Yore ma Gitiyogo e Lando Wach Maber
JOKRISTO omi chik ni “dhiuru utim ogendini duto jopuonjrena,” to kata kamano mani ok onyiso ni gibiro chuno ji mondo olokore gi thuon. Tich ma ne omi Yesu ne en lando “weche mabeyo mokou ni jo mamuol,” mondo okwe “jogo maneno masira e chunygi,” mondo oho “jogo duto mayuagore.” (Mathayo 28:19; Isaiah 61:1, 2; Luka 4:18, 19) Joneno mag Jehova temo timo kamano ka gilando wach maber ma owuok e Muma. Mana kaka janabi Ezekiel machon ne timo, Joneno mag Jehova sani temo dwaro jogo “maparore, mayuak ni kech weche duto nodwanyore motimoreye.”—Ezekiel 9:4.
Yo ma ong’ere ahinya ma gitiyogo kuom manyo jogo ma ywagore nikech gik matimore e pinyni, en lendo ot ka ot. Omiyo gitemo chopo ir ji duto mana kaka Yesu ne otimo ka “nowuotho e mier madongo kod matindo, koyalo kendo kolando Wach Maber mar pinyruodh Nyasaye.” Jopuonjrene mokwongo bende ne timo kamano. (Luka 8:1; 9:1-6; 10:1-9) Joneno mag Jehova temo limo ji duto kama gidakie, kendo gitimo kamano ding’eny e higa kuonde manyalore. Gitimo kamano nikech gidwaro mondo giwuo gi ji kuom thuolo matin e wi gigo ma chando ji e piny. Ginyalo somo ndiko achiel kata ariyo, to ka ng’ato ohero wechego, Janenono nyalo chano duogo e thuolo maber mondo gimed wuoyo. Gi chiwo Muma kod buge malero weche Muma, kendo ka ng’ato ohero, inyalo puonjruok kode Muma ma onge chudo. Ji mang’eny ahinya e piny mangima yudo konyruok ka itiyo gi chenroni mar puonjruok Muma, ma itimo kodgi juma ka juma.
Yo machielo ma ilandogo “wach maberni mar pinyruoth” en chokruoge ma itimo e Ute Romo maggi mantie machiegni. Joneno chokore kuondego juma ka juma. Achiel kuom chokruogego, en twak ma igolo ne ji duto kawuoyo kuom gik mapile manie pach ji. Bang’ twagno ipuonjruok weche moko ma oa e Muma kata weche ma jonabi ne ondiko, ka itiyo gi gaset mar Watchtower. Chokruok machielo en skul mar tiego Joneno mondo obedi jolendo molony, bang’e iluwe kod chokruok ma lero kaka onego tim tij lando wach e gwenge machiegni. Bende, Joneno romo e grube matindo dichiel e juma e ute jowetegi mondo gipuonjre Muma.
Chokruogegi oyaw ne ji duto. Onge sadaka ma ikawo kuom ji. Chokruogegi konyo ji duto. Muma wacho kama: “Kendo ng’ato ka ng’ato opar owadgi mondo wami hera gi timbe mabeyo omedre. Kik waweuru chokruokwa kaachiel, kaka jo moko timo, to wajiwreuru ng’ato gi ng’ato, moloyo to ka koro uneno ni Chieng’no sudo machiegni.” En gima ber mondo ng’ato osom Muma kendo onon wechegi ka en kende, kata kamano romo kod owete mamoko en gima jiwo ng’ato: “Nyinyo opiago nyinyo, kamano ng’ato omiyo wang’ osiepne bedo maler.”—Jo Hibrania 10:24, 25; Ngeche 27:17.
Joneno bende tiyo gi thuolo ma giyudo seche ma giromo gi ji e yoregi ma pile, mondo ginyisgi wach maberni. Ginyalo timo mano seche ma giwuoyo machuok gi jogo ma gidakgo machiegni, kata jowuoth ma gin go e bas kata ndege. Bende ginyalo goyo mbaka malach kod ng’ama osiep, ng’ama wat kata jatich wadgi e seche mag yueyo. Yesu bende ne tiyo kod yore kaka mago e lendo ka ne en e piny. Ne olendo e dho nam, e tiend got, ka ne ogago e dala ng’ato, kane en e arus kendo kane en e yie lupo e Nam Galili. Ne opuonjo e sunagoke koda hekalu ma ne yudore Jerusalem. Kamoro amora ma ne entie, ne oyudo thuolo mar wuoyo gi ji kuom Pinyruodh Nyasaye. Joneno mag Jehova temo ahinya mondo giluw ndache.—1 Petro 2:21.
BEDO GI TIMBE MABEYO
Yoregi duto mag nyisi wach maberni, ok nyal konyi ka ng’ano ma puonji ok ti kodgi e ngimane. Wacho gimoro to kendo itimo gi machielo en wuondruok, kendo ji mang’eny ok dwar weche Muma nikech wuondruok mag jo din. Ji wuoyo marach kuom Muma kayiem nono. Jondiko gi jo Farisai ne ni kod Ndiko mag Dho-Hibrania, to kata kamano Yesu ne okwedogi kaka jo ma wuondore. Ne owacho kaka jogo ne somo Chike Musa, kendo bang’e ne omedo wacho ni jopuonjrene niya: “Gigo duto ma giwacho, mondo urit, rituru kendo timuru. To kik utim kaka gitimo; nikech giwacho, to ok gitim.” (Mathayo 23:3) Timbe Jakristo ka beyo, oloyo puonj ma onyalo chiwo gi dhoge. Mano e gima ne onyis mon ma Jokristo ma chwogi ne ok oyie: “Mondo ka jo moko kuomgi ok oyie winjo Wach, to oresgi gi tim mag mondgi, ma ok wachnigi wach, ka girango ngimau maler kuluoro Nyasaye.”—1 Petro 3:1, 2.
Kuom mano, Joneno mag Jehova nyiso ji wach maberni, ka gidak e ngima ma Jakristo onego obedgo. Gitemo timo ne ji ‘gigo ma gidwaro mondo ji otimnegi.’ (Mathayo 7:12) Gitemo timo kamano ne ji duto, ok mana ni Joneno wetegi kende, osiepegi, jirandegi, kata mana wedegi kende. Nikech gin dhano, mani ok timre e yo makare kinde duto. Kata kamano, dwaro manie chunygi en ni mondo gitim maber ne ji duto ok mana ka ginyisogi wach maberni mar Pinyruoth kende, to konyogi bende kuonde manyalore.—Jakobo 2:14-17.
[Picha manie ite mar 19]
Hawaii
[Picha manie ite mar 19]
Venezuela
[Picha manie ite mar 19]
Yugoslavia
[Piche manie ite mar 20]
Ute Romo, oger e yo maber, gin kuonde puonjruok Muma
[Piche manie ite mar 21]
E dak mar joot koda dakgi gi jomoko, Joneno temo gi chuny maler timo gik ma gipuonjo