Oktoba

Waduto wanyalo miyo chokruogewa obed mamit ka wawer kanyachiel kendo chiwo paro moik maber. Nitie joma luor-luorga wer kama ji nitie kata chiwo paro e lela. Dibed ni in achiel kuom joma kamago? Ka en kamano, inyalo yudo ber mathoth kinono gik ma jomamoko osetimo mondo gilo luoro ma gin-go. Nitie joma oseyudo ni wer gi chunygi duto osekonyo ahinya. Sama wawero wendewa mag Pinyruoth, gombowa maduong’ onego obed pako Jehova. Nikech mano, ikriga maber ne wer sama pok idhi e chokruok mana kaka itimoga gi migepe mamoko. Tem fwenyo kaka weche motigo otudore gi wach ma idhi wuoye e chokruok. Bende, ket pachi kuom weche mag wer kar keto pachi kuom kaka iwer. Chiwo paro ok en gima yotga ahinya ne jomoko. En ang’o ma nyalo konyi? Tem chiwo paro nyading’eny. Par ni en gima kare chiwo paro machuok, mayot, kendo ma dwoko penjo achiel kachiel. Jehova winjoga maber sama oneno ka watimo duto mwanyalo mondo wapake e chokruok. w22.04 7-8 ¶12-15

Wach motigo e ndikoni ni “jakonyna,” nyiso ng’at ma ringo mondo odhi ores ng’at ma ywak ka kwayo kony. Tem ane goyo picha e pachi kendo ine kaka Jehova ringo kodhi reso ng’at manie chandruok. En adier ni ibiro yie ni wachno nyiso kaka Jehova oikore bedo Jakonywa kendo ogombo timo kamano. Ka Jehova ni kodwa, wanyalo nano e bwo tembe ka wamor. Gin yore mage ma Jehova tiyogo mondo okonywa? Bug Isaya dwoko penjono. Nikech ang’o? En nikech thoth weche ma Isaya nokoro timore e ngima Jokristo ma kindegi. E wi mano, Isaya ne wuoyoga e wi Jehova kotiyo gi weche ma wanyalo winjo e yo mayot. Kuom ranyisi, wanon ane Isaya sula mar 30. E sulano, Isaya tiyo gi ranyisi moko ma yot winjo e lero kaka Jehova konyowa. Owacho ni okonyowa kuom (1) chikonwa ite kendo dwoko lamowa, (2) tayowa, kod (3) miyowa gueth e kindegi kendo e kinde mabiro. w22.11 8 ¶2-3

E weche ma Yesu nonyiso kanyakla ma ne ni Smurna kod Filadelfia, nonyiso Jokristo ma ne ni e kanyaklago ni kik giluor sand, nikech ka gichung’ motegno to Jehova ne dhi guedhogi. (Fwe. 3:10) Nyaka wang’e ni wabiro yudo sand, kendo nyaka waikre nano. (Mat. 24:9, 13; 2 Kor. 12:10) Bug Fweny nyisowa ni ne idhi sand jotich Nyasaye e kindewagi, tiende ni “e odiechieng Ruoth.” (Fwe. 1:10) Fweny sula mar 12 wacho ni lweny nomuoch e polo mapiyo bang’ ka nosenyuol Pinyruodh Nyasaye. Mikael ma en Yesu Kristo kod malaikene, nokedo gi Satan kod jochiendene. (Fwe. 12:7, 8) Yesu kod malaikene noloyo jowasik Nyasayego kendo ne giwitogi e piny kae, to mano osemiyo Satan gi jochiendene okelo chandruoge mang’eny ne joma odak e piny.​—Fwe. 12:9, 12. w22.05 5 ¶12-13

Kinde duto Jehova ng’adoga bura e yo makare. Ok obuon-ga ng’ato ang’ata. Sama oyiero ka be obiro weyo ne ng’ato kethone, ok ong’iga kaka ng’atno chalo, mwandu ma en-go, humbe, kod lony moko ma en-go. (1 Sa. 16:7; Jak. 2:1-4) Onge ng’ama nyalo chuno Jehova kata miye asoya mondo owe ne ng’ato richone. Ok ong’ad bura nikech ich-wang’. (Wuok 34:7) Kuom adier, Jehova ng’adoga bura maberie mogik nikech ong’eyo gimoro amora kuomwa. (Rap. 32:4) Joma nondiko Ndiko mag Dho-Hibrania nong’eyo ni yo ma Jehova weyonego ji richogi opogore ahinya gi yo ma dhano nyalo weyonego jowetegi kethogi. Buk moro nolero ni jondikogo ne tiyoga gi wach moro e dho Hibrania, “mitiyogago kiwuoyo kuom yo ma Nyasaye kende e ma weyonegago joricho kethogi, kendo en wach ma ok nyal tigo kiwuoyo kuom yo ma dhano morem nyalo weyonego dhano wadgi richone.” Jehova kende e ma nyalo weyo ne jaricho kethone chuth. w22.06 4 ¶10-11

