano.—Luka 5:17. w15 6/15 2:3-5

Choko chir mar nono chandruogno gi Jakristo motegno nyalo konyowa mondo kik wabed joma rendore ni gombo marach ma wan godono ok rach ahinya. (Hib. 3:12, 13) Wuoyo kuom nyawo moro ma wan-go gi Jakristo moro motegno, nyalo fwenyonwa gik mamoko ma nyalo hinyowa ma wan to ok wane. Timo kamano nyalo konyowa mondo watim lokruoge ma dwarore mondo wasik e hera mar Jehova. Jodong-kanyakla e joma owinjore ahinya mondo okonywa. (Jak. 5:13-15) Manyo kony en gima dwarore ahinya kapo ni gima kelo ne ng’ato paro mochido en tim molil mar ng’iyo ponografi. Kaka ng’ato medo deko ma ok omanyo kony, e kaka medo bedo mayot mondo ‘gombono otegno ma nyuol richo’ ma biro kelo hinyruok ne jomoko kendo ketho nying Jehova. Gombo mar moro Jehova kendo siko e kanyakla mar Jokristo, osemiyo jotichne mang’eny orwako kony ma omigi e yor hera.—Jak. 1:15; Zab. 141:5; Hib. 12:5, 6. w15 6/15 3:15-17

Be kinde ma ikethoe dinde mag Babilon Maduong’, nyiso ni ji duto manie dindego biro tho? Nenore ni ok en kamano. Jotend dinde moko mag miriambo biro weyo dindegi ka gitamore ni ok ne gin e dindego. (Zek. 13:5, 6) To jotich Nyasaye biro timore nade e kindego? Yesu leronwa kama: “Kuom adier, dine bed ni ndalogo ok ong’ad machuok, onge ng’ato ma dores; to nikech joma oyier, ndalogo ibiro ng’ad machuok.” (Mat. 24:22) Monj ma notimore e higa 66, ne ‘ong’ad machuok.’ Mano nochiwo thuolo ne “joma oyier,” ma gin Jokristo mowal mondo oring owuog Jerusalem kod alworane. Kamano bende, masira maduong’ ma notimre e kinde mabiro, ibiro “ng’ad machuok” nikech “joma oyier.” Ok bi yiene jotend siasa ma gin “tunge apar” mondo oketh oganda Nyasaye. (Fwe. 17:16) Kar mano, gik moko biro kuwe kuom kinde machuok. w15 7/15 2:5, 6

Ng’ato owuon e ma biro yiero ka be obiro donjo e tem kata ooyo. (Mat. 6:13; Jak. 1:13-15) Kane Jachien teme, Yesu nokwedo mapiyo tembe duto ma ne otemego kotiyo gi weche manie e Wach Nyasaye. Omiyo, Yesu noriwo lwedo ratiro ma Jehova nigo mar bedo jaloch e wi gik moko duto. To Satan ne ok ool. Norito “nyaka chop kinde machielo mowinjore.” (Luka 4:13) Yesu nodhi nyime kwedo tembe duto ma Satan ne kelone mondo kik ochung’ motegno e nyim Nyasaye nyaka giko. Kata kamano, Satan pod kelo tembe ne jolup Yesu moriwo nyaka in. Nikech wach ma nosieko ni en ng’a ma nigi ratiro mar locho e wi gik moko duto pod dhi nyime, Jehova oweyo ne Jatem thuolo mondo otemwa kotiyo gi pinyni. Nyasaye ok e ma terwa e tem. Kar mano, en gadiera kodwa kendo odwaro konyowa. To nikech Jehova omiyowa thuolo mar timo yiero, ok ogeng’wa nyalhodia kik wadonj e tem. Nyaka watim gik moko ariyo: Wasik ka wachung’ motegno e winjruokwa gi Jehova, kendo wasik ka walemo. w15 6/15 5:13, 14

