Magi Duto Nyiso Ang’o?
YESU KRISTO nowacho ni: “Giko mar ndalo” ne dhi ng’ere ratiro gi lwenje, nok mar chiemo, tuoche malandore kod yiengni mag piny.—Mathayo 24:1-8; Luka 21:10, 11.
Chakre higa mar 1914, ngima osekethore nikech wach lwenje e kind pinje, e kind ogendini, to thothgi timore nikech jotend dinde donjore gi weche mag siasa, kendo gie sani lwenje bedoe nikech timbe mag mahundu osemedore ahinya.
Kata obedo ni dongruok osebetie e nyago chiemo kitiyo gi yore mag sayans, pod dhano tara gi tara e piny mangima chandore ni wach nok mar chiemo. Higa ka higa, dhano tara tho nikech nok mar chiemo.
Tuoche malandore bende en achiel kuom ranyis ma Yesu ne ochiwo. Bang’ Lweny Mokwongo mar Piny, tuwo marach miluongo ni influenza ne onego dhano mokalo 21,000,000. Mopogore gi tuoche mamoko ma ne mako dhano e kinde mokalo, tuwoni ne okwako pinje te nyaka kuonde chulini duto. Sani AYAKI yweyo ji e piny, kendo tuoche moko maricho malandore kamako ji kaka kahera [TB], malaria, taifod, koda kolera dhi nyime gi mako ji e pinje modhier.
Ripode wacho ni yiengni mopogore opogore mag piny timore mang’eny e okang’ mopogore higa ka higa. Kata obedo ni nitie dongruok kuom yore ma itiyo godo e chiwo ripode mag yiengini piny ma dhi timore, podi masira nwang’o ji kuonde ma dhano odakie mang’eny seche ma yiengni mar piny otimore.
Muma bende ne okoro kama: “Ng’e wachni maler, ni kinde mag chandruok nobi e ndalo mag giko. Ji nobed jo moherore giwegi, kendo jo mohero mwandu, jo ma wuorore, jong’ayi, kendo jojaro; jo ma ok winj jonywolgi, jo ma ok go erokamano, jo ma ok luor Nyasaye; jo ma ok ohero owetegi, jo ma jendeke, jojig wach, jo moowore, jo mager, jo ma ok ohero gik mabeyo; joandhoga, jorikni, josunga, kendo jo mohero mor mar piny moloyo hero Nyasaye. Kitgi maoko nenore ka jo moluoro Nyasaye, to ngimagi odagi tekone. Aye kuom jo ma kamago.”—2 Timotheo 3:1-5.
Donge iyie ni wadak “e kinde mag chandruok”?
Be iseneno kaka ji oherore giwegi, ohero pesa, kendo kaka gin jong’ayi ahinya?
En ng’a manyalo wacho ni piny ok opong’ gi joma oherore giwegi, ma ok go erokamano, ma ok ohero gik mabeyo, joma ok oluoro Nyasaye?
Be ing’eyo ni chayo jonyuol kaachiel gi bedo maonge hera en gima osemedore e okang’ mamalo ahinya, ok mana kuonde moko matin kende, to e piny mangima?
Onge kiawa ni sani isefwenyo ni wadak e piny ma dhano omer gi manyo raha to ok gihero gik mabeyo. Kamano e kaka Muma wuoyo kuom kido ma dhano ne dhi bedogo “e ndalo mag giko.”
Ang’o kendo manyalo dwarore mondo ong’ere ni wadak e kinde mag giko? Yesu bende ne okoro ni e ndalo mag giko, wach maber mar Pinyruodh Nyasaye ne idhi landi e piny duto ma dhano odakie. (Mathayo 24:14) Be mano timore?
Mnara wa Mlinzi, ma en gaset malero puonj manie Muma oyangi ne lando wach maber mar Pinyruodh Jehova, kendo owuok kinde ka kinde to igoye e dhok mang’eny moloyo gasede mamoko duto.
Higa ka higa, ng’ato ka ng’ato kuom Joneno mag Jehova chiwore ka gitiyo gi seche mokalo bilion achiel e lando ne jomoko wach maber mar Pinyruodh Nyasaye.