Ka po ni in janyuol achiel, kendo itemo matek mondo ikony nyithindi oher Jehova, kata, ka po ni jaodi ok en Janeno, bed gadier ni ranyisi maber miketo jiwo nyithindi kod Jokristo weteni bende. To nade ka nyathini ok dew kinda mitimo mondo ikonye hero Jehova? Par ni tiego nyathi en gima kawoga kinde. Sama wachwoyo kodhi e lowo, samoro wanyalo penjore ka be obiro dongo mi onyag olemo. Kata obedo ni ok inyal chiko kaka kodhino biro dongo, pod ibiro dhi nyime olone pi mondo okonye dongo maber. (Mar. 4:26-29) E yo ma chalo kamano, kaka miyo, samoro in bende inyalo parori ka be ichopo e chuny nyithindi sama ipuonjogi weche Nyasaye. En adier ni ok inyal chuno nyithindi mondo otim yiero midwaro. Kata kamano, kitimo duto minyalo mondo ipuonjgi, mano biro miyogi thuolo maber mar hero Jehova. w22.04 19-20 ¶16-17

Kinde ma ne Solomon pod lamo Jehova, ne en gi paro makare kuome owuon. Ka ne pod en rawera, nong’eyo kuonde ma noremie, kendo nokwayo Jehova mondo otaye. (1 Ru. 3:7-9) Ka nochako locho, nong’eyo kaka sunga nyalo kelo ne ng’ato hinyruok. Gima lit en ni e higni ma bang’e, Solomon ne ok oluwo puonj ma nondikono. Ka ne pod olocho, sunga nomake mochako chayo chike Nyasaye. Kuom ranyisi, achiel kuom chike ma nomi ruodhi mag Israel ne wacho ni ruoth “kik okend mon mang’eny, nimar ginyalo loko chunye.” (Rap. 17:17) Solomon ne ok oluwo chikno. Nokendo mon 700 kod mamoko 300! (1 Ru. 11:1-3) Samoro Solomon ne paro ni wachno ne ok nyal kelone chandruok moro amora. Kata kamano, bang’ kinde, weche ne ok odhine maber nikech ne oweyo Jehova.​—1 Ru. 11:9-13. w22.05 23 ¶12

Nitie yiero moro maduong’ ma dwarore ni dhano duto otim e kindegi. Be gibiro riwo lwedo ratiro ma Jehova Nyasaye nigo mar locho e wi piny gi polo, koso gibiro riwo lwedo Satan Jachien, ma en jasik Nyasaye maduong’? Onge chung’ diere. Yiero ma gitimo e ma biro nyiso ka be gibiro dak nyaka chieng’, kata ooyo. (Mat. 25:31-33, 46) E kinde “masira maduong’,” ibiro ket ne ji alama mar tony, kata alama mar kethruok. (Fwe. 7:14; 14:9-11; Eze. 9:4, 6) Ka po ni iseyiero riwo lwedo loch mar Jehova, mano nyiso ni isetimo yiero makare. Koro in gi thuolo mar konyo jomamoko bende mondo gitim yiero makare. Jehova biro guedho joma riwo lochne lwedo. Kuom mano, dwarore ahinya ni wanon wechego. Timo kamano biro konyowa medo kindawa e tij Jehova. Bende, wanyalo tiyo gi weche mwasepuonjore e konyo jomamoko mondo gitim yiero makare, kendo gimakre gi yierogino. w22.05 15 ¶1-2

Dwarore ni wawinj Jehova, to ok jowasikwa. Ayub nochiko ite maber ka Jehova ne wuoyo kode. Ka ne Nyasaye wuoyo gi Ayub, nochalo ka ng’ama nyise ni, ‘Ang’eyo gik moko duto misekaloe. Iparo ni ok anyal riti?’ Ayub nobolore kendo nomedo goyo erokamano nikech ber mar Jehova. Nowacho kama: “Ita to osewinjo humbi, kata kamano, sani to koro aneni gi wang’a.” (Ayub 42:5) Nenore ni ka ne Ayub owacho wechego, noyudo pod obet e buch kendo, ka dende pod opong’ gi adhonde. To e ma pod Jehova nojiwone kaka nohere kendo nonyise kaka nomor kode. (Ayub 42:7, 8) E kindegi bende, inyalo jarwa kendo ji nyalo timonwa gik ma nyiso ni wan joma nono. Ginyalo ketho nyingwa, kata ginyalo ketho nying riwruogwa. Weche ma notimore ne Ayub puonjowa bende ni Jehova ni gadier ni wabiro siko ka wamakore kode sama waromo gi tembe. w22.06 23-24 ¶15-16