Jokristo nyaka tieg pachgi kod chunygi mondo ging’e kaka onego gitim kodok korka weche ma kelo ywaruok monego ng’ato ochiwie paro. (Rumi 14:19) Ne ane ranyisi mar Mirjeta ma wuok e alwora moro ma chon ne en piny Yugoslavia. Nodongo e gweng’ ma ji ne mon gi Jo-Serbia. Bang’ puonjore ni Jehova ok buon ng’ato ang’ata kendo ni Satan e ma jiwoga tungni manie ogendni, notimo kinda ahinya mondo olok pache. Kata kamano, kane lweny otugore e alwora ma Mirjeta nodakie, sigu ma ne en-go chon nochier e chunye kendo mano nomiyo oyudo ka tekne lendo ne Jo-Serbia. Bang’e noduogo ofwenyo ni ne ok onyal ling’ aling’a kogeno ni siguno biro rumo kende. Nolamo Jehova kokwaye mondo okonye loyo pekno. Owacho niya: “Asefwenyo ni keto pacha e tij lendo e gima osebedo ka konya ahinya. Sama an e tij lendo, atemo luwo ranyisi mar Jehova mar bedo ng’at mohero ji, kendo mano osemiyo siguno orumo.” w15 7/15 3:11-13

Ne ane kaka Jehova notimo ne Jehoshafat ruodh Juda. Kinde moro, Jehoshafat ok notiyo gi rieko ka noyie riwo lwedo Ahab ruodh Israel ma ne dhi kedo gi jolweny mag Suria. Kata obedo ni jonabi 400 mag miriambo nonyiso Ahab ni ne odhi loyo lwenyno, janabi mar Jehova miluongo ni Mikaia e ma nokoro ni ne idhi loye. Ahab notho e lwenyno, kendo Jehoshafat notony mana matin. Ka nodok Jerusalem, nomiye siem mager nikech noriwo Ahab lwedo. Kata kamano, Jehu, wuod Hanani janen, nonyiso Jehoshafat niya: “Oyud gik moko mabeyo kuomi.” (2 We. 18:4, 5, 18-22, 33, 34; 19:1-3) Kata obedo ni Jehoshafat notimo tim fuwo, Jehova pod noparo gik mabeyo ma nosetimo. (2 We. 17:3-10) Siganani paronwa ni kata obedo ni warem, Jehova biro nyisowa herane mosiko ka watemo kar nyalowa duto mondo wamore. w15 8/15 1:8, 9

Ere kaka wanyalo ikore sani ne dak e piny manyien ma Nyasaye osingonwa? Tem ane paro ni ichano dar mondo idhi idag e piny machielo. Ere kaka inyalo ikori ne lokruok ma kamano? Inyalo chako puonjori dhok ma ji wacho e pinyno. Ng’eyo kitgi gi timbegi bende nyalo konyi. Inyalo kata chako chamo chiembgi. E yo moro, inyalo chako dak ka gima in e pinyno, nikech kamano e kaka ibiro dak kisedhi kuno. Kamano bende, wanyalo chako ikore ne dak e piny manyien ka watemo kar nyalowa sani mondo wadag mana kaka wabiro dak kuno. Thoth ji ok dwar ni Nyasaye ochikgi kendo giramo mar timo dwachgi ka gineno ni mano en gima owinjore. To mano osekelo ang’o? Mano osekelonegi chandruoge, kuyo, kod masiche mathoth. (Yer. 10:23) To mano kaka warito kinde ma ji duto biro bolore e bwo loch maber mar Jehova! w15 8/15 3:4, 5

Jokristo ma pok okendo kata ma pok okendi onego otang’ ahinya gi osiepe ma gibedogo. Muma chiwo puonj ne jotich Nyasaye ma manyo joma gidwaro kendorego, ni gikendre “mana kuom Ruoth,” ma tiende ni, gikendre mana gi jotich Jehova mosechiworene, ma osebatisi kendo modak kaluwore gi puonj ma yudore e Muma. (1 Kor. 7:39) Ka Janeno okendore gi Janeno wadgi, oyudo osiep mochiwore ne Jehova kendo ma biro konye chung’ motegno e tiyo ne Nyasaye. Jehova ong’eyo maber ahinya gima nyalo konyo jotichne kendo mano e momiyo osebedo konwoyonegi paro ma en-go e wi kend. Ne ane chik mayot winjo tiende ma nomiyo Jo-Israel kotiyo gi Musa. Jehova nowuoyo gi Jo-Israel e wi ogendni ma nolworogi kendo ma ne ok lame kochikogi niya: ‘Kik inyuomri kodgi . . . nikech enolok wuodi ni kik oluwa, ni mondo giti ni nyiseche mamoko.’—Rapar 7:3, 4. w15 8/15 4:12, 13