Buge gi gasede malero puonj manie Muma sani igoyo e dhok mopogore opogore mokalo 400, moriwo kata mana dhok miwacho gi ogendini matindo tindo modak e tung’ piny duto. Joneno mag Jehova osekowo wach maber ne pinje duto; bende giselendo kuonde chulini gi pinje matindo ma ji mathoth ok ong’eyo. Gin gi chenro mag puonjo ji Muma pile ka pile ma gitimo e pinje mang’eny.
Kuom adier, wach maber mar Pinyruodh Nyasaye ilando e piny duto ma dhano odakie, ok ni mondo piny mangima olokre, to mondo ochiw negi neno. Imiyo dhano duto kamoro amora ma gintie thuolo mar nyiso kabe gidewo ni en ng’ano ma ne ochweyo polo gi piny, kendo kabe gibiro miyo chikene luor kendo nyiso hera ne dhano wetegi.—Luka 10:25-27; Fweny 4:11.
E kinde mokayo machiegni, Pinyruodh Nyasaye biro yweyo kendo golo oko richo duto e piny, mi piny mangima bed paradis.—Luka 23:43.
[Sanduk manie ite mar 6]
En Ndalo Giko mar Ang’o?
Ok en ndalo giko mar ngima dhano. Kuom jogo matimo dwaro mar Nyasaye, Muma chiwo negi geno mar dak nyaka chieng’.—Johana 3:16, 36; 1 Johana 2:17.
Ok en ndalo giko mar piny ma wadakieni. Wach Nyasaye singo ni piny ma dhano odakieni biro siko nyaka chieng’.—Zaburi 37:29; 104:5; Isaiah 45:18.
Mopogore gi mago, magi gin ndalo giko mar piny ma gin jo ma onge hera, mopong’ gi timbe gero, kendo giko mar jogo ma podi omoko e yore maricho mag pinyni.—Ngeche 2:21, 22.
[Sanduk/Picha manie ite mar 7]
Be Muma en Wach Nyasaye Kuom Adier?
Jonabi mag Muma ne ondiko nyadinwoya ni: “Jehova owacho kama.” (Isaiah 43:14; Yeremia 2:2) Kata mana Yesu Kristo Wuod Nyasaye ne ojiwo ni ‘ok ne owach weche mowuok kuome owuon.’ (Johana 14:10) Muma wuon wacho maler ni: ‘Ndiko duto owuok kuom much Nyasaye.’—2 Timotheo 3:16.
Onge buk moro machielo ma osego e dhok mang’eny kaka Muma—dhok mokalo 2,200 kaluwore gi ripot ma ne ochiw gi riwruok miluongo ni United Bible Societies. Onge buk moro machielo ma osepogi kuonde mang’eny kaka Muma—sani chiegni Muma mokalo bilion ang’wen. Donge mano e gima digen neno kuom buk moting’o ote mawuok kuom Nyasaye ne dhano duto?
Mondo iyud weche mamoko mang’eny manyiso gimomiyo Muma en buk mondiki kuom much Nyasaye, ne buk miluongo ni Biblia—Neno la Mungu au la Binadamu?, ma ogo gi Joneno mag Jehova.
Ka isomo Muma gi chuny manyiso erokamano, king’eyo ni kuom adier en Wach Nyasaye, ibiro yudo gweth mogundho.
[Sanduk/Picha manie ite mar 8]
Pinyruodh Nyasaye en Ang’o?
En sirkal ma kende ma Jehova Nyasaye madier, ma e Jachwech polo gi piny osechungo.—Yeremia 10:10, 12.
Muma nyiso maler ni Yesu Kristo e jal ma Nyasaye omiyo teko mar locho e wi sirkandno. (Fweny 11:15) Kane en e piny, Yesu ne onyiso ni en gi teko mowuok kuom Nyasaye—teko ma ne omiyo obedo gi nyalo e wi kit yamo gi nam, nyalo mar thiedho tuoche duto te, kata mana nyalo mar chiero jo motho. (Mathayo 9:2-8; Mariko 4:37-41; Johana 11:11-44) Weche ma ne okor ei Muma kuom much Nyasaye bende wacho ni Nyasaye ne dhi miyo Yesu “loch gi duong’ kod piny ruoth, ni mondo ogendini duto gi libembini kod ji ma dhogi yore, gitine.” (Daniel 7:13, 14) Sirkandno iluongo ni Pinyruodh polo; sani Yesu Kristo locho ka en e polo.
[Piche manie ite mar 7]
Global preaching of the good news