Kata obedo ni joma ni e polo biro kok gi mor bang’ ka oseketh Babulon Maduong’, nitie gima chielo ma bende biro miyogi mor maduong’. (Fwe. 19:1-3) Mano en wach maduong’ ahinya e bug Fweny. Wachno en “kend mar Nyarombo.” Ji duto manie kwan mar 144,000 biro yudo kosedhi e polo ka pok lweny mar Har–​Magedon otugore. Kata kamano, mano ok e kinde ma Nyarombo nokendie. (Fwe. 21:1, 2) Kend mar Nyarombo biro timore bang’ ka lweny mar Har–​Magedon oserumo, kendo ka osegol jowasik Nyasaye duto. (Zab. 45:3, 4, 13-17) Ere kaka kend mar Nyarombo mulo joma ni e kendno? Mana kaka kend riwoga dichwo gi dhako mondo gibed gimoro achiel, e kaka kend mar ranyisino biro riwo Ruoth Yesu Kristo kod ‘miahane,’ tiende ni ji 144,000. Nyasi makendeno e ma nobed chakruok mar sirkal manyien ma biro locho e wi piny kuom higni 1,000.​—Fwe. 20:6. w22.05 17 ¶11-13

Yesu nowacho ni e ndalo mag giko nodhi keto “jatich mogen kendo mariek” mondo ochiw chiemb chuny. (Mat. 24:45) To mano e ma osebedo ka timore. Jaritwa ma en Yesu Kristo osebedo ka tiyo gi grup matin mar Jokristo mowal mondo ochiw chiemb chuny e “kinde mowinjore” ne jotich Nyasaye kaachiel gi joma orwako wach maber. Grubno ok ketrega kaka ruodhi e wi yie mar jomamoko. (2 Kor. 1:24) Kar mano, ging’eyo maler ni Yesu e “ruoth kendo jatend” joge. (Isa. 55:4) Chakre higa mar 1919, jatich mogen osebedo ka loso buge mopogore opogore ma osemiyo joma nyien morwako wach siso mar puonjruok Muma. E higa ma 1921, jatijno nogoyo buk miluongo ni The Harp of God mondo okony joma norwako wach maber ng’eyo puonj mag mise mag Muma. Kaka kinde ne medo kalo, e kaka jatich mogen nomedo nogoyo buge mamoko. En buk mane ma nokonyi ng’eyo Wuonwa manie polo kendo here? w22.07 10 ¶9-10

Jehova e Jachiwo moloyo ji duto. Kata imiye gik mang’eny ma romo nade, obiro miyi gik mang’eny moloyo mago. (Mar. 10:29, 30) Obiro miyi ngima mopong’ gi mor kod gueth, kata mana e piny marachni, to mano en mana chakruok. Inyalo tiyo ne Wuonu ma jahera nyaka chieng’. Hera manie kindi gi Wuonu biro dhi nyime bedo motegno, kendo ibiro dak kuom higni duto ma Jehova biro betie, tiende ni nyaka chieng’. Sama ichiwori ne Jehova mobatisi, iyudo thuolo mar miyo Wuonu gimoro ma jaber ahinya. Jehova osemiyi gik mabeyo duto ma nyalo miyo ibed ma mor. In bende sama isingori ni ibiro tiyone, ng’e ni imiye gima in iwuon e ma inyalo miye. (Ayub 1:8; 41:11; Nge. 27:11) To adier, be nitie yo machielo ma ditigo gi ngimani ma loyo mano? w23.03 6 ¶16-17

E higni ma rawera koro chako bedo ng’ama duong’, gombo mag nindruok medorega ahinya, kendo yot donjo e timbe mag terruok. To mano e gima Satan dwaro. Ang’o ma nyalo konyi siko ka in gi timbe mabeyo? (1 The. 4:3, 4) Sama iwuoyo gi Jehova e lamo, nyise kaka iwinjo e chunyi, kendo kwaye mondo omiyi teko mar timo gik makare. (Mat. 6:13) Par ni Jehova dwaro konyi, to ok ng’adoni bura. (Zab. 103:13, 14) Kik item loyo tembe kendi. Wuo gi jonyuolni e wi gik ma chandi. Ok yotga ahinya wuoyo e wi weche kaka mago, kata kamano, ber timo kamano. Ka isomo Muma kendo paro matut kuom puonj manie iye, biro bedoni mayot timo yiero ma moro Jehova. Ibiro fwenyo ni ok ochuno ni ibed gi chike ma tayi e weche duto, nikech ibiro ng’eyo paro ma Jehova nigo e wi gik moko. w22.08 5 ¶10-12