Ere kaka wanyalo tiego chunywa mar pogo ber gi rach? Yore madongo ma wanyalo timogo kamano en puonjruok Muma pile, paro matut kuom gik ma wasomo, kae to timo gik ma wapuonjore. Mano oriwo timo gik mang’eny moloyo mana ng’eyo adiera moko kod chike. Puonjruok Muma onego okonywa ng’eyo Jehova e yo maber chuth, ng’eyo kite, gik mohero kod ma ok ohero. Chunywa biro luwo mana kaka Jehova Nyasaye chikowa. Mano onego ochwalwa mondo kinde duto wagomb bedo kaka en. Kata kamano, kapo ni Jakristo moro oyiero timo gimoro ma chunye oyiene timo to wan gino ok morwa, ok onego wang’adne bura kata paro ni onego wachune olok pache. Samoro chunye mar pogo ber gi rach pod “yomyom” kendo nyalo dwarore ni omed tiego chunye. Kata nyalo bedo ni ochwanyore piyo kodok korka weche moko.—1 Kor. 8:11, 12. w15 9/15 2:4, 8, 10

Pinywani en kama kende ahinya kopime gi gik mamoko duto ma Nyasaye nochueyo. Par niya, e kind planet duto ma kwan-gi ok ong’ere ne dhano, piny kende e ma Jehova nochueyo gi nyalo mar siro ngima, kama dhano ok oremoe gimoro, kama jaber, kendo ma onge gima nyalo kethe chuth! (Isa. 45:18) Ma nyiso maler kaka Jehova oherowa. (Ayub 38:4, 7; Zab. 8:3-5) Kata obedo ni Jehova nochueyonwa piny ma jaber mondo wadagie, ong’eyo ni mondo wabed mamor e ngimawa, nitie gik mamoko ma wadwaro mopogore mana gi gige ringruok. Nyathi bedoga ma onge kibaji moro amora sama ong’eyo ni jonyuolne ohere gadier. Jehova nochueyo dhano e kite owuon, komiyogi nyalo mar winjo ni oherogi kendo odewogi to mano miyo gin bende gihere. (Chak. 1:27) E wi mano, Yesu nowacho niya: “Joma mor gin joma nigi riyo mar ng’eyo Nyasaye.” (Mat. 5:3) Nikech Jehova en Wuonwa ma jahera, ochiwonwa “gik moko duto e yo mogundho mondo wamorgo,” moriwo gige ringruok kod chiemb chuny.—1 Tim. 6:17; Zab. 145:16. w15 9/15 4:6, 7

Jandik-zaburi moro nonyiso ni en gi paro mowinjore ka nowacho niya: “Gen kuom Jehova; nimar pod anapake kuom konyrwok mayudo kuome. A Nyasacha, chunya ti okuyo: e momiyo aparoi.” (Zab. 42:5, 6) To mano kaka nohero Jehova! Be wan bende wahero kendo wageno Wuonwa me polo kamano? Kapo ni iparo ni en kamano, inyalo medo gene ka luwore gi gima Muma nyisowa kama: ‘Gen Jehova gi chunyi duto, kendo kik iketri kuom lony gi weche mayoreyore ma in-go iwuon. Yie kuome e yoreni duto, mi nomi yoreni bedo mochikore tir.’ (Nge. 3:5, 6) Nikech Jehova e ma nokwongo herowa, nonyisowa kaka onego wahere. (1 Joh. 4:19) Weuru wapar kinde duto kaka osenyiso ni oherowa malich. Kendo weuru wadhi nyime nyiso ni wahero Jehova ‘gi chunywa duto, gi ngimawa duto, gi pachwa duto, kendo gi tekowa duto.’—Mar. 12:30. w15 9/15 5:17-19

