Wan e Kinde mag Chandruok

MUMA nokoro ni dhano ne dhi bedo gi “kinde mag chandruok.” Onyiso ni kindegi e “ndalo mag giko.” (2 Timotheo 3:1-5; 2 Petro 3:3-7) Yesu Kristo bende nowuoyo kuom kindego, kane odwoko penjo moro ma jopuonjrene ne openje kuom wach “giko mar ndalo.” (Mathayo 24:3) Be sani wadak e ndalo mar gikono? Pim ane gima Muma nokoro kod gima ripode masani, mondik piny kae wacho, mondo ine in iwuon.

Gima Muma nokoro: lwenje e piny mangima​—Luka 21:10; Fweny 6:4.

Gima ripode masani wacho: “Kwan jo mosetho nikech lwenje kuom higini 100 mosekalo, oloyo nyadidek kwan joma ne otho e lwenje duto ma ne ogo kuom higini 1,900 chakre nyuol Kristo.”​—Worldwatch Institute.

Gima Muma nokoro: nok mar chiemo kod tuoche​—Luka 21:11; Fweny 6:5-8.

Gima ripode masani wacho: E higa 2004, ne oyud ni dhano milion 863 e piny mangima, ok yud chiemo moromo, to kwanno oloyo kwan ma ne ochiw e higa 2003 gi milion 7.​—United Nations Food and Agriculture Organization.

Dhano madirom bilion 1 odak kuonde ma udi richoe, to chiegni dhano bilion 2 gi nus, odak kuonde molil maonge choche koda kuonde wito yugi; to chiegni dhano bilion 1 ok yud pi maler mar modho.​—Worldwatch Institute.

E higa 2005, malaria nomako ji milion 500; ji milion 40 ne nigi kute mag Ayaki, kendo tuwo mar kahera (TB ) ne onego ji mokalo milion 1 gi nus.​—World Health Organization.

Gima Muma nokoro: ketho piny​—Fweny 11:18.

Gima ripode masani wacho: “Gik ma dhano timo, osemiyo piny obedo kama kit le mang’eny koda yien nyalo rumo, mi gilal chuth e wang’ piny.” “Chiegni gik mang’eny masiro ngima e piny, dok chien.”​—Millennium Ecosystem Assessment.

“Muya moting’o sum mawuok kuom gik ma dhano tiyogo, oseketho Piny ahinya mochopo kama piny chiegni kethore chuth.”⁠—NASA, Goddard Institute for Space Studies.

Gima Muma nokoro: wach maber mar Pinyruodh Nyasaye ibiro landi e piny mangima​—Mathayo 24:14; Fweny 14:6, 7.

Gima ripode masani wacho: E higa 2007, Joneno mag Jehova maromo 6,957,854, notiyo gi seche machiegni bilion 1 gi nus, e lando wach maber mar Pinyruodh Nyasaye e pinje 236.​—Kitabu cha Mwaka cha Mashahidi wa Yehova​—2008.

Mana kaka onyis malo, Muma nokoro ni sama gik maricho ma ne okorgo dhi nyime, nitie gima ne dhi miyo dhano obed gi geno. Yesu nowuoyo kuom ‘wach maber’ mar Pinyruodh Nyasaye. Pinyruodh Nyasaye en ang’o? Ang’o momiyo wachno chiwo geno ne dhano kuom kinde mabiro? To Pinyruodh Nyasaye biro mulo ngimani iwuon nade?

[Weche manie ite 5]

Muma nokoro gik ma waneno e piny sani