Wi ot ma Jakristo kawoga mapek ting’ ma en-go mar pidho joode. Ka po ni in wi ot, samoro inyalo bedo maluor ni ok dhi bedoni mayot miyo joodi chiemo kod kar dak. Samoro iluor ni kilalo tiji to ok bi bedoni mayot yudo tich machielo. Kata, samoro iluor timo lokruoge moko e tiji mar andika nikech mano nyalo miyo osachi odog piny. Satan osetiyo gi luoro ma kamago e miyo ji mang’eny oweyo tiyo ne Jehova. Satan dwaroga ni wapar ni Jehova ok dewwa kendo ni ok okonywaga pidho joutewa. Mano nyalo miyo watim gimoro amora mondo warit tijwa mar andika kata ka po ni gik ma watimogo ok luwre gi puonj mag Muma. w22.06 15 ¶5-6

Wang’eyo ni Jehova Nyasachwa en “Nyasaye mang’won kendo ma kecho ji, ma iye ok wang’ piyo, kendo mogundho gi hera mosiko kod adiera.” (Wuok 34:6) Jehova ohero bura makare. (Isa. 61:8) Owinjoga malit ahinya sama oneno kaka wachandore, kendo e kinde moseketo, obiro golonwa chandruoge duto nikech ogombo timo kamano. (Jer. 29:11) Warito gi siso neno ka mano timore! To mano en achiel kuom gik momiyo wahero Jehova ahinya! Wach machielo momiyo wahero adiera en mane? Adiera kelonwaga ber mang’eny. Ne ane ranyisini. Adiera mag Muma oriwo geno ma wan-go mar kinde mabiro. Mana kaka nanga miyoga meli chung’ kar tiende, geno ma wan-go mar Muma nyalo miyo wachung’ motegno sama waromo gi tembe. E ndiko ma kawuono, jaote Paulo ne wuoyo e wi geno ma Jokristo mowal nigo mar dhi e polo. Kata kamano, wechego nyalo konyo bende Jokristo ma nigi geno mar dak e paradiso e piny kae nyaka chieng’. (Joh. 3:16) Kuom adier, puonjruok e wi geno mar dak e piny kae nyaka chieng’ osemiyo wadak e ngima maber. w22.08 14-15 ¶3-5

Hera e mise mar geno madier. Bug 1 Jo-Korintho sula mar 13 wuoyo kuom yore mopogore opogore ma hera nyalo konyowa mondo wagen Jokristo wetewa kata chako genogi kendo. (1 Kor. 13:4-8) Kuom ranyisi, wes mar 4 wacho ni “hera hore mos kendo ong’won.” Jehova horega kodwa kata sama waketho chikene. Omiyo, wan bende wanyalo hore gi owetewa sama giwacho kata timo gimoro mochwanyowa. Wes mar 5 wacho niya: “[Hera] iye ok wang’ piyo. Ok omak tim marach motimne.” Ok dwaher ni wachak kwano gik maricho ma owetewa gi nyiminewa otimonwa ka gima waloso list moro ma wabiro tiyogo e kinde mabiro. Eklesiastes 7:9 nyisowa ni ‘kik wabed joma chwanyore piyo.’ Tem neno oweteni gi nyimineni kaka Jehova nenogi. Jehova oherogi ahinya kendo ok okwan-ga gik maricho ma gitimone. Wan bende ok onego wakwan richogi. (Zab. 130:3) Kar keto pachwa kuom nyawogi, dwarore ni wane kido mabeyo ma gin-go.​—Mat. 7:1-5. w22.09 3-4 ¶6-7

Bug Daniel lero weche moko ma biro timore moluwore e ndalo mag giko. Kuom ranyisi, Daniel 12:1 wacho ni Mikael ma en Yesu Kristo “biro chung’” ka konyo jo Nyasaye. Wach ma nokorno nochako chopo e higa mar 1914 ka noket Yesu mobedo Ruodh Pinyruodh Nyasaye e polo. Kata kamano, Daniel bende nokoro ni Yesu ne dhi “chung’” e “kinde chandruok marach ma pok nobedoe nyaka ne ogendni chakre.” ‘Kinde chandruok marachno’ e ma iluongo bende ni “masira maduong’” e Mathayo 24:21. Yesu biro “chung’,” tiende ni obiro kedo ne jo Nyasaye e giko kinde chandruokno e lweny mar Har–​Magedon. Bug Fweny luongo joma Yesu biro kedonegigo ni ‘oganda mang’ongo ma wuok e masira maduong’.’—Fwe. 7:9, 14. w22.09 21 ¶4-5