Sama wan e tij lendo, wakonyo ji obed gi yie, to gie sechego wan bende yiewa medo bedo motegno. Mana kaka Jokristo mokwongo, wapuonjore keto yiewa chuth kuom Jehova kendo wuoyo gi chir e chal moro amora. (Tich 4:17-20; 13:46) Fwenyo kaka Jehova konyowa e ngimawa kod kaka odwoko lamo magwa, miyo yiewa medo tegno. Mano e gima notimore ne Kaleb gi Joshua. Ne ginyiso yie kuom Jehova kane gidhi nono Piny Manosingi. Kata kamano, neno yo ma Jehova notayogigo e ngimagi bang’ nono piny nomiyo yie margi omedore moloyo. Mano e momiyo Joshua nowuoyo gi chir ahinya konyiso Jo-Israel wetene niya: “Gimoro ne ok orem kuom gik mabeyo duto ma ne Jehova Nyasachu owacho kuomu.” Bang’e nomedo wacho kama: “Kamano koro mondo uluor Jehova, kutiyone gi chuny kendo gadiera.” (Jos. 23:14; 24:14) Kaka wamedo neno ber ma Jehova bergo, wan bende wabiro medo bedo gadiera ma kamano.—Zab. 34:8. w15 10/15 2:10, 11

Be indikoga weche machuok sama owete chiwo twege e chokruogewa mag kanyakla kod chokruogewa madongo? Somo weche ma nindikogo bang’e, miyi thuolo maber mar paro matut gik ma ne ipuonjori e Wach Nyasaye kod riwruokne. E wi mano, gocho ka gocho mar gasede mag Ohinga mar Jarito kod Amkeni! kaachiel gi buge manyien ma wayudoga e chokruogewa madongo miyowa weche manyien ma wanyalo somo kendo paro matut kuomgi. Seche ma isomo Kitabu cha Mwaka, nyalo bedo maber ka iparo matin kuom wach moro misomo, kendo paro matut kuom gima isomono mondo wechego ojiwi. Inyalo kiewo weche madongo kata ndiko wach moro e bath buk misomo, ma nyalo konyi sama iikori ne dok timo limbe, timo limbe mar kwath, kata ma nyalo konyi e twak ma ibiro bedogo kinde ma biro. To maduong’ie moloyo, paro matut kinde ka kinde sama isomo bugewa ma lero Muma biro miyi thuolo mar guro wechego e chunyi kendo biro miyo ilem ka igoyo ne Jehova erokamano nikech gik mabeyo ma ipuonjorigo. w15 10/15 4:9, 10

Achiel kuom gik ma moroga jonyuol ma Jokristo en neno ka ibatiso nyathigi. Nyaminwa moro miluongo ni Berenice ma nyithinde ang’wen nobatis kapok gichopo higni 14 wacho kama: “Wachno nomulo chunywa ahinya. Ne wamor ni nyithindwa ne dwa tiyo ne Jehova. Kata kamano, ne wang’eyo ni gidhi romo gi pek mang’eny nyime nikech pod ne gin rowere.” Profesa moro molony e somo pach nyithindo wacho kama: “Hignigo ok nyis ni nyithindo koro ‘wigi richo’ kata ni ‘pachgi pod tin.’ Gin kinde ma ginyalo hero kata sin gi gimoro, manyo kinde mag bedo gi osiepe, kendo chako bedo molony e gik mopogore opogore.” E kinde ma nyithindi gin rowere, ginyalo mako osiep gi Jehova, ginyalo keto chenro mar tiyone kendo luwo chenrono. E wi mano ginyalo kawo okang’ mar chiworene kendo dak ka giluwo chikene. Ginyalo fwenyo ni hignigo gin higni mabeyo ahinya e tiyo ne Nyasaye, mana kaka Yesu notimo. w15 11/15 2:1, 2

