Wach Maber ma Gidwaro ni Mondo Iwinj
YESU kane ni e piny, jopuonjrene ne obiro ire ma gipenje niya: “Ang’o ma nobed ranyis mar biro mari, [bedo mari e loch, NW ] kendo mar giko mar ndalo?” Ne odwokogi ni lwenje nobedie e kind ogendini, kech, tuwoche, yiengni mag piny, richo nomedre, jopuonj din mawuondo ji mang’eny nobedie, ji nomon kod jolupne mag adier kendo nosandgi, to hero timbe makare nodog chien kuom ji mang’eny. Magi kachako timore, ginibed ranyisi mar bedo mar Kristo e loch ma ok ne gi wang’, kendo ni Pinyruodh polo okayo machiegni. Ma ne dhi bedo wach mawendo—wach maber ndi! Kuom mano, Yesu nomedo wechegi e ranyisino: “Kendo Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.”—Mathayo 24:3-14.
Kata obedo ni gik matimore e piny ok beyo, gichiwo ranyisi maber, tiende ni, Kristo osebedo e loch mare. Gik ma owach malo kae, ne ochako nenore ayanga e higa mar 1914! Higano ne nyiso giko mar Kinde mag Ogendini ma ok Jo-Yahudi, kendo chakruok mar loko loch mag dhano, nyaka chopi e Loch Kristo mar Higini Gana Achiel.
Zaburi 110:1, 2 kod Fweny 12:7-12 nyiso ni kinde lokruok ne dhi bedoe. Ndikogo nyiso ni Kristo ne dhi bedo e bat korachwich mar Nyasaye e polo, nyaka chop kinde ma ne idhi kete Ruoth. Bang’e, lweny e polo ne dhi miyo wit Satan e piny, kendo mano ne dhi kelo lit ne piny, to Kristo ne dhi locho e dier wasike. Richo ne dhi rumo chuth ka okalo kuom “masira maduong’,” ma ne dhi gik e lweny mar Har–Magedon, bang’e Loch Kristo mar Higini Gana Achiel mar kuwe ne dhi luwe.—Mathayo 24:21, 33, 34; Fweny 16:14-16.
Muma wacho kama: “To ng’e wachni maler, ni kinde mag chandruok nobi e ndalo mag giko. Ji nobed jo moherore giwegi, kendo jo mohero mwandu, jo ma wuorore, jong’ayi, kendo jojaro; jo ma ok winj jonywolgi, jo ma ok go erokamano, jo ma ok luor Nyasaye; jo ma ok ohero owetegi, jo ma jendeke, jojig wach, jo moowore, jo mager, jo ma ok ohero gik mabeyo; joandhoga, jorikni, josunga, kendo jo mohero mor mar piny moloyo hero Nyasaye. Kitgi maoko nenore ka jo moluoro Nyasaye, to ngimagi odagi tekone. Aye kuom jo ma kamago.”—2 Timotheo 3:1-5.
Jomoko nyalo wacho ni gigi osebedo katimore chakore chon e ngima dhano, kata kamano adiera en ni podi ok ne gitimore e okang’ magitimore sani. Mana kaka josomo osewacho, ngima osebedo mopogore e piny chakore 1914 ka dhi nyime. (Ne ite mar 7.) Masiche osebedo mang’eny moloyo ndalo moko duto ma osekalo. Kata kamano, ka wang’iyo weche moko e ranyisino ma Kristo ne ochiwo mag ndalo giko, nyaka waket wechegi e paro: Tij lando wach mar Pinyruoth kaachiel kod bedo mar Kristo e loch osebedo ka dhi nyime e okang’ mamalo moloyo ndalo duto. Ose sand Joneno mag Jehova moloyo ji mamoko nikech yalo. Ng’enygi ne onegi e kambe mag sando ji mag jo Nazi. Joneno mag Jehova ose go marfuk kuonde moko nyaka chil kawuono, to kuonde moko imakogi, itweyogi, isandogi, kendo inegogi. Magi duto gero ranyisino ma Yesu ne ochiwo.