Joma nyingegi osendik e bug ngima gie sani, inyalo ruch nyingegi oko. Mano chal ka gima Jehova ndiko nyingego gi pensil. (Fwe. 3:5) Omiyo, nyaka watim kinda mondo nyingewa osik e bugno nyaka chop chieng’ ma ibiro ndik nyingewa gi wino ma ok nyal ruchi. Grup mokwongo mar joma nyingegi ondik e bug ngima gin joma oyier mondo odhi oloch gi Yesu e polo. Ka luwore gi weche ma Paulo nonyiso ‘jotich wetene’ ma ne ni Filipi, nyinge Jokristo mowal ma biro locho gi Yesu e polo osendik e bug ngima sani. (Fil. 4:3) Kata kamano, mondo nyingegi osik kondik e bugno, nyaka gidhi nyime makore gi Jehova. Ibiro ndik nyingegi chuth e bugno ma ok nyal ruchi e kinde mibiro ketnegi alama mogik, bed ni en ka pok githo, kata ka pok masira maduong’ ochakore.​—Fwe. 7:3. w22.09 14 ¶3; 15 ¶5-6

Be ng’ato osegatedonie chiemo moro mihero kae to irikni chame kata ichame ka pachi ni mabor? Nyaka bed ni ne ok iwinjo mit chiemono ahinya. Bang’ chame, samoro nichako paro kaka di ne iwinjo mitne ka di ne ichame mos kendo kiketo pachi e chiemono. E yo ma chalo kamano, kisomo Muma kirikni, inyalo tieko kama isomono ma ok ifwenyo puonj maduong’. Omiyo, sama isomo Wach Nyasaye, kik irikni. Tem mondo somo Muma obedni mamit. Tem goyo picha e pachi kuom gik miwuoyoe, koko man kanyo, kod dwond joma wuoyo, kendo tem paro matut kuom gik misomogo. Kitimo kamano, to ibiro medo bedo mamor. Yesu noketo “jatich mogen kendo mariek” mondo omiwa chiemb chuny e kinde mowinjore, to kuom adier jatijno pidhowaga maber gi Wach Nyasaye. (Mat. 24:45) Jatich mogen kendo mariek tiyoga gi Wach Nyasaye sama oloso chiemb chuny.​—1 The. 2:13. w22.10 8 ¶6-8

Muma nowacho chon ni e ndalo mag giko, joma jaro ji ne dhi bedo mang’eny. (2 Pet. 3:3, 4) Jogo luwo “gombogi giwegi ma ok nyis luoro Nyasaye.” (Juda 7, 17, 18) Ang’o ma nyalo konyowa mondo kik waluw timbe mag joma jaro ji? Yo achiel en bedo mabor gi joma ohero jaro gik makare. (Zab. 1:1) Mano nyiso ni ok onego wachik itwa ne gimoro amora moa kuom joma ong’anyo moweyo adiera kata somo gigegi. Ka ok watang’, wanyalo chako bedo gi chuny mar ng’ur kendo bedo gi kiawa e wi yo ma Jehova tayowago kod yo ma riwruok mare tayowago. Penjo ma luwogi nyalo konyowa nonore: ‘Dibed ni awuoyoga marach e wi puonj moro manyien kata e wi yo manyien mitayowago? Be adichga mana gi manyo ketho kuom joma tayowa?’ Ka watimo mapiyo e rieyo paro kaka mago, Jehova biro bedo mamor kodwa.​—Nge. 3:34, 35. w22.10 20 ¶9-10

Roho maler mar Nyasaye notego Ezekiel mi olando wach ne joma wigi tek kendo ma tokgi tek. Jehova nonyiso Ezekiel niya: “Asemiyo wang’i obedo matek ka maggi, kendo pat wiyi bende obedo matek ka maggi. Asemiyo pat wiyi obed matek ka almasi kendo ka kidi matek. Kik iluorgi kendo kik iluor wengegi nimar gin jo ma wigi tek.” (Eze. 3:8, 9) Ne chalo ka gima Jehova ne nyiso Ezekiel niya: ‘Kik iyie wich teko mar jogo onyos chunyi. Abiro tegi.’ Bang’ mano, roho mar Nyasaye noting’o Ezekiel motere e alwora ma nodhi lendoe. Nondiko niya: “Lwet Jehova ne ni kuoma.” Nokawo janabino juma achiel koparo matut kuom ote ma nodhi landono. (Eze. 3:14, 15) Kae to Jehova nonyise ni odhi e hoho moro, kendo ka nochopo kanyo ‘roho ne obiro kuome.’ (Eze. 3:23, 24) Ezekiel koro noseikore maber ne chako tije mar lendo. w22.11 4 ¶8-9