Chenro ma Nyasaye oseketo mar bedo gi Pinyruodh Mesia, nyiso maler ni ohero dhano sidang’. Jehova oseketo sirkandno e lwet Wuode, ma bende ohero dhano kendo owinjore bedo jaloch. (Nge. 8:31) Sama ichiero ji 144,000 ma biro locho gi Yesu e polo, gidhi e polo ka ging’eyo gik ma dhano kaloe e ngimagi. (Fwe. 14:1) Wach Pinyruoth e gima duong’ ma Yesu ne puonjo kendo nonyiso jopuonjrene mondo olem ka gikwayo pinyruodhno obi kaachiel gi gueth mobiro kelo. Weche ma nokor e Muma nyiso ni Pinyruodh Nyasaye nochako locho e polo e higa mar 1914 e kinde ma gik ma nyiso ni Kristo nitie nochako nenore. Chakre kindeno, osebed kichoko joma biro locho gi Yesu ma pod nie piny, kaachiel gi ‘oganda mang’ongo’ ma biro tony kiketho piny marachni kendo ibiro rwakgi e piny manyien.—Fwe. 7:9, 13, 14. w15 11/15 3:16, 18

Jaote Johana nowuoyo e wi chuech ma Nyasaye nokwongo chueyo koluonge ni “Wach” kendo ni “chakruok mar chuech Nyasaye.” (Joh. 1:1; Fwe. 3:14) Jehova ne wuoyoga gi Wuode makayo konyise pache kod kaka owinjo e chunye. (Joh. 1:14, 17; Kol. 1:15) Jaote Paulo nowacho ni nitie ‘dhok mag malaike,’ ma chuech mag polo tudorego kendo dhokno nie rang’iny ma malo moloyo dhok ma dhano tiyogo. (1 Kor. 13:1) Jehova ong’eyo maber chuth malaike duto manie polo kod dhano te manie piny. Ji buora nyalo wuoyo kode e lamo e dhok mopogore opogore kendo riat. Owinjoga lamogo duto, to gie sechego bende owuoyo gi malaikene manie polo konyisogi gik monego gitim. Mondo otim mago duto, pache, dhok motiyogo, kod yo mowuoyogo nie rang’iny ma malo ahinya moloyo mag dhano. (Isa. 55:8, 9) Nenore maler ni sama Jehova dwaro wuoyo gi dhano, oketo wechene e yo mayot ma nyalo miyo dhano owinje. w15 12/15 1:1, 2

E pinje mang’eny, nengo Muma tek kendo ok oyudre mayot, kuom mano yudo ayuda Muma en gueth maduong’ ahinya. Ripot moro ma wuok Rwanda wacho kama: “Kuom kinde malach, thoth joma owetewa ne puonjorego ne ok tim dongruok nikech ne gionge Muma. Ne gionge gi nyalo mar nyiewo Muma ma kanisni ne tiyogo. E wi mano, ne ok gitim dongruok nikech ne ok ginyal winjo tiend ndiko moko e yo maler.” Weche nolokore ka ne New World Translation ochako yudore e dhoggi giwegi. Joot moro ma a Rwanda ma nigi nyithindo ang’wen ma rowere nowacho kama: “Wagoyo erokamano ne Jehova kod jatich mogen kendo mariek kuom miyowa Mumani. Wadhier malich kendo ne waonge gi pesa ma ne wanyalo nyiewogo Muma ne ng’ato ka ng’ato e odwa. To koro ng’ato ka ng’ato kuomwa nigi Mumbe owuon. Mondo wanyis ni waduoko erokamano ne Jehova, wasomoga Muma pile ka pile.” w15 12/15 2:15, 16

Nyalo bedo ni Daudi nondiko wechego e kinde ma Absalom ne dwa maye loch gi ang’enge ka koni to ohewore kendo onge gima nonyalo timo ne Absalom. Kata obedo ni Nyasaye noseng’wono ne Daudi richoge, Daudi ne wiye ok owil gi richo ma notimo gi Bath-sheba kod rach ma godhruogno nokelo. (2 Sam. 12:7-14) Kata kamano, ruodhno ne ni gadier ni Nyasaye ne dhi sire e otandane mar midekre. Daudi ok nolemo kokwayo ni Nyasaye ochange e yor hono. Weche molworo gima Daudi nowacho, nyiso ni nokwayo mondo Jehova okonye mana kaka Jehova ne konyo ng’at ma dewo jochan. Mano noriwo miye teko ka en e ‘otanda mar midekre.’ (Zab. 41:3) Nikech nosewene Daudi richone, nonyalo kwayo Nyasaye ohoye, osire, kendo ni nyalo ma del nigo mar chango kende okonye mondo ochangi. (Zab. 103:3) Wan be wanyalo timo kamano. w15 12/15 4:8, 9