Kaka ne okor e Fweny 11:18, ‘ogendini osebedo gi mirima’ gi Joneno mag Jehova, kendo mani nyiso ni Jehova owuon biro nyiso ogendinigo “mirimbe.” Ndikoni be wacho ni Nyasaye biro “kethoe jo ma ketho piny.” Ndalowagi ngima e piny osebedo matek moloyo kinde duto ma dhano osedak e piny. To koro, eka omedo kethore! Jo sayans wacho ni ka dhano odhi nyime gi ketho piny, mani dhi miyo piny bed kama ok nyal dakie. Kata kamano, Jehova “nolose mondo ji odagie,” kendo obiro golo oko jogo maketho piny ka podi ok gitieko kethe.—Isaiah 45:18.
GWETH MA PINYRUOTH BIRO KELO E PINY
Ji mang’eny moyie kuom Muma, kendo maparo ni ji duto man kod warruok dhi e polo, nyalo neno ni dak e pinyni e bwo Pinyruodh Nyasaye, en puonj ma wendo. Muma nyiso ni kwan jogo ma dhi e polo oseketi, to jogo ma biro dak e pinyni nyaka chieng’ gin oganda mang’ongo ma onge gi kwan. (Zaburi 37:11, 29; Fweny 7:9; 14:1-5) Buk mar Daniel e Muma, nyiso kaka Pinyruodh Nyasaye e bwo Kristo biro locho e wi pinyni.
E ndikono, inyiso Pinyruodh Kristo kaka kidi ma omuk ka oa kuom loch maduong’ mar Jehova machalo gi got. Kidino ne ogoyo ma oketho kido moro, tiende ni ogendini mani kod teko e pinyni, kendo “kidi ma nogoyo kidoni nodoko got maduong’ motieko piny duto.” Wach ma ne okorno medo wacho kama: “Kendo e ndalo ma ruodhigo nobedie, Nyasaye manie polo nochung piny ruoth moro ma ok norum nyaka chieng’, onge oganda moro ma nobedi gi loch kuom piny ruodhno; to enong’iny pinje ruodhigi duto, mi notiekgi, kendo nobedie nyaka chieng’.”—Daniel 2:34, 35, 44.
Wach ma Ndiko wacho kuom Pinyruodhni, kaachiel kod geno mar ngima ma nyaka chieng’ e piny maler, kendo ma jaber, ema Joneno mag Jehova gombo mondo onyisi. Ji gana gi gana mangima kata manie liete noyud thuolo mar dak e Pinyruodhno nyaka chieng’. Bang’e, e bwo Loch Kristo mar Higini Gana Achiel, dwaro mar Jehova mokwongo mar chweyo piny gi keto ji ariyo mokwongo e iye, biro timore. Paradisoni mar piny ok bi jogo kata olo ji. Mana kaka Adam ne omi tich e puodho mar Eden, e kaka dhano biro bedo gi tije ma opogore mag rito piny kod yien gi le man e iye. Kendo jogo “nomor gi tich luetegi ndalo mang’eny.”—Isaiah 65:22; Chakruok 2:15.
Inyalo tiyo kod ndiko mang’eny e nyiso kaka piny biro bedo ka wayudo dwoko mar lemo ma Yesu ne opuonjo: “Pinyruodhi mondo obi, gi midwaro mondo otimre e piny kaka e polo.” (Mathayo 6:10) To kata kamano, we mondo wa ti kod achielni sani: “Nawinjo dwol maduong’ moa e kom duong’, kowacho niya, ‘Koro kar dak mar Nyasaye ji ni go; Nyasaye nodag kodgi, kendo ginibed joge, mi Nyasaye owuon nobed kodgi. Kendo Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.’ Eka Jal mobet e kom duong’ nowacho niya, ‘Neuru! Achueyo gik moko duto obed manyien.’ Kendo nokona ni, ‘Ndik wachno, nikech wechegi gin migeno, kendo gin adier.’”—Fweny 21:3-5.
[Blab manie ite mar 15]
“Kinde mag chandruok,”
TO “eka giko nobi”
[Picha manie ite mar 18]
Netherlands
[Picha manie ite mar 18]
Nigeria