Janabi Habakuk nokalo e chandruok mang’eny ahinya. Nochopo kama nochako nenore ka gima ne en gi kiawa ka be Jehova ne dewe. Omiyo, nolamo Jehova konyise weche duto ma ne chande. Jehova nodwoko lamo mar jatichne ma nomakore kodeno. (Hab. 2:2, 3) Bang’ paro matut kuom yo ma Jehova resogago joge, Habakuk nochako bedo mamor kendo. Nobedo gadier ni Jehova ne dewe kendo noikore konye nano e chandruok moro amora. (Hab. 3:17-19) Mano puonjowa ang’o? Sama ikalo e chandruok moro, wuo gi Jehova e lamo kinyise kaka iwinjo e chunyi. Kae to gen kuome mondo okonyi. Kitimo kamano, inyalo bedo gadier chuth ni Jehova biro miyi teko mar nano. To sama ineno gi wang’i kaka okonyi, yie ma in-go kuome biro medo bedo motegno. In bende, kimakori gi chenroni mar timo gik motudore gi lamo Jehova, chandruoge kod kiawa moko ma samoro inyalo bedogo ok bi pogi gi Jehova.​—1 Tim. 6:6-8. w22.11 15 ¶6-7

Yesu gi jo mahundu moko ariyo ma nogur e bathe ne winjo rem malit ahinya kendo ne gichiegni tho. (Luka 23:32, 33) Jo mahundugo nosebedo ka jaro Yesu. (Mat. 27:44; Mar. 15:32) Kata kamano, achiel kuomgi noloko chunye. Nowacho niya: “Yesu, iparae e kinde midonjo e Pinyruodhi.” Yesu nodwoke kotiyo gi weche ma yudore e ndiko ma kawuono. (Luka 23:39-42) Weche ma Yesu nonyiso ja mahunduno onego omi wapar matut e wi kaka Paradiso biro chalo. Nitie gik ma wanyalo puonjore e wi Paradiso ka waparo matut e wi loch Solomon ma en loch ma ne nigi kuwe ahinya. Bende, wanyalo geno ni Yesu ma e ng’at maduong’ moloyo Solomon, biro tiyo kanyachiel gi joma obiro lochogo mondo gimi piny obed Paradiso ma jaber. (Mat. 12:42) Kuom mano, ber ka “rombe mamoko” ong’eyo gik monego gitim mondo gibi gidag nyaka chieng’ e Paradiso.​—Joh. 10:16. w22.12 8 ¶1; 9 ¶4

Isaya konyowa bedo gadier ni Jehova biro chikonwa ite sama waluonge mondo okonywa kendo ni obiro dwoko kwayowa mapiyo. Isaya medo wacho kama: “Obiro dwoki mapiyo kikwaye gimoro.” Wechego miyo wabedo gadier ni Jehova Wuonwa oikore reso joma kwaye kony kendo ogombo timo kamano. Ng’eyo wachno konyowa nano ka wamor. Jehova chikoga ite ne lamo mar ng’ato ka ng’ato kuomwa. Ang’o momiyo wawacho kamano? E weche mochakgo Isaya sula mar 30, Jehova wuoyo gi Jo-Israel kaka oganda. Kata kamano, weche motigo e wes mar 19 nyiso ni owuoyo gi ng’ato ka ng’ato kuomwa. Isaya nondiko kama: “Ok ibi ywak”; “obiro kechi”; “obiro dwoki.” Wuonwa ma jahera dewowa kendo ochikonwa ite.​—Zab. 116:1; Isa. 57:15. w22.11 9 ¶5-6

Tij yalo kod puonjo miyowa mor kod kuwe kata bed ni ikwedowa. E kinde Jokristo mokwongo, ka ne Jo-Yahudi ogolo chik ni joote kik yal wach maber, ne giwacho ni ne gidhi mana winjo Nyasaye kende. Ne gidhi nyime gi tij lendo kendo mano momiyo gibedo mamor ahinya. (Tich 5:27-29, 41, 42) En adier ni sama ogo tijwa marfuk kata nitie chike moko ma monowa lamo Jehova ka wan thuolo, nyaka wabed motang’ ahinya sama walendo. To ka watimo duto ma wanyalo, wabiro bedo gi kuwe e chunywa nikech wang’eyo ni wamoro Jehova kendo wanyiso ji wach maber ma nyalo reso ngimagi. Bed gadier chuth ni kata sama wakalo e weche matek, pod wanyalo dhi nyime bedo gi kuwe. E seche kaka mago, onego wapar kinde duto ni kuwe ma wadwaro en kuwe ma Jehova kende e ma chiwo. Gen kuome chuth sama tuo moro ma landore omuoch, sama masira moro otimore apoya, kata sama isandowa. Makri motegno gi riwruok mar ogandane. Ket pachi kuom ngima maber ma biro. Sama itimo kamano, ‘Nyasach kuwe nobed kodi.’—Fil. 4:9. w22.12 21 ¶17-18