Kuom joma osegwel gi Nyasaye e yo makende kamano, onge gimachielo ma dwarore ni obednegi janeno ni owalgi. Onge ng’at machielo monego okonygi nono ka be gima otimorenegino en adier. Sama Jehova gwelogi, ok owegi gi kiawa moro amora e pachgi kata e chunygi. Jaote Johana nyiso Jokristo mowalgo niya: “Ng’at malerno osewirou kendo uduto un gi ng’eyo.” Omedo wacho kama: “To un, wir ma ne owirougo siko kuomu, kendo ok onego obed ni ng’ato ang’ata puonjou; to wir moa kuome puonjou gik moko duto, kendo en adier to ok en miriambo. Mana kaka roho osepuonjou, sikuru e winjruok achiel kod jalo.” (1 Joh. 2:20, 27) Joma owalgi ipuonjo gi Jehova mana kaka jomamoko bende. Kata kamano, onge dhano moro amora monego onyisgi ni owalgi adier. Jehova osetiyo gi rohone ma e teko maduong’ie mogik e piny gi polo e nyisogi ni adier owalgi! w16.01 3:9, 10

Mondo wabed joma gik ma wan-go romowa, nyaka wagen Jehova. Mano miyo wabedo gi paro mowinjore e wi gige ringruok. (1 Tim. 6:6-8) Bende, okonyowa ng’eyo ni winjruok ma wan-go gi Jehova kod Jokristo wetewa duong’ moloyo gimoro amora ma pesa nyalo nyiewo. Ng’at ma gik ma en-go oromo ok bi ng’ur, kata manyo ketho kuom jomoko; to bende ok obi bedo gi nyiego kata gi ich lach, ma gin kido ma nyalo ketho hera manie kind owete. Kar mano, bedo joma gik ma wan-go oromo biro chwalowa wabed jochiwo. (1 Tim. 6:17-19) Bende, geno Jehova miyo wabedo gi chir kata bed ni waromo gi pek ma chalo nade. (Hib. 13:6) Chirni miyo wabedo gi paro mowinjore, wagerre, kendo hoyo Jokristo wetewa. (1 The. 5:14, 15) Kata mana e kinde ma weche nobedie matek miwuoro e kinde masira maduong’, wabiro ‘chung’ tir kendo ting’o wiwa malo,’ ka wang’eyo ni resruokwa okayo machiegni.—Luka 21:25-28. w16.01 1:16, 17

Kuom higni matin mosekalo, waseneno ka kwan joma chamo makate kendo madho divai e Rapar mar tho Kristo siko medore ameda. Medruokno osebedo kopogore ahinya gi kwan ma nosebedo ka dok chien higni pieche mokalo. Be medruokno onego ochand chunywa? Ooyo. We wane ane weche moko madongo monego waket e paro. Joma kwanoga joma obiro e Rapar, ok nyal ng’ado bura gadier ni en ng’awa ma nigi geno mar dhi e polo. Kwan mar joma chamo makate kendo madho divai oriwo kwan mar joma paro apara e yo ma ok owinjore ni owalgi. Moko kuom joma ne chamoga makate kendo madho divai e Rapar tinde oseweyo timo kamano. Nyalo bedo ni nitie jomoko ma tuoche ma chocho obwongo kod parruok mokalo tong’ nowilo pachgi ma gichako paro ni gibiro locho gi Kristo e polo. Omiyo, kwan mar joma chamo makate kendo madho divai ok nyis kwan makare mar joma owal ma pod odong’ e piny. Muma ok wachi ni gin ji adi ma biro yudo ka pod nitie e kinde ma masira maduong’ chakore w16.01 4:12-14