Timo kamano dwaro kinda. Dwarore ni watim kinda mondo walo kido kaka ich-wang’ kod mirima. (Efe. 4:31, 32) Ang’o momiyo nyalo bedo matek weyo timbe kaka mago? En nikech nyalo bedo ni timbego ogurore e chunywa ahinya. Kuom ranyisi, Muma wacho ni nitie jo “mirima” kendo ma igi “siko wang’.” (Nge. 29:22) Nyalo dwarore ni wadhi nyime timo kinda mondo walo kido maricho mosegurore e chunywa kata mana bang’ kosebatiswa. (Rumi 7:21-23) Lam Jehova kikwaye mondo okonyi kedo gi kido maricho, kendo bed gadier ni obiro winjo kwayoni. (1 Joh. 5:14, 15) Kata obedo ni Jehova ok bi goloni kido marichogo e yor hono, onyalo miyi teko mar kedo gi kidogo ma ilogi. (1 Pet. 5:10) Bende, tim ka luwore gi kwayoni kuom bedo mabor gi gik ma nyalo miyo ichak rwako kit dhano machon. E wi mago, kik iwe pachi oged e gombo maricho.​—Fil. 4:8; Kol. 3:2. w23.01 10 ¶7, 9-10

Yo achiel ma wanyisogo ni wahero jomoko en kuom bedo gi kinda e tij lendo. Walendo ne ng’ato ang’ata ma waromogo. Ok wabuon ng’ato ang’ata nikech oganda moae, rangi mar pien dende, dhok mowacho, pesa ma en-go, tich motimo, kata sombe. Sama walendo ne ji duto ma ok wabuon-gi, watimo ka luwore gi dwach Jehova ma en ni “ji duto oresi, kendo gibed gi ng’eyo malong’o chuth e wi adiera.” (1 Tim. 2:4) Wanyiso bende ni wahero Nyasaye kod Kristo kuom hero owetewa gi nyiminewa. Wadewogi kendo wakonyogiga sama gikalo e tembe. Wahoyogi sama gilalo osiepegi e tho, walimogi sama gituore, kendo watimo duto ma wanyalo mondo wajiwgi sama chunygi onyosore. (2 Kor. 1:3-7; 1 The. 5:11, 14) Walemonegi ka wang’eyo maber ni “kwayo mar ng’at makare nigi teko.”—Jak. 5:16. w23.01 28-29 ¶7-8

Mana kaka fundi medoga lony ma en-go e gedo kinde ka kinde, e kaka wan bende wanyalo medo lony e gero Jokristo wetewa. Wanyalo tegogi mondo ginan e tembe kuom nyisogi ranyisi mag joma osenano e tembe. (Hib. 11:32-35; 12:1) Wanyalo jiwo kuwe e kindwa kuom wuoyo e wi kido mabeyo ma jowetewa nigo, temo mondo wagol gimoro amora ma nyalo ketho kuwe, kendo loso weche sama nitie pogruok e kindwa gi jowetewa. (Efe. 4:3) Bende, wanyalo dhi nyime gero yie mag owetewa gi nyiminewa kuom wuoyo kodgi e wi adiera manie Muma, konyogi sama gichandore, kendo jiwo moko kuomgi ma yiegi osedok chien. Wanyalo winjo ka wan gi mor madier sama wakonyo e gero owete gi nyimine ma wan-go e kanyakla. Mopogore gi ute masie ma wagero ma bang’e nyalo ti ma mukre, ber ma betie sama wagero Jokristo wetewa to nyalo siko nyaka chieng’! w22.08 21 ¶6; 25 ¶17-18

Yesu nowacho kido moro maduong’ ma dwarore ni wabedgo ka wadwaro winjo tiend weche ma wasomo e Wach Nyasaye. Kidono en rieko. (Mat. 24:15) Rieko en ang’o? En nyalo mar neno kaka weche otudore kod kaka gipogore, kendo fwenyo nyaka puonj moko mopondo. E wi mano, mana kaka Yesu nowacho, rieko biro konyowa fwenyo kaka gik ma timore chopo weche ma nokor. Bende, rieko biro konyowa yudo ber chuth sama wasomo Muma. Jehova e ma miyoga jotichne rieko. Omiyo, kwaye e lamo mondo omiyi rieko. Tim ka luwore gi kwayoni. Non adimba gik misesomo kae to ine kaka gitudore gi weche ming’eyo. Non tiend weche misomo e Muma kendo ne yore minyalo tiyogo gi wechego e ngimani. (Hib. 5:14) Sama isomo ka in gi rieko, weche misomo e Ndiko biro medo donjoni maber. w23.02 10 ¶7-8

Tem ane paro ni osiepni moro omiyi mich ma jaber, molos gi kidi mopa maber. Michno osebudho, kata kamano, nengone to pod duong’. Rangine osechako ruchore, en gi nyal, to kuonde moko be osebarore. Kata obedo ni ochal kamano, pod inyalo use pesa mang’eny. Kuom adier, ibiro geno michno kendo rite maber. E yo ma chalo kamano, wan bende nitie mich moro maber ahinya ma Jehova osemiyowa. En mich mar ngima. Kiwacho awacha adier, Jehova osenyiso ni oneno ngimawa kaka gima duong’ kuom chiwo Wuode mondo othonwa. (Joh. 3:16) Jehova e Soko mar ngima. (Zab. 36:9) Jaote Paulo noyie gi wachno. Nowacho kama: “Kokalo kuome wangima, wawuotho, kendo wantiere.” (Tich 17:25, 28) Mano e momiyo wanyalo wacho ni ngima en mich moa kuom Nyasaye. Nikech oherowa, omiyowa gik ma wadwaro mondo wasik ka wangima. (Tich 14:15-17) Kata kamano, Jehova ok rit ngimawa e yor hono. Kar mano, odwaro ni watim duto ma wanyalo mondo warit ngimawa e yor ringruok kod e yor chuny.​—2 Kor. 7:1. w23.02 20 ¶1-2

Wamor ahinya ni Jehova nomiyowa Muma ma en Wachne. Nyasaye miyowa paro moko mabeyo e Muma ma nyalo konyowa nyagore gi chandruoge ma waromogo e kindegi. Bende, omiyowa geno ma jaber mar kinde mabiro. To moloyo duto, osetiyo gi Muma mondo okonywa ng’eyo kido mabeyo ma en-go. Sama waparo matut kuom kido mabeyogo, chunywa pong’ga gi ilo kod mor kendo wabedo machiegni gi Nyasachwa kaka osiepene.(Zab. 25:14) Jehova dwaro ni ji ong’eye. E kinde machon, notiyo gi yore mopogore opogore mondo omi ji ong’eye. Notiyo gi lek, fweny, kod malaike. (Kwan 12:6; Tich 10:3, 4) Kata kamano, be ji ne nyalo puonjore kuom lek, fweny, kata ote ma nomiyo malaike ka po ni ne ok ondikgi kamoro? Mano e momiyo Jehova notiyo gi dhano mondo ‘ondik weche duto’ ma nodwaro ni wang’e “e buk.” Nikech “yor Nyasaye madier en yo makare chuth,” wanyalo bedo gadier ni joma ne Nyasaye otiyogo mondo ondik Muma, nondike e yo makare kendo ma nyalo konyowa.​—Zab. 18:30. w23.02 2 ¶1-2

Ket chenro ma nyalo konyi. Ket chenro ma nyalo tego yieni kendo konyi bedo Jakristo motegno. (Efe. 3:16) Kuom ranyisi, inyalo keto chenro mar timo puonjruok ma mari iwuon kod somo Muma pile. (Zab. 1:2, 3) Kata, inyalo medo kinda e lemo pile, kendo timo kamano koa e chunyi. Samoro nyalo dwarore ni imed bedo gi ritruok e yoreni mag manyo mor kod kaka itiyo gi thuoloni. (Efe. 5:15, 16) Konyo jomamoko bende biro konyi timo dongruok mondo ibed Jakristo motegno. Kuom ranyisi, inyalo keto chenro mar konyo jo kanyaklau ma hikgi oniang’ kod ma tuore. Inyalo konyogi e tije kaka dhinegi e chiro, kata inyalo konyogi ng’eyo tiyo gi simbegi ma nyasani kod tabledegi. Bende, inyalo nyiso ni ihero dhano weteni kuom landonegi wach maber mar Pinyruoth. (Mat. 9:36, 37) To ka po ni nyalore, ket chenro mar tiyo ne Jehova kuom thuoloni duto. w22.08 6 ¶16-17